Kulonga
15 Aciindi eeco Musa abana Israyeli bakaimbila Jehova lwiimbo oolu lwakuti:+
“Andimwiimbile Jehova, nkaambo wasumpuka kapati.+
Ibbiza autantide alindilyo wabawaala mulwizi.+
2 Ja* ninguzu zyangu alimwi nguundiyumya, mbwaanga waba mufwutuli wangu.+
Ooyu ngo Leza wangu, alimwi ndilamutembaula;+ ngo Leza+ wataata, alimwi ndilamusumpula.+
3 Jehova ngusilumamba singuzu.+ Jehova ndezina lyakwe.+
4 Inkalaki zya Farao abasikalumamba bakwe wabawaalila mulwizi,+
Alimwi basikalumamba bakwe basalidwe banyikila mu Lwizi Lusalala.+
5 Banyikila mumaanzi malamfwu; babbila ansi eeni mbuli bbwe.+
6 Ijanza lyako lyalulyo, O Jehova, lili anguzu kapati;+
Ijanza lyako lyalulyo, O Jehova, lilakonzya kumunyonyoona sinkondo.
7 Mubupati bwako butagoli ulakonzya kubazunda aabo bakubukila;+
Ulatuma bukali bwako buyaka mbuli mulilo, balapya mbuli makuba.
8 Kwiinda mumuya wamumpemo zyako maanzi akalundana;
Akaima mbuli bwaanda;
Maanzi malamfwu akaima mukati kalwizi.
9 Sinkondo ooyo wakati: ‘Ndilabatobela! Ndilabeenzya!
Ndilaabanya buvwubi bwabo kusikila moyo wangu ukkutile!
Ndilabweza panga lyangu! Janza lyangu lilabazunda!’+
10 Wakafwulida muya wako, eelyo lwizi lwakabavwumba;+
Bakabbila mbuli lubulo mumaanzi manji.
11 Nguni akati kabaleza uuli mbuli nduwe, O Jehova?+
Nguni uuli mbuli nduwe, oosalalisya?+
Yebo ooyelede kuyoowegwa akwiimbilwa nyimbo zyakutembaula, Oocita zintu zigambya.+
12 Wakatandabika janza lyako lyalulyo, eelyo nyika yakabamena.+
13 Muluyando lwako lutamani wakasololela bantu mbookanununa;+
Ncobeni munguzu zyako uyoobasololela kubusena bwako busalala.
14 Bantu bayoomvwa;+ eelyo bayookopana;
Kumyongwa mbuli kwakutumbuka kuyoobasikila bantu baku Filisitiya.
15 Aciindi eeco basilutwe baku Edomu bayoonyongana,
Alimwi kukankama kuyoobajaya beendelezi basinguzu* baku Moabu.+
Bantu boonse baku Kanana bayootyompwa.+
16 Buyoofwu abukandu ziyoobasikila.+
Akaambo kanguzu zyajanza lyako bayakuumuna wi mbuli bbwe,
Kusikila bantu bako bakainde, O Jehova,
17 Uyoobaleta akubasimpika mucilundu calukono lwako,+
Busena oobo mbookalibambila kale yebo kuti ukkale, O Jehova,
Cikombelo ncookayaka amaanza aako, O Jehova.
18 Jehova uyoolela kali mwami lyoonse alyoonse mane kukabe kutamani.+
19 Mabbiza aa Farao ankalaki zyakwe zyankondo abasimabbiza nobakanjila mulwizi,+
Mpoonya Jehova wakaajola maanzi aamulwizi alimbabo,+
Pele bana Israyeli bakeenda anyika njumu akati kalwizi.”+
20 Mpoonya Miriamu imusinsimi mukaintu, mucizyi wa Aroni wakabweza nsakalala, eelyo bamakaintu boonse bakamutobela kabayaabulizya nsakalala akuzyana. 21 Miriamu wakaingula bamaalumi kwiinda mukwiimba kuti:
“Atumwiimbile Jehova, nkaambo wasumpuka kapati.+
Ibbiza autantide alindilyo wabawaala mulwizi.”+
22 Mpoonya Musa wakasololela bana Israyeli kuzwa ku Lwizi Lusalala, eelyo bakaunka kunkanda ya Suri, bakeenda mazuba otatwe munkanda, pele tiibakajana maanzi. 23 Eelyo bakasika ku Mara,*+ pele tiibakakonzya kunywa maanzi aaku Mara nkaambo akali kulula. Nkakaambo kaako ncaakaulika busena oobo kuti Mara. 24 Mpoonya bantu bakatalika kutongookela Musa+ kuti: “Ino tulanywa nzi?” 25 Aboobo wakalilila Jehova,+ eelyo Jehova wakamutondezya kasamu. Naakakawaala mumaanzi, maanzi aayo akaleka kulula.
Ooko wakababikkila mulawo wakuti kabatobela nobabeteka, alimwi wakabasunka ooko.+ 26 Wakabaambila kuti: “Ikuti naa mwaswiilila jwi lya Jehova Leza wanu akucita ciluzi mumeso aakwe akuccilila malailile amilazyo yakwe yoonse,+ tandikamuleteli malwazi aayo ngondakaletela bana Egepita,+ nkaambo ndime Jehova uumusilika.”+
27 Kuzwa waawo bakaboola ku Elimu, ooko ikwakali tusensa twamaanzi tuli 12 atukunka tuli 70. Aboobo bakakkala ooko kumbali aamaanzi.