Bahebrayo
8 Lino ikaambo kapati nkotwaamba nkaaka: Tulijisi mupaizi mupati uuli boobu,+ alimwi ulikkede kujanza lyalulyo lyacuuno cabwami ica Mupati kujulu,+ 2 kali mubelesi* wamubusena busalala+ amutente lini-lini eelyo ndyaakayaka Jehova,* ikutali muntu pe. 3 Nkaambo mupaizi mupati uuli woonse ulasalwa kutegwa katuula zipego alimwi azipaizyo; aboobo cakali kuyandika akuli yooyu awalo kuti abe acintu cimwi cakutuula.+ 4 Ikuti naali anyika, naatali mupaizi pe,+ mbwaanga nkobali kale baalumi ibatuula zipego kweelana a Mulawo. 5 Baalumi aaba babeleka mulimo uusetekene mucikozyanyo buyo alimwi acimvwule+ cazintu zyakujulu;+ mbubonya Musa eelyo naakali kuyanda kutalika kuyaka tente, Leza wakamulailila kuti: Nkaambo waamba kuti: “Ukabone kuti zintu zyoonse wazipanga kweelana acitondezyo ncowakatondezyegwa mucilundu.”+ 6 Pele lino Jesu wakatambula mulimo* mubotu kapati, nkaambo alimwi ngosimwiimaakati+ wacizuminano iciinda kubota,+ eeco cakatalisyigwa mumulawo kwiinda muzisyomezyo ziinda kubota.+
7 Ikuti cizuminano cakusaanguna eeco nocatakajisi kampenda, nokwatakayandika cabili pe.+ 8 Nkaambo wajana kampenda mubantu naamba kuti: “‘Amubone! Mazuba alaboola,’ mbwaamba Jehova,* ‘eelyo ndiyoopangana cizuminano cipya abamuŋanda ya Israyeli alimwi abamuŋanda ya Juda. 9 Tacikabi mbuli cizuminano ncindakapangana abamausyi mubuzuba oobo nindakabajata kujanza akubagwisya mucisi ca Egepita,+ nkaambo tiibakazumanana kuba mucizuminano cangu, aboobo ndakaleka kubalanganya,’ mbwaamba Jehova.*
10 “‘Nkaambo eeci ncecizuminano ncendiyoopangana abamuŋanda ya Israyeli aakwiinda mazuba aayo,’ mbwaamba Jehova.* ‘Ndiyoobikka milawo yangu mumizeezo yabo, alimwi ndiyakwiilemba mumyoyo yabo.+ Eelyo ndiyooba Leza wabo, abalo bayooba bantu bangu.+
11 “‘Alimwi kunyina limbi umwi aumwi wabo nayooyiisya sicisinyina amwanookwabo kuti: “Kozyiba Jehova!”* Nkaambo boonse bayoondizyiba, kuzwa kumusyoonto akati kabo kusikila kumupati. 12 Nkaambo ndiyoobafwida luse kujatikizya micito yabo iitaluleme, alimwi kunyina pe nondiyooziyeeya limbi zibi zyabo.’”+
13 Eelyo mukwaamba kuti “cizuminano cipya,” wapa kuti eeco cakusaanguna cibule mulimo.+ Lino eeco icacitwa kuti cibule mulimo alimwi iciyaabucembaala cilaafwaafwi kuloba.+