KULONGA

1 Lino aaya ngamazina aabana ba Israyeli ibakaboola mu Egepita antoomwe a Jakobo, umwi aumwi iwakaboola amukwasyi wakwe:+ 2 Rubeni, Simeoni, Levi, a Juda;+ 3 Isakara, Zebuloni, a Benjamini; 4 Dani alimwi a Nafutali, Gadi a Aseri.+ 5 Alimwi bantu boonse ibakazyalwa kuli Jakobo* bakali 70, pele Josefa wakali kale mu Egepita.+ 6 Mukuya kwaciindi Josefa wakafwa,+ abalo banabokwabo basankwa boonse kubikkilizya abazyalani eeliya bakafwa. 7 Pele bana Israyeli bakazyalana akutalika kuvwula kapati, alimwi bakali kuyaabwiindila kuvwula akuba basinguzu kapati cakuti cisi cakazula mbabo mukaindi buyo kasyoonto.+

8 Mukuya kwaciindi mu Egepita kwakaba mwami mupya iwatakamuzyi Josefa. 9 Aboobo wakaambila bantu bakwe kuti: “Amubone! Bana Israyeli mbanji alimwi mbaasinguzu kapati kwiinda ndiswe.+ 10 Atubacenjelele. Buyo-buyo banooyaabuvwula, aboobo ikuti kwabuka nkondo, bayoosangana abasinkondoma akutulwana mpoonya bayootija kuzwa mucisi.”

11 Aboobo bakababikkila basilutwe kuti kabababelesya cabuzike kutegwa kababapenzya amilimo iiminya,+ eelyo bakayaka minzi iitegwa Pitomu a Ramese+ kuti ibe ziyobwedo* zya Farao. 12 Pele nobakali kuyaabwiindila kubapenzya, ndendilyo abalo nobakali kuyaabwiindila kuvwula akumwaika mucisi, aboobo bakayoowa kapati akaambo kabana Israyeli.+ 13 Akaambo kaceeci, bana Egepita bakabelesya bana Israyeli cabuzike.+ 14 Bakabayumizyila buumi bwabo kwiinda mukubabelesya milimo yacibbalo yakukanda bulongo, kuuma zitina akubeleka milimo iili yoonse yabuzike yamumyuunda. Inzya bakababelesya mubukkale bukatazya mumilimo iili yoonse yabuzike.+

15 Mpoonya mwami wa Egepita wakabandika abasikutumbusya ibana Hebrayo, Sifura a Puwa, 16 akubaambila kuti: “Nomutumbusya+ bamakaintu ba Hebrayo, ikuti mwabona batumbuka mwana musankwa, mweelede kumujaya; pele ikuti naa musimbi, tamweelede kumujaya pe.” 17 Pele basikutumbusya aabo bakali kumuyoowa Leza mwini-mwini, aboobo tiibakacita kweelana ambwaakabaambila mwami wa Egepita. Muciindi caboobo, bana basankwa bakali kubaleka kuti bapone.+ 18 Nokwakainda ciindi mwami wa Egepita wakaita basikutumbusya akubabuzya kuti: “Ino mubalekela nzi bana basankwa kuti kabapona?” 19 Basikutumbusya bakati kuli Farao: “Bamakaintu ba Hebrayo tabali mbuli bamakaintu bana Egepita. Balo mbayumu, sikutumbusya katanasika inga nkujana batumbuka kale.”

20 Aboobo Leza wakabacitila kabotu basikutumbusya aaba, alimwi bana Israyeli bakazumanana kuvwula akuba basinguzu kapati. 21 Alimwi akaambo kakuti basikutumbusya bakali kumuyoowa Leza mwini-mwini, kumbele wakabapa mikwasyi yabo beni. 22 Kumane Farao wakalailila bantu boonse kuti: “Mwana musankwa uuli woonse muna Hebrayo iwazyalwa mweelede kumusowela mu Mulonga wa Nile, pele kuti naa musimbi, mweelede kumuleka kuti azumanane kupona.”+

2 Aciindi eeco mwaalumi umwi wamuŋanda ya Levi wakakwata mwana wa Levi.+ 2 Aboobo mukaintu ooyo wakamita akuzyala mwana musankwa.Naakabona mbwaakali mubotu, wakamusisa kwamyezi yotatwe.+ 3 Naakabona kuti tacicikonzyi kumusisa+ wakabweza mutaanga* wantumbu akuuzilulula ataala,* mpoonya wakamubikka mwana oomo akuyakuubikka mumatete munkomwe ya Mulonga wa Nile. 4 Pele mucizyi+ wamwana ooyo wakaima alamfwu kutegwa abone cikonzya kucitika kulinguwe.

5 Lino mwana musimbi wa Farao naakaboola ku Mulonga wa Nile kuzoosamba, bamakaintu basikumukutaukila bakali kweenda mumbali aa Mulonga wa Nile. Mpoonya wakabona mutaanga akati kamatete. Cakufwambaana wakatuma mubelesi kuti akaubweze.+ 6 Naakaujalula wakabona mwana, alimwi mwana ooyo wakali kulila. Mpoonya wakeetezyegwa, pele wakati: “Ooyu mwana waba Hebrayo.” 7 Mpoonya mucizyi wamwana ooyu wakaambila mwana musimbi wa Farao kuti: “Sena nduunke ndikakwiitile mukaintu umwi wabana Hebrayo uunyonsya kutegwa kakulelela mwana ooyu?” 8 Aboobo mwana musimbi wa Farao wakati kulinguwe: “Koya!” Mpoonya aawo musimbi ooyo wakaunka kuyakwiita banyina mwana.+ 9 Kumane mwana musimbi wa Farao wakati kulimbabo: “Komubweza mwana ooyu kutegwa komunyonsya akundilelela, eelyo mebo ndinookuvwozya.” Aboobo mukaintu ooyo wakamubweza mwana akumulela. 10 Lino mwana naakakomena, wakamutola kumwana musimbi wa Farao, eelyo wakaba mwanaakwe.+ Wakamuulika kuti Musa* akwaamba kuti: “Nkaambo ndakamununa buya mumaanzi.”+

11 Lino Musa naakakomena,* buzuba bumwi wakaunka kubanabokwabo kutegwa abone mbobakali kupenzyegwa amilimo iiminya,+ eelyo wakabona muna Egepita kauma mu Hebrayo imwanookwabo. 12 Kumane wakalanga ooku akooku, eelyo naakabona kuti kunyina uulibonya, wakamujaya muna Egepita ooyo akumusisa mumusenga.+

13 Alimwi wakaunka buzuba bwakatobela, eelyo wakabona ba Hebrayo bobilo kabalwana. Aboobo wakabuzya yooyo iwakalubizya kuti: “Ino umuumina nzi munyoko?”+ 14 Mpoonya walo wakati: “Nguni wakakubikka kuba silutwe amubetesi wesu? Sena uyanda kundijaya mbuli mbookajaya muna Egepita?”+ Amvwe boobo Musa wakayoowa alimwi wakalyaambauzya mumoyo kati: “Masimpe makani aaya baazyiba bantu!”

15 Mpoonya Farao wakaamvwa makani aaya, eelyo wakali kuyanda kujaya Musa; pele Musa wakatija kuzwa kuli Farao akuyookkala munyika ya Midiyani,+ wakakkala kumbali aamugoti. 16 Lino mupaizi waku Midiyani+ wakajisi bana basimbi bali ciloba, alimwi mbuli cilengwa bakaboola kuzooteka maanzi akuzuzya zinywido zyabutanga bwabausyi. 17 Pele mbuli lyoonse, ibeembezi bakaboola akubatanda. Mpoonya abone boobo Musa wakanyamuka akubagwasya* bamakaintu aaba alimwi wakanywisya butanga bwabo. 18 Lino nobakasika kuŋanda kuli Reueli*+ usyi, wakagambwa akubabuzya kuti: “Ino sunu mwafwambaana buti kusika aŋanda?” 19 Bakaingula kuti: “Muna Egepita umwi+ watuvwuna kubeembezi alimwi ngowatutekela amaanzi kutegwa butanga bunywe.” 20 Kumane wakaambila bana bakwe basimbi kuti: “Ino walo uli kuli? Ino mwamusiila nzi? Amukamwiite kutegwa tuzoolye antoomwe.” 21 Mpoonya Musa wakazumina kukkala amwaalumi ooyu, kumane wakapa Zipora+ mwanaakwe kuti abe mukaintu wa Musa. 22 Kumbele wakazyala mwana musankwa akumuulika kuti Gerisomu,*+ nkaambo wakati: “Ndaba mweenzu mucisi cabantu.”+

23 Nokwakainda ciindi cilamfwu,* mwami wa Egepita wakafwa,+ pele bana Israyeli bakazumanana kutongela akaambo kabuzike alimwi bakali kutongooka akulila, alimwi kulila kwabo kwakuti bagwasyigwe akaambo kabuzike bwabo kwakazumanana kuunka kuli Leza mwini-mwini.+ 24 Mukuya kwaciindi Leza wakakumvwa kutongela+ kwabo alimwi Leza wakayeeya cizuminano ncaakapangana a Abrahamu, Izaka a Jakobo.+ 25 Aboobo Leza wakalanga bana Israyeli; akubona mbobakali kupenga.

3 Musa wakaba mweembezi wambelele zya Jetero+ usyizyala, imupaizi waku Midiyani. Naakali kubinga mbelele munkanda kuzitola nkoili kumbo, wakazoosika kucilundu ca Leza mwini-mwini, ku Horebu.+ 2 Mpoonya mungelo wa Jehova wakalibonya kulinguwe mubbibi lyamulilo akati kacitewo camamvwa.+ Naakacili kulanga, wakabona kuti citewo camamvwa cakali kuyaka, pele tiicakali kupya pe. 3 Aboobo Musa wakati: “Ndilaunka afwaafwi kutegwa ndibone cintu eeci cigambya kapati, ndibone cipa kuti citewo camamvwa eeci kacitapyi.” 4 Jehova naakabona kuti waunka kuti abone cicitika, Leza wakamwiita kuzwa mucitewo camamvwa kati: “Musa! Musa!” mpoonya walo wakaingula kuti: “Ndime aano mwami.” 5 Mpoonya Leza wakati: “Utasweni afwaafwi. Kosamununa mpato kumaulu aako, nkaambo busena aawo mpoimvwi bulasalala.”

6 Wakayungizya kuti: “Ndime Leza wabamauso, Leza wa Abrahamu,+ Leza wa Izaka+ a Leza wa Jakobo.”+ Mpoonya Musa wakalivwumba kumeso nkaambo wakali kuyoowa kulanga Leza mwini-mwini. 7 Jehova wakayungizya kwaamba kuti: “Masimpe ndaabona mapenzi aabantu bangu ibali mu Egepita, alimwi ndakumvwa kulila kwabo akaambo kabaabo babasinikizya kubeleka; nkaambo ndilaazyi kabotu mapenzi aabo.+ 8 Ndilaseluka kuyoobavwuna kumaanza aabana Egepita+ akubagwisya mucisi ciya akubatola kunyika mbotu alimwi mpati, inyika iikunka buci amukupa,+ kucilawo cabana Kanana, bana Heti, bana Amori, bana Perizi, bana Hivi abana Jebusi.+ 9 Lino bona! Kulilauka kwabana Israyeli kwasika kulindime alimwi ndabona mbobabapenzya+ bana Egepita. 10 Lino koboola ndikutume kuli Farao, ukagwisye bantu bangu bana Israyeli mucisi ca Egepita.”+

11 Nokuba boobo, Musa wakati kuli Leza mwini-mwini: “Ino ndime ni kuti nduunke kuli Farao akuti ndikagwisye bana Israyeli mu Egepita?” 12 Mpoonya walo wakati: “Nkaambo ndiyooba anduwe,+ alimwi nceeci citondezyo cakuti ndime ndakutuma: Waakubagwisya bantu mu Egepita, nywebo muyookomba Leza mwini-mwini acilundu+ eeci.”

13 Pele Musa wakati kuli Leza mwini-mwini: “Ikuti naa ndaunka kubana Israyeli akuyoobaambila kuti, ‘Leza wabamauso wandituma kulindinywe,’ eelyo baakundibuzya kuti, ‘Ino zina lyakwe nguni?’+ Ino ndikabaambile kuti nzi?” 14 Aboobo Leza wakaambila Musa kuti: “Ndiyooba Kufwumbwa Mbondasala* Kuba.”+ Alimwi wakayungizya akwaamba kuti: “Mboobu mboyelede kubaambila bana Israyeli, ‘Ndiyooba+ wandituma kulindinywe.’” 15 Kumane Leza wakaambila Musa alimwi kuti:

“Mboobu mboyelede kuyakwaambila bana Israyeli, ‘Jehova Leza wabamauso, Leza wa Abrahamu,+ Leza wa Izaka+ a Leza wa Jakobo+ wandituma kulindinywe.’ Eeli ndezina lyangu lyoonse alyoonse,+ alimwi oobu mbombubo mbondiyooyeeyegwa kuzyalani azyalani. 16 Lino koya ukabunganye baalu babana Israyeli, alimwi weelede kubaambila kuti, ‘Jehova Leza wabamauso wakalibonya kulindime, Leza wa Abrahamu, Izaka a Jakobo, aboobo wakati: “Masimpe ndilimubwene+ alimwi ndazibona azintu zyoonse nzyobali mukumucita mu Egepita. 17 Aboobo ndaamba kuti, ndiyoomugwisya mumapenzi+ ngobamupenzya bana Egepita akumutola kunyika yabana Kanana, bana Heti, bana Amori,+ bana Perizi, bana Hivi abana Jebusi,+ kunyika iikunka buci amukupa.”’+

18 “Cakutadooneka bayooswiilila jwi lyako,+ alimwi mweelede kuunka, yebo abaalu babana Israyeli, kumwami wa Egepita, alimwi mweelede kuyoomwaambila kuti: ‘Jehova Leza waba Hebrayo+ wakaambaula andiswe. Aboobo lino tuyanda kuunka mulweendo lwamazuba otatwe kuya munkanda kutegwa tukatuulile Jehova Leza wesu cipaizyo.’+ 19 Pele mebo ndilizyi kabotu kuti mwami wa Egepita takamuzumizyi kuunka, ccita kuti akasinikizyigwe buya ajanza lyanguzu.+ 20 Aboobo ndiyootandabika janza lyangu akuuma Egepita kubelesya milimo yangu yoonse iigambya njondiyoocita mulinguwo: eelyo uyoomuleka kuti muunke.+ 21 Mpoonya ndiyoopa kuti bantu bangu bafwidwe luzyalo kubana Egepita, eelyo masimpe mwaakuunka, tamukaunki cinkwamaanza pe.+ 22 Mukaintu umwi aumwi weelede kulomba zintu zyansiliva azyangolida alimwi azyakusama kuli simukobonyina akumukaintu mweenzu uukkala muŋanda yakwe, aboobo mweelede kuzisamika bana banu basankwa abasimbi; mweelede kubweza mbono zyabana Egepita.”+

4 Nokuba boobo, Musa wakaingula kuti: “Pele ino kuti batakandisyomi akukaka kuswiilila jwi lyangu?+ Nkaambo bayakwaamba kuti, ‘Jehova tanaakalibonya kulinduwe.’” 2 Mpoonya Jehova wakamubuzya kuti: “Ino ncinzi ncojisi mujanza lyako?” Eelyo walo wakaingula kuti: “Musako.” 3 Wakati: “Kouwaala ansi.” Aboobo wakauwaala ansi, eelyo wakaba nzoka;+ mpoonya Musa wakaitija. 4 Lino Jehova wakaambila Musa kuti: “Tandabika janza lyako akwiijata kumucila.” Aboobo wakatandabika janza lyakwe akwiijata, eelyo yakaba musako mujanza lyakwe. 5 Mpoonya Leza wakati: “Weelede kucita oobu kutegwa bakasyome kuti Jehova Leza wabamausyi, Leza wa Abrahamu, Leza wa Izaka a Leza wa Jakobo,+ wakalibonya kulinduwe.”+

6 Jehova wakamwaambila alimwi kuti: “Njizya janza lyako mucisani mpocili akaango.” Aboobo wakanjizya janza lyakwe mucisani. Naakaligwisya, janza lyakwe lyakaba acinsenda cituba buu mbuli caanda.+ 7 Kumane wakati: “Kolijosya janza lyako mucisani cako mpocili akaango.” Aboobo wakalijosya janza lyakwe mucisani. Naakaligwisya, janza lyakwe lyakajokela mbolyakabede! 8 Mpoonya wakazumanana akwaamba kuti: “Ikuti batakakusyomi naa kubikkila maano kucitondezyo cakusaanguna, masimpe bayoosyoma waakucita citondezyo cabili.+ 9 Nokuba boobo, ikuti batakazisyomi noziba zitondezyo eezyi zyobilo akukaka kuswiilila jwi lyako, ukateke maanzi mu Mulonga wa Nile akwaatila ansi, eelyo maanzi ngoyooteka kuzwa mu Mulonga wa Nile masimpe ayooba bulowa.”+

10 Lino Musa wakati kuli Jehova: “Akaka Jehova, nsinabede muntu waambaula kabotu, kuzwa lili anoliba lino noambaula amubelesi wako, nkaambo ndilaakamaama.”+ 11 Kumane Jehova wakati kulinguwe: “Ino nguni wakalenga mulomo wamuntu, naa uupa muntu kuba syaataambi, musinkematwi, uubona naa moofwu? Sena tandili ndime nde Jehova? 12 Aboobo lino koya, alimwi mebo ndinooli anduwe noambaula, alimwi ndiyookuyiisya nzyoyelede kwaamba.”+ 13 Pele wakati: “Akaka Jehova, kotuma uumbi kufwumbwa ngoyanda kuti acite mulimo ooyu.” 14 Mpoonya Jehova wakamunyemena kapati Musa akumwaambila kuti: “Mwanookwanu Aroni+ imuna Levi nkwali. Ndilizyi kuti walo ulakonzya kwaambaula kabotu. Alimwi uli munzila kuboola kuzookucinga. Akubona ulakkomana mumoyo wakwe.+ 15 Aboobo weelede kwaambaula anguwe akumwaambila majwi aangu,+ ndinooli aandinywe nomwaambaula+ alimwi ndiyoomuyiisya nzyomweelede kucita. 16 Uyookwaambilila kubantu, uyooba mwiiminizi wako mukwaambaula abantu, eelyo yebo uyooba mbuli Leza kulinguwe.*+ 17 Musako ooyu uutolelezye akuyakuubelesya kucita zitondezyo.”+

18 Aboobo Musa wakapiluka kuli Jetero usyizyala+ akumwaambila kuti: “Ndiyanda kuunka kubanabokwesu ibali ku Egepita kutegwa ndikabone naa bacipona.” Aboobo Jetero wakati kuli Musa: “Mbubo weende kabotu.” 19 Kumane Jehova wakaambila Musa ku Midiyani kuti: “Koya, jokela ku Egepita, nkaambo baalumi boonse ibakali kuyanda kukujaya bakafwa.”+

20 Mpoonya Musa wakabweza mukaintu wakwe abana bakwe basankwa akubatansika ambongolo, kumane wakajokela kucisi ca Egepita. Kunze lyaboobo, Musa wakabweza amusako wa Leza mwini-mwini mujanza lyakwe. 21 Mpoonya Jehova wakati kuli Musa: “Waakujokela ku Egepita, ukabone masimpe kuti waacita maleele oonse ngondakupa kuti ukacite+ kumbele lya Farao. Pele mebo, ndiyoopa kuti moyo wakwe uyume,+ alimwi takazumizyi kuti bantu baunke.+ 22 Ukamwaambile Farao kuti, ‘Mboobu mbwaamba Jehova: “Israyeli mwanaangu, imutaanzi kuzyalwa.+ 23 Ndikwaambila kuti, Muleke mwanaangu aunke kutegwa akandibelekele. Pele ikuti umukasye kuunka, ndilakujaila mwanaako mutaanzi.”’”+

24 Lino nobakacili munzila abusena bwakulyookezyela, Jehova+ wakamuyaanya akutalika kuyandaula nzila yakuti amujaye.+ 25 Kumane Zipora+ wakabweza bbwe libosya akutenda lulomo lwamwanaakwe musankwa akulugumika kumaulu aakwe akwaamba kuti: “Nkaambo kakuti uli sibwiinga wabulowa kulindime.” 26 Aboobo Leza wakamuleka kuti aunke. Aciindi eeco Zipora wakati, “Sibwiinga wabulowa,” akaambo kakupalulwa.

27 Kumane Jehova wakaambila Aroni kuti: “Koya umucinge Musa+ munkanda.” Aboobo wakaunka akuyooswaangana anguwe mucilundu ca Leza mwini-mwini,+ wamwaanzya akumumyonta. 28 Mpoonya Musa wakaambila Aroni majwi oonse aa Jehova iwakamutuma,+ azitondezyo zyoonse Leza nzyaakamulailila kuti acite.+ 29 Kuzwa waawo Musa a Aroni bakaunka akubunganya baalu boonse babana Israyeli.+ 30 Mpoonya Aroni wakabaambila majwi oonse Jehova ngaakaambila Musa, alimwi wakacita zitondezyo+ bantu kabalangilila. 31 Eelyo bantu bakasyoma.+ Nobakamvwa kuti Jehova wabayeeya bana Israyeli+ akuti waabona mapenzi aabo,+ mpoonya bakakotama akuvwuntama ansi.

5 Kuzwa waawo Musa a Aroni bakaunka kuli Farao akumwaambila kuti: “Mboobu mbwaamba Jehova Leza wa Israyeli, ‘Leka bantu bangu baunke kutegwa bakandicitile pobwe munkanda.’” 2 Pele Farao wakati: “Ino Jehova nguni,+ kuti ndiswiilile jwi lyakwe akuleka bana Israyeli kuti baunke?+ Tandimuzyi Jehova naaceya, alimwi buya tandikoobazumizya bana Israyeli kuti baunke.”+ 3 Pele bakati: “Leza waba Hebrayo wakabandika andiswe. Akaka, tuyanda kuunka lweendo lwamazuba otatwe munkanda akuyootuula cipaizyo kuli Jehova Leza wesu;+ buyo-buyo ulatujaya acilwazi naa apanga.” 4 Kumane mwami wa Egepita wakabaingula kuti: “Ino nkaambo nzi nywebo, Musa a Aroni, ncomulesya bantu kubeleka? Amupiluke kumilimo yanu!”+ 5 Alimwi Farao wakati: “Amubone, bantu aaba mbanji, alimwi mubapa kuti baleke kubeleka milimo yabo.”

6 Buzuba mbubonya oobo, Farao wakalailila bakapitawu alimwi abasilutwe babo kuti: 7 “Tamuceelede kupa bantu bwizu* bwakuumya zitina.+ Amubaleke kabaliyandawida beni. 8 Pele mweelede kubaambila kuuma mweelwe wazitina mbubonya mbobakali kuuma kaindi. Tamweelede kuucesya pe, nkaambo batalika kuba batolo. Nkakaambo kaako ncobalilauka akwaamba kuti, ‘Tuyanda kuunka, tuyanda kuyootuula cipaizyo kuli Leza wesu!’ 9 Amubabelesye canguzu akubajatya bubi kutegwa batabikkili maano kumajwi aakubeja.”

10 Aboobo bakapitawu+ abasilutwe babana Israyeli bakaunka akuyakwaambila bantu kuti: “Mboobu mbwaamba Farao, ‘Kuzwa sunu ndacileka kumupa bwizu. 11 Kamuya mukaliyandawide bwizu kufwumbwa nkomuyoobujana, pele milimo yanu tiikoocesyegwa pe.’” 12 Mpoonya bantu bakamwaikizyanya mucisi coonse ca Egepita kuyoobwezelela makuba muciindi cabwizu. 13 Alimwi bakapitawu bakazumanana kubabinzya kabati: “Umwi aumwi weelede kumanizya mulimo wakwe wabuzuba abuzuba mbubonya mbuli kaindi nomwakali kupegwa bwizu.” 14 Abalo basilutwe babana Israyeli, aabo bakapitawu ba Farao mbobakabikkide kuti kabasololela, bakaumwa.+ Bakababuzya kuti: “Ino nkaambo nzi jilo asunu ncomwatakkwanya mweelwe wazitina mbuli mbomwali kucita lyoonse?”

15 Aboobo basilutwe babana Israyeli bakaunka kuyootongookela Farao kuti: “Ino nkaambo nzi ncootucitila boobu tobabelesi bako? 16 Taakwe bwizu mbobatupa tobabelesi bako pele batwaambila kuti, ‘Amuume zitina!’ Tobabelesi bako tulaumwa, kakuli bantu bako mbabalubizyide.” 17 Pele walo wakati: “Muli batolo! Muli batolo!+ Nkakaambo kaako ncomwaambila kuti, ‘Tuyanda kuunka, tuyanda kuyootuula cipaizyo kuli Jehova.’+ 18 Lino kamuya mukabeleke! Taakwe bwizu mbomutiipegwe pe, pele mweelede kukkwanya mweelwe wazitina uuyandika.”

19 Mpoonya basilutwe babana Israyeli bakabona kuti zintu zyababijila nobakamvwa majwi aakuti: “Tamweelede naaceya kucesya mweelwe wazitina nzyomweelede kuuma abuzuba.” 20 Kumane bakajana Musa a Aroni, kabaimvwi aawo kulindila kuti baswaangane ambabo nibakazwa kuli Farao. 21 Mpoonya aawo bakati kulimbabo: “Jehova abone ncomwacita akumubeteka, nkaambo mwapa kuti Farao ababelesi bakwe batusulaike* alimwi mwabikka panga mujanza lyabo kuti batujaye.”+ 22 Mpoonya Musa wakapiluka kuli Jehova akuti: “Jehova, ino nkaambo nzi ncoobaletela mapenzi bantu aaba? Ino wakanditumina nzi? 23 Kuzwa ciindi nindakaunka kuli Farao akumwaambila muzina lyako,+ waindila kubapenzya bantu bako+ aaba alimwi masimpe kunyina noobavwuna bantu bako pe.”+

6 Aboobo Jehova wakaambila Musa kuti: “Lino ulabona nconditiimucite Farao.+ Janza lyangu lyanguzu lilamupa kuti abaleke kuti baunke alimwi janza lyangu lyanguzu lilamupa kuti abatande buya kuti bazwe mucisi cakwe.”+

2 Mpoonya Leza wakati kuli Musa: “Ndime Jehova. 3 Ndakali kulibonya kuli Abrahamu, Izaka a Jakobo kandili Leza Singuzuzyoonse,+ pele zina lyangu lyakuti Jehova+ tiindakalizyibya kulimbabo.+ 4 Alimwi ndakapangana cizuminano ambabo kuti ndikabape nyika ya Kanana, ooko nkobakali kukkala kabali beenzu.+ 5 Lino mebo ndaamvwa matongoosi aabana Israyeli, bana Egepita mbobacita buzike alimwi ndaciyeeya cizuminano cangu.+

6 “Aboobo kobaambila bana Israyeli kuti: ‘Ndime Jehova, alimwi ndiyoomulemununa kumilimo iiminya yabana Egepita akumugwisya mubuzike bwabo,+ alimwi ndiyoomuvwuna ajanza lyangu lyanguzu alubeta lupati.+ 7 Ndiyoomubweza kuti mube bantu bangu, ndiyooba Leza wanu,+ alimwi masimpe muyoozyiba kuti ndime Jehova Leza wanu uumulemununa kumilimo iiminya yamu Egepita. 8 Alimwi ndiyoomutola kunyika njindakakonkezya acikonke* kupa Abrahamu, Izaka a Jakobo; ndiyoomupa njiyo kuba cikono canu.+ Ndime Jehova.’”+

9 Kumane Musa wakabaambila makani aaya bana Israyeli, pele tiibakamuswiilila Musa akaambo kakutyompwa amilimo miyumu yabuzike.+

10 Mpoonya Jehova wakaambila Musa kuti: 11 “Koya ukamwaambile Farao, mwami wa Egepita, kuti abaleke bana Israyeli kuti bazwe mucisi cakwe.” 12 Pele Musa wakati kuli Jehova: “Bona! Bana Israyeli tiibandiswiilila;+ ino mbuti Farao mbwakonzya kundiswiilila, mbwaanga cilandikatazya kwaambaula?”*+ 13 Pele Jehova alimwi wakapa Musa a Aroni malailile aakuti baambile bana Israyeli a Farao, mwami wa Egepita, kuti Musa a Aroni bagwisye bana Israyeli mucisi ca Egepita.

14 Mbaaba basilutwe bamuŋanda yabamausyi: Bana ba Rubeni, imwana mutaanzi+ wa Israyeli, bakali ba Hanoki, Palu, Hezironi a Karimi.+ Eeyi njemikwasyi ya Rubeni.

15 Bana ba Simeoni bakali ba Jemueli, Jamini, Ohadi, Jakini, Zohari a Saulu mwana wamukaintu muna Kanana.+ Eeyi njemikwasyi ya Simeoni.

16 Aaya ngamazina aabana ba Levi+ kweelana amikwasyi yabo: Gerisoni, Kohati a Merari.+ Levi wakapona myaka iili 137.

17 Bana ba Gerisoni bakali ba Libini a Simeyi kweelana amikwasyi yabo.+

18 Bana ba Kohati bakali ba Amuramu, Izara, Hebroni a Uzieli.+ Kohati wakapona myaka iili 133.

19 Bana ba Merari bakali ba Mali a Musi.

Eeyi njemikwasyi ya Levi kweelana amikwasyi yabo.+

20 Lino Amuramu wakakwata Jokebedi mucizyi wausyi.+ Wakamuzyalila Aroni a Musa.+ Amuramu wakapona myaka iili 137.

21 Bana ba Izara, bakali ba Kora,+ Nefegi a Zikiri.

22 Bana ba Uzieli bakali ba Misayeli, Elizafana+ a Sitiri.

23 Lino Aroni wakakwata Eliseba mwana wa Aminadabu, mucizyi wa Nasoni.+ Wakamuzyalila Nadabu, Abihu, Eleazara a Itamara.+

24 Bana ba Kora bakali ba Asiri, Elikana a Abiasafu.+ Eeyi njemikwasyi yabana Kora.+

25 Eleazara,+ mwana wa Aroni, wakakwata umwi wabana ba Putieli. Wakamuzyalila Finehasi.+

Aaba mbabasilutwe baziinga zyabamausyi baba Levi kweelana amikwasyi yabo.+

26 Ooyu ngo Aroni a Musa aabo Jehova mbaakaambila kuti: “Amugwisye bana Israyeli mucisi ca Egepita kweelana amakamu-makamu+ aabo.” 27 Mbambabo ibakaambaula a Farao, mwami wa Egepita, kuti bagwisye bana Israyeli mu Egepita. Ooyu ngo Musa a Aroni.+

28 Mubuzuba oobo Jehova mbwaakaambaula a Musa mucisi ca Egepita, 29 Jehova wakaambila Musa kuti: “Ndime Jehova. Umwaambile Farao mwami wa Egepita zyoonse nzyondikwaambila.” 30 Mpoonya Musa wakaambila Jehova kuti: “Bona! Cilandikatazya kwaambaula,* ino mbuti Farao mbwakonzya kundiswiilila?”+

7 Mpoonya Jehova wakaambila Musa kuti: “Bona, ndakubikka kuti ube mbuli Leza kuli Farao, alimwi Aroni munyoko uyookubeda musinsimi wako.+ 2 Yebo uyoomwaambila zyoonse nzyonditiikulailile, Aroni munyoko uyakwaambila Farao, eelyo Farao uyoobazumizya bana Israyeli kuti bazwe mucisi cakwe. 3 Pele mebo ndiyoopa kuti moyo wa Farao uyume,+ alimwi ndiyoovwuzya zitondezyo amaleele aangu mucisi ca Egepita.+ 4 Pele Farao takamuswiilili pe, aboobo ndiyootondezya nguzu zyajanza lyangu mu Egepita alimwi ndiyoogwisya makamu aangu, bantu bangu, ibana Israyeli mucisi ca Egepita alubeta lupati.+ 5 Eelyo bana Egepita bayoozyiba kuti ndime Jehova+ ndaakutondezya nguzu zyajanza lyangu mu Egepita, alimwi ndiyoogwisya bana Israyeli akati kabo.” 6 Musa a Aroni bakacita mbubonya Jehova mbwaakabalailila; bakacita mbubonya oobo. 7 Musa wakali amyaka iili 80 eelyo Aroni wakali amyaka iili 83 ciindi nobakali kwaambaula a Farao.+

8 Lino Jehova wakaambila Musa a Aroni kuti: 9 “Ikuti naa Farao amwaambile kuti, ‘Amucite maleele,’ weelede kwaambila Aroni kuti, ‘Bweza musako wako akuuwaala ansi kumbele lya Farao.’ Mpoonya musako ooyo ulaba nzoka mpati.”+ 10 Aboobo Musa a Aroni bakaunka kuli Farao akucita mbubonya mbwaakabalailila Jehova. Mbubonya oobo Aroni wakawaala musako wakwe kumbele lya Farao ababelesi bakwe, eelyo wakaba nzoka mpati. 11 Nokuba boobo, awalo Farao wakaita basongo abasimabibo, alimwi bapaizi basimasalamuzi bamu Egepita+ abalo bakacita mbubonya oobo amasalamuzi aabo.+ 12 Umwi aumwi wakawaala musako wakwe, eelyo misako eeyo yakaba nzoka zipati; pele musako wa Aroni wakaimena misako yabo. 13 Nokuba boobo, moyo wa Farao wakayuma,+ aboobo tanaakabaswiilila mbubonya Jehova mbwaakaambide.

14 Mpoonya Jehova wakaambila Musa kuti: “Moyo wa Farao muyumu. Wakaka kuleka bantu kuti baunke.+ 15 Mafwumofwumo uunke kuli Farao. Bona! Walo ulaunka ku Mulonga wa Nile! Aboobo weelede kwiima mumbali aamulonga kutegwa muswaangane anguwe; alimwi ubwezelezye amusako mujanza lyako iwakasandukide kuba nzoka.+ 16 Alimwi weelede kumwaambila kuti, ‘Jehova Leza waba Hebrayo wandituma kulinduwe,+ waamba kuti: “Kobaleka bantu bangu baunke kutegwa bakandibelekele munkanda,” pele alino tonaswiilila pe. 17 Mboobu mbwaamba Jehova: “Lino oobu mbotiizyibe kuti ndime Jehova.+ Ndilauma maanzi aamu Mulonga wa Nile amusako uuli mujanza lyangu, eelyo masimpe alaba bulowa. 18 Inswi zili mu Mulonga wa Nile zilafwa alimwi masimpe Mulonga wa Nile ulanunka nsu, eelyo bana Egepita tabakookonzya kwaanywa maanzi aamu Mulonga wa Nile.”’”

19 Kumane Jehova wakaambila Musa kuti: “Komwaambila Aroni kuti, ‘Bweza musako wako akutandabika janza lyako atala aamaanzi aamu Egepita,+ mumilonga yabo, mutufwolo twabo twa Nile amumazyiba,+ amaanzi oonse aayobwedwe, kutegwa abe bulowa.’ Kuyooba bulowa mucisi coonse ca Egepita, nomuba muzibikkilo zyamaanzi zyazisamu azyamabwe.” 20 Mpoonya aawo Musa a Aroni bakacita mbubonya mbwaakabalailila Jehova. Aroni wakanyamuna musako akuuma maanzi aakali mu Mulonga wa Nile kalangilila Farao ababelesi bakwe, eelyo maanzi oonse aamumulonga akasanduka kuba bulowa.+ 21 Mpoonya inswi izyakali mumulonga zyakafwa,+ alimwi mulonga wakatalika kununka, cakuti bana Egepita tiibakali kukonzya kunywa maanzi aamu Mulonga wa Nile,+ alimwi kwakaba bulowa mucisi coonse ca Egepita.

22 Nokuba boobo, bapaizi basimasalamuzi bamu Egepita bakacita mbubonya oobo amasalamuzi aabo,+ cakuti Farao wakazumanana kuyumya moyo wakwe, aboobo tanaakabaswiilila mbubonya Jehova mbwaakaambide.+ 23 Mpoonya Farao wakapiluka kuŋanda yakwe, alimwi kunyina naakaabikkila maano makani aaya. 24 Eelyo bana Egepita boonse bakali kusya mumbali aa Mulonga wa Nile kutegwa bajane maanzi aakunywa, nkaambo tiibakali kukonzya kunywa maanzi aali oonse aamu Mulonga wa Nile. 25 Aboobo kwakainda mazuba aali ciloba kuzwa ciindi Jehova naakasandula maanzi aamu Mulonga wa Nile kuba bulowa.

8 Mpoonya Jehova wakaambila Musa kuti: “Koya kuli Farao, alimwi weelede kumwaambila kuti, ‘Mboobu mbwaamba Jehova: “Leka bantu bangu baunke kutegwa bakandibelekele.+ 2 Ikuti uzumanane kubakasya kuunka, ndilacisubula cisi cako coonse kwiinda mukuleta bacula.+ 3 Mulonga wa Nile uyoozula bacula, alimwi bayooboola akunjila muŋanda yako, kubulo bwako alimwi bayootanta abulo bwako, bayoonjila mumaanda aababelesi bako akukkala amibili yabantu bako amuzitofwu amoomo mukandilwa fulaulu.+ 4 Bacula bayoosika kulinduwe, kubantu bako akubabelesi bako boonse.”’”

5 Mpoonya Jehova wakaambila Musa kuti: “Ambila Aroni kuti, ‘Tandabika janza lyako amusako wako atala aamilonga, mutufwolo twa Nile amumazyiba akupa kuti bacula baboole mucisi ca Egepita.’” 6 Aboobo Aroni wakatandabika janza lyakwe atala aamaanzi aamu Egepita, eelyo bacula bakatalika kuboola alimwi bakazula mucisi ca Egepita. 7 Nokuba boobo, bapaizi basimasalamuzi abalo bakacita mbubonya oobo kwiinda mumasalamuzi aabo alimwi akupa kuti bacula batalike kuboola mucisi ca Egepita.+ 8 Mpoonya Farao wakaita Musa a Aroni akubaambila kuti: “Amumukombelezye Jehova kutegwa agwisye bacula kulindime akubantu bangu,+ mbwaanga ndiyanda kubaleka bantu kuti baunke kutegwa bakatuule cipaizyo kuli Jehova.” 9 Eelyo Musa wakaambila Farao kuti: “Mbubo, kondaambila naa ndilili nondeelede kukukombelezyela kutegwa bacula bazwe kulinduwe, kubabelesi bako, kubantu bako alimwi amumaanda aako. Balasyaala buyo mu Mulonga wa Nile.” 10 Mpoonya wakavwiila kuti: “Juunza.” Aboobo walo wakati: “Ciyoocitika mbuli mbowaamba kutegwa ukazyibe kuti kunyina uumbi uuli mbuli Jehova Leza wesu.+ 11 Bacula bayoozwa kulinduwe, mumaanda aako, kubabelesi bako akubantu bako. Bayoosyaala buyo mu Mulonga wa Nile.”+

12 Aboobo Musa a Aroni bakazwa kuli Farao, alimwi Musa wakakombelezya Jehova kujatikizya bacula mbaakaletede kuli Farao.+ 13 Mpoonya Jehova wakacita kweelana akulomba kwa Musa, alimwi bacula bakatalika kufwa mumaanda, mumabbuwa amusyokwe. 14 Bana Egepita bakabalundika bacula mumilwi iitabaliki, eelyo cisi cakatalika kununka nsu. 15 Lino Farao naakabona kuti penzi eeli lyamana, wakayumya moyo wakwe+ alimwi wakakaka kubaswiilila mbubonya Jehova mbwaakaambide.

16 Lino Jehova wakaambila Musa kuti: “Ambila Aroni kuti, ‘Tandabika musako wako akuuma anyika, eelyo lusuko lulasanduka kuba tususuli* mucisi coonse ca Egepita.’” 17 Mpoonya bakacita mbubonya oobo. Aboobo Aroni wakatandabika janza lyakwe amusako akuuma anyika, eelyo tususuli twakaboola kubantu abanyama. Lusuko loonse lwakaba tususuli mucisi coonse ca Egepita.+ 18 Bapaizi basimasalamuzi bakasoleka kucita mbubonya oobo kutegwa balete tususuli kwiinda mumasalamuzi aabo,+ pele bakaalilwa. Lino tususuli twakaboola kubantu akubanyama. 19 Aboobo bapaizi basimasalamuzi bakati kuli Farao: “Ooyu munwe wa Leza!”+ Pele moyo wa Farao wakazumanana kuyuma, aboobo tanaakabaswiilila pe, mbubonya Jehova mbwaakaambide.

20 Mpoonya Jehova wakaambila Musa kuti: “Ubuke mafwumofwumo ukaime kumbele lya Farao. Bona! Ulaunka kumulonga! Aboobo weelede kumwaambila kuti, ‘Mboobu mbwaamba Jehova: “Kobaleka bantu bangu baunke kutegwa bakandibelekele. 21 Pele ikuti utabazumizyi bantu bangu kuti baunke, ndilakutumina mazimbwa, yebo, babelesi bako abantu bako mumaanda aanu; eelyo maanda aamu Egepita alazula buyo mazimbwa kubikkilizya anyika mpobabede.* 22 Buzuba oobo masimpe ndiyakwaandaanya nyika ya Goseni oomo bantu bangu mobakkala. Kunyina mazimbwa ayoolibonya mulinjiyo,+ alimwi kwiinda muliceeci muyoozyiba kuti mebo, nde Jehova, nkondili munyika iino.+ 23 Alimwi ndiyakwaandaanya bantu bangu abantu bako. Juunza citondezyo eeci ciyoocitika.”’”

24 Eelyo Jehova wakacita oobo, alimwi kwakaba mazimbwa manji kapati muŋanda ya Farao amumaanda aababelesi bakwe amucisi coonse ca Egepita.+ Cisi cakanyonyoonwa akaambo kamazimbwa.+ 25 Mpoonya Farao wakaita Musa a Aroni akubaambila kuti: “Kamuya mukatuule cipaizyo kuli Leza wanu mumonya mucisi cino.” 26 Pele Musa wakati: “Tacili cibotu kucita oobo pe, nkaambo tuyootuulila Jehova Leza wesu cintu cisesemya kubana Egepita.+ Ikuti twatuula cipaizyo cisesemya kubana Egepita kumbele lyabo, sena tabakatupwayi mabwe? 27 Tulaunka lweendo lwamazuba otatwe munkanda alimwi tuyootuula cipaizyo kuli Jehova Leza wesu nkukonya ooko mbubonya mbwaakatwaambila.”+

28 Lino Farao wakati: “Ndilamuleka kuti muunke kuyootuula cipaizyo kuli Jehova Leza wanu munkanda. Pele mutaunki kule kapati. Amundikombelezyele kuli Leza wanu.”+ 29 Mpoonya Musa wakati: “Lino ndaunka, alimwi ndiyookukombelezyela kuli Jehova, eelyo cifwumo mazimbwa ayoozwa kuli Farao, kubabelesi bakwe akubantu bakwe. Pele Farao atatucengi* alimwi kwiinda mukukasya bantu kuti baunke kuyootuula cipaizyo kuli Jehova.”+ 30 Kumane Musa wakazwa kuli Farao akuyoomukombelezyela kuli Jehova.+ 31 Aboobo Jehova wakacita kweelana ambwaakaambide Musa, alimwi mazimbwa akazwa kuli Farao, kubabelesi bakwe akubantu bakwe. Kunyina muzimbwa naba omwe wakasyaala. 32 Nokuba boobo, Farao alimwi wakayumya moyo wakwe alimwi tanaakabaleka bantu kuti baunke pe.

9 Aboobo Jehova wakaambila Musa kuti: “Koya kuli Farao ukamwaambile kuti, ‘Mboobu mbwaamba Jehova Leza waba Hebrayo: “Leka bantu bangu baunke kutegwa bakandibelekele.+ 2 Pele kuti ukake kubazumizya kuti baunke akuzumanana kubasinkilila, 3 bona! janza lya Jehova+ liyooboola kuzivwubwa zyako zili musyokwe. Mabbiza, mbongolo, nkamela, ŋombe ambelele ziyoosikilwa cilwazi cipati kapati.+ 4 Alimwi masimpe Jehova uyakwaandaanya banyama babana Israyeli abanyama babana Egepita, alimwi kunyina munyama naba omwe wabana Israyeli utiikafwe.”’”+ 5 Kuyungizya waawo, Jehova wakabikka ciindi akwaamba kuti: “Juunza Jehova uyoocicita eeci.”

6 Lino Jehova wakacicita cintu eeci buzuba bwakatobela, alimwi zivwubwa zyamisyobo yoonse zyabana Egepita zyakatalika kufwa,+ pele kunyina munyama naba omwe wabana Israyeli iwakafwa. 7 Lino Farao naakabuzya, wakajana kuti kunyina munyama naba omwe wabana Israyeli iwakafwa. Nokuba boobo, Farao wakazumanana kuyumya moyo wakwe alimwi tanaakabazumizya bantu kuti baunke.+

8 Eelyo Jehova wakaambila Musa a Aroni kuti: “Amuzuzye maanza aanu amumbwe wamuwondo,* mpoonya Musa awuululule mujulu kumbele lya Farao. 9 Eelyo ulaba lusuko mucisi coonse ca Egepita, alimwi akuba zyuute zibbwalauka amibili yabantu ayabanyama mucisi coonse ca Egepita.”

10 Aboobo bakabweza mumbwe muwondo akwiima kumbele lya Farao alimwi Musa wakawuululula mujulu, mpoonya wakaba zyuute zibbwalauka amibili yabantu ayabanyama. 11 Bapaizi basimasalamuzi tiibakali kukonzya kwiima kumbele lya Musa akaambo kazyuute, nkaambo zyuute zyakakkala amibili yabapaizi basimasalamuzi alimwi ayabana Egepita boonse.+ 12 Pele Jehova wakazumizya moyo wa Farao kuti uyume, alimwi tanaakabaswiilila ba Musa a Aroni mbubonya Jehova mbwaakaambide kuli Musa.+

13 Mpoonya Jehova wakaambila Musa kuti: “Ubuke mafwumofwumo akuyakwiima kumbele lya Farao, ukamwaambile kuti, ‘Mboobu mbwaamba Jehova Leza waba Hebrayo: “Leka bantu bangu baunke kutegwa bakandibelekele. 14 Nkaambo aciindi eecino ndilatuma zipenzyo zyangu zyoonse kulinduwe, kubabelesi bako akubantu bako, kutegwa uzyibe kuti kunyina uumbi uuli mbuli ndime munyika yoonse.+ 15 Nkaambo kusikila lino nindalitandabikide kale janza lyangu akukuumya cilwazi, yebo abantu bako alimwi nimwalilobede kale anyika. 16 Pele kaambo ncondakulekela kuti kocipona nkakuti: ndikutondezye nguzu zyangu akuti izina lyangu lyaambilizyigwe munyika yoonse.+ 17 Sena ucili ankazi zyakukaka kubazumizya bantu bangu kuti baunke? 18 Lino juunza aciindi nciconya eecino ndizoowisya civwulamabwe cipati kapati, icitanawide mucisi ca Egepita kuzwa nocakaba kusikila lino. 19 Lino kotumya mulomo wakuti bantu balete zivwubwa zyako azintu zyako zyoonse zili musyokwe kuti zinjile muzyaanda. Kufwumbwa muntu naa munyama uutiikajanike musyokwe, uutakaletwi muŋanda, uyoofwa caakumuwida civwulamabwe.”’”

20 Muntu uuli woonse iwakayoowa jwi lya Jehova akati kababelesi ba Farao wakafwambaana kuyobolola babelesi bakwe azivwubwa zyakwe akuzinjizya mumaanda, 21 pele muntu uuli woonse iwatakayoowa jwi lya Jehova wakalekela babelesi bakwe azivwubwa zyakwe musyokwe.

22 Lino Jehova wakaambila Musa kuti: “Tambika janza lyako kujulu, kutegwa civwulamabwe ciwe anyika yoonse ya Egepita,+ ciwide bantu, banyama alimwi azimena ansi zyoonse zyamusyokwe mucisi ca Egepita.”+ 23 Aboobo Musa wakatondeka musako wakwe kujulu, eelyo Jehova wakaleta mizumo acivwulamabwe, amulilo* wakaloka anyika alimwi Jehova wakazumanana kuwisya civwulamabwe acisi ca Egepita. 24 Kwakali civwulamabwe alimwi kwakali mulilo uuvwelene acivwulamabwe. Cakali cipati kapati; taakwe nicakabwenwe cili boobu mucisi coonse ca Egepita kuzwa nocakaba cisi.+ 25 Civwulamabwe cakanyonyoona zintu zyoonse izyakali musyokwe mucisi coonse ca Egepita, kutalikila kumuntu kusikila kubanyama, alimwi cakanyonyoona azimena ansi zyoonse zyamusyokwe.+ 26 Pele buyo munyika ya Goseni imwakali bana Israyeli, momumo mocatakawa civwulamabwe.+

27 Aboobo Farao wakatumya mulomo wakwiita Musa a Aroni akubaambila kuti: “Lino ndabisya. Jehova uliluleme, alimwi mebo abantu bangu tulilubizizye. 28 Amumukombelezye Jehova kutegwa alesye mizumo yakwe acivwulamabwe. Mpoonya ndilamuleka kuti muunke, tamukoozumanana kukkala kuno pe.” 29 Aboobo Musa wakati kulinguwe: “Ndazwa buyo mumunzi, ndilatambika maanza aangu kuli Jehova. Mizumo ilamana alimwi acalo civwulamabwe cilaleka kuwa, kutegwa uzyibe kuti nyika njiya Jehova.+ 30 Pele ndilizyi kale kuti noliba lino, yebo ababelesi bako tamukooyoowa Jehova Leza.”

31 Lino butonje abbaale zyakanyonyoonwa, nkaambo bbaale yakalisimide kale abwalo butonje bwakalitalikide kale kufwulula. 32 Pele wiiti amaila tiizyakanyonyoonwa pe, nkaambo zyakali kumuka kubizwa. 33 Lino Musa wakazwa kuli Farao akuzwa mumunzi akuyootambika maanza aakwe kuli Jehova. Aboobo mizumo acivwulamabwe zyakaleka, eelyo mvwula yakaleka kuwa anyika.+ 34 Mpoonya Farao naakabona kuti mvwula, civwulamabwe amizumo zyaleka, wakabisya alimwi akuyumya moyo wakwe,+ walo ababelesi bakwe. 35 Aboobo Farao wakazumanana kuyumya moyo wakwe, eelyo tanaakabaleka bana Israyeli kuti baunke, mbubonya mbwaakaambide Jehova kwiinda muli Musa.+

10 Mpoonya Jehova wakati kuli Musa: “Koya kuli Farao, nkaambo mebo ndapa kuti moyo wakwe amyoyo yababelesi bakwe iyume,+ kutegwa nditondezye zitondezyo zyangu eezyi kubusyu bwakwe,+ 2 akuti ukaambe kubana bako abazyukulu bako mbuli mbondasubula Egepita azitondezyo nzyondacita akati kabo;+ alimwi masimpe muyoozyiba kuti ndime Jehova.”

3 Aboobo Musa a Aroni bakaunka kuli Farao akumwaambila kuti: “Mboobu mbwaamba Jehova Leza waba Hebrayo, ‘Ino ulaleka lili kukaka kulibombya kulindime?+ Kobaleka bantu bangu baunke kutegwa bakandibelekele. 4 Nkaambo ikuti naa uzumanane kukaka kubazumizya bantu bangu kuti baunke, juunza ndilaleta cikwikwi mucisi cako. 5 Eelyo ciyoovwumba nyika yoonse, alimwi ansi taanoolibonyi pe. Ciyoolya zyoonse zyakasyaala, eezyo nzyomwakasiilwa acivwulamabwe, alimwi ciyoolya zisamu zyanu zyoonse zimena musyokwe.+ 6 Maanda aako aababelesi bako boonse alimwi amaanda aabana Egepita boonse ayoozula cikwikwi ncobatanabwene bamauso abamasyaanyokokulu kuzwa nobakabawo munyika eeyi kusikila sunu.’”+ Amane kwaamba boobo wakavwuuluka akuzwa kuli Farao.

7 Mpoonya babelesi ba Farao bakati kulinguwe: “Ino muntu ooyu ulaleka lili kutupenzya?* Baleke bantu aaba baunke kutegwa bakabelekele Jehova Leza wabo. Sena tonazyiba asunu kuti cisi ca Egepita canyonyooka?” 8 Aboobo Musa a Aroni bakaletwa alimwi kuli Farao, eelyo wakati kulimbabo: “Kamuya mukabelekele Jehova Leza wanu. Pele ino mbaani kubagama ibatiiunke?” 9 Mpoonya Musa wakati: “Tulaunka abana besu, bamacembele, bana besu basankwa abasimbi, mbelele aŋombe zyesu,+ nkaambo tuyanda kuyoocitila Jehova pobwe.”+ 10 Wakati kulimbabo: “Ikuti naa ndimuleke kuti muunke abana banu, nkokuti ncobeni Jehova uli andinywe!+ Calibonya kuti mukanzide kucita cimwi cintu cibyaabi. 11 Peepe! Akuunke buyo baalumi kuyoobelekela Jehova, nkaambo oobu mbomwakalomba.” Amane kubaambila majwi aaya, bakatandwa kuzwa kuli Farao.

12 Lino Jehova wakati kuli Musa: “Tandabika janza lyako anyika ya Egepita kuti cikwikwi ciboole anyika yoonse ya Egepita akulya zisyango zyoonse zyamucisi, eezyo zyakasyaala kucivwulamabwe.” 13 Mpoonya aawo Musa wakatandabika musako wakwe anyika ya Egepita, eelyo Jehova wakapa kuti muwo utalike kuunga mucisi kuzwa kujwe buzuba oobo boonse amasiku oonse. Imafwumofwumo, muwo wuunga kuzwa kujwe wakaleta cikwikwi. 14 Mpoonya cikwikwi cakatalika kuboola mucisi coonse ca Egepita akukkala mucilawo coonse camu Egepita.+ Cikwikwi eeci cakabapenzya kapati;+ takunabwenwe cikwikwi cili boobu, alimwi takukabi cimbi cili boobu. 15 Cakavwumba nyika yoonse, eelyo nyika yakasiya mbi akaambo kancico; mpoonya cakalya zisyango zyoonse zyamucisi amicelo yoonse yakuzisamu eezyo izyakasyaala kucivwulamabwe; alimwi kunyina tewo noliba lyomwe lyakasyaala muzisamu nouba mweemvwe mucisi coonse ca Egepita.

16 Aboobo cakufwambaana Farao wakaita Musa a Aroni akubaambila kuti: “Ndabisizya Jehova Leza wanu alimwi andinywe. 17 Lino ndilomba kuti, eno lyalo kaka, mundilekelele cibi cangu akuti mundikombelezezye kuli Jehova Leza wanu kutegwa agwisye alindime cipenzyo eeci cijaya.” 18 Aboobo wakazwa* kuli Farao akuyookombelezya Jehova.+ 19 Mpoonya Jehova wakapa kuti luwo lucince, eelyo kwakaba luwo lwakumbo ilubbubbulisya, alimwi lwakacitola cikwikwi akuyoocisowela mu Lwizi Lusalala. Kunyina cikwikwi nociba comwe cakasyaala mucisi coonse ca Egepita. 20 Nokuba boobo Jehova wakapa kuti moyo wa Farao uyume,+ alimwi tanaakabazumizya bana Israyeli kuti baunke.

21 Mpoonya Jehova wakaambila Musa kuti: “Tambika janza lyako kujulu, kutegwa kube mudima mucisi ca Egepita, mudima uusiya mbi cakuti ulakonzya kwaampwaampwa.” 22 Mpoonya aawo Musa wakatambika janza lyakwe kujulu, eelyo kwakaba mudima uusiya mbi mucisi coonse ca Egepita mazuba otatwe.+ 23 Tiibakali kukonzya kubonana pe, alimwi kunyina naba omwe wakali kukonzya kuzwa aawo mpaakabede kwamazuba otatwe; pele mumaanda aabana Israyeli boonse kwakali mumuni.+ 24 Mpoonya Farao wakaita Musa akumwaambila kuti: “Kamuya mukabelekele Jehova.+ Pele mbelele aŋombe zyanu zilikke zilasyaala. Abalo bana banu mulakonzya kuunka ambabo.” 25 Pele Musa wakati: “Yebo kukugama ulatupa zipaizyo azituuzyo zyuumpwa, alimwi tuyoozituula kuli Jehova Leza wesu.+ 26 Abalo banyama besu tweelede kubatolelezya. Kunyina munyama naba omwe uuyoosyaala,* nkaambo akati kabanyama aaba mpotuyoobweza bamwi kutegwa tukabelesye mukukomba Jehova Leza wesu, alimwi swebo tatuzyi ncotuyoopa mukukomba Jehova kusikila tukasike kubusena oobo.” 27 Aboobo Jehova wakapa kuti moyo wa Farao uyume, alimwi tanaakabazumizya kuti baunke.+ 28 Kumane Farao wakamwaambila kuti: “Kozwa aawa! Utakabooli kabili kundibona, nkaambo buzuba mboyoobona busyu bwangu uyoofwa.” 29 Amvwe boobo Musa wakati: “Mbubonya mbowaamba, tandikabooli kabili kubona busyu bwako.”

11 Mpoonya Jehova wakaambila Musa kuti: “Kwasyaala cipenzyo comwe ncenditiiletele Farao abana Egepita. Eelyo uyoomuleka kuti muunke kuzwa kokuno.+ Ciindi nayoomuleka kuti muunke, uyoomutanda buya.+ 2 Kobaambila lino bantu kuti baalumi abamakaintu boonse beelede kulomba zintu zyansiliva azyangolida kuli basimukobonyina.”+ 3 Lino Jehova wakapa kuti bantu bafwidwe luzyalo kubana Egepita. Awalo Musa wakali kulemekwa kapati mucisi ca Egepita, akati kababelesi ba Farao alimwi aakati kabantu.

4 Mpoonya Musa wakati: “Mboobu mbwaamba Jehova, ‘Akati kamasiku ndilainda mucisi ca Egepita,+ 5 alimwi kufwumbwa mwana mutaanzi mucisi ca Egepita ulafwa,+ kutalikila kumwana mutaanzi wa Farao uukkede acuuno cakwe cabwami kusikila kumwana mutaanzi wamuzike musimbi uubeleka kuziyo, alimwi amwana mutaanzi wamunyama uuli woonse.+ 6 Kulaba kulila kupati mucisi ca Egepita coonse, ikutanacitikide alimwi ikutakacitiki limbi.+ 7 Pele bana Israyeli kunyina naba mubwa uutiibakuwe, balo naa banyama babo, kutegwa muzyibe kuti Jehova ulakonzya kwaandaanya bana Egepita abana Israyeli.’+ 8 Alimwi masimpe aaba babelesi bako boonse bayooboola kulindime akundivwuntamina, akwaamba kuti, ‘Koya, yebo abantu boonse bakutobela.’+ Kwamana boobo ndiyakuunka.” Naakamana kwaamba majwi aaya wakazwa kuli Farao kanyemede kapati.

9 Mpoonya Jehova wakaambila Musa kuti: “Farao takamuswiilili pe,+ kutegwa ndiyungizye maleele aangu mucisi ca Egepita.”+ 10 Aboobo Musa a Aroni bakacita maleele aaya oonse kumbele lya Farao,+ pele Jehova wakapa kuti moyo wa Farao uyume, akaambo kaceeco tanaakabaleka bana Israyeli kuti bazwe mucisi cakwe.+

12 Lino Jehova wakaambila Musa a Aroni mucisi ca Egepita kuti: 2 “Mwezi ooyu uyoomubeda mwezi wakusaanguna. Uyooba mwezi wakusaanguna mumwaka kulindinywe.+ 3 Amwaambile mbungano yoonse ya Israyeli kuti, ‘Mubuzuba bwa 10 bwamwezi uuno, luzubo lumwi alumwi lweelede kubweza mbelele yomwe,+ mukwasyi umwi aumwi ubweze mbelele yomwe. 4 Pele ikuti naa mukwasyi kuuli musyoonto cakuti tuukonzyi kwiilya yoonse mbelele, nkokuti ooyo mukwasyi uswaangane amukwasyi ngobabambene limwi akuyaabana muŋanda yamukwasyi ooyo kweelana amweelwe wabantu. Nomubalila mweelede kubona naa muntu umwi aumwi inga walya cibeela cipati buti. 5 Mbelele yanu eeyo yeelede kuba mugutu wamwaka omwe alimwi tayeelede kuba akampenda.+ Mulakonzya kubweza akati kabana bambelele naa mpongo. 6 Mweelede kwiibamba kusikila buzuba bwa 14 bwamwezi uuno,+ mpoonya mbungano yoonse yabana Israyeli ileelede kwiijaya kumangolezya.+ 7 Beelede kubweza bulowa bumwi akubusansaila aminsende yobilo yamilyango alimwi aatala aamilyango yamaanda oomo mobayakwiilida.+

8 “‘Beelede kulya nyama sunu masiku.+ Beelede kwiiyoka buya akwiilya antoomwe azinkwa zitajisi bumena+ azisyu zilula.+ 9 Tamweelede kwiilya bubisi naa kwiijika mumaanzi, pele mweelede kwiiyoka buya, antoomwe amutwe, myeendo alimwi azyamukati. 10 Tamweelede kusiya nyama iili yoonse kusikila mafwumofwumo, pele kufwumbwa yasyaala kusikila mafwumofwumo mweelede kuyuumpa mumulilo.+ 11 Alimwi mboobu mbomweelede kwiilya, mweelede kuti kamulyaangide lutambo mucibuno, kamusamide mpato zyanu kumaulu alimwi kamujisi amusako wanu mujanza; alimwi mweelede kwiilya cakubindaana. Ndi Pobwe Lyakwiindilila lya Jehova. 12 Nkaambo sunu masiku ndilainda mucisi ca Egepita akujaya mwana mutaanzi uuli woonse mucisi ca Egepita, kutalikila kumuntu kusikila kumunyama;+ alimwi abaleza boonse bamu Egepita+ ndilababeteka. Ndime Jehova. 13 Bulowa bulaba citondezyo canu amaanda momubede; alimwi ndabona bulowa ndilamwiindilila, aboobo cipenzyo tacikoomusikila ndanyonyoona mucisi ca Egepita.+

14 “‘Buzuba oobu bweelede kuba ciibalusyo kulindinywe, alimwi mweelede kubusekelela kabuli pobwe lya Jehova mumazyalani aanu oonse. Mulawo ooyu wakusekelela buzuba oobu mweelede kuutobela lyoonse alyoonse. 15 Mweelede kulya zinkwa zitajisi bumena+ mazuba aali ciloba. Inzya, mubuzuba bwakusaanguna mweelede kugwisya bumena mumaanda aanu nkaambo kufwumbwa uulya cintu cijisi bumena, kuzwa mubuzuba bwakusaanguna kusikila mubuzuba bwaciloba, imuntu ooyo weelede kujaigwa kutegwa azwe akati kabana Israyeli. 16 Mubuzuba bwakusaanguna muyooba amuswaangano uusalala, alimwi buzuba bwaciloba mbuzuba bwamuswaangano uumbi uusalala. Kunyina mulimo weelede kubelekwa mumazuba aaya.+ Ccita buyo kubamba cakulya muntu umwi aumwi ncayelede kulya.

17 “‘Mweelede kuzumanana kucita Pobwe lya Zinkwa Zitajisi Bumena,+ nkaambo mubuzuba mbubonya oobu, ndiyoogwisya makamu aanu mucisi ca Egepita. Alimwi mweelede kububamba buzuba oobu mumazyalani aanu oonse kauli mulawo walyoonse alyoonse. 18 Mumwezi wakusaanguna, mubuzuba bwa 14 bwamwezi, kumangolezya mweelede kulya zinkwa zitajisi bumena kusikila kumangolezya+ mubuzuba bwa 21 bwamwezi ngoonya ooyo. 19 Kunyina fulaulu uukandidwe uujisi bumena iweelede kujanwa mumaanda aanu kwamazuba aali ciloba, nkaambo kufwumbwa uulya cintu cijisi bumena, kufwumbwa naa mweenzu naa muna Israyeli,+ muntu ooyo weelede kujaigwa kutegwa azwe mumbungano yabana Israyeli.+ 20 Tamweelede kulya cintu cili coonse cijisi bumena. Mweelede kulya zinkwa zitajisi bumena mumaanda aanu oonse.’”

21 Cakufwambaana Musa wakaita baalu babana Israyeli+ boonse akubaambila kuti: “Amuunke mukasale mpongo naa mbelele yamukwasyi wanu umwi aumwi akwiijaya kuti ibe cipaizyo ca Pobwe Lyakwiindilila. 22 Mpoonya mweelede kubweza cikama cahisopo akucinyika mubulowa ibuli mumutiba, mpoonya musansaile bulowa bumwi buli mumutiba atala aamulyango aaminsende yobilo yamulyango; eelyo kunyina naba omwe akati kanu iweelede kuzwa muŋanda yakwe kusikila mafwumofwumo. 23 Lino Jehova ainda kutegwa ajaye bana Egepita ulabona bulowa buli atala aamulyango aaminsende yobilo yamulyango, eelyo masimpe Jehova ulawiindilila mulyango ooyo, alimwi takoolekela kuti lunyonyooko lunjile mumaanda aanu akumujaya.+

24 “Mweelede kucita cilengwa eeci nywebo abana banu lyoonse alyoonse.+ 25 Alimwi mwaakusika munyika Jehova njayoomupa, mbubonya mbwaakaamba, mweelede kuyoozumanana kucita cilengwa eeci.+ 26 Lino bana banu baakumubuzya kuti, ‘Ino cilengwa eeci caamba nzi kulindinywe?’+ 27 mweelede kubaambila kuti, ‘Ncipaizyo ca Pobwe Lyakwiindilila lya Jehova, iwakaindilila maanda aabana Israyeli mu Egepita ciindi naakajaya bana Egepita, pele wakakwabilila maanda eesu.’”

Mpoonya bantu bakakotama akuvwuntama ansi. 28 Aboobo bana Israyeli bakaunka akucita mbubonya Jehova mbwaakalailila Musa a Aroni.+ Bakacita mbubonya oobo.

29 Eelyo akati kamasiku Jehova wakajaya bana bataanzi boonse mucisi ca Egepita,+ kutalikila kumwana mutaanzi wa Farao uukkede acuuno cabwami kusikila kumwana mutaanzi wamwaange iwakali muntolongo, alimwi amwana mutaanzi kuzyalwa wamunyama uuli woonse.+ 30 Mpoonya masiku Farao wakabuka ababelesi bakwe boonse alimwi abana Egepita boonse, eelyo kwakaba kulila kupati akati kabana Egepita, nkaambo taakwe ŋanda imwatakafwa muntu.+ 31 Mpoonya aawo wakaita Musa a Aroni+ masiku akubaambila kuti: “Amunyamuke, muzwe akati kabantu bangu, nywebo abana Israyeli boonse. Kamuya mukabelekele Jehova mbubonya mbomwaamba.+ 32 Alimwi amubweze mbelele aŋombe zyanu, mbuli mbomwakaamba,+ muunke. Pele ambebo mweelede kundilongezya.”

33 Aboobo bana Egepita bakatalika kubakombelezya bantu kutegwa bazwe cakufwambaana+ mucisi kabati, “nkaambo toonse tuli buyo mbuli bantu bafwide kale!”+ 34 Mpoonya bantu bakabweza fulaulu wabo uukandidwe kautanabikkwa bumena, azibelesyo zyabo zyakukandila fulaulu kazyaangilidwe muzisani zyabo akuzinyamuna agwezyo. 35 Bana Israyeli bakacita mbubonya mbwaakabaambila Musa, bakalomba bana Egepita zintu zyansiliva, zyangolida azisani.+ 36 Jehova wakapa kuti bafwidwe luzyalo kubana Egepita, eelyo bakabapa nzyobakalomba, aboobo bakabweza mbono zyabana Egepita.+

37 Kumane bana Israyeli bakanyamuka kuzwa ku Ramese+ kuya ku Sukoti,+ ibaalumi bakali kusika ku 600,000 ibeenda amaulu, kutabalilizya abana.+ 38 Alimwi nkamu mpati yabantu bamisyobo-misyobo*+ ayalo yakaunka ambabo, antoomwe ambelele alimwi aŋombe, itanga lipati lyabanyama. 39 Mpoonya fulaulu uukandidwe ngobakaletelezya kuzwa ku Egepita bakatalika kuupanga zinkwa zibulungene zitajisi bumena. Tiiwakabikkidwe bumena nkaambo bakatandwa buya kuzwa ku Egepita cakuti tiibakajisi ciindi cakulibambila zyakulya zyamulweendo.+

40 Lino myaka bana Israyeli njobakakkala, aabo ibakakkala mu Egepita+ yakali 430.+ 41 Noyakamana myaka iili 430, mubuzuba mbubonya oobu makamu oonse aa Jehova akazwa mucisi ca Egepita. 42 Oobu mbusiku mbobeelede kusekelela kuli Jehova akaambo kakuti wakabagwisya mucisi ca Egepita. Mbusiku bana Israyeli boonse mbobeelede kusekelela kuti balemeke Jehova mumazyalani aabo oonse.+

43 Mpoonya Jehova wakati kuli Musa a Aroni, “Ngooyu mulawo wa Pobwe Lyakwiindilila: Kunyina muzwakule weelede kulya cipaizyo capobwe eeli.+ 44 Pele kuti umwi kajisi muzike ngwaakaula amali, mweelede kumupalula.+ Acita boobo ndendilyo nakonzya kulya. 45 Imweenzu alimwi amubelesi tabeelede kulya. 46 Cipaizyo ceelede kulidwa muŋanda yomwe. Tamweelede kugwisya nyama imwi anze, alimwi tamweelede kupwaya cifwuwa cili coonse pe.+ 47 Mbungano yoonse yabana Israyeli yeelede kusekelela pobwe eeli. 48 Ikuti kakuli mweenzu uukkala akati kanu alimwi kayanda kusekelela Pobwe Lyakwiindilila lya Jehova, baalumi bakwe boonse beelede kusaanguna kupalulwa. Ndendilyo nakonzya kusekelela pobwe eeli, alimwi weelede kuba mbuli muna Israyeli. Pele kunyina mwaalumi uutapalwidwe weelede kulya pe.+ 49 Kweelede kuba mulawo omwe buyo kumuna Israyeli akumweenzu uukkala akati kanu.”+

50 Aboobo bana Israyeli boonse bakacita mbubonya Jehova mbwaakalailila Musa a Aroni. Bakacita mbubonya oobo. 51 Mubuzuba mbubonya oobu Jehova wakagwisya bana Israyeli antoomwe amakamu aabo kuzwa mucisi ca Egepita.

13 Lino Jehova wakaambila Musa kuti: 2 “Kondisalazizya* umwi aumwi mwana musankwa mutaanzi akati kabana Israyeli. Mwana musankwa mutaanzi kuzyalwa, wamuntu awamunyama, boonse mbibangu.”+

3 Mpoonya Musa wakaambila bantu kuti: “Kamubuyeeya buzuba oobu mbomwazwa mu Egepita,+ muŋanda yabuzike, nkaambo Jehova wamugwisya mucisi eeci ajanza lyakwe lyanguzu.+ Aboobo kunyina cintu cili coonse cijisi bumena iceelede kuligwa. 4 Mubuzuba oobuno mumwezi wa Abibi* mulazwa mucisi eecino.+ 5 Jehova aakumunjizya munyika yabana Kanana, bana Heti, bana Amori, bana Hivi abana Jebusi,+ eeyo njaakakonkezya kuli bamauso kuti uyoomupa,+ inyika iikunka buci amukupa,+ mweelede kunoocita cilengwa eeci mumwezi ooyu. 6 Mweelede kulya zinkwa zitajisi bumena mazuba aali ciloba+ eelyo mubuzuba bwaciloba kuyooba pobwe lya Jehova. 7 Zinkwa zitajisi bumena zyeelede kuligwa mazuba aali ciloba;+ takweelede kujanwa cintu cili coonse cijisi bumena akati kanu,+ alimwi takweelede kujanwa fulaulu uukandidwe uujisi bumena akati kanu mucilawo* canu coonse. 8 Alimwi mubuzuba oobo weelede kuyakwaambila mwanaako kuti, ‘Eeci cilacitwa akaambo kaceeco Jehova ncaakandicitila nindakazwa mu Egepita.’+ 9 Alimwi eeci ciyooba citondezyo ajanza lyako alimwi akuba ciibalusyo* ankumo yako,+ kutegwa mulawo wa Jehova kuuli mukanwa lyako; nkaambo Jehova wakakugwisya mu Egepita ajanza lyakwe lyanguzu. 10 Mweelede kubamba mulawo ooyu aciindi cibikkidwe mwaka amwaka.+

11 “Jehova aakumunjizya munyika yabana Kanana, eeyo njaakakonkezya kumupa nywebo abamauso,+ 12 mweelede kupa Jehova mwana musankwa mutaanzi uuli woonse, alimwi amupoho mutaanzi wamunyama wanu uuli woonse. Zilumi zyoonse nzizya Jehova.+ 13 Mwana mutaanzi woonse wambongolo mweelede kumununuzya mbelele, pele kuti tiimwamunununa, nkokuti mweelede kumujaya kwiinda mukumutyola nsingo. Alimwi mwana wamuntu uuli woonse mutaanzi akati kabana basankwa mweelede kumunununa.+

14 “Ikuti naa mwanaako akakubuzye kumbele kuti, ‘Ino eeci caamba nzi?’ Weelede kumwaambila kuti, ‘Jehova wakatugwisya mu Egepita ajanza lyakwe lyanguzu, kuzwa muŋanda yabuzike.+ 15 Farao naakayumya moyo akukaka kutuzumizya kuti tuunke,+ Jehova wakajaya bana bataanzi boonse mucisi ca Egepita, ikutalikila kumwana mutaanzi wamuntu kusikila kumwana mutaanzi wamunyama.+ Nkakaambo kaako ndituulila Jehova bana basankwa bataanzi boonse babanyama, alimwi abana basankwa bataanzi boonse babantu ndilabanununa.’ 16 Eeci ceelede kuba citondezyo kujanza lyako alimwi akuba ciibalusyo ankumo yako,+ nkaambo Jehova wakatugwisya mu Egepita ajanza lyakwe lyanguzu.”

17 Lino Farao naakabazumizya bantu kuti baunke, Leza tanaakabainzya nzila iinda munyika yaba Filisiti nokuba kuti njiyakali kukosola. Nkaambo Leza wakati: “Bantu balakonzya kucinca mizeezo yabo babona nkondo akupiluka ku Egepita.” 18 Aboobo Leza wakabainzya nzila iizinguluka iinda munkanda iili kufwaafwi a Lwizi Lusalala.+ Pele bana Israyeli bakeenda kabotu-kabotu kuzwa mucisi ca Egepita mbuli nkamu zyabasikalumamba. 19 Musa wakabweza amafwuwa aa Josefa, nkaambo Josefa wakabakonkezya cakusinizya bana Israyeli kuti: “Masimpe Leza uyoomulanganya, aboobo mweelede kuyakwaabweza mafwuwa aangu kuzwa mucisi cino.”+ 20 Eelyo bakanyamuka kuzwa ku Sukoti akuyookkala ku Etamu kumagolelo aankanda.

21 Lino Jehova wakali kubasololela ciindi camasyikati amusumpuululu wakkumbi kutegwa abatondezye nzila,+ alimwi masiku wakali kubasololela amusumpuululu wamulilo kuti kabamunikila, kutegwa bacikonzye kweenda syikati amasiku.+ 22 Musumpuululu wakkumbi tiiwakali kuzwa kumbele lyabantu syikati alimwi musumpuululu wamulilo tiiwakali kuzwa kumbele lyabantu masiku.+

14 Lino Jehova wakaambila Musa kuti: 2 “Koambila bana Israyeli kuti bapiluke akuyookkala afwaafwi aku Pihahiroti akati ka Migidoli alwizi, busena ibuli kumbele lya Baala-zefoni.+ Mweelede kuyookkala kumbali aalwizi, kamulangene ambubo. 3 Mpoonya Farao uyakwaamba boobu kujatikizya bana Israyeli, ‘Baile kwiingaila mucisi kabanyongene. Nkanda yabasinkila.’ 4 Aboobo ndiyoopa moyo wa Farao kuti uyume+ alimwi uyoobatandila, eelyo ndiyoolijanina bulemu kwiinda mukuzunda Farao abasikalumamba bakwe boonse;+ alimwi ncobeni bana Egepita bayoozyiba kuti ndime Jehova.”+ Eelyo bana Israyeli bakacita oobo.

5 Mpoonya mwami wa Egepita wakaambilwa kuti bantu baloboka. Mpoonya aawo moyo wa Farao awababelesi bakwe wakacinca kujatikizya bantu aaba,+ aboobo bakati: “Ino ncinzi eeci ncotwacita, ikulekela bana Israyeli ibali kutubelekela mbuli bazike kuti baunke?” 6 Aboobo wakatalika kulibambila nkalaki zyakwe zyankondo, eelyo wakaunka abantu bakwe.+ 7 Mpoonya wakabweza nkalaki zisalidwe zili 600 ankalaki zimwi zyoonse zyamu Egepita alimwi abasikalumamba muli imwi aimwi. 8 Aboobo Jehova wakapa moyo wa Farao mwami wa Egepita kuti uyume, mpoonya wakabatandila bana Israyeli ciindi nobakali kuzwa cabusicamba.+ 9 Bana Egepita bakabatandila,+ alimwi nkalaki zyoonse zya Farao abasimabbiza bakwe abasikalumamba bakwe bakali afwaafwi kubeenzya nobakali kumbali alwizi, kufwaafwi a Pihahiroti kumbele lya Baala-zefoni.

10 Lino Farao naakasika afwaafwi, bana Israyeli bakatambya meso aabo akubona bana Egepita kababoola kulimbabo. Bana Israyeli bakayoowa akutalika kulilila Jehova.+ 11 Bakati kuli Musa: “Sena caamba kuti kunyina busena bwakuzikkila mu Egepita ncookatuletela kokuno kutegwa tuzoofwide momuno munkanda?+ Ino ncinzi eeci ncootucitila mukutugwisya mu Egepita? 12 Sena tiitwakakwaambila notwakali mu Egepita kuti, ‘Kotuleka buyo kutegwa tubelekele bana Egepita’? Nkaambo cilainda kubota kubelekela bana Egepita kwiinda kufwida momuno munkanda.”+ 13 Mpoonya Musa wakaambila bantu kuti: “Mutayoowi pe.+ Amwiime nji akubona lufwutuko lwa Jehova ndwatiimucitile sunu.+ Nkaambo bana Egepita mbomubwene sunu, tamukababoni limbi pe.+ 14 Jehova lwakwe mwini ulamulwanina,+ nywebo muumune buyo.”

15 Lino Jehova wakaambila Musa kuti: “Ino nkaambo nzi ncolilila ndime? Kobaambila bana Israyeli kuti bazumanane kweenda. 16 Pele yebo nyamuna musako akutandabika janza lyako atala aalwizi akulwaandaanya, kutegwa bana Israyeli bainde akati kalwizi anyika njumu. 17 Pele mebo ndilapa myoyo yabana Egepita kuti iyume kutegwa babatandile mulwizi; eelyo ndilalijanina bulemu kwiinda mukuzunda Farao, basikalumamba bakwe boonse, nkalaki zyakwe zyankondo abasimabbiza bakwe.+ 18 Eelyo bana Egepita bayoozyiba ncobeni kuti ndime Jehova ndaakulijanina bulemu kwiinda mukuzunda Farao, nkalaki zyakwe zyankondo abasimabbiza bakwe.”+

19 Mpoonya mungelo wa Leza mwini-mwini+ iwakali kumbele kwankamu yabana Israyeli wakaunka musyule lyabo, awalo musumpuululu wakkumbi wakazwa kumbele lyabo akuyakwiima musyule lyabo.+ 20 Aboobo musumpuululu wakkumbi wakaima akati kankamu yabana Egepita ankamu yabana Israyeli.+ Kulubazu lumwi, kkumbi lyakali kupa kuti kube mudima uusiya mbi. Kulubazu lumbi, lyakali kumunika masiku.+ Masiku oonse kkumbi lyakapa kuti nkamu eezyi zyobilo kazyaandeene.

21 Lino Musa wakatandabika janza lyakwe atala aalwizi;+ eelyo Jehova wakapa kuti maanzi aandaane kwiinda mukubelesya guwo ilyakali kuzwa kujwe masiku oonse akupa kuti lwizi lube nyika njumu,+ eelyo maanzi akaandaana.+ 22 Aboobo bana Israyeli bakainda akati kalwizi anyika njumu,+ eelyo maanzi akaima mbuli bwaanda kululyo akulumwensyi lwabo.+ 23 Lino bana Egepita bakabatobela, antoomwe amabbiza aa Farao oonse, ankalaki zyakwe zyankondo abasimabbiza bakwe, bakanjila mukati kalwizi.+ 24 Mpoonya kubucedo,* Jehova wakatalika kulanga nkamu yabana Egepita kuzwa mumusumpuululu wamulilo amumusumpuululu wakkumbi,+ alimwi wakanyonganya nkamu yabana Egepita. 25 Eelyo wakali kuyaabukukkula mavwili kunkalaki zyabo cakuti bakali kukatazyigwa kuzyeenzya, alimwi bana Egepita bakatalika kwaamba kuti: “Atutije kuzwa kubana Israyeli, nkaambo Jehova nguubalwanina kubana Egepita.”+

26 Mpoonya Jehova wakaambila Musa kuti: “Tandabika janza lyako atala aalwizi kutegwa maanzi ajokele akubanyikizya bana Egepita ankalaki zyabo abasimabbiza.” 27 Mpoonya aawo Musa wakatandabika janza lyakwe atala aalwizi, eelyo kubucedo lwizi lwakatalika kuyaabujokela mbolwakabede. Bana Egepita nobakali kusola kutija, Jehova wakabanyikizya akati kalwizi.+ 28 Lino maanzi akajokela akunyikizya nkalaki zyakwe zyankondo, basikalumamba bakwe boonse, basimabbiza ba Farao abaabo boonse bakaccilila bana Israyeli mulwizi.+ Kunyina naba omwe akati kabo iwakafwutuka.+

29 Pele balo bana Israyeli bakeenda anyika njumu akati kalwizi+ alimwi maanzi akaima mbuli bwaanda kululyo akulumwensyi.+ 30 Aboobo Jehova wakabafwutula bana Israyeli buzuba oobo kumaanza aabana Egepita,+ alimwi bana Israyeli bakalibonena bana Egepita kabafwide kunkomwe yalwizi. 31 Kunze lyaboobo bana Israyeli bakalibonena nguzu zinji kapati zya* Jehova kazibeleka kubana Egepita, eelyo bantu bakatalika kumuyoowa Jehova akumusyoma Jehova a Musa mubelesi wakwe.+

15 Aciindi eeco Musa abana Israyeli bakaimbila Jehova lwiimbo oolu lwakuti:+

“Andimwiimbile Jehova, nkaambo wasumpuka kapati.+

Ibbiza autantide alindilyo wabawaala mulwizi.+

 2 Ja* ninguzu zyangu alimwi nguundiyumya, mbwaanga waba mufwutuli wangu.+

Ooyu ngo Leza wangu, alimwi ndilamutembaula;+ ngo Leza+ wataata, alimwi ndilamusumpula.+

 3 Jehova ngusilumamba singuzu.+ Jehova ndezina lyakwe.+

 5 Banyikila mumaanzi malamfwu; babbila ansi eeni mbuli bbwe.+

 9 Sinkondo ooyo wakati: ‘Ndilabatobela! Ndilabeenzya!

Ndilaabanya buvwubi bwabo kusikila moyo wangu ukkutile!

Ndilabweza panga lyangu! Janza lyangu lilabazunda!’+

11 Nguni akati kabaleza uuli mbuli nduwe, O Jehova?+

Nguni uuli mbuli nduwe, oosalalisya?+

Yebo ooyelede kuyoowegwa akwiimbilwa nyimbo zyakutembaula, Oocita zintu zigambya.+

12 Wakatandabika janza lyako lyalulyo, eelyo nyika yakabamena.+

Bantu boonse baku Kanana bayootyompwa.+

16 Buyoofwu abukandu ziyoobasikila.+

18 Jehova uyoolela kali mwami lyoonse alyoonse mane kukabe kutamani.+

20 Mpoonya Miriamu imusinsimi mukaintu, mucizyi wa Aroni wakabweza nsakalala, eelyo bamakaintu boonse bakamutobela kabayaabulizya nsakalala akuzyana. 21 Miriamu wakaingula bamaalumi kwiinda mukwiimba kuti:

“Atumwiimbile Jehova, nkaambo wasumpuka kapati.+

Ibbiza autantide alindilyo wabawaala mulwizi.”+

22 Mpoonya Musa wakasololela bana Israyeli kuzwa ku Lwizi Lusalala, eelyo bakaunka kunkanda ya Suri, bakeenda mazuba otatwe munkanda, pele tiibakajana maanzi. 23 Eelyo bakasika ku Mara,*+ pele tiibakakonzya kunywa maanzi aaku Mara nkaambo akali kulula. Nkakaambo kaako ncaakaulika busena oobo kuti Mara. 24 Mpoonya bantu bakatalika kutongookela Musa+ kuti: “Ino tulanywa nzi?” 25 Aboobo wakalilila Jehova,+ eelyo Jehova wakamutondezya kasamu. Naakakawaala mumaanzi, maanzi aayo akaleka kulula.

Ooko wakababikkila mulawo wakuti kabatobela nobabeteka, alimwi wakabasunka ooko.+ 26 Wakabaambila kuti: “Ikuti naa mwaswiilila jwi lya Jehova Leza wanu akucita ciluzi mumeso aakwe akuccilila malailile amilazyo yakwe yoonse,+ tandikamuleteli malwazi aayo ngondakaletela bana Egepita,+ nkaambo ndime Jehova uumusilika.”+

27 Kuzwa waawo bakaboola ku Elimu, ooko ikwakali tusensa twamaanzi tuli 12 atukunka tuli 70. Aboobo bakakkala ooko kumbali aamaanzi.

16 Nobakazwa ku Elimu, mbungano yoonse yabana Israyeli yakaboola kunkanda ya Sini+ iili akati ka Elimu a Sinai, mubuzuba bwa 15 bwamwezi wabili kuzwa nobakazwa mucisi ca Egepita.

2 Mpoonya mbungano yoonse yabana Israyeli yakatalika kutongaukila Musa a Aroni munkanda.+ 3 Bana Israyeli bakazumanana kwaamba kuti: “Nicakabota ikuti Jehova naakatujaya buyo mucisi ca Egepita ooko nkotwakali kulya nyama cakulilekela,+ acinkwa cakukkuta. Lino mwatuleta mucimpayuma eeci kutegwa mbungano yoonse eeyi ifwe anzala.”+

4 Mpoonya Jehova wakaambila Musa kuti: “Ndilamulosyela cinkwa kuzwa kujulu,+ umwi aumwi weelede kuunka kuyoobwezelela ncakonzya kulya abuzuba,+ kutegwa ndibasunke akubona naa bayootobela mulawo wangu naa pe.+ 5 Pele mubuzuba bwacisambomwe+ nobabamba nzyobabwezelela, zyeelede kuba zyamazuba obilo kwiinda aali zyeezyo nzyobabwezelela abuzuba.”+

6 Aboobo Musa a Aroni bakaambila bana Israyeli boonse kuti: “Mangolezya mulazyiba ncobeni kuti ngu Jehova iwakamugwisya mucisi ca Egepita.+ 7 Mafwumofwumo muyoobona bulemu bwa Jehova, nkaambo waamvwa matongoosi aanu ngomumutongookela Jehova. Ino swebo ndiswe bani kuti kamututongookela?” 8 Musa wakazumanana kwaamba kuti: “Jehova amupa nyama kumangolezya kuti mulye alimwi mafwumofwumo aakumupa cinkwa kuti mulye akukkuta, muyoozyiba kuti Jehova waamvwa matongoosi aanu ngomumutongookela. Alimwi ino swebo ndiswe bani? Tamutongookeli ndiswe pe, mutongookela Jehova.”+

9 Mpoonya Musa wakaambila Aroni kuti: “Ambila mbungano yoonse yabana Israyeli kuti, ‘Amuboole afwaafwi a Jehova, nkaambo waamvwa matongoosi aanu.’”+ 10 Aroni mbwaakamanizyila buyo kwaambila mbungano yoonse yabana Israyeli, bakavwuuluka akulanga kulubazu lwankanda, eelyo bakabona bulemu bwa Jehova mukkumbi.+

11 Lino Jehova wakaambila Musa kuti: 12 “Ndaamvwa matongoosi aabana Israyeli.+ Kobaambila kuti, ‘Kumangolezya mulalya nyama alimwi mafwumofwumo muyoolya cinkwa akukkuta,+ eelyo muyoozyiba ncobeni kuti ndime Jehova Leza wanu.’”+

13 Aboobo mangolezya aayo bakancele bakaboola akuzula munkambi,+ alimwi mafwumofwumo kwakaba mume kuzinguluka nkambi yoonse. 14 Nokwakainda ciindi, mume wakayuminina eelyo munkanda+ kwakaboneka tuntu tupapalete tuniini-niini ituli mbuli caanda anyika. 15 Mpoonya bana Israyeli nobakatubona, bakatalika kubuzyanya kuti, “Ino ncinzi eeci?” nkaambo tiibakatuzyiba pe. Aboobo Musa wakati kulimbabo: “Eeci ncecilyo Jehova ncaamupa kuti mulye.+ 16 Mboobu Jehova mbwaalailila, ‘Umwi aumwi abweze kweelana ambwakonzya kulya. Mweelede kubweza cipimyo caomeri*+ kweelana amweelwe wabantu umwi aumwi mbajisi mutente lyakwe.’” 17 Bana Israyeli bakacita mbubonya oobo; bamwi bakabwezelela cinji ibamwi cisyoonto. 18 Nobakapima acipimyo caomeri, ooyo wakabwezelela cinji kunyina cakaindilila alimwi ooyo wakabwezelela cisyoonto kunyina cakabulila.+ Umwi aumwi wakabwezelela kweelana ambwakonzya kulya.

19 Mpoonya Musa wakabaambila kuti: “Kutabi muntu uusiya cili coonse kusikila mafwumofwumo.”+ 20 Pele tiibakamuswiilila Musa. Bantu bamwi nobakasiya cimwi kusikila mafwumofwumo, cakazwa mvwunyu akutalika kununka, eelyo Musa wakabakalalila. 21 Bakali kubwezelela lyoonse mafwumofwumo, umwi aumwi kweelana ambwakonzya kulya. Pele zuba lyabala, cakali kweenzemuka.

22 Mubuzuba bwacisambomwe, bakabwezelela mweelwe wacakulya camazuba obilo,+ maomeri obilo muntu omwe. Aboobo basilutwe boonse bambungano bakaunka bamwaambila Musa. 23 Mpoonya Musa wakabaambila kuti: “Mboobu mbwaamba Jehova: ‘Juunza kuyooba kulyookezya cakumaninina,* sabata iisalala kuli Jehova.+ Kamuyoka nzyomukonzya kuyoka, alimwi kamujika nzyomukonzya kujika,+ eelyo coonse citiicaale amucibambe kusikila mafwumofwumo.’” 24 Aboobo bakaciyobola kusikila mafwumofwumo mbubonya Musa mbwaakabalailila, eelyo tiicakanunka pe nokuba kuzwa mvwunyu. 25 Mpoonya Musa wakabaambila kuti: “Amucilye sunu, nkaambo sunu mbuzuba bwa Sabata bwa Jehova. Sunu tamukoocijana ansi pe. 26 Munoobwezelela mazuba aali cisambomwe, pele mubuzuba bwaciloba, nkokuti buzuba bwa Sabata,+ tamunoojani cili coonse.” 27 Nokuba boobo, mubuzuba bwaciloba bamwi bantu bakaunka kuti bakabwezelele, pele taakwe ncobakajana.

28 Aboobo Jehova wakati kuli Musa: “Ino nywebo nobantu muyooleka lili kukaka kutobela milawo yangu amalailile aangu?+ 29 Amuzyibe kuti Jehova wamupa Sabata.+ Nkakaambo kaako ncamupeda cakulya camazuba obilo mubuzuba bwacisambomwe. Umwi aumwi weelede kukkala abusena bwakwe; taakwe weelede kuzwa abusena bwakwe mubuzuba bwaciloba.” 30 Aboobo bantu bakabamba Sabata* mubuzuba bwaciloba.+

31 Bana Israyeli bakaulika cakulya eeci kuti “mana.”* Cakali mbuli tunseke tuniini-niini tutuba, alimwi cakali kulweela mbuli tunkwa tuvwelene abuci.+ 32 Mpoonya Musa wakati: “Mboobu Jehova mbwaalailila, ‘Amuzuzye omeri lyomwe lyacakulya eeci kuti ciyobolwe mumazyalani aanu oonse,+ kutegwa bakabone cakulya ncondakamusanina mucimpayuma eelyo nondakamugwisya mucisi ca Egepita.’” 33 Aboobo Musa wakaambila Aroni kuti: “Bweza nongo akubikka mana mulinjiyo aakkwana omeri mpoonya wiibikke kumbele lya Jehova kutegwa iyobolwe mumazyalani aanu oonse.”+ 34 Mbubonya Jehova mbwaakalailila Musa, Aroni wakaibikka kumbele lya Bumboni+ kutegwa iyobolwe. 35 Bana Israyeli bakalya mana myaka iili 40,+ kusikila ciindi nobakasika munyika eeyo iyakakkedwe bantu.+ Bakalya mana kusikila nobakasika kumunyinza wanyika ya Kanana.+ 36 Lino cipimyo caomeri ncipaanzi cakkumi caefa.*

17 Mbungano yabana Israyeli yoonse yakanyamuka kuzwa munkanda ya Sini+ kaiyaabulonga-longa mbubonya mbwaakalailila Jehova,+ eelyo bakaakukkala ku Refidimu.+ Pele kwakanyina maanzi aakuti bantu banywe.

2 Aboobo bantu bakatalika kuzwangana a Musa+ kabaamba kuti: “Kotupa maanzi aakunywa.” Pele Musa wakati kulimbabo: “Nkaambo nzi ncomuzwangana andime? Nkaambo nzi ncomuzumanana kumusunka Jehova?”+ 3 Pele bantu bakafwide nyota kapati, aboobo bakazumanana kutongookela Musa+ kabati: “Ino nkaambo nzi ncookatugwisya mu Egepita kuti uzootujazye nyota swebo abana besu alimwi abanyama besu?” 4 Mpoonya Musa wakalilila Jehova kuti: “Ino ndilabacita buti bantu aaba? Ino-ino buyo balandipwaya mabwe!”

5 Mpoonya Jehova wakaambila Musa kuti: “Koya kumbele lyabantu akubweza baalu babana Israyeli alimwi amusako wako ngowakaumya Mulongo wa Nile.+ Koubweza mujanza lyako akuzumanana kweenda. 6 Bona! Ndiyakwiima kumbele lyako abbwe ku Horebu. Lino weelede kuyakuuma abbwe, eelyo maanzi ayoozwa mulindilyo aboobo bantu bayoonywa.”+ Mpoonya Musa wakacita mbubonya oobo kabalangilila baalu bamu Israyeli. 7 Aboobo busena oobo wakabuulika kuti Masa*+ a Meriba,*+ akaambo kakuti bana Israyeli bakazwangana anguwe alimwi akaambo kakuti bakasunka Jehova+ kabaamba kuti: “Sena Jehova mpali akati kesu naa pe?”

8 Mpoonya bana Amaleki+ bakaboola kuzoolwana bana Israyeli ku Refidimu.+ 9 Aboobo Musa wakaambila Joshua kuti:+ “Kosala baalumi muunke kuyoolwana bana Amaleki. Juunza ndiyakwiima atala aacilundu, kandijisi musako wa Leza mwini-mwini mujanza lyangu.” 10 Mpoonya Joshua wakacita mbubonya Musa mbwaakamwaambila,+ kutegwa alwane bana Amaleki. Eelyo Musa, Aroni a Huri+ bakaunka atala aacilundu.

11 Lino kwakali kunga Musa anootambikide maanza aakwe mujulu, bana Israyeli bakali kuzunda, pele kufwumbwa abikka maanza aakwe ansi, bana Amaleki bakali kuzunda. 12 Musa naakalema kunyamuna maanza aakwe bakamuletela bbwe, eelyo wakakkala alindilyo. Mpoonya Aroni a Huri bakaatabilila maanza aakwe, umwi kulubazu oolu aumwi kulubazu lumbi, aboobo maanza aakwe akaliimvwi kusikila zuba lyabbila. 13 Aboobo Joshua wakazunda bana Amaleki abantu babo apanga.+

14 Lino Jehova wakaambila Musa kuti: “Lemba makani aaya mubbuku kutegwa abe ciibalusyo* akwaainduluka kuli Joshua kuti, ‘Ndiyoobanyonyoona bana Amaleki cakumaninina, alimwi tabakayeeyegwi limbi anyika.’”+ 15 Mpoonya Musa wakayaka cipaililo akucuulika kuti Jehova-nisi,* 16 wakati: “Nkaambo balwana cuuno cabwami ca Ja,+ Jehova ulalwana nkondo abana Amaleki mumazyalani aabo oonse.”+

18 Lino Jetero, imupaizi waku Midiyani, usyizyala Musa+ wakamvwa zyoonse Leza nzyaakacitila Musa alimwi abana Israyeli bantu bakwe, Jehova mbwaakagwisya bana Israyeli mu Egepita.+ 2 Jetero, usyizyala Musa wakalimubwezede Zipora imukaintu wa Musa, nkaambo Musa wakalimupilusyide kwabo, 3 antoomwe abana bakwe bobilo.+ Umwi wakali Gerisomu,*+ nkaambo Musa wakati, “Ndili mweenzu mucisi cabantu,” 4 eelyo umwi wakali Eliezere,* nkaambo wakati, “Leza wabataata mugwasyi wangu, iwakandivwuna kupanga lya Farao.”+

5 Aboobo Jetero, usyizyala Musa, abana ba Musa amukaintu wakwe bakaboola kuli Musa munkanda ooko nkwaakakkede, acilundu ca Leza mwini-mwini.+ 6 Mpoonya wakatumya mulomo kuli Musa ulaamba: “Mebo nde Jetero,+ usozyala, ndaboola kulinduwe antoomwe amukaintu wako abana bako bobilo.” 7 Amvwe buyo boobo, Musa wakaunka kuyoocinga bausyizyala, mpoonya wakavwuntama ansi amane wakabamyonta. Eelyo bakatalika kwaanzyanya, kuzwa waawo bakanjila mutente.

8 Musa wakalwiida usyizyala zintu zyoonse Jehova nzyaakacita kuli Farao akucisi ca Egepita akaambo kabana Israyeli,+ mapenzi oonse aakabacitikila mulweendo+ ambwaakabavwuna Jehova. 9 Mpoonya Jetero wakakkomana kumvwa zintu zibotu Jehova nzyaakacitila bana Israyeli mukubavwuna kubana Egepita.* 10 Mpoonya Jetero wakati: “Aatembaulwe Jehova, ooyo iwakamuvwuna kumaanza aabana Egepita akujanza lya Farao, ooyo iwakavwuna bantu kubweendelezi bwabana Egepita. 11 Lino ndazyiba kuti Jehova mupati kwiinda baleza bambi boonse+ akaambo kacintu ncaakacita kulibaabo ibakacitila bantu bakwe cakulisumpula.” 12 Mpoonya Jetero, usyizyala Musa, wakaletela Leza cituuzyo cuumpwa azipaizyo zimwi, alimwi Aroni abaalu boonse bamu Israyeli bakaboola akulya cakulya antoomwe ausyizyala Musa kubusyu bwa Leza mwini-mwini.

13 Buzuba bwakatobela, Musa wakakkala ansi mbuli lyoonse kutegwa abeteke bantu, eelyo bantu bakali kuboola akwiima kumbele lya Musa kuzwa mafwumofwumo kusikila kumangolezya. 14 Usyizyala Musa naakabona zintu zyoonse nzyaakali kucitila bantu, wakati: “Ino ncinzi eeci ncocitila bantu? Nkaambo nzi ncokkede olikke abantu boonse ncobaboola kwiima kumbele lyako kuzwa mafwumofwumo kusikila kumangolezya?” 15 Mpoonya Musa wakaambila usyizyala kuti: “Nkaambo kakuti bantu bazumanana kuboola kulindime kutegwa babuzye makani kuli Leza. 16 Ikuti naa kwaba mulandu akati kabantu bobilo, ulaletwa kulindime eelyo ndeelede kubabeteka akubazyibya malailile aa Leza mwini-mwini alimwi amilawo yakwe.”+

17 Mpoonya usyizyala Musa wakati: “Oobu mbocita tacili kabotu pe. 18 Masimpe ulakatala, yebo abantu aaba mboli limwi, nkaambo mulimo ooyu wakukomenena alimwi tokonzyi kuucita olikke pe. 19 Lino kondiswiilila. Ndilakwaambila ncoyelede kucita eelyo Leza unooli anduwe.+ Yebo ube mwiiminizi wabantu kuli Leza mwini-mwini,+ alimwi yebo weelede kutola makani aabo kuli Leza mwini-mwini.+ 20 Weelede kubayiisya malailile amilawo,+ akubatondezya mbobeelede kukkala anzyobeelede kucita. 21 Pele yebo weelede kusala bamaalumi basongo kuzwa akati kabantu,+ ibayoowa Leza, ibasyomeka, ibatayandi kujana mpindu cabumpelenge,+ eelyo ubabikke kuba basilutwe babantu bali zyuulu, basilutwe babantu bali myaanda, basilutwe babantu bali makumi aali musanu alimwi abasilutwe babantu bali makumi.+ 22 Beelede kubeteka bantu ciindi coonse nokwabuka twaambo, milandu mipati yoonse beelede kwiileta kulinduwe,+ pele milandu misyoonto yoonse beelede kwiibeteka lwabo beni. Kocita oobo kutegwa zintu zikuubile-ubile, kuti bakugwasye kunyamuna mukuli.+ 23 Ikuti wacita oobo, alimwi kwaba kuti Leza mbwaakulailila, uyookonzya kuubeleka mulimo ooyu, alimwi bantu aaba boonse bayoopiluka kumatente aabo muluumuno.”

24 Mpoonya aawo Musa wakaswiilila ncaakamwaambila usyizyala akucita zyoonse nzyaakaamba. 25 Aboobo Musa wakasala baalumi basongo akati kabana Israyeli boonse akubapa milimo yabusilutwe akati kabantu, kuba basilutwe babantu bali zyuulu, basilutwe babantu bali myaanda, basilutwe babantu bali makumi aali musanu alimwi abasilutwe babantu bali makumi. 26 Aboobo bakali kubeteka bantu ciindi coonse nokwabuka twaambo. Milandu mipati bakali kwiitola kuli Musa,+ pele milandu misyoonto yoonse bakali kwiibeteka beni. 27 Mpoonya Musa wakamusindikila usyizyala,+ eelyo wakapiluka kucisi cakwe.

19 Mumwezi watatu kuzwa ciindi bana Israyeli nobakazwa mucisi ca Egepita, mubuzuba mbubonya oobo,* bakasika kunkanda ya Sinai. 2 Bakanyamuka kuzwa ku Refidimu+ akuboola kunkanda ya Sinai akukkala munkanda. Bana Israyeli bakakkala aawo kumbele lyacilundu.+

3 Mpoonya Musa wakatanta acilundu kutegwa akalibonye kuli Leza mwini-mwini, eelyo Jehova wakatalika kumwaambila kuzwa mucilundu+ kuti: “Mboobu mboyelede kubaambila baluzubo lwa Jakobo, ibana Israyeli, 4 ‘Mwakalibonena mbondakabacita bana Egepita,+ ikutegwa ndimunyamune amababa aangu mbuli sikwaze.+ 5 Lino ikuti naa mwaswiilila jwi lyangu cakumaninina akubamba cizuminano cangu, masimpe muyooba bantu bangu bayandisi* akati kabantu boonse,+ nkaambo nyika yoonse njiyangu.+ 6 Muyoondibeda bwami bwabapaizi alimwi acisi cisalala.’+ Aaya ngamajwi ngoyelede kubaambila bana Israyeli.”

7 Aboobo Musa wakaunka kuyakwiita baalu babantu akubaambila majwi aaya oonse Jehova ngaakamulailila.+ 8 Mpoonya bantu boonse bakaingula amoyo omwe kabati: “Zyoonse nzyaamba Jehova tulazicita.”+ Mpoonya aawo Musa wakatola bwiinguzi bwabantu kuli Jehova. 9 Kumane Jehova wakati kuli Musa: “Bona! Ndilaboola kulinduwe mukkumbi lisiya, kutegwa bantu bamvwe ndanakwaambaula anduwe, kuti ayebo kabakusyoma lyoonse.” Eelyo Musa wakaambila Jehova majwi ngobakaamba bantu.

10 Lino Jehova wakazumanana kwaambila Musa kuti: “Koya kubantu ukabasalazye sunu ajuunza, alimwi beelede kuwasya zisani zyabo. 11 Beelede kulibambila buzuba bwatatu, nkaambo mubuzuba oobo bwatatu Jehova uyooseluka a Cilundu ca Sinai bantu boonse kabalangilila. 12 Weelede kubabikkila munyinza bantu kuzinguluka cilundu akubaambila kuti, ‘Amucenjele kuti mutatanti acilundu, alimwi tamweelede nokuba kuciguma. Kufwumbwa uutiicigume ncobeni ulajaigwa. 13 Kunyina weelede kumuguma sikubisya, pele uyoopwaigwa mabwe naa kuyaswa muvwi. Kufwumbwa naa munyama naa muntu, takaponi pe.’+ Lilikke walila mweembo walwija lwamugutu,+ ndendilyo nobeelede kuboola kucilundu.”

14 Mpoonya Musa wakaseluka kuzwa acilundu akuboola kubantu eelyo wakatalika kubasalazya, kumane bakawasya zisani zyabo.+ 15 Kumane bantu wakabaambila kuti: “Amulibambile buzuba bwatatu. Tamweelede koonana* pe.”

16 Mafwumofwumo mubuzuba bwatatu kwakaba mizumo andabo, alimwi kwakali kkumbi lipati+ atala aacilundu alimwi mweembo wakalilisya cakuti bantu boonse ibakali munkambi bakatalika kukankama.+ 17 Lino Musa wakabaleta bantu kuzwa munkambi kutegwa baswaangane a Leza mwini-mwini, eelyo bakaakwiima munsi aacilundu. 18 Mpoonya busi bwakatalika kuuntumuka mu Cilundu ca Sinai coonse akaambo kakuti Jehova wakaseluka alincico mumulilo;+ eelyo busi ibwakali kuzwa mucilundu bwakazumanana kuuntumuka mbuli busi buzwa muwondo, alimwi cilundu coonse cakali kuzungaana kapati.+ 19 Lino mweembo nowakazumanana kulilisya, Musa wakatalika kwaambaula, mpoonya Leza mwini-mwini wakamwiingula.

20 Aboobo Jehova wakaseluka atala aa Cilundu ca Sinai. Mpoonya Jehova wakaita Musa atala aacilundu, eelyo Musa wakatanta acilundu.+ 21 Lino Jehova wakaambila Musa kuti: “Seluka ukabacenjezye bantu kuti batasoli kusotoka munyinza kuboola kuzoobona Jehova nkaambo bunji bwabo balafwa. 22 Abalo bapaizi ibaboola afwaafwi a Jehova lyoonse balisalazye, kutegwa bukali bwa Jehova butabasikili.”+ 23 Mpoonya Musa wakaambila Jehova kuti: “Bantu tabakonzyi kuboola ku Cilundu ca Sinai, nkaambo yebo wakatucenjezya kale nowakaamba kuti, ‘Bikka munyinza kuzinguluka cilundu akubucita kuti bube busena busetekene.’”+ 24 Nokuba boobo Jehova wakamwaambila kuti: “Seluka, koya alimwi weelede kuboola a Aroni, pele bapaizi abantu tabeelede kusotoka munyinza akuboola kuli Jehova kutegwa bukali bwakwe butabasikili.”+ 25 Aboobo Musa wakaseluka, waakubaambila bantu.

20 Mpoonya Leza wakaamba majwi oonse aaya aakuti:+

2 “Ndime Jehova Leza wako, iwakakugwisya mucisi ca Egepita, muŋanda yabuzike.+ 3 Utabi abaleza bambi kunze lyangu.*+

4 “Utalipangili cikozyanyo cibezedwe naa cikozyanyo cili mbuli cintu cili coonse icili kujulu naa icili aanyika naa icili mumaanzi kunsi aanyika.+ 5 Utazikotamini naa koongelezyegwa kuzikomba,+ nkaambo mebo nde Jehova Leza wako, ndime Leza uuyanda kuti bantu kabakomba buyo ndime ndelikke,+ uuleta cisubulo kubana akaambo kacibi cabamausyi, akubazyukulu akubazyukululwa babaabo ibandisulide, 6 pele uutondezya luyando lutamani kuzyuulu-zyuulu zyamazyalani aabantu aabo ibandiyanda akubamba milawo yangu.+

7 “Utabelesyi zina lya Jehova Leza wako munzila iiteelede,+ nkaambo Jehova uyoomusubula ooyo uubelesya zina lyakwe munzila iiteelede.+

8 “Kobamba buzuba bwa Sabata akububona kuti bulisetekene.+ 9 Weelede kubeleka milimo yako yoonse mumazuba aali cisambomwe,+ 10 pele buzuba bwaciloba mbuzuba bwa Sabata ya Jehova Leza wako. Toyelede kubeleka mulimo uuli woonse, yebo naba mwanaako musankwa naba mwanaako musimbi, mubelesi wako musankwa naba mubelesi wako musimbi naba munyama wako uuvwubwa naba mweenzu uukkala muminzi yako.*+ 11 Nkaambo mumazuba aali cisambomwe Jehova wakalenga julu anyika, lwizi azyoonse zili mumo, eelyo wakalyookezya mubuzuba bwaciloba.+ Nkakaambo kaako Jehova wakabulongezya buzuba bwa Sabata akububikka kuti bulisetekene.

12 “Lemeka bauso abanyoko+ kutegwa upone mazuba manji munyika Jehova Leza wako njaakupa.+

13 “Utajayi.+

14 “Utaciti bumambe.+

15 “Utabbi.+

16 “Utabejelezyi mweenzinyoko ciindi nopa bumboni.+

17 “Utanyonokeli ŋanda yamweenzinyoko. Utanyonokeli mukaintu wamweenzinyoko,+ naba mubelesi wakwe musankwa, naba mubelesi wakwe musimbi, noiba ŋombe yakwe noiba mbongolo yakwe, nociba cintu cili coonse camweenzinyoko.”+

18 Lino bantu boonse bakaimvwa mizumo akubona ndabo, kulila kwamweembo, akubona cilundu kacuuntumuka busi; eelyo nobakabona zintu eezyi bakatalika kubimba akuyakwiimina alamfwu.+ 19 Aboobo bakaambila Musa kuti: “Koambaula andiswe, eelyo tulaswiilila, pele Leza ataambauli andiswe nkaambo inga twafwa.”+ 20 Eelyo Musa wakaambila bantu kuti: “Mutayoowi pe, nkaambo Leza mwini-mwini waboola kuzoomusunka,+ kutegwa muzumanane kumuyoowa akuti mutabisyi.”+ 21 Aboobo bantu bakaliimvwi kulamfwu, pele Musa wakaunka afwaafwi akkumbi lisiya ooko ikwakali Leza mwini-mwini.+

22 Mpoonya Jehova wakaambila Musa kuti: “Mboobu mboyelede kubaambila bana Israyeli, ‘Mwalibonena kuti ndaambaula andinywe kuzwa kujulu.+ 23 Tamweelede kulipangila baleza bansiliva akubakomba mbuli mbomukomba ndime. Alimwi tamweelede kulipangila baleza bangolida.+ 24 Amundiyakile cipaililo cabulongo, mpoonya mukapaizye alincico zituuzyo zyuumpwa, zipaizyo zyalumvwano,* mbelele zyanu, alimwi aŋombe. Mubusena buli boonse mbondiyoosala kuti izina lyangu kalyaambwa+ ndiyooboola kulindinywe akumulongezya. 25 Ikuti mwandiyakila cipaililo camabwe, tamweelede kuciyaka kubelesya mabwe aacezudwe.+ Nkaambo ikuti mwabelesya ncezulo, muyoocisofwaazya. 26 Alimwi taakwe weelede kutanta amatantilo kuya kucipaililo cangu, kutegwa cinswe cakwe citabonwi.’

21 “Lino njeeyi milawo njoyelede kubapa:+

2 “Ikuti naa waula muzike mu Hebrayo,+ ooyo muzike weelede kubeleka myaka iili cisambomwe, pele mumwaka waciloba weelede kwaangununwa kakunyina kubbadela cili coonse.+ 3 Ikuti naa wakaboola alikke, uyakuunka alikke. Ikuti naa kakwete, weelede kuunka amukaintu wakwe. 4 Ikuti naa simalelaakwe wamupa mukaintu, eelyo mukaintu ooyo wamuzyalila bana basankwa naa basimbi, imukaintu abana bakwe bayooba basimalelaakwe, pele walo alikke nguuyakuunka.+ 5 Pele ikuti naa muzike ooyo wazumanana kwaamba kuti, ‘Ndilamuyanda kapati simalelaangu, mukaintu wangu abana bangu; tandiyandi kwaangununwa pe,’+ 6 simalelaakwe weelede kumutola kumbele lya Leza mwini-mwini. Mpoonya uyoomuleta kumulyango naa kumunsende wamulyango, eelyo simalelaakwe uyoomudonkola kutwi akabulo kakudonkozya, mpoonya uyooba muzike wakwe buumi bwakwe boonse.

7 “Ikuti muntu wauzya mwanaakwe musimbi mubuzike, takaangununwi mbuli mbobaangununwa bazike baalumi. 8 Ikuti naa simalelaakwe tanaamukkomanina alimwi tanaamusala kuba mukaintu wakwe, pele wamuuzya kumuntu uumbi, takazumizyigwi kumuuzya kuli bamuzwakule, nkaambo wamucitila calweeno. 9 Ikuti naa wamupa kumwanaakwe musankwa, nkokuti weelede kumulanganya mbuli mwanaakwe musimbi. 10 Ikuti naa mwana musankwa ooyo waalika, mukaintu wakusaanguna weelede kuzumanana kumupa zyakulya, zyakusama alimwi azyeelede zyamulukwatano.*+ 11 Ikuti katamucitili zintu eezyi zyotatwe, nkokuti weelede kwaangununwa kakunyina kubbadela mali aali woonse.

12 “Kufwumbwa uuma mweenzinyina akumujaya, weelede kujaigwa awalo.+ 13 Pele ikuti tanaacita acaali, alimwi Leza mwini-mwini wazumizya kuti cicitike, ndiyookutondezya busena nkwayelede kutijila.+ 14 Ikuti naa muntu wakalazyanya amweenzinyina eelyo wamujaya acaali,+ muntu ooyo weelede kujaigwa, nokuba kuti watijila kucipaililo cangu weelede kugwisyigwa ooko.+ 15 Muntu uuma bausyi naa banyina weelede kujaigwa.+

16 “Ikuti muntu wabba muntunyina+ akumusambala, naa wajatwa kamujisi,+ weelede kujaigwa.+

17 “Muntu uuli woonse uusinganya bausyi naa banyina weelede kujaigwa.+

18 “Mboobu mbomweelede kucita ikuti naa baalumi bazwangana, eelyo umwi wapwaya mweenzinyina bbwe naa kumuuma mfwaindi* kumane tanaafwa, pele walala mubulo: 19 Ikuti kacikonzya kubuka akweendeenda anze ankoli yakwe, nkokuti ooyo wakamupwaya takasubulwi pe. Uyoobbadela buyo akaambo kakumusowela ciindi kumulimo wakwe ciindi naali kuciswa kusikila wapona.

20 “Ikuti muntu wauma muzike wakwe musankwa naa musimbi amusako kumane muzike ooyo wafwida mumaanza aakwe, muntu ooyo weelede kusubulwa.+ 21 Pele ikuti naa kwainda buzuba bomwe naa obilo katafwi, muntu ooyo tayelede kusubulwa pe, nkaambo muzike ooyo wakamuula amali aakwe.

22 “Ikuti baalumi balwana akucisa mukaintu uulaada kumane watumbuka mazuba aakwe kaatanasika,+ pele kunyina ntenda yacitika, ooyo uulaamukaintu weelede kulungilwa kufwumbwa mbwaamba; alimwi ooyo wacisa mukaintu weelede kulunga kwiinda mubabetesi.+ 23 Pele ikuti naa kwacitika ntenda, nkokuti uyoolunga buumi kubuumi,+ 24 liso kuliso, lino kulino, janza kujanza, cituta kucituta,+ 25 kuumpa mulilo kukuumpa mulilo, cilonda kucilonda, mibunda kumibunda.

26 “Ikuti muntu wauma liso lyamuzike wakwe musankwa naa liso lyamuzike wakwe musimbi akulidonkola, weelede kumwaangununa ikubbadela liso lyakwe.+ 27 Alimwi ikuti naa wagwisya lino lyamuzike wakwe musankwa naa muzike wakwe musimbi, weelede kumwaangununa ikubbadela lino lyakwe.

28 “Ikuti naa ŋombe yayasa mwaalumi naa mukaintu akumujaya, ŋombe eeyo yeelede kupwaigwa mabwe kusikila yafwa+ alimwi nyama yanjiyo tayeelede kuligwa pe; mukamwini ŋombe tayelede kusubulwa. 29 Pele ikuti naa ŋombe eeyo ijisi cilengwa cakuyasa bantu alimwi mukamwini wakacenjezyegwa pele taibambi kabotu, alimwi yajaya mwaalumi naa mukaintu, ŋombe eeyo yeelede kupwaigwa mabwe kusikila yafwa alimwi awalo mukamwini weelede kujaigwa. 30 Ikuti naa waambilwa kubbadela cinunuzyo, weelede kubbadela kufwumbwa mbwaambilwa kutegwa anunune buumi bwakwe. 31 Kufwumbwa naa yakayasa mwana musankwa naa musimbi, mukamwini ŋombe weelede kucitilwa kweelana amulawo ooyu. 32 Ikuti naa ŋombe yayasa muzike musankwa naa muzike musimbi, mukamwini ŋombe uyoobbadela mukamwini muzike masyekeli* aali 30, alimwi ŋombe eeyo yeelede kupwaigwa mabwe kusikila yafwa.

33 “Ikuti naa muntu wasiya mulindi bukwazi naa wasya mulindi akutauvwumba, eelyo ŋombe naa mbongolo yawida mumo, 34 mukamwini mulindi weelede kubbadela.+ Weelede kumubbadela mukamwini ŋombe, eelyo nyama eeyo iyooba yakwe. 35 Ikuti naa ŋombe yamuntu yayasa ŋombe yeenzinyina akwiijaya, beelede kwiisambala ŋombe eeyo iipona akwaabana mali ngobaisambala; alimwi beelede kwaabana nyama yaŋombe eeyo yafwa. 36 Ikuti naa ŋombe eeyo yakajisi cilengwa cakuyasa zyeenzinyina pele mukamwini tanaakali kwiibamba, weelede kubbadela ŋombe, eelyo ŋombe eeyo iyafwa ilaba yakwe.

22 “Ikuti muntu wabba ŋombe naa mbelele mpoonya wiijaya naa kwiisambala, weelede kubbadela ŋombe zyosanwe kuŋombe yomwe ambelele zyone kumbelele yomwe.+

2 (“Ikuti mubbi+ wajanwa kabba kumane bamuuma akumujaya, kunyina mulandu wabulowa pe. 3 Pele ikuti zuba kalili lyazwa kale, nkokuti ooyo wamujaya ulijisi mulandu wabulowa.)

“Mubbi ooyo weelede kubbadela. Ikuti katajisi cili coonse, nkokuti ooyo sikubba weelede kusambalwa kubbadelela zintu nzyaabba. 4 Ikuti naa ncaakabba kacicili cuumi alimwi ulicijisi, kufwumbwa naa niŋombe, mbongolo naa mbelele, weelede kuzibbadelela ziindi zyobilo.

5 “Ikuti muntu watola banyama bakwe kuyoocela mumuunda naa mumuunda wamisaansa, mpoonya wazilekela kucelela mumuunda wamuntu uumbi, weelede kubbadela zisyango zibotu zyamumuunda wakwe naa misaansa yakwe mibotu.

6 “Ikuti naa muntu wadoneka mulilo eelyo wayandilila akuumpa lubaya lwamamvwa, misunta yamaila naa maila aaimvwi mumuunda, ooyo iwaudoneka mulilo weelede kubbadelela nzyaaumpa.

7 “Ikuti muntu wapa mweenzinyina mali naa zintu zimwi kuti amuyobwede pele zyabbigwa muŋanda yakwe, ikuti mubbi wajatwa, weelede kuzibbadelela zintu eezyo ziindi zyobilo.+ 8 Pele ikuti naa mubbi tanaajatwa, mukamwini ŋanda weelede kutolwa kumbele lya Leza mwini-mwini+ kutegwa bakabone naa ngonguwe iwakazibba zintu zyamweenzinyina. 9 Mumakani oonse aajatikizya muntu uujisi zintu zitali zyakwe, mbuli ŋombe, mbongolo, mbelele, cisani, naa cintu cili coonse casweeka muntu ncakonzya kwaamba kuti, ‘Ncicangu eeci!’ boonse bobilo bayootola makani aabo kumbele lya Leza mwini-mwini.+ Ooyo Leza ngwayoojana amulandu uyoobbadela mweenzinyina ziindi zyobilo.+

10 “Ikuti muntu wapa mweenzinyina imbongolo, ŋombe, mbelele naa munyama uuli woonse uuvwubwa kuti amubambile, mpoonya ikuti munyama ooyo wafwa, walemana naa kutolwa kakunyina wali kulangilila, 11 muntu ooyo iwakali kulanganya munyama wamweenzinyina weelede kukonkezya kumbele lya Jehova, kuti talinguwe wakabikka janza amunyama wamweenzinyina; mukamwini weelede kuzumina. Muntu ooyo tayelede kubbadela pe.+ 12 Pele kuti naa munyama wakabbigwa kumuntu ooyo akaambo kakutabikkila maano, weelede kumubbadela mukamwini. 13 Ikuti naa wakalumwa amunyama wamusyokwe, weelede kumuleta kuti bube bumboni. Tayelede kubbadelela cintu icakalumwa amunyama wamusyokwe pe.

14 “Pele kuti muntu umwi walomba munyama kumweenzinyina, mpoonya munyama ooyo walemana naa wafwa katako mukamwini, imuntu ooyo iwakamulomba weelede kubbadela. 15 Pele ikuti mukamwini kaliko, tayelede kubbadela. Ikuti naa munyama ooyo wakali kubelekela mali, aayo mali ngaayooba aakulunga.

16 “Ikuti mwaalumi woongelezya musimbi uutazyi musankwa alimwi uutasinkilidwe kumane woona anguwe, weelede kumukwata akubbadela mali aacikwati.+ 17 Ikuti bausyi bakakila limwi kuti mwaalumi ooyo akwate mwanaabo, weelede kubbadela mali aayelene amali aacikwati.

18 “Tamweelede kulekela simasalamuzi mukaintu kuti kapona.+

19 “Muntu uuli woonse woona amunyama weelede kujaigwa.+

20 “Kufwumbwa muntu uukomba baleza bambi kunze lya Jehova alikke weelede kujaigwa.+

21 “Tamweelede kupenzya mweenzu naa kumudyaaminina,+ nkaambo andinywe mwakali beenzu mucisi ca Egepita.+

22 “Tamweelede kupenzya mukamufwu naa mucaala.+ 23 Ikuti naa mwamupenzya, kumane watalika kundililila, masimpe ndiyookumvwa kulila kwakwe;+ 24 eelyo bukali bwangu buyoomusikila, alimwi ndiyoomujaya apanga, alimwi bamakaintu banu bayooba bamukabafwu, abana banu bayooba bamucaala.

25 “Ikuti mwamukweletesya mali muntu wangu mucete* uukkala akati kanu, tamweelede kuba mbuli sikukweletesya kulinguwe. Tamweelede kumubbadelesya cinyonamucila pe.+

26 “Ikuti wajata cisani camweenzinyoko akaambo kacikwelete ncajisi,+ weelede kumujolela zuba kalitanabbila. 27 Nkaambo ncecisani cilikke ncajisi cakulivwumba; ino ncinzi ncatiilivwumbe awona?+ Ikuti naa wandililila, masimpe ndilamumvwa, nkaambo ndili silweetelelo.*+

28 “Toyelede kusampaula Leza+ naba silutwe* wabantu bako.+

29 “Toyelede kuwayawaya kutuula butebuzi bwako bunji amafwuta alimwi awaini.+ Weelede kundipa mwanaako musankwa mutaanzi.+ 30 Mboobu mboyelede kucita aŋombe yako naa mbelele yako ntaanzi:+ Mazuba aali ciloba iyooba abanyina. Mubuzuba bwalusele, weelede kundipa.+

31 “Mweelede kuba bantu basalala kulindime,+ alimwi tamweelede kulya nyama iili yoonse iyajaigwa amunyama wamusyokwe.+ Mweelede kwiipa babwa.

23 “Toyelede kumwaya makani aakubeja.+ Utagwasyi sizibi kwiinda mukupa bumboni bwakubeja.+ 2 Toyelede kutobela buleya mukucita zibi, alimwi toyelede kuzimaanya mulandu mulubeta kwiinda mukupa bumboni bwakubeja kutegwa ukkomanisye buleya.* 3 Toyelede kusalulula mumakani aajatikizya muntu mucete.+

4 “Ikuti wajana ŋombe naa mbongolo yasinkondonyoko iisweekede, weelede kwiitola kulinguwe.+ 5 Ikuti wabona mbongolo yamuntu uukusulide yalimbililwa amukuli wayo, toyelede kwiinda buyo. Weelede kumugwasya kwiilimbulula.+

6 “Toyelede kuzimaanya kaambo kajatikizya lubeta lwamuntu mucete uuli akati kanu.+

7 “Utajanwi mumakani aakubeja, alimwi utajayi muntu uunyina mulandu naa muntu uululeme, nkaambo mebo tandikonzyi kwaamba sizibi kuti uliluleme.*+

8 “Toyelede kutambula cisinkamulomo, nkaambo cisinkamulomo cilakonzya kupa babetesi kutabeteka kabotu alimwi cipa bantu baluleme kwaamba zyakubeja.+

9 “Toyelede kupenzya mweenzu. Nywebo mulizyi mbocibede kuba mweenzu, nkaambo andinywe mwakali beenzu mucisi ca Egepita.+

10 “Weelede kulima muunda wako akutebula nzyoosyanga mumyaka iili cisambomwe.+ 11 Pele mumwaka waciloba toyelede kuulima muunda pe, pele weelede kuuleka buyo, eelyo bacete akati kanu bayoolya zili mumo, alimwi nzyobayoosiya, banyama bamusyokwe bayoozilya. Eeci ncoyelede kucita akumyuunda yako yamisaansa ayamaolifa.

12 “Kobeleka milimo yako mumazuba aali cisambomwe, pele mubuzuba bwaciloba toyelede kubeleka milimo yako kutegwa musune* wako ambongolo yako zilyookezye, amwana musankwa wamuzike wako musimbi amweenzu balikatalusye.+

13 “Mweelede kubikkila maano kuzicita zyoonse nzyondamwaambila,+ alimwi tamweelede kwaamba mazina aabaleza bambi; taayelede kumvwigwa mukanwa lyanu pe.+

14 “Ziindi zyotatwe mumwaka mweelede kundicitila pobwe.+ 15 Mweelede kusekelela Pobwe lya Zinkwa Zitajisi Bumena.+ Muyoolya zinkwa zitajisi bumena mazuba aali ciloba, mbubonya mbondakamulailila, aciindi cibikkidwe mumwezi wa Abibi,*+ nkaambo nceciindi ncomwakazwa mu Egepita. Kunyina weelede kuboola cinkwamaanza kulindime.+ 16 Alimwi mweelede kucita Pobwe lya Butebuzi* bwamicelo mitaanzi kupya yamilimo yanu njomwakalima mumuunda;+ alimwi a Pobwe lya Kuyobolola* kumamanino aamwaka, mwayobolola nzyomwakalima mumuunda.+ 17 Ziindi zyotatwe mumwaka baalumi banu boonse beelede kulibonya ku Mwami mwini-mwini, Jehova.+

18 “Toyelede kutuula bulowa bwacituuzyo cangu antoomwe acintu cili coonse cijisi bumena. Alimwi zituuzyo zyamafwuta zituulwa kumapobwe aangu tazyeelede kuyobolwa kusikila mafwumofwumo.

19 “Micelo mitaanzi mibotu kapati njookalima, weelede kwiileta kuŋanda ya Jehova Leza wako.+

“Toyelede kujika kana kampongo mumukupa wabanyina.+

20 “Ndilakutumina mungelo kumbele lyako+ kutegwa akukwabilile munzila akukuleta mubusena mbondakubambila.+ 21 Umuswiilile akucita nzyatiikwaambile. Utamuzangili pe, nkaambo takamulekeleli milandu yanu,+ nkaambo zina lyangu lili mulinguwe. 22 Pele ikuti waswiilila jwi lyakwe akucita zyoonse nzyondaamba, ndiyoobalwana basinkondonyoko abaabo bakukazya. 23 Nkaambo mungelo wangu ulaunka kumbele lyako, uyookutola kubana Amori, bana Heti, bana Perizi, bana Kanana bana Hivi akubana Jebusi alimwi ndiyoobanyonyoona.+ 24 Toyelede kukomba baleza babo naa koongelezyegwa kubabelekela, alimwi toyelede kwiiya micito yabo.+ Muciindi caboobo, weelede kubanyonyoona akupwayaula misemu yabo yamabwe yakukomba.+ 25 Mweelede kubelekela Jehova Leza wanu,+ eelyo uyoomulongezya kuti mujane cakulya alimwi amaanzi.+ Ndiyoogwisya malwazi akati kanu.+ 26 Takukabi mukaintu naba omwe uusowa da naa uutazyali mucisi canu,+ alimwi ndiyoopa kuti moongole.

27 “Kamutanasika, bayoomvwa kujatikizya ndime akukankama,+ eelyo ndiyoopa kuti bantu boonse mbomuyoojana banyongane, alimwi ndiyoopa kuti basinkondonyoko boonse bamutije akaambo kakuzundwa.+ 28 Kamutanasika ndiyoopa kuti bana Hivi, bana Kanana abana Heti bakamuyoowe akumutija.+ 29 Tandikabatandi kuzwa kulindinywe mumwaka omwe, kutegwa cisi citakabi matongo akuti banyama bamusyokwe batakavwuli akutalika kumuluma.+ 30 Ndiyoobatanda asyoonto-syoonto kuzwa kulindinywe, kusikila mukazyalane akukona nyika.+

31 “Ndiyoobikka munyinza wako kuzwa ku Lwizi Lusalala kusikila kulwizi lwaba Filisiti, akuzwa kunkanda kusikila ku Mulonga wa Firate;+ nkaambo bantu bakkala munyika eeyo ndiyoobaaba mumaanza aanu, alimwi muyoobatanda kuzwa kulindinywe.+ 32 Tamweelede kupanga cizuminano ambabo naa abaleza babo.+ 33 Tabeelede kukkala mucisi canu kutegwa batamupi kundibisizya. Ikuti mukabelekele baleza babo, ncobeni eeci ciyoomubeda kakole.”+

24 Mpoonya Leza wakaambila Musa kuti: “Tanta acilundu kuli Jehova, yebo a Aroni, Nadabu a Abihu+ alimwi abaalu bamu Israyeli ibali 70, mpoonya mukotame alaale. 2 Musa alikke ngoweelede kuswena afwaafwi kuli Jehova; pele bamwi tabeelede kuswena afwaafwi alimwi bantu buyo tabeelede kutanta anguwe.”+

3 Eelyo Musa wakaunka wabaambila bantu zyoonse Jehova nzyaakamwaambila amilawo yakwe yoonse,+ mpoonya bantu boonse bakaingula antoomwe kuti: “Zyoonse nzyaamba Jehova tulazicita.”+ 4 Aboobo Musa wakalemba zyoonse nzyaakaamba Jehova.+ Mpoonya wakabuka mafwumofwumo akuyaka cipaililo munsi aacilundu akubikka misemu yamabwe iili 12 kweelana amisyobo iili 12 yabana Israyeli. 5 Mpoonya wakatuma balombwana bana Israyeli, eelyo bakatuula zituuzyo zyuumpwa akutuula ŋombe kazili zipaizyo zyalumvwano+ kuli Jehova. 6 Kumane Musa wakabweza cisela cabulowa akububikka mumitiba, eelyo cisela cimbi wakacisansaila acipaililo. 7 Mpoonya wakabweza bbuku lyacizuminano akulibala cakupozya kubantu.+ Kumane bakati: “Zyoonse nzyaamba Jehova tulazicita alimwi tulamumvwida.”+ 8 Aboobo Musa wakabweza bulowa akubasansaila bantu,+ mpoonya wakati: “Oobu mbulowa bwacizuminano Jehova ncaapanga andinywe kweelana amajwi aaya oonse.”+

9 Mpoonya Musa a Aroni, Nadabu a Abihu, alimwi abaalu bamu Israyeli ibali 70 bakatanta acilundu, 10 eelyo bakamubona Leza wa Israyeli.+ Kunsi aamaulu aakwe kwakali cakali kulibonya mbuli cibuye camabwe aasafilo aayalidwe alimwi cakali kubalangala mbuli kujulu nokutakwe makumbi.+ 11 Tanaakabanyonyoona baalumi balemekwa bamu Israyeli,+ alimwi bakabona cilengaano ca Leza mwini-mwini kumwi kabalya akunywa.

12 Lino Jehova wakati kuli Musa: “Boola acilundu mpondibede uzookkale nkukonya okuno. Ndilakupa mabwe aapapalete aajisi milawo amalailile ngonditiilembe kuti bantu bakayiisyigwe.”+ 13 Aboobo Musa antoomwe a Joshua+ sikumugwasyilizya bakaunka, eelyo Musa wakatanta acilundu ca Leza mwini-mwini.+ 14 Pele baalu wakabaambilide kuti: “Amutulindile aano mane tupiluke.+ Aroni a Huri+ bali andinywe. Kufwumbwa uujisi kaambo ulakonzya kuunka kulimbabo.”+ 15 Mpoonya Musa wakatanta acilundu kkumbi nolyakavwumbide cilundu.+

16 Lino bulemu bwa Jehova+ bwakalikkede a Cilundu ca Sinai+ alimwi kkumbi lyakacivwumba mazuba aali cisambomwe. Mpoonya mubuzuba bwaciloba wakaita Musa kuzwa mukati kakkumbi. 17 Kubana Israyeli ibakali kulangilila, bulemu bwa Jehova bwakali kulibonya mbuli mulilo uuvwilima atala aacilundu. 18 Mpoonya Musa wakanjila mukkumbi naakali kutanta acilundu.+ Eelyo Musa wakakkala acilundu mazuba aali 40, syikati amasiku.+

25 Mpoonya Jehova wakaambila Musa kuti: 2 “Kobaambila bana Israyeli kuti bandipe zyakusanga; mweelede kundiletela cakusanga kuzwa kumuntu uuli woonse iwakulwaizyigwa amoyo wakwe kundipa.+ 3 Nzyeezyi zyakusanga nzyomweelede kutambula kuzwa kulimbabo: ngolida,+ nsiliva,+ mukuba,+ 4 ntali yamubala wajulu, boya bwambelele bwamubala wacisombo, milembo iisalala pyu, amilembo mibotu myuuba-uba, boya bwampongo, 5 zikutu zyabagutu izyakanyikwa mumusila uusalala, zikutu ziteteete,* mapulanga aamuunga,+ 6 mafwuta aamumalambe,+ mafwuta aamabbona aakupangisya mafwuta aakunanika+ alimwi atununkilizyo,+ 7 amabwe aaonikisi alimwi amabwe aamwi aayelede kubikkwa kukabaki*+ kabupaizi akukasani kakwe kaacamba.+ 8 Beelede kundipangila tente lyakukombela, eelyo ndiyookkala akati kabo.+ 9 Mweelede kupanga tente lyakukombela azibelesyo zyamumo, libe mbubonya mbuli mbonditiikutondezye.+

10 “Beelede kupanga bbokesi kubelesya cisamu camuunga, tukokola* tobilo acisela mubulamfwu akakokola komwe acisela mubwamba alimwi akakokola komwe acisela kuya mujulu.+ 11 Mpoonya ukalizilulule angolida iisalalisya.+ Ukalizilulule mukati akunze alimwi weelede kupanga moombe wangolida kuzinguluka mulomo wabbokesi.+ 12 Upange ninga zyangolida zyone akuzibikka atala aamaulu aandilyo, ninga zyobilo kulubazu lumwi lwabbokesi aninga zyobilo kulubazu lumbi. 13 Alimwi upange minkulwa yacisamu camuunga akwiizilulula angolida.+ 14 Ukanjizye minkulwa muninga zili mumbali aa Bbokesi kutegwa ibe zijatizyo nomunyamuna Bbokesi. 15 Minkulwa eeyi yeelede kuti kiikkede muninga zya Bbokesi; tayeelede kugwisyigwa pe.+ 16 Uyoobubikka mu Bbokesi Bumboni oobo mbondiyookupa.+

17 “Upange civwunisyo cangolida iisalalisya, cibe tukokola tobilo acisela mubulamfwu akakokola komwe acisela mubwamba.+ 18 Weelede kupanga bakerubi bobilo bangolida; ubapange kubelesya nsando akubabikka aumwi kumamanino aacivwunisyo.+ 19 Upange bakerubi akubabikka aumwi kumamanino aamwi aacivwunisyo. 20 Bakerubi beelede kutandabika mababa aabo obilo atala, kabavwumbilide civwunisyo amababa aabo,+ alimwi beelede kuti kabalangene. Masyu aabakerubi ayelede kulanga acivwunisyo. 21 Uyoobikka civwunisyo+ atala aa Bbokesi, alimwi mu Bbokesi ukabikke Bumboni mbondiyookupa. 22 Ndiyoolitondezya kulinduwe akwaambaula anduwe atala aacivwunisyo.+ Kuzwa akati kabakerubi ibali atala aabbokesi lya Bumboni, ndiyookupa malailile oonse ngoyelede kupa bana Israyeli.

23 “Alimwi ukapange tebulu+ lyacisamu camuunga, lyeelede kuba tukokola tobilo mubulamfwu, kakokola komwe mubwamba akakokola komwe acisela kuya mujulu.+ 24 Uyoolizilulula angolida iisalalisya, akupanga moombe wangolida molili mumabali moonse. 25 Ukapange mubalo uuli aabwamba mbuli bwajanza* kuzinguluka tebulu akubikka moombe wangolida kuzinguluka mubalo. 26 Weelede kupanga ninga zyangolida zyone akuzibikka mumakkona one mumaulu aatebulu. 27 Ninga eezyo zyeelede kuti kazili afwaafwi amubalo kutegwa kamunjila minkulwa yakunyamuzya tebulu. 28 Weelede kupanga minkulwa kubelesya cisamu camuunga akwiizilulula angolida, kutegwa ibe zijatizyo nobanyamuna tebulu.

29 “Alimwi tebulu weelede kulipangila mitiba, nkapu, nongo amitiba yanindi yakubelesya kutila zituuzyo zinyugwa. Weelede kuzipanga angolida iisalalisya.+ 30 Alimwi weelede kunoobikka zinkwa zyacitondezyo atebulu kumbele lyangu ciindi coonse.+

31 “Upange cibikkilo camalambe+ cangolida iisalalisya. Cibikkilo camalambe ceelede kupangwa kubelesya nsando. Tako lyaco, musemu waco uujisi mitabi, nkapu zyaco, tunkuli twaco amaluba-luba aaco, zyoonse zinoojatene.+ 32 Alimwi mitabi iili cisambomwe yeelede kuzwa mumbazu zyacibikkilo camalambe, mitabi yotatwe kulubazu lomwe alimwi aimwi yotatwe kulubazu lumwi. 33 Kumutabi umwi aumwi uuli kulubazu lomwe kube nkapu zyotatwe izipangidwe mbuli maluba-luba aa alumondi, atunkuli katuyaabunungana amaluba-luba, alimwi akumutabi umwi aumwi uuli kulubazu lumbi kube nkapu zyotatwe izipangidwe mbuli maluba-luba aa alumondi, atunkuli katuyaabunungana amaluba-luba. Oobu mbombubo mitabi iili cisambomwe mboyeelede kuba kuzwa kumusemu wacibikkilo camalambe. 34 Kumusemu wacibikkilo camalambe kube nkapu zyone izipangidwe mbuli maluba-luba aa alumondi, atunkuli katuyaabunungana amaluba-luba. 35 Kube kankuli komwe kunsi aamitabi yobilo iisaanguna kuzwa kumusemu wacibikkilo camalambe, alimwi kube kankuli komwe kunsi aamitabi yobilo iitobela, alimwi kube kankuli komwe kunsi aamitabi yobilo kumitabi iili cisambomwe iizwa kumusemu wacibikkilo camalambe. 36 Tunkuli, mitabi amusemu wacibikkilo camalambe, zyoonse zyeelede kuti kazipangidwe acibulo comwe cangolida iisalalisya, izipangidwe kubelesya nsando.+ 37 Ucipangile malambe aali ciloba, alimwi ciindi ayasyigwa ayelede kumunika kumbele lyaco.+ 38 Lumano atwakunyamwida mulilo twaco zyeelede kuba zyangolida iisalalisya.+ 39 Ukabelesye ngolida iisalalisya iilema talenta* lyomwe kupanga cibikkilo camalambe azibelesyo zyaco. 40 Ukabone kuti wazipanga kweelana acitondezyo ncowakatondezyegwa acilundu.+

26 “Weelede kupanga tente lyakukombela+ kubelesya milembo mibotu myuuba-uba iili kkumi, ntali yamubala wajulu, boya bwambelele bwamubala wacisombo, amilembo iisalala pyu. Weelede kusuma zikozyanyo zyabakerubi+ amilembo eeyi.+ 2 Mulembo umwi aumwi watente weelede kulampa tukokola* tuli 28 alimwi mubwamba weelede kuba tukokola tone. Milembo yoonse yaatente yeelede kuti kayeelene.+ 3 Milembo yosanwe yaatente yeelede kunungwa antoomwe, alimwi aimbi iili musanu yeelede kunungwa antoomwe. 4 Weelede kupanga bufwizyo antali yamubala wajulu kumoombe wamulembo omwe wamamanino akati kamilembo iinungidwe antoomwe, alimwi weelede kucita mbubonya kumoombe wamulembo wamamanino akati kamilembo aimbi iinungidwe antoomwe, aawo mpoiyooswaanganina. 5 Ukapange bufwizyo buli 50 kumulembo omwe watente, alimwi abufwizyo buli 50 kumulembo umbi watente kutegwa kabulangene aawo milembo mpoiyooswaanganina. 6 Weelede kupanga ngobyo zyangolida zili 50 akuzibelesya kuswaanganya milembo eeyo yatente antoomwe, mpoonya tente lyakukombela liyooba lyomwe.+

7 “Alimwi ukasume milembo yaboya bwampongo+ yakupangizya tente lyakuvwumbya atala aatente lyakukombela. Ukapange milembo yatente iili 11.+ 8 Mulembo watente umwi aumwi weelede kuba tukokola tuli 30 mubulamfwu atukokola tone mubwamba. Milembo yoonse iili 11 yeelede kuti kayeelene. 9 Ukanunge milembo yaatente yosanwe antoomwe, akununga milembo yaatente iili cisambomwe antoomwe, kumane iwacisambomwe ukauvwunge kumbele lyatente. 10 Alimwi weelede kupanga bufwizyo buli 50 kumoombe wamulembo watente wamamanino akati kamilembo iinungidwe antoomwe, alimwi akucita mbubonya kumulembo watente lyamamanino akati kamilembo aimbi iinungidwe antoomwe, aawo mpoziyooswaanganina zibeela zyobilo zyamilembo. 11 Weelede kupanga ngobyo zyamukuba zili 50 akuzinjizya mubufwizyo akununga milembo yatente antoomwe, eelyo iyooba tente lyomwe. 12 Cibeela camilembo yatente iciindilila ciyoolengelela. Cisela camulembo watente ciindilila ceelede kulengelela kusyule lyatente lyakukombela. 13 Milembo iivwumbide tente lyakukombela yeelede kulengelela akusiya buyo kakokola komwe kuti isike ansi mumabali oonse obilo.

14 “Alimwi weelede kupanga cakuvwumbya tente kuzwa kuzikutu zyambelele zyakanyikwa mumusila uusalala alimwi atala aancico kube civwumbyo cazikutu ziteteete.+

15 “Weelede kupanga minsende+ yatente lyakukombela yacisamu camuunga, minsende eeyo yeelede kuti kayiimvwi.+ 16 Munsende umwi aumwi weelede kulampa tukokola tuli kkumi kuya mujulu alimwi akakokola komwe acisela mubwamba. 17 Munsende umwi aumwi weelede kuba ansumpi zyobilo iziswaanganizyidwe antoomwe. Oobu mboyelede kwiipanga minsende yoonse yatente lyakukombela. 18 Weelede kupanga minsende iili 20 yakulubazu lwakumusanza kwatente lyakukombela iilangide kumusanza.

19 “Ukapange ziimikizizyo zyaminsende zyansiliva izili 40 kunsi aaminsende+ iili 20 : ziimikizizyo zyobilo kunsi aamunsende omwe oomo imuyoonjila nsumpi zyobilo, nkokuti ziimikizizyo zyobilo kunsi aamunsende umwi aumwi imuyoonjila nsumpi zyobilo.+ 20 Kulubazu lumwi lwatente lyakukombela, ilubazu lwakunyika, ukapange minsende iili 20, 21 aziimikizizyo zyayo izili 40, ziimikizizyo zyobilo kunsi aamunsende omwe, nkokuti ziimikizizyo zyobilo kunsi aamunsende umwi aumwi. 22 Kusyule lyatente lyakukombela, kulubazu lwakumbo, ukapange minsende iili cisambomwe.+ 23 Ukapange minsende yobilo kuti ikabe misemu yamakkona obilo aakusyule kwatente lyakukombela. 24 Yeelede kuba azibeela zyobilo kuzwa ansi kusikila mujulu, kusikila kuninga yakusaanguna. Oobu mboyeelede kuba yoonse yobilo alimwi iyooba misemu yamumakkona obilo. 25 Alimwi kweelede kuba minsende iili lusele aziimikizizyo zyayo zyansiliva izili 16, ziimikizizyo zyobilo kunsi aamunsende omwe, nkokuti ziimikizizyo zyobilo kunsi aamunsende umwi aumwi.

26 “Upange minkulwa yacisamu camuunga, minkulwa yosanwe iyooba yaminsende iili kulubazu lomwe lwatente lyakukombela,+ 27 aminkulwa yosanwe iyooba yaminsende iili kulubazu lumbi lwatente lyakukombela, alimwi aminkulwa yosanwe iyooba yaminsende iili kulubazu lwakusyule kwatente lyakukombela, nkokuti lubazu lwakumbo. 28 Munkulwa waakati iwiinda akati kaminsende weelede kuba omwe kuzwa kumatalikilo kusikila kumamanino.

29 “Minsende ukaizilulule angolida,+ alimwi ninga zyayo ukazipange angolida kuti zikajate minkulwa, ayalo minkulwa ukaizilulule angolida. 30 Weelede kupanga tente lyakukombela mbubonya mbowakatondezyegwa acilundu.+

31 “Weelede kupanga cisitilizyo+ cantali yamubala wajulu, boya bwambelele bwamubala wacisombo, milembo iisalala pyu alimwi amilembo mibotu myuuba-uba. Ciyoosumwa zikozyanyo zyabakerubi alincico. 32 Weelede kucaanzika atala aamisemu yone yazisamu zyamuunga iizilulwidwe angolida. Ngobyo zyayo zyeelede kuba zyangolida. Misemu yeelede kubikkwa aziimikizizyo zyansiliva zyone. 33 Cisitilizyo eeco uyoocaanzika munsi aatujatilizyo akuleta bbokesi lya Bumboni+ mukati kacisitilizyo. Cisitilizyo ciyakwaandaanya Busena Busalala+ a Busena Busalalisya.+ 34 Weelede kubikka civwunisyo abbokesi lya Bumboni mu Busena Busalalisya.

35 “Weelede kubikka tebulu anze aacisitilizyo, akubikka cibikkilo camalambe+ kacilangene atebulu kulubazu lwakumusanza lwatente lyakukombela; eelyo tebulu uyoolibikka kulubazu lwakunyika. 36 Uyoopanga mulembo wakubikka kumulyango watente lyakukombela wantali yamubala wajulu, boya bwambelele bwamubala wacisombo, milembo iisalala pyu alimwi amilembo mibotu myuuba-uba iilukidwe antoomwe.+ 37 Uyoopanga misemu yosanwe yazisamu zyamuunga aakubikka mulembo akwiizilulula angolida. Ngobyo zyayo zyeelede kuba zyangolida alimwi uyakwiipangila ziimikizizyo zyamukuba zyosanwe.

27 “Weelede kupanga cipaililo kubelesya cisamu camuunga;+ ceelede kuba tukokola* tosanwe mubulamfwu atukokola tosanwe mubwamba. Cipaililo eeco ceelede kuba amabazu one aayelene, akulampa tukokola totatwe kuya mujulu.+ 2 Uyoopanga meja+ mumakkona aaco one; meja aayo ayelede kuti kaajisi kucipaililo, alimwi cipaililo muyoocizilulula amukuba.+ 3 Upange zibbakete mwakusowela mulota,* akupanga mafosyolo, mitiba, mfwoloko atwakunyamwida mulilo, alimwi weelede kupanga zibelesyo zyaco zyoonse amukuba.+ 4 Cipaililo ucipangile tubulo twamukuba tupataikidwe mbuli kansabwe, alimwi mumakkona aaco one ubikke ninga zyamukuba zyone. 5 Wamana utubikke kunsi aamoombe wamulomo wacipaililo, tusike mpocili akati-kati cipaililo. 6 Weelede kupanga minkulwa yacisamu camuunga iyacipaililo, akwiizilulula amukuba. 7 Minkulwa yeelede kubikkwa muninga kutegwa kiili mumabazu obilo aacipaililo nocinyamunwa.+ 8 Cipaililo ucipange mbuli bbokesi lyamapulanga ilinyina caatala acaatako. Ceelede kupangwa mbubonya Leza mbwaakakutondezya acilundu.+

9 “Weelede kupanga lubuwa+ lwatente lyakukombela. Lubuwa nkoluli kumusanza lweelede kuba amilembo yakusitilizya iilukidwe kabotu. Milembo yakulubazu lomwe yeelede kulampa tukokola tuli 100.+ 10 Lyeelede kuba amisemu iili 20 aziimikizizyo zyayo zyamukuba izili 20. Ingobyo zyamisemu atwakunungya* zyeelede kuba zyansiliva. 11 Milembo yakusitilizya yakulubazu lwakunyika ayalo yeelede kulampa tukokola tuli 100, antoomwe amisemu yayo iili 20 aziimikizizyo zyayo zyamukuba izili 20 antoomwe angobyo zyamisemu izyansiliva atwakunungya* twansiliva. 12 Milembo yamubwamba bwalubuwa, kulubazu lwakumbo, yeelede kulampa tukokola tuli 50, kiijisi amisemu iili 10 aziimikizizyo zyayo zili 10. 13 Bwamba bwalubuwa, kulubazu lwakujwe, bulampa tukokola tuli 50. 14 Kulubazu lomwe kweelede kuba milembo yakusitilizya iilampa tukokola tuli 15, kiijisi amisemu yotatwe aziimikizizyo zyayo zyotatwe.+ 15 Alimwi kulubazu lumwi kweelede kuba milembo yakusitilizya iilampa tukokola tuli 15, kiijisi amisemu yotatwe aziimikizizyo zyayo zyotatwe.

16 “Mulyango walubuwa weelede kuti kaujisi mulembo uulampa tukokola tuli 20, wantali yamubala wajulu, boya bwambelele bwamubala wacisombo, milembo iisalala pyu, milembo iilukidwe kabotu, iilukidwe antoomwe.+ Weelede kuba amisemu yone aziimikizizyo zyayo zyone.+ 17 Misemu yoonse kuzinguluka lubuwa yeelede kuba atwaanzyo twansiliva angobyo zyansiliva, pele ziimikizizyo zyayo zyeelede kuba zyamukuba.+ 18 Lubuwa lweelede kulampa tukokola tuli 100,+ tukokola tuli 50 mubwamba atukokola tuli musanu kuya mujulu. Lweelede kupangwa amilembo iilukidwe kabotu, alimwi lweelede kuba aziimikizizyo zyamukuba. 19 Zibelesyo zyoonse zibelesyegwa mumulimo waatente lyakukombela, kubikkilizya ankanka zyatente ankanka zyoonse zyalubuwa zyeelede kuba zyamukuba.+

20 “Weelede kulailila bana Israyeli kuti bakuletele mafwuta mabotu aamaolifa aatwidwe aakumunisya, kutegwa malambe kaayaka lyoonse.+ 21 Mutente lyakuswaanganina, anze aacisitilizyo cili afwaafwi a Bumboni,+ Aroni abana bakwe basankwa beelede kubikka bubambe bwakubona kuti malambe alayaka kumbele lya Jehova+ kuzwa kumangolezya kusikila mafwumofwumo. Ooyu mulawo ngobeelede kutobela bana Israyeli mumazyalani aabo oonse.+

28 “Weelede kwiita Aroni munyoko kuzwa akati kabana Israyeli antoomwe abana bakwe basankwa, kutegwa andibelekele mulimo wabupaizi+–Aroni+ antoomwe abana bakwe+ ba Nadabu, Abihu,+ Eleazara a Itamara.+ 2 Weelede kusumina Aroni munyoko zyakusama zisetekene, zibotu alimwi zyabulemu.+ 3 Weelede kubaambila basyaazibwene* boonse, aabo mbondapa muuya wabusongo,+ eelyo bayoosuma zisani zya Aroni kuti asalazyigwe kutegwa andibelekele mulimo wabupaizi.

4 “Eezyi nzyezisani nzyobeelede kusuma: kasani kabupaizi kaacamba,+ kabaki kabupaizi,+ jansi,+ cisani catubbokesi-bbokesi, citambala,+ alutambo lwamucibuno;+ beelede kusumina Aroni munyoko zisani eezyi zisetekene abana bakwe kutegwa andibelekele mulimo wabupaizi. 5 Basyaazibwene aaba bayoobelesya ngolida antali yamubala wajulu, boya bwambelele bwamubala wacisombo, mulembo uusalala pyu alimwi amulembo mubotu muuba-uba.

6 “Beelede kusuma kabaki kabupaizi kubelesya ngolida, ntali yamubala wajulu, boya bwambelele bwamubala wacisombo, milembo iisalala pyu alimwi amilembo iilukidwe kabotu, alimwi keelede kusumwa kabotu.+ 7 Keelede kuba atusani tobilo tusumidwe aamagwezyo. 8 Lutambo* lulukidwe+ lusumidwe kukabaki kabupaizi kutegwa kakaangililwa kabotu, alwalo lweelede kusumwa kubelesya: ngolida, ntali yamubala wajulu, boya bwambelele bwamubala wacisombo, mulembo uusalala pyu alimwi amulembo uulukidwe kabotu.

9 “Weelede kubweza mabwe obilo aaonikisi+ akulemba mazina aabana ba Israyeli alingawo.+ 10 Abbwe lyomwe kulembwe mazina aali cisambomwe alimwi abbwe limbi kulembwe mazina aambi aali cisambomwe, kweelana ambobakatobelana kuzyalwa. 11 Mufwuzi wamabwe weelede kulemba mazina aabana ba Israyeli amabwe obilo mbuli mbwakonzya kulemba aciganto.+ Mpoonya ukaabikke mutukkazikilo twangolida. 12 Weelede kubikka mabwe obilo kutusani twamumagwezyo twakabaki kabupaizi kutegwa abe ciibalusyo kubana ba Israyeli,+ alimwi Aroni weelede kutola mazina aabo kumbele lya Jehova kutusani twakwe tobilo twamumagwezyo. 13 Weelede kupanga tukkazikilo twangolida, 14 anketani zyobilo zyangolida iisalalisya izili mbuli ntambo,+ alimwi weelede kuzinunga kutukkazikilo.+

15 “Weelede kwaambila sikusuma kuti asume kasani kabupaizi kaacamba kalubeta.+ Kasumwe mbuli kabaki kabupaizi, kubelesya ngolida, ntali yamubala wajulu, boya bwambelele bwamubala wacisombo, mulembo uusalala pyu alimwi amulembo uulukidwe kabotu.+ 16 Kapetwa ciindi comwe, zyooko zyakasani aaka zyone zyeelede kweelana, cisela* cakakokola mubulamfwu acisela cakakokola mubwamba. 17 Weelede kubamba mizila yone yamabwe mulinkako. Mumuzila wakusaanguna ubikke bbwe lisalala pyu, lyatopazi alyaemalodi. 18 Mumuzila wabili ubikke bbwe lyanofeki, lyasafilo alyajasipa. 19 Mumuzila watatu ubikke bbwe lyaliguri, lyaagate alyamutusito. 20 Mumuzila wane ubikke bbwe lyakulusolito, lyaonikisi alyajade. Ayelede kubikkwa mutukkazikilo twangolida. 21 Mabwe ayelede kweendelana amazina aabana ba Israyeli bali 12. Abbwe limwi alimwi kweelede kulembwa zina mbuli ciganto, ibbwe limwi alimwi liiminine zina lyomwe akati kamisyobo iili 12.

22 “Weelede kupanga nketani zyoosedwe kukasani kabupaizi kaacamba izili mbuli ntambo zyangolida iisalalisya.+ 23 Weelede kupanga ninga zyangolida zyobilo akuzibikka mumakkona obilo aakasani kabupaizi kaacamba. 24 Weelede kubikka ntambo zyangolida eezyo zyobilo muninga zili mumakkona aakasani kabupaizi kaacamba. 25 Mpoonya waange mpela zyantambo zyobilo kutukkazikilo tobilo ituli atusani twamumagwezyo twakabaki kabupaizi nkokali kumbele. 26 Weelede kupanga ninga zyobilo zyangolida akuzibikka mumakkona aakasani kabupaizi kaacamba mpokali aansi mukati, mpokabambene akabaki kabupaizi.+ 27 Weelede kupanga ninga zimbi zyobilo zyangolida kumbele lyakabaki kabupaizi, ansi atusani twamumagwezyo atala aalutambo* lulukidwe, afwaafwi ampoluswaanganina akabaki kabupaizi.+ 28 Kasani kabupaizi kaacamba keelede kuti kakaangilidwe antambo zyamubala wajulu zizwa kuninga zyakasani akuyoojata kuninga zyakabaki kabupaizi. Eeci cinoopa kuti kasani kabupaizi kaacamba kakakkala kabotu kukabaki kabupaizi, atala aalutambo* lulukidwe.

29 “Aroni weelede kuti kanyamwide mazina aabana ba Israyeli akasani kabupaizi kaacamba kalubeta acamba cakwe anjila mubusena Busalala kacili ciibalusyo lyoonse kumbele lya Jehova. 30 Ubikke Urimu a Tumimu*+ mukasani kabupaizi kaacamba kalubeta, zyeelede kuba acamba ca Aroni nanjila kumbele lya Jehova, alimwi Aroni weelede kutolelezya zibelesyo eezyi zyakubelesya mukubeteka bana Israyeli acamba cakwe kumbele lya Jehova lyoonse.

31 “Weelede kusuma jansi lisamwa kunsi aakabaki kabupaizi ikubelesya buyo ntali yamubala wajulu.+ 32 Lyeelede kuti kalijisi aakunjilila mutwe mpolili akati. Sikusuma weelede kusuma moombe munsingo yoonse. Nsingo eeyo yeelede kusumwa mbuli yacibaki cankondo kutegwa itayauki. 33 Weelede kusuma mapomegranite aantali yamubala wajulu, boya bwambelele bwamubala wacisombo amilembo iisalala pyu kumoombe waco woonse, ubikke atulangu twangolida akati kamapomegranite. 34 Weelede kuzitobelanya kumoombe wajansi woonse, kalangu kangolida apomegranite, kalangu kangolida apomegranite. 35 Aroni weelede kulisama kutegwa abeleke mulimo, alimwi kulila kwatulangu kweelede kumvwigwa nanjila alimwi anazwa mu Busena Busalala kumbele lya Jehova, kutegwa atafwi.+

36 “Weelede kupanga mpande yangolida iisalalisya akulemba alinjiyo mbuli muntu mbwakonzya kulemba aciganto kuti: ‘Kusalala nkukwa Jehova.’+ 37 Weelede kuyaanga kucitambala+ akatambo kamubala wajulu; lyoonse yeelede kuba ankumo atala aacitambala. 38 Mpande eeyo inooli ankumo ya Aroni, alimwi unooli mukuli wakwe ikuti umwi wacita buteelede kujatikizya zintu zisalala,+ eezyo bana Israyeli nzyobasalazya ciindi nobazipa kazili zipego zisalala. Yeelede kuti kiili ankumo yakwe lyoonse kutegwa batambulike kuli Jehova.

39 “Weelede kusuma cisani catubbokesi-bbokesi camulembo mubotu muuba-uba, upange citambala camulembo mubotu muuba-uba alimwi alutambo lwakuluka.+

40 “Alimwi weelede kusuma zisani, ntambo alimwi azyakumutwe zyabana ba Aroni,+ kuti kabeebeka akulemekwa.+ 41 Weelede kusamika Aroni munyoko abana bakwe, alimwi weelede kubananika+ akubapa nguzu+ alimwi akubasalazya, eelyo bayooba bapaizi bangu. 42 Alimwi ubasumine zibbudula* zyamilembo mibotu kutegwa kabavwumba mantanda aabo.+ Zyeelede kuti kazizwa mucibuno kusikila muzibelo. 43 Aroni abana bakwe beelede kuti kabazisama nobanjila mutente lyakuswaanganina naa nobaunka kucipaililo kuti babeleke milimo mubusena busalala kutegwa batabisyi akufwa. Ooyu uyoomubeda mulawo walyoonse antoomwe alunyungu lwakwe luboola.

29 “Lino mboobu mboyelede kucita kutegwa ubasalazye kuti bandibelekele kabali bapaizi: Bweza mupoho uucili mwana, bagutu bobilo batajisi kampenda,+ 2 cinkwa citajisi bumena, zinkwa zibunge zitajisi bumena izijisi kapulo akati alimwi zikandidwe amafwuta, atunkwa tupapalete tunanikidwe mafwuta.+ Weelede kuzipanga afulaulu 3 akuzibikka mumutaanga+ alimwi akuzileta mumutaanga antoomwe amupoho abagutu bobilo.

4 “Ulete Aroni abana bakwe kumulyango watente lyakuswaanganina+ akubalailila kuti basambe.+ 5 Mpoonya ubweze zisani+ akusamika Aroni jansi lilamfwu, jansi lifwaafwi lisamwa kunsi aakabaki kabupaizi, kabaki kabupaizi akasani kabupaizi kaacamba, alimwi weelede kwaanga lutambo* lulukidwe ilwakabaki kabupaizi mucibuno cakwe.+ 6 Umwaange citambala kumutwe wakwe akubikka citondezyo cisetekene cakulyaaba* alincico;+ 7 alimwi ubweze mafwuta+ aakunanika akwaatila amutwe wakwe, umunanike.+

8 “Mpoonya ubalete bana bakwe afwaafwi akubasamika majansi+ 9 akwaanga Aroni abana bakwe ntambo muzibuno, akubaanga zyakumutwe; eelyo bupaizi buyooba bwabo, ooyu mulawo wangu lyoonse alyoonse.+ Oobu mboyelede kubikka Aroni abana bakwe kuti babeleke kabali bapaizi.+

10 “Lino weelede kuleta mupoho kumbele lyatente lyakuswaanganina, alimwi Aroni abana bakwe beelede kubikka maanza aabo amutwe wamupoho.+ 11 Mpoonya ujaye mupoho ooyo kubusyu bwa Jehova, amulyango watente lyakuswaanganina.+ 12 Ukombole bulowa bwamupoho amunwe wako akubulamba kumeja aacipaililo,+ eelyo bulowa boonse bwasyaala ubutile ansi aacipaililo.+ 13 Mpoonya ubweze mafwuta oonse+ aavwumbilide bula, mafwuta aakumuni alimwi ansa zyobilo amafwuta aali kulinzizyo, uzyuumpe kutegwa zisuke busi acipaililo.+ 14 Pele nyama yamupoho acikutu alimwi abufwumba bwakwe weelede kuzyuumpa anze aankambi. Ncituuzyo cazibi.

15 “Mpoonya ubweze mugutu omwe, eelyo Aroni abana bakwe beelede kubikka maanza aabo amutwe wamugutu ooyo.+ 16 Lino ujaye mugutu ooyo akubweza bulowa bwakwe akubusansaila mumabazu oonse aacipaililo.+ 17 Eelyo umutendaule muzibeela-beela akusanzya bula+ amyeendo yakwe akubikka zibeela eezyo acimwi kuceenzinyina antoomwe amutwe. 18 Weelede kuumpa mugutu woonse, kutegwa asuke busi acipaililo. Ncituuzyo cuumpwa kuli Jehova, ibweema bununkilila.+ Ncituuzyo cuumpwa amulilo kuli Jehova.

19 “Wamana ubweze mugutu uumbi, alimwi Aroni abana bakwe beelede kubikka maanza aabo amutwe wamugutu.+ 20 Lino ujaye mugutu ooyo akubweza bulowa bwakwe bumwi akubulamba kukutwi kwa Aroni kwakululyo mpokuli ansi akumatwi aabana bakwe aakululyo mpaali ansi alimwi akuzyaala zyabo zyakumaanza zyakululyo azyakumaulu aakululyo, mpoonya usansaile bulowa mumabazu oonse aacipaililo. 21 Mpoonya ubweze bulowa bumwi ibuli aacipaililo amafwuta aakunanika+ akusansaila Aroni azisani zyakwe abana bakwe azisani zyabo, kutegwa walo azisani zyakwe alimwi abana bakwe azisani zyabo basalazyigwe.+

22 “Mpoonya ubweze mafwuta aamugutu, nkokuti mucila uuli amafwuta, mafwuta aavwumbilide bula, mafwuta aakumuni, insa zyobilo amafwuta aali kulinzizyo,+ akuulu kwakululyo, nkaambo ooyu mugutu ngwakubikkwa abupaizi.+ 23 Alimwi weelede kubweza cinkwa cibunge, acinkwa cibunge cijisi kapulo akati cikandidwe amafwuta atunkwa tupapalete kuzwa mumutaanga wazinkwa zitajisi bumena izili kubusyu bwa Jehova. 24 Zyoonse weelede kuzibikka mumaanza aa Aroni amumaanza aabana bakwe, alimwi weelede kuziyumba ooku akooku kazili cituuzyo cakuyumba kubusyu bwa Jehova. 25 Mpoonya weelede kuzibweza kuzwa mumaanza aabo akuzyuumpa acipaililo, atala aacituuzyo cuumpwa kazili bweema bununkilila kuli Jehova. Ncituuzyo cuumpwa amulilo kuli Jehova.

26 “Mpoonya ubweze kaango kamugutu wakubikkwa abupaizi+ iwatuulilwa Aroni alimwi akukayumba ooku akooku kakali cituuzyo cakuyumba kuli Jehova alimwi keelede kuba caabilo cako. 27 Weelede kusalazya kaango kacituuzyo cakuyumba akuulu kwacaabilo cisetekene icayumbwa alimwi icagwisyigwa kumugutu wakubikkwa abupaizi,+ kuzwa kuli ceeco catuulilwa Aroni abana bakwe. 28 Ceelede kuba ca Aroni abana bakwe, ooyu mulawo wangu walyoonse ngobeelede kutobela bana Israyeli, nkaambo ncaabilo cisetekene, alimwi cilaba caabilo cisetekene ncobanoopa bana Israyeli.+ Ncaabilo cabo cisetekene ncobanoopa kuli Jehova kuzwa kuzipaizyo zyabo zyalumvwano.+

29 “Zisani zisalala+ zya Aroni ziyoobelesyegwa abana bakwe+ ibayoomutobela baakunanikwa akubikkwa kuba bapaizi. 30 Imupaizi kuzwa akati kabana bakwe iwamunjilila abusena bwakwe alimwi iwanjila mutente lyakuswaanganina kutegwa abeleke mubusena busalala uyoozisama mazuba aali ciloba.+

31 “Ubweze mugutu wakubikkwa abupaizi akujika nyama yakwe mubusena busalala.+ 32 Aroni abana bakwe bayoolya+ nyama yamugutu azinkwa zili mumitaanga amulyango watente lyakuswaanganina. 33 Beelede kulya zituuzyo zyakumanya milandu yabo eezyo izyakatuulwa ciindi nobakabikkwa abupaizi alimwi akubasalazya. Pele muntu uutazumizyidwe* teelede kuzilya pe, nkaambo zilasalala.+ 34 Ikuti naa nyama yacituuzyo cakubikkwa abupaizi naa cinkwa casyaala kusikila mafwumofwumo, weelede kucuumpa mumulilo.+ Taceelede kuligwa pe, nkaambo cilasalala.

35 “Oobu mboyelede kucita kuli Aroni abana bakwe kweelana azintu zyoonse nzyondakulailila. Mulimo wakubabikka kuba bapaizi weelede kukutolela mazuba aali ciloba.+ 36 Buzuba abuzuba weelede kutuula mupoho wacituuzyo cazibi cakumanya milandu, alimwi weelede kusalazya cipaililo kuzibi kwiinda mukucituulila cituuzyo cakumanya milandu akucinanika kutegwa ucisalazye.+ 37 Weelede kutola mazuba aali ciloba kutuulila cipaililo cituuzyo cakumanya milandu, alimwi weelede kucisalazya kutegwa cibe cipaililo cisalalisya.+ Kufwumbwa uuguma cipaililo uyoosalala.

38 “Nzyeezyi zintu nzyoyelede kutuula acipaililo: bagutu bobilo bamwaka omwe buzuba abuzuba ciindi coonse.+ 39 Mafwumofwumo kotuula mugutu omwe uucili mwana eelyo kumangolezya kotuula aumbi.+ 40 Mugutu wakusaanguna weelede kutuulwa antoomwe acipaanzi cakkumi caefa* yafulaulu mubotu uukandidwe acipaanzi cane cansazi* yamafwuta mabotu aamaolifa aatwidwe, alimwi acibeela cane cansazi yacituuzyo cinyugwa cawaini. 41 Mpoonya weelede kutuula mugutu wabili kumangolezya antoomwe azituuzyo zyamaila azituuzyo zinyugwa izyeelene azyamafwumofwumo. Ucituule kacili bweema bununkilila, icituuzyo cuumpwa amulilo kuli Jehova. 42 Ceelede kuba cituuzyo cuumpwa icicitwa lyoonse mumazyalani aanu oonse amulyango watente lyakuswaanganina kubusyu bwa Jehova, aawo mpondiyoolibonya kulindinywe akwaambaula anduwe.+

43 “Ndiyoolibonya abusena aawo kubana Israyeli, alimwi buyoosalazyigwa abulemu bwangu.+ 44 Ndiyoosalazya tente lyakuswaanganina alimwi acipaililo, alimwi ndiyoosalazya Aroni abana bakwe+ kuti bakandibelekele kabali bapaizi. 45 Ndiyookkala akati kabana Israyeli, alimwi ndiyooba Leza wabo.+ 46 Mubwini bayoozyiba kuti ndime Jehova Leza wabo, iwakabagwisya mucisi ca Egepita kutegwa ndikkale akati kabo.+ Ndime Jehova Leza wabo.

30 “Weelede kupanga cipaililo kuti cibe busena bwakuumpila tununkilizyo;+ ucipange kubelesya cisamu camuunga.+ 2 Ceelede kuba amabazu one aayelene, kakokola* komwe mubulamfwu amubwamba, atukokola tobilo kuya mujulu. Meja aaco ayelede kuti kaajisi kulincico.+ 3 Weelede kucizilulula angolida iisalalisya: mpocili atala, mumabali oonse alimwi aameja ancico; alimwi weelede kucipangila moombe wangolida. 4 Alimwi weelede kucipangila tuninga tobilo twangolida kumabazu obilo aalangene munsi aamoombe waco, oomu momunoonjila minkulwa yakucinyamuzya. 5 Upange minkulwa yacisamu camuunga akwiizilulula angolida. 6 Weelede kucibikka kumbele lyacisitilizyo afwaafwi abbokesi lya Bumboni,+ kumbele lyacivwunisyo icili atala lya Bumboni, aawo mpondiyoolibonya kulinduwe.+

7 “Aroni+ unakuumpa tununkilizyo+ alincinco+ kutegwa katusuka busi acipaililo, ciindi walo nabamba malambe+ lyoonse mafwumofwumo. 8 Alimwi ciindi Aroni nayasya malambe kumangolezya, weelede kuumpa tununkilizyo. Ncituuzyo catununkilizyo kuli Jehova calyoonse mumazyalani aanu oonse. 9 Tamweelede kuumpa tununkilizyo tutazumizyidwe+ nociba cituuzyo cuumpwa naa cituuzyo camaila acipaililo, alimwi tamweelede kutila cituuzyo cinyugwa alincico. 10 Ciindi comwe amwaka, Aroni weelede kumanya milandu kumeja aaco.+ Kubelesya bulowa bumwi bwacituuzyo cazibi cakumanya milandu,+ weelede kumanya milandu yacipaililo ciindi comwe amwaka mumazyalani aanu oonse. Cilasalalisya kuli Jehova.”

11 Mpoonya Jehova wakaambila Musa kuti: 12 “Ciindi nobala mweelwe wabana Israyeli,+ umwi aumwi weelede kupa cinunuzyo cabuumi bwakwe kuli Jehova ciindi nobabalwa. Ceelede kuba boobu kutegwa kutabi mapenzi aakonzya kubasikila ciindi nobabalwa. 13 Nzyeezyi umwi aumwi iwabalwa nzyayelede kupa: cisela casyekeli* kweelana acipimyo casyekeli lyamubusena busalala.+ Magera* aali 20 aleelene asyekeli lyomwe. Cisela casyekeli ncakusanga kuli Jehova.+ 14 Kufwumbwa iwabalwa uujisi myaka iili 20 akwiindilila uyoopa cakusanga kuli Jehova.+ 15 Bavwubi tabeelede kupa ziindilila, abalo bacete tabeelede kulela acisela casyekeli* nobapa cakusanga kuli Jehova cakumanya milandu kunununa maumi aanu. 16 Weelede kubweza mali aansiliva aakumanya milandu kubana Israyeli akwaapa kuti abelesyegwe kumilimo yaatente lyakuswaanganina, kutegwa abe ciibalusyo cabana Israyeli kuli Jehova, ikuti cibe cinunuzyo camaumi aanu.”

17 Eelyo Jehova wakaambila Musa kuti: 18 “Panga cakusambila camukuba acikkazikilo caco;+ mpoonya ukacibikke akati katente lyakuswaanganina acipaililo alimwi ubikke maanzi mulincico.+ 19 Aroni abana bakwe beelede kusamba oomo kumaanza akumaulu aabo.+ 20 Nobanjila mutente lyakuswaanganina naa nobaunka kucipaililo kuti babeleke milimo akutuulila Jehova zituuzyo zyuumpwa, beelede kusamba kutegwa batafwi. 21 Beelede kusamba kumaanza akumaulu aabo kutegwa batafwi, ooyu weelede kubabeda mulawo walyoonse, walo abana bakwe mumazyalani aabo oonse.”+

22 Jehova wakazumanana kwaambila Musa kuti: 23 “Mpoonya ubweze mafwuta aanunkilila kabotu: muro wamasyekeli aali 500, asinamoni uununkilila kabotu wamasyekeli aali 250, icisela camasyekeli aamuro, kalamasi uununkilila kabotu wamasyekeli aali 250, 24 alimwi akkasiya wamasyekeli aali 500 kweelana acipimyo casyekeli lyamubusena busalala,+ antoomwe ansazi* yamafwuta aamaolifa. 25 Mpoonya usanganye akupanga mafwuta aakunanika aasalala; zyeelede kusanganizyigwa kabotu.*+ Zyeelede kuba mafwuta aakunanika aasalala.

26 “Weelede kubelesya mafwuta aaya kunanika tente lyakuswaanganina+ abbokesi lya Bumboni, 27 alimwi atebulu antoomwe azibelesyo zyalyo zyoonse, cibikkilo camalambe azibelesyo zyaco, cipaililo catununkilizyo, 28 cipaililo cazituuzyo zyuumpwa azibelesyo zyaco zyoonse alimwi acakusambila acikkazikilo caco. 29 Weelede kuzisalazya kutegwa zibe zintu zisalalisya.+ Kufwumbwa uuziguma uyoosalala.+ 30 Alimwi weelede kunanika Aroni+ abana bakwe+ akubasalazya kutegwa bandibelekele milimo yabupaizi.+

31 “Ubaambile bana Israyeli kuti, ‘Aaya ayoozumanana kuba mafwuta aakunanika aasalala kulindime mumazyalani aanu.+ 32 Taayelede kunanwa amuntu buyo pe, alimwi tamweelede kupanga cintu cili coonse icikozyenye angawo kwiinda mukubelesya zintu zibelesyegwa mukupanga mafwuta aaya. Mafwuta aaya ncintu cisalala. Ayoozumanana kusalala kulindinywe. 33 Kufwumbwa uupanga mafwuta aali mbuli yaaya akwaananika muntu uutazumizyidwe,* weelede kujaigwa.’”+

34 Mpoonya Jehova wakaambila Musa kuti: “Bweza myeelwe yeelene yamafwuta aanunkilila aaya:+ sitakite, onika, kelebuna, atununkilizyo tusalala. 35 Mpoonya upange tununkilizyo;+ ubelesye tununkilizyo tusanganizyidwe kabotu* akulungwa munyo+ alimwi tweelede kuti katusalala. 36 Lino tumwi ututwe tube busu akubikka bumwi busu mumbali aa Bumboni mutente lyakuswaanganina, aawo mpondilibonya kulindinywe. Tununkilizyo ootu tweelede kuba cintu cisalalisya kulindinywe. 37 Tamweelede kubelesya tununkilizyo ntomwapanga amafwuta aaya kumilimo yanu nobeni.+ Mweelede kutubona kuti ncintu cisalala kuli Jehova. 38 Kufwumbwa muntu uulipangila tununkilizyo ituli mbuli tootu akukkomanina kununkilila kwantuto, weelede kujaigwa.”

31 Jehova wakazumanana kwaambila Musa kuti: 2 “Bona, ndasala* Bezaleli+ imwana wa Uri mwana wa Huri wamusyobo wa Juda.+ 3 Ndilamuzuzya muuya wa Leza kutegwa abe abusongo, kumvwisya aluzyibo mumilimo yoonse iibelekwa amaanza, 4 kutegwa kapanga zintu zyeebeka, zyangolida, nsiliva amukuba, 5 kabeza akunamatika mabwe,+ kapanga zintu zyamisyobo-misyobo zyakubeza.+ 6 Alimwi ndabikka sikumugwasya, Oholiabu+ mwana wa Ahisamaki wamusyobo wa Dani, alimwi ndabikka busongo mumyoyo yabaabo boonse bacibwene kumutwe,* kutegwa bapange zintu zyoonse nzyondakulailila:+ 7 tente lyakuswaanganina,+ bbokesi lya Bumboni,+ civwunisyo+ cili alindilyo, zibelesyo zyoonse zyamutente, 8 tebulu+ azibelesyo zyalyo, cibikkilo camalambe cangolida iisalalisya azibelesyo zyaco zyoonse,+ cipaililo catununkilizyo,+ 9 cipaililo cazituuzyo zyuumpwa+ azibelesyo zyaco zyoonse, cakusambila acikkazikilo caco,+ 10 zisani zilukidwe kabotu, zisani zisalala zya Aroni mupaizi, zisani zyabana bakwe ibanoobeleka milimo yabupaizi,+ 11 mafwuta aakunanika, atununkilizyo twamu Busena Busalala.+ Bayoocita zyoonse nzyondakulailila.”

12 Kuyungizya waawo Jehova wakati kuli Musa: 13 “Waambaule abana Israyeli akubaambila kuti, ‘Mweelede kuba masimpe kuti mwabamba masabata aangu,+ nkaambo ncitondezyo akati kandime andinywe mumazyalani aanu kutegwa muzyibe kuti mebo nde Jehova, ndendime nendimusalazya. 14 Mweelede kubamba Sabata, nkaambo mbuzuba busalala kulindinywe.+ Kufwumbwa uutabubambi weelede kujaigwa. Ikuti umwi wabeleka mulimo uuli woonse mubuzuba oobu, muntu ooyo weelede kujaigwa.+ 15 Mulakonzya kubeleka mumazuba aali cisambomwe, pele buzuba bwaciloba mbuzuba bwasabata bwakulyookezya cakumaninina.+ Mbuzuba busalala kuli Jehova. Kufwumbwa uubeleka mubuzuba bwa Sabata weelede kujaigwa. 16 Bana Israyeli beelede kubamba Sabata; beelede kubamba Sabata mumazyalani aabo oonse. Ncizuminano calyoonse. 17 Ncitondezyo citamani akati kandime abana Israyeli,+ nkaambo mumazuba aali cisambomwe Jehova wakalenga julu anyika, eelyo mubuzuba bwaciloba wakalyookezya akulikatalusya.’”+

18 Lino mbwaakamanina buyo kwaambaula anguwe a Cilundu ca Sinai, wakapa Musa mabwe obilo aapapalete aalembedwe Bumboni,+ imabwe aapapalete aakalembwa amunwe wa Leza.+

32 Lino bantu bakabona kuti Musa watola ciindi cilamfwu kataseluki kuzwa kucilundu.+ Aboobo bakamubunganina Aroni akumwaambila kuti: “Kotupangila leza uutiitusololele,+ nkaambo tatuzyi camucitikila Musa ooyu iwakatusololela kuzwa mucisi ca Egepita.” 2 Mpoonya Aroni wakabaambila kuti: “Amugwisye masikkiyo aangolida+ aali kumatwi aabamakaintu banu abana banu basankwa abasimbi akwaaleta kulindime.” 3 Aboobo bantu boonse bakatalika kugwisya masikkiyo aangolida aakali kumatwi aabo akwaaleta kuli Aroni. 4 Mpoonya wakabweza ngolida kulimbabo, wayeenzemuna akupanga cikozyanyo camoombe+ kwiinda mukubelesya cibelesyo cakufwuzya. Mpoonya bakatalika kwaamba kuti: “Ngooyu Leza wako, O Israyeli, iwakakugwisya mucisi ca Egepita.”+

5 Aroni naakabona boobo, wakapanga cipaililo kumbele lyaco. Mpoonya wakati: “Juunza kunooli pobwe lya Jehova.” 6 Kumane buzuba bwakatobela bakafwuma akutalika kutuula zituuzyo zyuumpwa akuleta zipaizyo zyalumvwano. Kuzwa waawo bantu bakakkala ansi kutegwa balye akunywa. Mpoonya bakanyamuka kuti balikondelezye.+

7 Jehova lino wakaambila Musa kuti: “Koya, selemuka, nkaambo bantu mbookasololela kuzwa mucisi ca Egepita, balisofwaazya.+ 8 Bafwambaana kusiya nzila njindakabalailila kuti batobele.+ Balipangila cikozyanyo camoombe wangolida alimwi akucikotamina akutuula kulincico kabati, ‘Ngooyu Leza wako, O Israyeli, iwakakugwisya mucisi ca Egepita.’” 9 Jehova wakaambila Musa kuti: “Ndabona kuti bantu aaba mbaasicinguni.*+ 10 Aboobo lino undileke ndibanyonyoone mubukali bwangu buyaka mbuli mulilo, mpoonya yebo ndilakucita kuti ube musyobo mupati.”+

11 Mpoonya Musa wakakombelezya Jehova Leza+ wakwe akwaamba kuti: “O Jehova, ino nkaambo nzi bukali bwako bupati ncobuyanda kubukila bantu bako mbowakagwisya mucisi ca Egepita ajanza lyanguzu kapati?+ 12 Bana Egepita bayakwaamba kuti, ‘Wakali amakanze mabi naakabagwisya mu Egepita. Wakali kuyanda kubajaya mumalundu akubamanizya kuzwa munyika.’+ Koleka bukali bwako bupati akucinca* muzeezo wako wakuleta lunyonyooko oolu kubantu bako. 13 Kobayeeya babelesi bako ba Abrahamu, Izaka a Israyeli, mbowakakonkezya akubaambila kuti: ‘Ndiyoovwuzya lunyungu lwanu mbuli nyenyeezi zyakujulu,+ alimwi ndiyakwiipa kulunyungu lwanu nyika eeyi yoonse njindasala, kutegwa cikabe cikono canu kukabe kutamani.’”+

14 Mpoonya Jehova wakacinca* muzeezo kujatikizya mapenzi ngaakaambide kuti ulabaletela bantu bakwe.+

15 Kumane Musa wakavwuuluka akuselemuka kuzwa acilundu kajisi mabwe obilo aapapalete aakalembedwe Bumboni.+ Mabwe aaya aapapalete akalilembedwe kumabazu oonse obilo; akalilembedwe ooku akooku. 16 Mabwe aaya aapapalete akapangwa a Leza, alimwi nguwakalemba alingawo.+ 17 Joshua naakamvwa kuyobeka kwabantu, wakaambila Musa kuti: “Kuli kuyobeka kwankondo munkambi.” 18 Pele walo Musa wakati:

19 Lino Musa mbwaakasikila buyo afwaafwi ankambi akubona moombe+ abantu bazyana, wakakalala kapati akwaasowa mabwe aapapalete ngaakajisi mumaanza aakwe akwaapwaya munsi aacilundu.+ 20 Wakabweza moombe ngobakapangide akumuumpa mumulilo akumupwayaula kusikila waba busu;+ kumane wakabumwaya busu oobo mumaanzi akubapa bana Israyeli kuti banywe.+ 21 Kuzwa waawo Musa wakaambila Aroni kuti: “Ino bantu aaba bakucita buti, icapa kuti ubape kucita cibi cipati boobu?” 22 Aroni wakaingula kuti: “Utanyemi simalelaangu. Ulizyi kabotu-kabotu kuti bantu aaba bayandisya kucita cibi.+ 23 Aboobo bakandaambila kuti, ‘Kotupangila leza uutiitusololele, nkaambo tatuzyi camucitikila Musa ooyu iwakatusololela kuzwa mucisi ca Egepita.’+ 24 Mpoonya ndakabaambila kuti, ‘Kufwumbwa uujisi ngolida iili yoonse weelede kwiigwisya akundipa.’ Eelyo ndakaisowela mumulilo kumane kwakazwa moombe ooyu.”

25 Musa wakabona kuti bantu tiibakacili kuyoowa kucita bubi, nkaambo Aroni wakabalekela kucita boobo cakuti bakasampuka kuli basinkondonyina. 26 Mpoonya Musa wakaima amulyango wankambi akwaamba kuti: “Nguni uuli kulubazu lwa Jehova? Aaboole kulindime!”+ Eelyo ba Levi boonse bakabungana kulinguwe. 27 Eelyo wakati kulimbabo: “Mboobu mbwaamba Jehova Leza wa Israyeli, ‘Umwi aumwi wanu asekke panga lyakwe mucibuno akunjila munkambi yoonse kuzwa kumulyango umwi kusikila kumulyango uumbi, akujaya mwanookwabo, simukobonyina alimwi amweenzinyina ngwayandisya.’”+ 28 Ba Levi bakacita mbwaakabaambila Musa. Aboobo, mubuzuba oobo baalumi basika ku 3,000 bakajaigwa. 29 Mpoonya Musa wakati: “Amulisalazye kutegwa mubelekele Jehova sunu, nkaambo umwi aumwi wanu wabukila mwanaakwe alimwi amwanookwabo;+ sunu ulamulongezya.”+

30 Nibwakaca Musa wakaambila bantu kuti: “Mwakacita cibi cipati kapati, lino ndilapiluka kuli Jehova ndikabone naa inga ndamukombelezezya cibi canu.”+ 31 Mpoonya Musa wakapiluka kuli Jehova akwaamba kuti: “Eelo kaka bantu aaba bacita cibi cipati! Balipangila leza wangolida!+ 32 Pele naa ulayanda kobalekelela cibi cabo;+ ikuti kakutali boobo, kolimwaya zina lyangu mubbuku lyako ndyookalemba.”+ 33 Nokuba boobo Jehova wakaambila Musa kuti: “Kufwumbwa ooyo wandibisizya, ngonguwe ngonditiimwaye mubbuku lyangu. 34 Lino koya usololele bantu kubusena mbondakakwaambila. Bona! Mungelo wangu ulamusolweda+ alimwi mubuzuba oobo mbondiyoobabeteka, ndiyoobasubula akaambo kacibi cabo.” 35 Mpoonya Jehova wakatalika kubasubula bantu akaambo kakupanga moombe, ooyo Aroni ngwaakapangide.

33 Jehova wakazumanana kwaambila Musa kuti: “Koya, uzwe kubusena oobu antoomwe abantu mbowakasololela kuzwa mucisi ca Egepita. Muunke kunyika eeyo njindakakonkezya kuli Abrahamu, Izaka a Jakobo kuti, ‘Ndiyakwiipa lunyungu lwako.’+ 2 Ndiyootuma mungelo kumbele lyanu+ akutanda bana Kanana, bana Amori, bana Heti, bana Perizi, bana Hivi abana Jebusi.+ 3 Kamuya kunyika iikunka buci amukupa.+ Pele mebo tandikokuunka akati kanu, nkaambo muli basicinguni,*+ alimwi ndilakonzya kumujaya munzila.”+

4 Ciindi bantu nobakamvwa majwi aaya aabukali, bakatalika kulila, alimwi kunyina naba omwe akati kabo iwakasama zyakulisakatizya. 5 Mpoonya Jehova wakaambila Musa kuti: “Kobaambila bana Israyeli kuti, ‘Muli basicinguni.*+ Mukaindi buyo kasyoonto ndilakonzya kwiinda akati kanu akumunyonyoona.+ Aboobo lino amusamunune zyakulisakatizya zyanu nendiciyeeya cakumucita.’” 6 Aboobo bana Israyeli bakasamununa zyakulisakatizya zyabo a Cilundu ca Horebu alimwi kuzwa waawo tiibakazisama limbi.

7 Lino Musa wakabweza tente lyakwe akuyooliimika anze aankambi, kulaale ankambi, eelyo wakalyuulika kuti nditente lyakuswaanganina. Kufwumbwa muntu wakali kuyanda kubuzya makani kuli Jehova+ wakali kuunka kutente lyakuswaanganina, ilyakali anze aankambi. 8 Lino Musa naakali kuunka kutente, bantu boonse bakali kunyamuka akwiimikila amilyango yamatente aabo, eelyo bakali kumulangisya Musa kusikila wanjila mutente. 9 Mbwaanjilila buyo mutente Musa, musumpuululu wakkumbi+ wakali kuboola akwiimikila kumulyango watente ciindi Leza naakali kubandika a Musa.+ 10 Bantu boonse nobakali kubona musumpuululu wakkumbi kawiimvwi amulyango watente, umwi aumwi wabo wakali kwiimikila akukotama amulyango watente lyakwe. 11 Jehova wakabandika mulomo mpande a Musa,+ mbubonya muntu mbwakonzya kubandika amuntunyina. Musa apiluka kunkambi, Joshua+ mwana wa Nuni, mubelesi wakwe alimwi sikumugwasyilizya,+ wakali kusyaala kutente.

12 Lino Musa wakati kuli Jehova: “Bona, undaambila kuti, ‘Kobasololela bantu aaba,’ pele tonandizyibya ngotiitume kuunka andime. Kuyungizya waawo, waamba kuti, ‘Ndilikuzyi zina,* alimwi ndakufwida luzyalo.’ 13 Eelo kaka naa wandifwida luzyalo, kondizyibya nzila zyako,+ kutegwa ndikuzyibe akuzumanana kufwidwa luzyalo mumeso aako. Alimwi koyeeya kuti eeyi nkamu mbantu bako.”+ 14 Aboobo wakati: “Mebo lwangu ndilaunka anduwe+ alimwi ndilakupa kulyookezya.”+ 15 Mpoonya Musa wakati kulinguwe: “Ikuti naa yebo tokokuunka andiswe, kotuleka tutazwi aano. 16 Ino kulazyibwa buti kuti mebo abantu bako watufwida luzyalo? Sena takuli kwiinda mukuunka antoomwe anduwe,+ kutegwa mebo abantu bako tubonwe kuti tulaandeene abantu boonse ibali munyika?”+

17 Jehova wakazumanana kwaambila Musa kuti: “Eeci ncoolomba acalo ndilacicita, nkaambo ndakufwida luzyalo alimwi ndilikuzyi zina.” 18 Mpoonya Musa wakati: “Akaka konditondezya bulemu bwako.” 19 Pele walo wakati: “Ndilakutondezya bubotu bwangu boonse alimwi ndilaambilizya zina lyangu ilyakuti Jehova;+ ndilamufwida luzyalo ooyo ngondiyanda kufwida luzyalo akumufwida luse ooyo ngondiyanda kufwida luse.”+ 20 Alimwi wakayungizya kuti: “Tokonzyi kubona busyu bwangu, nkaambo kunyina muntu uukonzya kundibona akuzumanana kupona.”

21 Jehova wakazumanana kwaamba kuti: “Mboobu busena buli afwaafwi andime. Koimikila atala aamwala. 22 Bwanakwiinda bulemu bwangu, ndilakubikka mulwaanzi lwamwala alimwi ndilakukwabilila ajanza lyangu kusikila ndiinde. 23 Ndamana kwiinda ndilagwisya janza lyangu, eelyo ulabona syule lyangu. Pele busyu bwangu tokonzyi kububona pe.”+

34 Mpoonya Jehova wakati kuli Musa: “Beza mabwe obilo aapapalete mbuli aakusaanguna,+ eelyo amabwe aayo ndilalemba majwi aakalembedwe amabwe aakusaanguna,+ aayo ngookapwaya.+ 2 Kolibambila nkaambo mafwumofwumo weelede kutanta a Cilundu ca Sinai akuyakwiima kumbele lyangu atala aacilundu.+ 3 Pele kunyina uumbi weelede kutanta antoomwe anduwe, alimwi kunyina weelede kulibonya abusena buli boonse acilundu. Noziba mbelele naa ŋombe tazyeelede kucelela afwaafwi acilundu.”+

4 Aboobo Musa wakabeza mabwe obilo aapapalete mbuli aakusaanguna alimwi mafwumofwumo wakatanta a Cilundu ca Sinai, kweelana ambwaakamulailila Jehova. Wakatolelezya amabwe obilo mujanza lyakwe. 5 Mpoonya Jehova wakaseluka+ mukkumbi akwiima anguwe aawo alimwi wakaambilizya zina lyakwe lyakuti Jehova.+ 6 Eelyo Jehova wakainda kumbele lyakwe akulyaambilizya kuti: “Jehova, Jehova, Leza siluse+ alimwi silweetelelo,*+ uutafwambaani kukalala+ alimwi uuzwide luyando+ lutamani akasimpe,*+ 7 uutondezya luyando lutamani kubantu bali zyuulu,+ uulekelela milandu, nsotoko alimwi azibi,+ nokuba boobo aabo babisya tabaleki buyo katabasubuli,+ uuleta cisubulo kubana, kubazyukulu akubazyukululwa akaambo kacibi cabamausyi.”+

8 Cakufwambaana Musa wakakotama akuvwuntama ansi. 9 Mpoonya wakati: “Kuti naa wandifwida luzyalo, O Jehova, akaka Jehova, kounka andiswe+ nokuba kuti tuli basicinguni*+ alimwi kotulekelela milandu azibi zyesu,+ ututambule tube bantu bako.” 10 Aboobo wakati: “Ndilapanga cizuminano: Ndilacita zintu zigambya kubusyu bwabantu bako boonse izitanacitikide munyika yoonse naa muzisi zyoonse,+ alimwi bantu boonse bamuzingulukide balabona milimo ya Jehova, nkaambo cintu ncenditiimucitile cilayoosya kapati.+

11 “Amubikkile maano kumajwi ngondimulailila sunu.+ Ndilabatanda kubusyu bwanu bana Amori, bana Kanana, bana Heti, bana Perizi, bana Hivi abana Jebusi.+ 12 Amucenjele kuti mutapangi cizuminano abantu bamunyika eeyo nkomuunka,+ buyo-buyo cilamubeda kakole.+ 13 Pele zipaililo zyabo mweelede kuzimwaya, misemu yabo yamabwe yakukomba mweelede kwiipwayaula alimwi amisemu yabo yazisamu yakukomba* mweelede kwiigonkaula.+ 14 Tamweelede kukotamina baleza bambi,+ nkaambo Jehova ngu Leza uuyanda* kuti kakombwa buyo alikke.* Inzya, ngu Leza uuyanda kuti kakombwa buyo alikke.+ 15 Amucenjele kuti mutapangi cizuminano abantu bamunyika eeyo, nkaambo nobacita buvwuule abaleza babo akutuula zipaizyo kuli baleza babo,+ umwi muntu inga wamutamba eelyo mulakonzya kulya cipaizyo cakwe.+ 16 Mpoonya muyoobweza bana babo bamwi basimbi akubapa kubana banu basankwa,+ eelyo bana babo basimbi bayoovwuula abaleza babo akupa bana banu basankwa kuti bavwuule abaleza babo.+

17 “Mutapangi mituni yakufwula pe.+

18 “Mweelede kusekelela Pobwe lya Zinkwa Zitajisi Bumena.+ Muyoolya zinkwa zitajisi bumena, mbubonya mbondakamulailila; kamucita oobo mazuba aali ciloba aciindi cibikkidwe mumwezi wa Abibi,*+ nkaambo wakali mwezi wa Abibi nomwakazwa mu Egepita.

19 “Boonse bana basankwa bataanzi kuzyalwa mbibangu,+ kubikkilizya ababanyama bavwubwa, babe bana baŋombe naa bambelele.+ 20 Bana bataanzi bambongolo mweelede kubanunuzya mbelele. Pele kuti tiimwamunununa, mweelede kumujaya kwiinda mukumutyola nsingo. Mweelede kumunununa mwana musankwa uuli woonse mutaanzi kuzyalwa.+ Taakwe weelede kuboola kubusyu bwangu acinkwamaanza.

21 “Mweelede kubeleka milimo mumazuba aali cisambomwe, pele mubuzuba bwaciloba mweelede kulyookezya.*+ Nomuba muciindi cakulima amuciindi cakutebula mweelede kulyookezya.

22 “Mweelede kusekelela Pobwe lya Mvwiki mwatebula wiiti wakusaanguna, alimwi a Pobwe lya Kuyobolola* kumamanino aamwaka.+

23 “Ziindi zyotatwe mumwaka, baalumi boonse ibali akati kanu beelede kulibonya kubusyu bwa Mwami mwini-mwini, Jehova, Leza wa Israyeli.+ 24 Nkaambo ndiyootanda misyobo iimbi kuzwa kulindinywe+ alimwi ndiyookomezya cilawo canu, kunyina uyoonyomenena nyika yanu mwanakuunka kuyoolibonya kuli Jehova Leza wanu ziindi zyotatwe mumwaka.

25 “Tamweelede kutuula bulowa bwacipaizyo cangu antoomwe acintu cili coonse cijisi bumena.+ Cipaizyo ca Pobwe Lyakwiindilila taceelede kuyobolwa kusikila mafwumofwumo.+

26 “Micelo mitaanzi mibotu kapati njomwakalima, mweelede kwiileta kuŋanda ya Jehova Leza wanu.+

“Tamweelede kujika kana kampongo mumukupa wabanyina.”+

27 Jehova wakazumanana kwaambila Musa kuti: “Weelede kwaalemba majwi aaya,+ nkaambo ndapanga cizuminano anduwe alimwi abana Israyeli kweelana amajwi aaya.”+ 28 Alimwi wakakkala ooko a Jehova mazuba aali 40 syikati amasiku. Tanaakalya cinkwa nokuba kunywa maanzi.+ Eelyo walo* wakalemba majwi aacizuminano amabwe aapapalete, nkokuti Milawo Iili Kkumi.*+

29 Mpoonya Musa wakaseluka kuzwa a Cilundu ca Sinai, alimwi wakalijisi amabwe aapapalete aalembedwe Bumboni mujanza lyakwe.+ Lino Musa tanaakazyi kuti busyu bwakwe bwakali kumweka akaambo kakwaambaula a Leza. 30 Lino Aroni abana Israyeli boonse nobakamubona Musa, bakabona kuti busyu bwakwe bwakali kumweka aboobo bakayoowa kuswena afwaafwi anguwe.+

31 Pele Musa wakabaita, mpoonya Aroni abasilutwe bambungano boonse bakaboola kulinguwe, eelyo wakaambaula ambabo. 32 Kumane bana Israyeli boonse bakaboola afwaafwi anguwe, mpoonya wakabapa malailile oonse Jehova ngaakamupa a Cilundu ca Sinai.+ 33 Musa wakali kulivwumba cisani kubusyu amana kwaambaula ambabo.+ 34 Pele Musa naakali kuunka kukwaambaula a Jehova, wakali kucigwisya cisani kusikila wapiluka.+ Mpoonya wakali kuunka kuyakwaambila bana Israyeli milawo njaakatambula.+ 35 Bana Israyeli bakabona kuti busyu bwa Musa bwakali kumweka; mpoonya Musa wakalivwumba alimwi kubusyu kusikila naakaunka alimwi kuyakwaambaula a Leza.+

35 Mpoonya Musa wakabunganya mbungano yoonse yabana Israyeli akubaambila kuti: “Nzyeezyi zintu Jehova nzyaalailila kuti zicitwe:+ 2 Milimo ilakonzya kucitwa mumazuba aali cisambomwe, pele bwaciloba bulaba buzuba busalala kulindinywe, mbuzuba bwasabata bwakulyookezya cakumaninina kuli Jehova.+ Kufwumbwa uubeleka mulimo mubuzuba oobu uyoojaigwa.+ 3 Mumasena aanu oonse tamweelede kukunka mulilo mubuzuba bwa Sabata.”

4 Kumane Musa wakaambila mbungano yabana Israyeli yoonse kuti: “Mboobu Jehova mbwaalailila, 5 ‘Amupe Jehova zyakusanga kuzwa akati kazintu nzyomujisi.+ Kufwumbwa muntu iwasungulwa amoyo+ wakwe aletele Jehova zyakusanga: ngolida, nsiliva, mukuba, 6 ntali yamubala wajulu, boya bwambelele bwamubala wacisombo, milembo iisalala pyu, milembo mibotu myuuba-uba, boya bwampongo,+ 7 zikutu zyabagutu zinyikidwe mumusila uusalala, zikutu ziteteete, mapulanga aamuunga, 8 mafwuta aamumalambe, mafwuta aamabbona aakunanika alimwi aatununkilizyo,+ 9 mabwe aaonikisi alimwi amabwe aambi aakubikka mukabaki kabupaizi+ amukasani kabupaizi kaacamba.+

10 “‘Bantu boonse bacibwene kumutwe*+ kupanga zintu akati kanu ababoole akupanga zintu zyoonse Jehova nzyaalailila, 11 nkokuti, tente lyakukombela antoomwe atente lyalyo acakuvwumba atala calyo, ngobyo zyalyo, minsende yalyo, minkulwa yalyo, misemu yalyo aziimikizizyo zyalyo; 12 Bbokesi+ aminkulwa+ yalyo, civwunisyo+ amulembo+ wakusitilizya; 13 tebulu,+ minkulwa yalyo azibelesyo zyalyo zyoonse alimwi azinkwa zyacitondezyo;+ 14 cibikkilo camalambe+ azibelesyo zyaco, malambe alimwi amafwuta aakumunisya;+ 15 cipaililo catununkilizyo+ aminkulwa yaco; mafwuta aakunanika atununkilizyo;+ mulembo waamulyango watente lyakukombela; 16 cipaililo cazituuzyo zyuumpwa+ atubulo twaco twamukuba tupataikidwe mbuli kansabwe, minkulwa azibelesyo zyaco zyoonse; cakusambila acikkazikilo caco;+ 17 milembo yakusitilizya lubuwa,+ misemu aziimikizizyo zyayo; mulembo waamulyango walubuwa; 18 nkanka zyatente lyakukombela ankanka zyalubuwa antambo zyazyo;+ 19 zisani zisumidwe kabotu+ zyakubelesya mubusena busalala, zisani zisalala zya Aroni+ mupaizi alimwi azisani zyabana bakwe zyabupaizi.’”

20 Aboobo mbungano yoonse yabana Israyeli yakamwaika kuzwa kubusyu bwa Musa. 21 Mpoonya boonse aabo ibakasungulwa+ akukulwaizyigwa amyoyo yabo bakaboola akuletela Jehova zyakusanga zyabo zyakubelesya mumilimo yoonse yaatente lyakuswaanganina, akusuma zisani zisalala. 22 Bakazumanana kuboola, baalumi abamakaintu, umwi aumwi kalisungwide mumoyo, bakaleta tuntu twakulibotezya, masikkiyo, nweenwe azyakulisakatizya zimbi alimwi azintu ziindene-indene zyangolida. Boonse bakapa zyakusanga* zyabo zyangolida kuli Jehova.+ 23 Alimwi boonse ibakajisi ntali yamubala wajulu, boya bwambelele bwamubala wacisombo, milembo iisalala pyu, milembo mibotu myuuba-uba, boya bwampongo, zikutu zyabagutu zinyikidwe mumusila uusalala azikutu ziteteete, bakazileta. 24 Boonse aabo ibakali kusanga nsiliva amukuba bakaleta cakusanga ca Jehova, abaabo boonse ibakajisi mapulanga aamuunga aakubelesya mumilimo iili yoonse bakaaleta.

25 Bamakaintu boonse bacibwene kumutwe+ kuluka bakali kupanga zintu zyakuluka amaanza aabo alimwi bakali kuzileta: ntali yamubala wajulu, boya bwambelele bwamubala wacisombo, milembo iisalala pyu amilembo mibotu myuuba-uba. 26 Alimwi bamakaintu boonse bacibwene kuluka ibakasungulwa amyoyo yabo bakali kuluka boya bwampongo.

27 Alimwi basilutwe bakaleta mabwe aaonikisi amabwe aamisyobo iimbi aakubikka mukabaki kabupaizi alimwi amukasani kabupaizi kaacamba,+ 28 mafwuta aamabbona, mafwuta aakumunisya, mafwuta aakunanika+ alimwi aatununkilizyo.+ 29 Bamaalumi abamakaintu boonse ibakasungulwa amyoyo yabo bakaleta zintu zyakubelesya mumulimo ooyo Jehova ngwaakalailila kwiinda muli Musa, kuti ucitwe; bana Israyeli bakazipa amoyo omwe kuli Jehova.+

30 Mpoonya Musa wakati kubana Israyeli: “Amubone, Jehova wasala Bezaleli mwana wa Uri imwana wa Huri wamusyobo wa Juda.+ 31 Wamuzuzya muuya wa Leza, kuti umupe busongo, kumvwisya alimwi aluzyibo mumilimo yoonse iibelekwa amaanza 32 kutegwa kapanga zintu zyeebeka zyangolida, nsiliva amukuba, 33 kabeza akunamatika mabwe, kapanga zintu zyakubeza zyamisyobo-misyobo izyeebeka. 34 Alimwi wamupa luzyibo lwakuyiisya, walo a Oholiabu+ mwana wa Ahisamaki wamusyobo wa Dani. 35 Wabapa busongo*+ bwakubeleka milimo yoonse iicitwa amaanza, mbuli kubotya milembo, kusuma zisani zisiyene-siyene zyantali yamubala wajulu, zyaboya bwambelele bwamubala wacisombo, milembo iisalala pyu alimwi amilembo mibotu myuuba-uba. Baalumi aaba bayoocita milimo yamisyobo yoonse akupanga zintu zyamisyobo yoonse.

36 “Bezaleli abeleke antoomwe a Oholiabu abaalumi boonse bacibwene kumutwe* kupanga zintu, aabo Jehova mbaapa busongo akumvwisya kutegwa bazyibe mboikonzya kubelekwa milimo yoonse iisetekene mbubonya Jehova mbwaalailila.”+

2 Mpoonya Musa wakaita Bezaleli, Oholiabu abaalumi boonse bacibwene kupanga zintu, aabo Jehova mbaakapa busongo mumyoyo,+ aabo boonse ibakakulwaizyigwa amyoyo yabo kuti balisungule kubeleka mulimo.+ 3 Eelyo bakabweza kuli Musa zyakusanga zyoonse+ nzyobakaleta bana Israyeli izyakubelesya mumulimo uusetekene. Nokuba boobo, bana Israyeli bakazumanana kuleta zyakusanga zinji lyoonse mafwumofwumo.

4 Mpoonya nobakautalika mulimo uusetekene, basimilimo bacibwene boonse bakali kutobelana kuboola, 5 akwaambila Musa kuti: “Bantu balimukuleta zintu zinji kwiinda mweelwe wazintu uuyandika mumulimo ooyo Jehova ngwaalailila kuti ucitwe.” 6 Aboobo Musa wakalailila kuti kwaambilizyigwe munkambi yoonse kuti: “Nobaalumi anobamakaintu, lino amuleke kuleta zintu zyamulimo uusetekene.” Aboobo bantu bakalesyegwa kuleta zintu zimbi. 7 Zintu nzyobakaleta zyakali kukkwana kumulimo woonse mane akwiindilila.

8 Aboobo basimilimo boonse bacibwene+ bakapanga tente lyakukombela+ kubelesya milembo iili kkumi. Milembo eeyi wakaipanga* amilembo iilukidwe kabotu, ntali yamubala wajulu, boya bwambelele bwamubala wacisombo, milembo iisalala pyu; wakaisuma azikozyanyo zyabakerubi.+ 9 Mulembo watente umwi aumwi wakali tukokola* tuli 28 mubulamfwu alimwi atukokola tone mubwamba. Milembo yaatente yoonse yakaleelene. 10 Mpoonya milembo yaatente yosanwe wakainunga antoomwe, alimwi aimbi iili musanu wakainunga antoomwe. 11 Kumane wakapanga bufwizyo bwantali yamubala wajulu kumoombe wamulembo omwe aawo mpoyakeelede kuswaanganina. Wakacita mbubonya oobo kumoombe wamulembo wamamanino kumilembo iimbi yosanwe aawo mpoyakeelede kuswaanganina. 12 Wakapanga bufwizyo buli 50 kumulembo omwe watente, alimwi abufwizyo buli 50 kumoombe wamulembo uumbi watente aawo milembo mpoyakeelede kuswaanganina, kutegwa bufwizyo kabulangene. 13 Kumane wakapanga ngobyo zyangolida zili 50 akuzibelesya kuswaanganya milembo eeyo yatente antoomwe, mpoonya tente lyakukombela lyakaba lyomwe.

14 Mpoonya wakapanga milembo yatente yaboya bwampongo yakupangizya tente lyakuvwumbya atala aatente lyakukombela. Wakapanga milembo yatente iili 11.+ 15 Mulembo watente umwi aumwi wakali tukokola tuli 30 mubulamfwu atukokola tone mubwamba. Milembo yatente yoonse iili 11 yakaleelene. 16 Mpoonya wakanunga milembo yatente yosanwe antoomwe, akununga milembo iimbi iili cisambomwe antoomwe. 17 Kumane wakapanga bufwizyo buli 50 kumoombe wamulembo wamamanino aawo mpoyakeelede kuswaanganina, alimwi wakapanga bufwizyo buli 50 kumoombe watente limbi ilili kumamanino aawo mpowakeelede kuswaanganina ayeeyo iimbi. 18 Mpoonya wakapanga ngobyo zyamukuba zili 50 izyakuswaanganya milembo antoomwe kutegwa ibe tente lyomwe.

19 Wakapanga cakuvwumbya tente cazikutu zyabagutu izinyikidwe mumusila uusalala acazikutu ziteteete cakuvwumba atala aancico.+

20 Mpoonya wakapanga minsende yatente lyakukombela yacisamu camuunga,+ iyakwiimikizya.+ 21 Munsende umwi aumwi wakali kulampa tukokola tuli kkumi kuya mujulu alimwi akakokola komwe acisela mubwamba. 22 Munsende umwi aumwi wakajisi nsumpi zyobilo iziswaanganizyidwe antoomwe. Oobu mbwaakapanga minsende yoonse yatente lyakukombela. 23 Aboobo wakapanga minsende yakulubazu lwakumusanza yatente lyakukombela, wakapanga iili 20 iilangide kumusanza. 24 Mpoonya wakapanga ziimikizizyo zyaminsende zyansiliva izili 40 mwakwiimikizizya minsende iili 20, ziimikizizyo zyobilo kunsi aamunsende omwe oomo imuyoonjila nsumpi zyobilo, nkokuti ziimikizizyo zyobilo kunsi aamunsende umwi aumwi imuyoonjila nsumpi zyobilo.+ 25 Kulubazu lumwi lwatente lyakukombela, ilubazu lwakunyika, wakapanga minsende iili 20 26 aziimikizizyo zyayo zyansiliva izili 40, ziimikizizyo zyobilo kunsi aamunsende omwe, nkokuti ziimikizizyo zyobilo kunsi aamunsende umwi aumwi.

27 Kusyule lyatente lyakukombela, kulubazu lwakumbo, wakapanga minsende iili cisambomwe.+ 28 Wakapanga minsende yobilo kuti ibe misemu yamakkona obilo aakusyule kwatente lyakukombela. 29 Misemu yakajisi zibeela zyobilo kuzwa ansi kusikila mujulu, kusikila kuninga yakusaanguna. Oobu mbwaakaicita misemu yobilo yamakkona. 30 Antoomwe minsende yakali lusele aziimikizizyo zyayo zyansiliva izili 16, ziimikizizyo zyobilo kunsi aamunsende umwi aumwi.

31 Mpoonya wakapanga minkulwa yacisamu camuunga yosanwe iyaminsende iili kulubazu lomwe lwatente lyakukombela+ 32 aminkulwa yosanwe yaminsende iili kulubazu lumbi lwatente lyakukombela, alimwi aminkulwa yosanwe yaminsende iili kulubazu lwakusyule kwatente lyakukombela, lubazu lwakumbo. 33 Kumane wakapanga munkulwa waakati iwiinda akati kaminsende kuzwa kumatalikilo kusikila kumamanino. 34 Minsende wakaizilulula angolida, alimwi wakaipangila ninga zyangolida kuti zijate minkulwa, eelyo minkulwa wakaizilulula angolida.+

35 Mpoonya wakapanga cisitilizyo+ cantali yamubala wajulu, boya bwambelele bwamubala wacisombo, milembo iisalala pyu alimwi amilembo iilukidwe kabotu. Wakasuma azikozyanyo zyabakerubi+ alincico.+ 36 Mpoonya wakacipangila misemu yone yazisamu zyamuunga akwiizilulula angolida, angobyo zyangolida alimwi akwiibikkila ziimikizizyo zyansiliva zyone. 37 Kumane wakapanga mulembo wakubikka amulyango watente lyakukombela wantali yamubala wajulu, boya bwambelele bwamubala wacisombo, milembo iisalala pyu alimwi amilembo iilukidwe antoomwe iyakooswa asikuluka,+ 38 alimwi amisemu yawo yosanwe angobyo zyayo. Wakazilulula angolida atala aamisemu alimwi atwakunungya* wakatuzilulula angolida, pele ziimikizizyo zyayo zyosanwe zyakali zyamukuba.

37 Mpoonya Bezaleli+ wakapanga Bbokesi+ lyacisamu camuunga. Lyakali tukokola* tobilo acisela mubulamfwu akakokola komwe acisela mubwamba akakokola komwe acisela kuya mujulu.+ 2 Wakalizilulula angolida iisalalisya mukati akunze alimwi wakapanga moombe wangolida kuzinguluka mulomo wabbokesi.+ 3 Kuzwa waawo wakalipangila ninga zyangolida zyone zyakubikka atala aamaulu aalyo, ninga zyobilo kulubazu lumwi lwabbokesi aninga zyobilo kulubazu lumbi. 4 Kumane wakapanga minkulwa yacisamu camuunga akwiizilulula angolida.+ 5 Eelyo wakanjizya minkulwa muninga zili mumbali aa Bbokesi kutegwa ibe zijatizyo zyakunyamuzya Bbokesi.+

6 Wakapanga civwunisyo cangolida iisalalisya.+ Cakali tukokola tobilo acisela mubulamfwu akakokola komwe acisela mubwamba.+ 7 Mpoonya wakapanga bakerubi bobilo+ kubelesya ngolida iifwulidwe ansando akubabikka umwi aumwi kumamanino aacivwunisyo.+ 8 Kerubi umwi wakali kumamanino aamwi aacivwunisyo eelyo umbi kumamanino aambi. Wakapanga kerubi kumamanino aamwi aacivwunisyo. 9 Bakerubi bobilo bakatandabikide mababa aabo mujulu, kabavwumbilide civwunisyo amababa aabo.+ Bakalilangene alimwi masyu aabo akalangide acivwunisyo.+

10 Mpoonya wakapanga tebulu lyacisamu camuunga.+ Lyakali tukokola tobilo mubulamfwu, kakokola komwe mubwamba akakokola komwe acisela kuya mujulu.+ 11 Wakalizilulula angolida iisalalisya akupanga moombe wangolida mumabali-bali moonse. 12 Mpoonya wakapanga mubalo uuli aabwamba mbuli bwajanza* kuzinguluka tebulu akubikka moombe wangolida kuzinguluka mubalo. 13 Kuyungizya waawo, wakapanga ninga zyangolida zyone akuzibikka mumakkona one aatebulu oomo mujatila maulu. 14 Ininga zyakali afwaafwi amubalo oomo imwakali kunjila minkulwa yakunyamuzya tebulu. 15 Mpoonya wakapanga minkulwa yacisamu camuunga akwiizilulula angolida, kuti ibe zijatizyo zyakunyamuzya tebulu. 16 Kuzwa waawo wakapanga zibelesyo zyaatebulu zyangolida iisalalisya–mitiba yalyo, nkapu, nongo, amitiba yanindi yakubelesya kutila zituuzyo zinyugwa.+

17 Mpoonya wakapanga cibikkilo camalambe+ cangolida iisalalisya. Wakapanga cibikkilo camalambe cangolida iifwulidwe ansando. Musemu waco, mitabi yaco, nkapu zyaco, tunkuli twaco amaluba-luba aaco, zyoonse zinoojatene.+ 18 Mitabi iili cisambomwe yakali kuzwa mumusemu waco, mitabi yotatwe kulubazu lomwe aimwi yotatwe kulubazu lumwi. 19 Kumutabi umwi aumwi uuli kulubazu lomwe kwakali nkapu zyotatwe izipangidwe mbuli maluba-luba aa alumondi, atunkuli tunungene amaluba-luba, alimwi akumutabi umwi aumwi uuli kulubazu lumwi kwakali nkapu zyotatwe izipangidwe mbuli maluba-luba aa alumondi, atunkuli tunungene amaluba-luba. Oobu mboyakapangwa mitabi iili cisambomwe iizwa kumusemu wacibikkilo camalambe. 20 Alimwi kumusemu wacibikkilo camalambe kwakali nkapu zyone izipangidwe mbuli maluba-luba aa alumondi, atunkuli tunungene amaluba-luba. 21 Kwakali kankuli komwe kunsi aamitabi yobilo iisaanguna kuzwa kumusemu, alimwi akankuli komwe kunsi aamitabi yobilo iitobela, alimwi akankuli komwe kunsi aamitabi yobilo yatatu, nkaambo kwakali mitabi iili cisambomwe iizwa kumusemu wacibikkilo camalambe. 22 Tunkuli, mitabi amusemu wacibikkilo camalambe zyoonse zyakapangidwe acibulo comwe cangolida iisalalisya, iifwulidwe ansando. 23 Kumane wakapanga malambe aaco aali ciloba+ alimwi alumano atwakunyamwida mulilo twaco zyangolida iisalalisya. 24 Wakapanga cibikkilo camalambe antoomwe azibelesyo zyaco zyoonse, kubelesya ngolida iisalalisya iilema talenta* lyomwe.

25 Lino wakapanga cipaililo catununkilizyo+ kubelesya cisamu camuunga. Cakali amabazu one aayelene, kakokola komwe mubulamfwu amubwamba, atukokola tobilo kuya mujulu. Meja aaco akalijisi kucipaililo.+ 26 Wakacizilulula angolida iisalalisya mpocili aatala, mumabali oonse alimwi amumeja aancico alimwi wakacipangila moombe wangolida. 27 Wakacipangila ninga zyangolida zyobilo munsi aamoombe waco kumabazu obilo aalangene imunjila minkulwa yakucinyamuzya. 28 Kumane wakapanga minkulwa yacisamu camuunga akwiizilulula angolida. 29 Alimwi wakapanga mafwuta aasalala aakunanika+ alimwi atununkilizyo tubotu,+ tusanganizyidwe kabotu.*

38 Mpoonya wakapanga cipaililo cazituuzyo zyuumpwa kubelesya cisamu camuunga. Mabazu aaco oonse akaleelene, tukokola* tosanwe mubulamfwu atukokola tosanwe mubwamba atukokola totatwe kuya mujulu.+ 2 Kumane wakapanga meja mumakkona aaco one. Meja aaco akalijisi kulincico. Mpoonya wakacizilulula amukuba.+ 3 Kuzwa waawo wakapanga zibelesyo zyoonse zyacipaililo, zibbakete mwakusowela mulota, mafosyolo, mitiba, mfwoloko atwakunyamwida mulilo. Zibelesyo zyaco zyoonse wakazipanga amukuba. 4 Alimwi cipaililo wakacipangila tubulo twamukuba tupataikidwe mbuli kansabwe, kunsi aamubalo, mpocili akati-kati cipaililo. 5 Wakabikka ninga zyone mumakkona one afwaafwi atubulo twamukuba tupataikidwe, imwakubikka minkulwa. 6 Kumane wakapanga minkulwa yacisamu camuunga akwiizilulula amukuba. 7 Wakabikka minkulwa muninga zili mumabazu aacipaililo yakucinyamuzya. Wakapanga cipaililo mbuli bbokesi lyamapulanga linyina caatala acaatako.

8 Mpoonya wakapanga cakusambila camukuba+ acikkazikilo caco; wakabelesya zimbonimboni zyabamakaintu ibakali kubeleka cabulondo amulyango watente lyakuswaanganina.

9 Kumane wakapanga lubuwa.+ Lubuwa, nkoluli kumusanza, wakapanga milembo yakusitilizya lubuwa iilukidwe kabotu alimwi iilampa tukokola tuli 100.+ 10 Kwakali misemu iili 20 aziimikizizyo zyayo zyamukuba izili 20 alimwi ngobyo zyamisemu atwakunungya twayo* zyakali zyansiliva. 11 Alimwi kulubazu lwakunyika, kwakali milembo yakusitilizya iilampa tukokola tuli 100. Misemu yayo iili 20 aziimikizizyo zyayo izili 20 zyakali zyamukuba. Ngobyo zyamisemu atwakunungya twayo* zyakali zyansiliva. 12 Pele milembo yakusitilizya lubuwa yakulubazu lwakumbo yakali kulampa tukokola tuli 50. Kwakali misemu iili 10 aziimikizizyo zyayo zili 10, alimwi ngobyo zyamisemu atwakunungya twayo* zyakali zyansiliva. 13 Kulubazu lwakujwe, milembo yakusitilizya lubuwa mubwamba yakali kulampa tukokola tuli 50. 14 Kulubazu lomwe kwakali milembo yakusitilizya iilampa tukokola tuli 15, kiijisi misemu yotatwe aziimikizizyo zyayo zyotatwe. 15 Akulubazu lumwi lwamulyango walubuwa kwakali milembo yakusitilizya iilampa tukokola tuli 15, kiijisi amisemu yotatwe aziimikizizyo zyayo zyotatwe. 16 Milembo yoonse yakusitilizya lubuwa yakali milembo iilukidwe kabotu. 17 Ziimikizizyo zyamisemu zyakali zyamukuba, ngobyo zyamisemu atwakunungya twayo* twakali twansiliva, atala aamisemu wakazilulula ansiliva alimwi kwakali twaanzyo twansiliva itwamisemu yoonse yalubuwa.+

18 Mulembo waamulyango walubuwa wakalukwa antali yamubala wajulu, boya bwambelele bwamubala wacisombo, milembo iisalala pyu, amilembo iilukidwe kabotu. Wakali tukokola tuli 20 mubulamfwu atukokola tosanwe kuya mujulu, wakaleelene amilembo yakusitilizya lubuwa mubulamfwu kuya mujulu.+ 19 Misemu yanjiyo yone azikkazikizizyo zyayo zyone zyakali zyamukuba. Ngobyo zyayo zyakali zyansiliva, eelyo mitwe yayo alimwi atwakunungya* zyakazilulwidwe ansiliva. 20 Nkanka zyatente lyakukombela zyoonse ankanka zyalubuwa izyakazingulukide zyakali zyamukuba.+

21 Eezyi nzyezintu zyakabelesyegwa mukuyaka tente lyakukombela, itente lyakukombela lya Bumboni,+ izyakalembwa kweelana ambwaakalailila Musa, kuti bazilanganye ba Levi+ ibakali kusololelwa a Itamara+ mwana wa Aroni mupaizi. 22 Bezaleli+ mwana wa Uri imwana wa Huri wamusyobo wa Juda wakacita zyoonse Jehova nzyaakalailila Musa. 23 Wakali a Oholiabu+ imwana wa Ahisamaki wamusyobo wa Dani, iwakacibwene kumutwe mumilimo iibelekwa amaanza, kusuma zisani alimwi akupanga zyakuluka zyantali yamubala wajulu, boya bwambelele bwamubala wacisombo, milembo iisalala pyu alimwi amilembo mibotu myuuba-uba.

24 Ngolida yoonse iyakabelesyegwa mumulimo uusetekene yakeelana amweelwe wangolida yacituuzyo cakuyumba,+ nkokuti matalenta* aali 29 alimwi amasyekeli* aali 730 kweelana acipimyo casyekeli lyamubusena busalala. 25 Alimwi nsiliva yabasimbungano aabo ibakabalwa yakali matalenta aali 100 alimwi amasyekeli aali 1,775 kweelana acipimyo casyekeli lyamubusena busalala. 26 Cisela casyekeli umwi aumwi ndyaakaleta cakali cisela casyekeli kweelana acipimyo casyekeli lyamubusena busalala, alimwi mweelwe wabaabo ibakabalwa ibakali amyaka iili 20 akwiinda aawo,+ wakali 603,550.+

27 Kwakabelesyegwa matalenta aali 100 kupanga ziimikizizyo zyabusena busalala alimwi aziimikizizyo zyamulembo wakusitilizya; ziimikizizyo zili 100 zyakaleelene amatalenta aali 100, italenta lyomwe kuciimikizizyo cimwi acimwi.+ 28 Wakapanga ngobyo zyamisemu ikubelesya masyekeli aali 1,775, alimwi akuzizilulula atala akuziswaanganya antoomwe.

29 Mukuba wacituuzyo* wakali matalenta aali 70 amasyekeli aali 2,400. 30 Ikubelesya mukuba ooyu wakapanga ziimikizizyo zyaamulyango watente lyakuswaanganina, cipaililo camukuba, tubulo twaco twamukuba tupataikidwe mbuli kansabwe, zibelesyo zyoonse zyacipaililo, 31 ziimikizizyo zyamisemu yalubuwa, ziimikizizyo zyaamulyango walubuwa, ankanka zyatente lyakukombela zyoonse alimwi ankanka+ zyalubuwa zyoonse.

39 Kubelesya ntali yamubala wajulu, boya bwambelele bwamubala wacisombo amilembo iisalala pyu,+ bakasuma zisani zibotu kapati zyakubelesya mubusena busalala. Bakasuma zisani zisalala zya Aroni,+ mbubonya Jehova mbwaakalailila Musa.

2 Wakasuma kabaki kabupaizi+ kubelesya ngolida, ntali yamubala wajulu, boya bwambelele bwamubala wacisombo, milembo iisalala pyu alimwi amilembo iilukidwe kabotu. 3 Mpoonya bakoonda ngolida mane yapapalala, kumane bakaitendaula kuba ntali yakusuminizya antoomwe antali yamubala wajulu, boya bwambelele bwamubala wacisombo, milembo iisalala pyu amilembo mibotu myuuba-uba, eelyo bakailuka kabotu. 4 Bakasuma tusani twakabaki kabupaizi, eelyo tusani ooto twakabikkwa mumagwezyo. 5 Alimwi lutambo* lulukidwe, ilwakasumidwe kukabaki kabupaizi kutegwa kakaangililwa kabotu,+ alwalo lwakasumwa mbubonya kubelesya ngolida, ntali yamubala wajulu, boya bwambelele bwamubala wacisombo, milembo iisalala pyu alimwi amilembo iilukidwe kabotu, mbubonya Jehova mbwaakalailila Musa.

6 Mpoonya bakabikka mabwe aaonikisi mutukkazikilo twangolida alimwi amabwe aayo bakalemba mazina aabana ba Israyeli mbubonya mbobakali kulemba aciganto.+ 7 Wakabikka tukkazikilo twangolida kutusani twamumagwezyo twakabaki kabupaizi kutegwa cibe ciibalusyo kubana ba Israyeli,+ mbubonya Jehova mbwaakalailila Musa. 8 Mpoonya wakasuma kasani kabupaizi kaacamba,+ wakakasuma kabotu mbuli kabaki kabupaizi kubelesya ngolida, ntali yamubala wajulu, boya bwambelele bwamubala wacisombo, mulembo uusalala pyu alimwi amulembo uulukidwe kabotu.+ 9 Kasani aaka naa kavwungwa ciindi comwe, zyooko zyako zyone zyakali kweelana. Bakapanga kasani kaacamba ikakali azyooko zyeelene kuti kavwungwa, cisela cakakokola mubulamfwu acisela cakakokola mubwamba.* 10 Mpoonya bakabamba mizila yamabwe yone mulinkako. Mumuzila wakusaanguna bakabikka bbwe lisalala pyu, lyatopazi alyaemalodi. 11 Mumuzila wabili bakabikka bbwe lyanofeki, lyasafilo alyajasipa. 12 Mumuzila watatu mwakali bbwe lyaliguri, lyaagate alyamutusito. 13 Eelyo mumuzila wane mwakali bbwe lyakulusolito, lyaonikisi alyajade. Akabikkwa mutukkazikilo twangolida. 14 Mabwe akali kweendelana amazina aabana ba Israyeli bali 12 alimwi mazina akalembwa mbuli ciganto, izina limwi alimwi lyakali kwiiminina musyobo omwe akati kamisyobo iili 12.

15 Mpoonya bakapanga nketani zyoosedwe kukasani kabupaizi kaacamba izili mbuli ntambo zyangolida iisalalisya.+ 16 Eelyo bakapanga tukkazikilo twangolida tobilo aninga zyangolida zyobilo akubikka ninga eezyo mumakkona obilo aakasani kabupaizi kaacamba. 17 Kumane bakabikka ntambo zyangolida eezyo zyobilo muninga zili mumakkona aakasani kabupaizi kaacamba. 18 Mpoonya bakaanga mpela zyantambo zyobilo kutukkazikilo tobilo ituli atusani twamumagwezyo twakabaki kabupaizi nkokali kumbele. 19 Kumane bakapanga ninga zyobilo zyangolida akuzibikka mumakkona aakasani kabupaizi kaacamba mokali mukati, kulubazu lulangene akabaki kabupaizi.+ 20 Mpoonya bakapanga ninga zimbi zyobilo zyangolida kumbele kwakabaki kabupaizi kunsi kwatusani tobilo twamumagwezyo, atala aalutambo* lulukidwe afwaafwi ampoluswaanganina akabaki kabupaizi. 21 Kumane kasani kabupaizi kaacamba bakakaanga antambo zyamubala wajulu zizwa kuninga zyakasani akuyoojata kuninga zyakabaki kabupaizi, kutegwa kakakkala kabotu kukabaki kabupaizi atala aalutambo* lulukidwe, mbubonya Jehova mbwaakalailila Musa.

22 Kuzwa waawo wakasuma jansi lisamwa kunsi aakabaki kabupaizi ikubelesya buyo ntali yamubala wajulu.+ 23 Insingo yajansi eeli yakali akati mbuli yacibaki cankondo. Yakajisi moombe kutegwa itayauki. 24 Kumane mumoombe walyo waansi bakasuma mapomegranite aantali yamubala wajulu, boya bwambelele bwamubala wacisombo amilembo iisalala pyu, bakailuka antoomwe. 25 Alimwi bakapanga tulangu twangolida iisalalisya akutubikka akati kamapomegranite kumoombe woonse wajansi lifwaafwi; 26 Bakazitobelanya mumoombe woonse wajansi lifwaafwi lyakubelesya mumilimo, kalangu kangolida apomegranite, kalangu kangolida apomegranite, mbubonya Jehova mbwaakalailila Musa.

27 Alimwi bakasuma zisani zyatubbokesi-bbokesi zyamilembo mibotu myuuba-uba, zyakasumwa asikuluka, izya Aroni abana bakwe,+ 28 acitambala+ camulembo mubotu, azyakumutwe+ zyeebeka zyamilembo mibotu, azibbudula*+ zyamilembo iilukidwe kabotu, 29 alimwi alutambo lwamucibuno lwamulembo uulukidwe kabotu, ntali yamubala wajulu, boya bwambelele bwamubala wacisombo, amulembo uusalala pyu zisumidwe antoomwe mbubonya Jehova mbwaakalailila Musa.

30 Kumane bakapanga mpande iiŋaima yangolida iisalalisya, icitondezyo cisetekene cakulyaaba,* akulemba alinjiyo mbuli muntu mbwakonzya kulemba aciganto kuti: “Kusalala nkukwa Jehova.”+ 31 Mpoonya bakaibikkila katambo ikantali yamubala wajulu kakuyaanzya kucitambala, mbubonya Jehova mbwaakalailila Musa.

32 Aboobo milimo yoonse yatente lyakukombela, itente lyakuswaanganina, yakamanizyigwa alimwi bana Israyeli bakacita zyoonse Jehova nzyaakalailila Musa.+ Bakacita mbubonya oobo.

33 Mpoonya bakaleta tente lyakukombela+ kuli Musa, itente+ azibelesyo zyalyo zyoonse: ngobyo zyalyo,+ minsende yalyo,+ minkulwa yalyo,+ misemu yalyo aziimikizizyo zyalyo;+ 34 cakuvwumbya tente cazikutu zyabagutu zinyikidwe mumusila uusalala+ acazikutu ziteteete, mulembo wakusitilizya;+ 35 bbokesi lya Bumboni, minkulwa+ yalyo acivwunisyo;+ 36 tebulu, zibelesyo zyalyo+ zyoonse azinkwa zyacitondezyo; 37 cibikkilo camalambe cangolida iisalalisya,+ malambe aaco, mulongo wamalambe aaco, azibelesyo zyaco+ zyoonse alimwi amafwuta aakumunisya;+ 38 cipaililo+ cangolida, mafwuta aakunanika,+ tununkilizyo,+ mulembo+ waamulyango watente; 39 cipaililo camukuba,+ tubulo twaco twamukuba tupataikidwe,+ minkulwa yaco, azibelesyo zyaco zyoonse,+ cakusambila acikkazikilo caco;+ 40 milembo yakusitilizya lubuwa, misemu yandulo aziimikizizyo zyandulo,+ mulembo+ waamulyango walubuwa, ntambo zyatente ankanka zyandulo+ azibelesyo zyoonse zyamutente lyakukombela, izyamutente lyakuswaanganina; 41 zisani zilukidwe kabotu zyakubelesya mutente lyakukombela, zisani zisalala zya Aroni mupaizi+ alimwi azisani zyabana bakwe zyabupaizi.

42 Bana Israyeli bakacita milimo yoonse mbubonya Jehova mbwaakalailila Musa.+ 43 Lino Musa naakalingula milimo yoonse njobakacita, wakajana kuti bakaicita mbubonya mbuli Jehova mbwaakalailila; kumane Musa wakabalongezya.

40 Mpoonya Jehova wakati kuli Musa: 2 “Mubuzuba bwakusaanguna bwamwezi wakusaanguna, weelede kwiimika tente lyakukombela, itente lyakuswaanganina.+ 3 Ubikke bbokesi lya Bumboni mukati+ akulisitilizya acisitilizyo.+ 4 Ulete tebulu+ mukati akubikka zintu zikkala alindilyo, alimwi ulete acibikkilo camalambe+ akumunika malambe aaco.+ 5 Mpoonya ubikke cipaililo cangolida catununkilizyo+ kumbele lya bbokesi lya Bumboni alimwi ubikke mulembo waamulyango watente lyakukombela.+

6 “Weelede kubikka cipaililo cazituuzyo zyuumpwa+ kumbele aamulyango watente lyakukombela, itente lyakuswaanganina, 7 alimwi ubikke cakusambila akati katente lyakuswaanganina acipaililo akubikka maanzi mulincico.+ 8 Mpoonya ubambe lubuwa+ kuzinguluka tente lyakuswaanganina akubikka mulembo+ waamulyango walubuwa. 9 Wamana ubweze mafwuta aakunanika+ akunanika tente lyakukombela azintu zyoonse zili mumo,+ alimwi akulisalazya azibelesyo zyalyo zyoonse, kutegwa libe cintu cisetekene. 10 Weelede kunanika cipaililo cazituuzyo zyuumpwa azibelesyo zyaco zyoonse alimwi akusalazya cipaililo kutegwa cibe cipaililo cisalalisya.+ 11 Wamana unanike cakusambila acikkazikilo caco akucisalazya.

12 “Mpoonya umulete Aroni abana bakwe kufwaafwi amulyango watente lyakuswaanganina akubalailila kuti basambe.+ 13 Alimwi weelede kumusamika Aroni zisani zisalala,+ kumunanika akumusalazya,+ eelyo uyoondibelekela kali mupaizi. 14 Wamana ubalete bana bakwe afwaafwi akubasamika zisani.+ 15 Weelede kubananika mbubonya mbookananika bausyi,+ kutegwa bandibelekele kabali bapaizi, alimwi akaambo kakunanikwa kwabo bayoopegwa coolwe cakuba bapaizi lyoonse mumazyalani aabo oonse.”+

16 Musa wakacita zyoonse Jehova nzyaakamulailila.+ Wakacita mbubonya oobo.

17 Mumwezi wakusaanguna mumwaka wabili, mubuzuba bwakusaanguna bwamwezi, tente lyakukombela lyakaimikwa.+ 18 Musa naakali kwiimika tente lyakukombela, wakabikka ziimikizizyo+ zyalyo ansi, waimika minsende,+ wabikka minkulwa yalyo+ akwiimika misemu yalyo. 19 Mpoonya wakavwumba tente atala aatente+ lyakukombela akubikka cakuvwumbya+ atala aatente eelyo, mbubonya Jehova mbwaakalailila Musa.

20 Kumane wakabweza Bumboni+ akububikka mu Bbokesi+ alimwi wakabikka minkulwa+ yalyo akubikka civwunisyo+ atala aa Bbokesi.+ 21 Mpoonya wakaleta Bbokesi mutente lyakukombela akubikka cisitilizyo+ ikusitilizya bbokesi lya Bumboni,+ mbubonya Jehova mbwaakalailila Musa.

22 Kuzwa waawo wakabikka tebulu+ mutente lyakuswaanganina, itente lyakukombela nkolili kunyika, aanze lyacisitilizyo, 23 alimwi wakabikka zinkwa+ alindilyo kubusyu bwa Jehova, mbubonya Jehova mbwaakalailila Musa.

24 Wakabikka cibikkilo camalambe+ mutente lyakuswaanganina kumbele lyatebulu, kulubazu lwakumusanza kwatente lyakukombela. 25 Eelyo wakayasya malambe+ kubusyu bwa Jehova, mbubonya Jehova mbwaakalailila Musa.

26 Kuzwa waawo wakabikka cipaililo cangolida+ mutente lyakuswaanganina kumbele lyacisitilizyo, 27 kutegwa aumpe tununkilizyo+ alincico,+ mbubonya Jehova mbwaakalailila Musa.

28 Kumane wakabikka mulembo+ waamulyango watente lyakukombela.

29 Wakabikka cipaililo cazituuzyo zyuumpwa+ kumulyango watente lyakukombela, itente lyakuswaanganina, kutegwa atuule zituuzyo zyuumpwa+ azituuzyo zyamaila alincico, mbubonya Jehova mbwaakalailila Musa.

30 Mpoonya wakabikka cakusambila akati katente lyakuswaanganina acipaililo akubikka maanzi aakusamba mulincico.+ 31 Musa a Aroni abana bakwe bakasamba kumaanza akumaulu aalincico. 32 Lyoonse nobakali kunjila mutente lyakuswaanganina naa kuunka kucipaililo, bakali kusamba+ mbubonya Jehova mbwaakalailila Musa.

33 Kumane wakabamba lubuwa+ kuzinguluka tente lyakukombela alimwi acipaililo akubikka mulembo waamulyango walubuwa.+

Aboobo Musa wakaumanizya mulimo. 34 Eelyo kkumbi lyakatalika kuvwumba tente lyakuswaanganina alimwi bulemu bwa Jehova bwakazuzya tente lyakukombela.+ 35 Musa tanaakali kukonzya kunjila mutente lyakuswaanganina nkaambo kkumbi lyakalikkede atala alimwi bulemu bwa Jehova bwakazuzya tente lyakukombela.+

36 Mulweendo lwabo loonse, kkumbi nolyakali kunyamuka kuzwa atente lyakukombela, bana Israyeli bakali kunyamuka akweenda.+ 37 Nokuba boobo, kuti kkumbi tiilyanyamuka, abalo tiibakali kunyamuka mane kusikila buzuba nolyanyamuka.+ 38 Nkaambo kkumbi lya Jehova lyakali atente lyakukombela masyikati, eelyo masiku kwakali kuba mulilo alindilyo alimwi bana Israyeli boonse bakali kuzibona eezyi mulweendo lwabo loonse.+