AMOSI
1 Ngaaya majwi aa Amosi,* umwi wabeembezi bambelele ibazwa ku Tekowa,+ ngaakaambilwa mucilengaano kujatikizya Israyeli kumazuba aa Mwami Uziya+ wa Juda amumazuba aa Jeroboamu+ mwana wa Joasi,+ mwami wa Israyeli, kakucili myaka yobilo kuti kuzungaana kwanyika kucitike.+ 2 Wakaamba kuti:
“Jehova uyoovwuluma mu Ziyoni,
Uyakoongolola ajwi lyakwe mu Jerusalemu.
Macelelo aabeembezi ayoolila,
Aalo atala aacilundu ca Karimeli ayooyuma.”+
3 “Mboobu mbwaamba Jehova,
‘“Akaambo kamilandu yotatwe yabuzangi bwa Damasiko, inzya akaambo kamilandu yone, tandikaleki kubauma,
Akaambo kakuti bakaziya Gileadi azilayi zyabutale zyakuumya maila.+
5 Ndiyootyola mpingizyo zyamilyango ya Damasiko;+
Ndiyoonyonyoona bantu bakkala mu Bikati-aveni
Amweendelezi* waku Bete-edeni;
Bantu baku Siriya bayootolwa mubuzike ku Kiri,”+ mbwaamba Jehova.’
6 Mboobu mbwaamba Jehova,
‘“Akaambo kamilandu yotatwe yabuzangi bwa Gaza,+ inzya akaambo kamilandu yone, tandikaleki kubauma,
Akaambo kakuti bakatola nkamu yabaange+ yoonse kuti bakaabwe mumaanza aa Edomu.
7 Aboobo ndiyootuma mulilo kubwaanda bwa Gaza,+
Eelyo uyakuumpa ngazi zyanguwo zikwabilidwe.
8 Ndiyoojaya bantu bakkala mu Asidodi,+
Amweendelezi* waku Asikeloni;+
Ndiyakuuma Ekroni+ ajanza lyangu,
Abalo basyeede bamu Filisiti bayooloba,”+ mbwaamba Mwami Singuzuzyoonse Jehova.’
9 Mboobu mbwaamba Jehova,
‘Akaambo kamilandu yotatwe yabuzangi bwa Turo,+ inzya akaambo kamilandu yone, tandikaleki kubauma,
Akaambo kakuti bakaaba nkamu yoonse yabaange mumaanza aa Edomu,
Alimwi akaambo kakuti tiibakayeeya cizuminano cabanabokwabo.+
10 Aboobo ndiyootuma mulilo kubwaanda bwa Turo,
Eelyo uyakuumpa ngazi zyanguwo zikwabilidwe.’+
11 Mboobu mbwaamba Jehova,
‘Akaambo kamilandu yotatwe yabuzangi bwa Edomu,+ inzya akaambo kamilandu yone, tandikaleki kubauma,
Nkaambo wakatandaanya mwanookwabo apanga,+
Alimwi akaambo kakuti wakakaka kutondezya luse;
Cabukali uluujisi kubazazaula cakutaleka,
Alimwi ulinyemede akaambo kambabo ciindi coonse.+
13 Mboobu mbwaamba Jehova,
‘“Akaambo kamilandu yotatwe yabuzangi bwabana Amoni,+ inzya akaambo kamilandu yone, tandikaleki kubauma,
Akaambo kakuti bakaandula mada aabamakaintu bamitide baku Gileadi, kutegwa bakomezye cilawo cabo.+
14 Aboobo ndiyoodoneka mulilo kubwaanda bwa Raba,+
Eelyo uyakuumpa ngazi zyanguwo zikwabilidwe,
Aloongololo lwankondo mubuzuba bwankondo,
Amuwo uubbubbula canguzu mubuzuba bwaguwo pati.
15 Alimwi mwami wabo uyootolwa mubuzike antoomwe abasilutwe bakwe,”+ mbwaamba Jehova.’
2 “Mboobu mbwaamba Jehova,
‘“Akaambo kamilandu yotatwe yabuzangi bwa Moabu,+ inzya akaambo kamilandu yone, tandikaleki kubauma,
Akaambo kakuti wakaumpa mafwuwa aamwami wa Edomu kutegwa apange mulambo uutuba.
2 Aboobo ndiyootuma mulilo ku Moabu, eelyo uyakuumpa ngazi zikwabilidwe zyaku Kerioti;+
Moabu uyoofwa nokunooli manyongwe,
Loongololo lwankondo, akulila kwamweembo.+
3 Ndiyoogwisya mweendelezi* mukati kakwe
Akujaya basilutwe bakwe boonse antoomwe amweendelezi ooyo,”+ mbwaamba Jehova.’
4 Mboobu mbwaamba Jehova,
‘Akaambo kamilandu yotatwe yabuzangi bwa Juda,+ inzya akaambo kamilandu yone, tandikaleki kubauma,
Akaambo kakuti bakaukaka mulawo* wa Jehova,
Alimwi akaambo kakuti tiibakaatobela malailile aakwe;+
Pele bubeji mbubonya mbubakali kutobela bamausyi bwabapa kusweeka.+
6 Mboobu mbwaamba Jehova,
‘Akaambo kamilandu yotatwe yabuzangi bwa Israyeli,+ inzya akaambo kamilandu yone, tandikaleki kubauma,
Akaambo kakuti basambala bantu baluleme kuti bajane nsiliva,
Alimwi basambala bantu bacete kuti bajane mpato zyobilo buyo.+
Musankwa abausyi ibakamuzyala beenda amusimbi omwe,
Aboobo basofwaazya zina lyangu lisalala.
8 Kumbali aazipaililo zyoonse,+ balalandabala aazisani nzyobakanyanga bamwi kazili cisyomezyo cakubbadelela cikwelete;+
Alimwi waini ngobanywa kuŋanda* yabaleza babo bakaujana kubantu mbobakabbadelesya.’
9 ‘Pele ndime ndakanyonyoona muna Amori wakali kumbele lyabo,+
Ooyo iwakali mulamfwu mbuli zisamu zyakkedari, alimwi iwakajisi nguzu mbuli masamu mapati;
Ndakanyonyoona micelo yakwe yakali kujulu alimwi amiyanda yakwe yakali kunsi.+
10 Nywebo ndakamugusya mucisi ca Egepita,+
Akumweenzya munkanda myaka iili 40,+
Kutegwa mukone cisi camuna Amori.
Sena tabusyi oobo, nobana Israyeli?’ mbwaamba Jehova.
12 ‘Pele nywebo mwakazumanana kupa ba Naziri waini kuti banywe,+
Abalo basinsimi mwakabalailila kuti: “Tamweelede kusinsima pe.”+
13 Aboobo ndilamupwaya mubusena bwanu,
Mbubonya mbuli ŋola iizwide maila aatebulwa mboipwaya zili kunsi aanjiyo.
14 Muntu silubilo uyoobula kwakutijila,+
Imuntu singuzu uyoomaninwa nguzu,
Alimwi kunyina sikalumamba uuyoofwutula buumi bwakwe.
15 Sibuta takazumanani kwiima nji,
Silubilo wamaulu takafwutuki pe,
Awalo muntu weendela aabbiza takafwutuli buumi bwakwe.
16 Naba sicamba kapati akati kabasikalumamba
Uyootija amantanda mubuzuba oobo,’+ mbwaamba Jehova.”
3 “Amumvwe jwi eeli ndyaamba Jehova kujatikizya ndinywe, nywebo nobana Israyeli, kujatikizya musyobo woonse ngondakagwisya mucisi ca Egepita:
2 ‘Nywebo ndendinywe nyolikke mbondizyi akati kamisyobo yoonse yaanyika.+
Nkakaambo kaako ndiyoomusubula akaambo kazinyonyoono zyanu zyoonse.+
3 Sena bantu bobilo inga beenda antoomwe ikuti tiibapangana kuti baswaangane?
4 Sena syuumbwa inga wavwuluma musyokwe ikuti katajisi munyama ngwaaluma?
Sena syuumbwa uucili mwana inga walila mubusena mwayubide ikuti kunyina cintu ncaajata?
5 Sena kayuni inga kacegwa mukakole ikuti kakunyina wateya?*
Sena kakole inga kalebuka* ikuti kakunyina cacegwa?
6 Ikuti kwalizyigwa mweembo mumunzi, sena bantu inga tiibakankama?
Ikuti kwacitika mapenzi mumunzi, sena tali Jehova wabweza ntaamu?
7 Nkaambo Mwami Singuzuzyoonse Jehova taciti cintu cili coonse
Kakunyina kusaanguna kubayubunwida maseseke aakwe babelesi bakwe basinsimi.+
8 Ikuti syuumbwa wavwuluma,+ ino nguni uutakonzyi kuyoowa?
Ikuti Mwami Singuzuzyoonse Jehova waamba, ino nguni uutakonzyi kusinsima?’+
9 ‘Amucaambilizye eeci kungazi zikwabilidwe zyaku Asidodi
Alimwi akungazi zikwabilidwe zyamucisi ca Egepita.
Amwaambe kuti: “Amubungane antoomwe mulibambile kulwana malundu aa Samariya;+
Amubone manyongwe aali mukati kanguwo
Amicito yakuunina iicitwa mulinguwo.+
10 Nkaambo tabacizyi kucita cintu ciluleme,” mbwaamba Jehova,
“Aabo ibayobola bugwebenga alunyonyooko mungazi zyabo zikwabilidwe.”’
11 Aboobo mboobu mbwaamba Mwami Singuzuzyoonse Jehova,
‘Sinkondo uyoocizinguluka cisi,+
Uyookunyanga nguzu nzyojisi,
Azyalo ngazi zyako zikwabilidwe ziyoosaalwa.’+
12 Mboobu mbwaamba Jehova,
‘Mbubonya mweembezi mbwakwempa myeendo yobilo naa cibeela cakutwi kuzwa kumulomo wasyuumbwa,
Mbombubo mbobayookwempwa abalo bana Israyeli,
Aabo lino ibakkede mu Samariya aamalo mabotu kapati alimwi aazyuuno zibotu kapati.’*+
13 ‘Amuswiilile akubacenjezya* bamuŋanda ya Jakobo,’ mbwaamba Mwami Singuzuzyoonse Jehova, Leza wamakamu.
14 ‘Nkaambo mubuzuba mbondiyoomusubula Israyeli akaambo kabuzangi* bwakwe boonse,+
Ndiyoozinyonyoona azipaililo zyaku Beteli;+
Meja aacipaililo ayookompolwa alimwi ayoowida ansi.+
15 Ndiyoopwaya ŋanda yamupeyo antoomwe aŋanda yamainza.’
4 “Amumvwe jwi eeli nywebo nompwizi zyaku Basani,
Nywebo nomuli atala aacilundu ca Samariya,+
Nywebo nobamakaintu nomuunina bantu bapengede+ akupwayaula bacete,
Nomwaambila balumi banu* kuti, ‘Amutuletele cakunywa tunywe!’
2 Mwami Singuzuzyoonse Jehova wakonka mubusalali bwakwe kuti,
‘“Amubone! Mazuba ayoomusikila nywebo eelyo nayakumooba angobyo zyakwaanzikila nyama,
Mpoonya nywebo nobamwi nomuyoosyaala uyoomuloba atulobyo.
3 Muyoozwida muzipulo zyakubwaanda, umwi aumwi wanu uyoogama buyo kumbele;
Mpoonya muyoosowelwa ku Harmoni,” mbwaamba Jehova.’
5 Amuumpe cipaizyo cakulumba cacinkwa cijisi bumena;+
Amuzyaambilizye ajwi lipati zituuzyo zyanu zyakuliyandila!
Nkaambo eeco ncencico ncimuyanda kucita, nywebo nobana Israyeli,’ mbwaamba Mwami Singuzuzyoonse Jehova.
6 ‘Mebo ndakapa kuti meno aanu abule tombe akaambo kakubula cakulya muminzi yanu yoonse
Alimwi ndakapa kuti kubule cakulya mumaanda aanu oonse;+
Pele tiimwakapiluka kulindime,’+ mbwaamba Jehova.
7 ‘Kunze lyaboobo, ndakamwiima mvwula nokwakacili myezi yotatwe kuti ciindi cakutebula cisike;+
Ndakapa kuti mvwula iwe mumunzi umwi, pele kutali mumunzi uumbi.
Muunda umwi wakali kuwidwa mvwula,
Pele muunda uumbi iwatakali kuwidwa mvwula wakali kuyuma.
8 Bantu bamuminzi yobilo naa yotatwe bakali kudadalika kuya kumunzi omwe kuti bakanywe maanzi,+
Alimwi tiibakali kukkuta pe;
Pele tiimwakapiluka kulindime,’+ mbwaamba Jehova.
9 ‘Ndakamuumya muwo uupya kapati alimwi angubi.+
Mwakavwuzya myuunda yanu yamicelo alimwi amyuunda yamisaansa,
Pele cikwikwi cakali kulya mikuyu yanu alimwi azisamu zyanu zyamaolifa;+
Nokuba boobo tiimwakapiluka kulindime,’+ mbwaamba Jehova.
10 ‘Ndakamutumina cilwazi mbubonya mbuli ceciya caku Egepita.+
Balombwana banu ndakabajaya apanga+ akubweza mabbiza aanu.+
Ndakapa kuti kununka kwankambi zyanu kunjile mumpemo zyanu;+
Pele tiimwakapiluka kulindime,’ mbwaamba Jehova.
11 ‘Ndakamuletela lunyonyooko
Mbubonya mebo nde Leza mbondakanyonyoona Sodoma a Gomora.+
Alimwi nywebo mwakali mbuli cisisi cayokolwa mumulilo;
Pele tiimwakapiluka kulindime,’+ mbwaamba Jehova.
12 Aboobo eeco ncencico ncetiikucitile, O Israyeli.
Lino mbokunga ndilakucitila cintu eeci,
Kolibambila kuswaangana a Leza wako, O Israyeli.
13 Nkaambo bona! Walo ngonguwe wakabumba malundu+ alimwi akulenga muwo;+
Ulaambila muntu mizeezo njajisi,
Ulasandula mumuni wakubucedo kuba mudima,+
Alimwi ulalyatauka masena aasumpukide aanyika;+
Izina lyakwe ngu Jehova Leza wamakamu.”
5 “Amumvwe jwi eeli ndendimwaambila kalili lwiimbo lwabuumba,* nywebo nobamuŋanda ya Israyeli:
2 ‘Israyeli nakalindu wawa;
Takonzyi kunyamuka alimwi.
Wasiigwa munyika yakwe mwini;
Kunyina uumubusya.’
3 “Nkaambo mboobu mbwaamba Mwami Singuzuzyoonse Jehova:
‘Imunzi uunka kunkondo abantu bali 1,000 uyoosyaalilwa buyo bali 100 ;
Awalo ooyo uunka kunkondo abantu bali 100 uyoosyaalilwa buyo bali 10, ibamuŋanda ya Israyeli.’+
4 “Nkaambo mboobu Jehova mbwaambila bamuŋanda ya Israyeli:
‘Amundiyandaule kutegwa muzumanane kupona.+
Mutaunki ku Giligala+ naa kwiinda ku Beere-seba,+
Nkaambo ncobeni bantu bamu Giligala bayootolwa mubuzike,+
Awalo Beteli uyoonyonyoonwa.*
6 Amuyandaule Jehova, kutegwa muzumanane kupona,+
Kutegwa atamubukili mbubonya mbuli mulilo, nywebo nobamuŋanda ya Josefa,
Akuumpa Beteli, kakunyina muntu uunga wauzima.
7 Nywebo musandula lubeta luli kabotu kuba mululwe,
Alimwi bululami mubusowela ansi.+
8 Mulengi wacibunga canyenyeezi zya Kima* acibunga canyenyeezi zya Kesili,*+
Ooyo uusandula mudima uusiya mbi kuba mafwumofwumo,
Ooyo uupa kuti masyikati asiye mbi mbuli masiku,+
Ooyo wiita maanzi manji aamulwizi
Kuti aapoomwede atala aanyika+
—izina lyakwe ngu Jehova.
9 Uyoopa kuti lunyonyooko lubasikile cakufwambaana bantu basinguzu,
Akunyonyoona masena aakwabilidwe.
10 Balabasulaika bantu basinsa kumulyango wamunzi,
Alimwi balabasesemwa bantu baamba masimpe.+
11 Akaambo kakuti mubbadelesya mucete mutelo wamuunda,*
Alimwi mubweza maila kulinguwe kauli mutelo,+
Tamukazumanani pe kukkala mumaanda aamabwe aacezudwe ngomwayaka+
Nokuba kunywa waini uuzwa mumyuunda yamisaansa mibotu njomwasyanga.+
12 Nkaambo ndilizyi mbobuli bunji buzangi bwanu*
Ambozili zipati zibi zyanu
—Nywebo mulapenzya bantu balulami,
Mulatambula cisinkamulomo,
Alimwi tamubacitili nzyobeelede bantu bacete kumulyango wamunzi.+
13 Aboobo bantu bacenjede bayakuumuna buyo ciindi eeco,
Nkaambo cinooli ciindi camapenzi.+
Eelyo ambweni Jehova Leza wamakamu ulaba andinywe,
Mbubonya mbomwaamba kuti ulaandinywe.+
Ambweni Jehova Leza wamakamu
Ulabafwida luzyalo basyeede ba Josefa.’+
16 “Aboobo mboobu mbwaamba Jehova, inzya Jehova Leza wamakamu:
‘Mumabuwa oonse aabuleya munooli koomoka,
Amwalo mumigwagwa yoonse bantu bayoolila kabati, “Maawe! Maawe!”
Bayakwiita balimi kuti bazoolile
Abaabo bacibwene kulila kuti bazikoomoke.’
17 ‘Mumyuunda yoonse yamisaansa munooli koomoka;+
Nkaambo ndiyakwiinda akati kanduwe,’ mbwaamba Jehova.
18 ‘Maawe kuli baabo bayandisya kuti busike buzuba bwa Jehova!+
Aboobo, ino buzuba bwa Jehova buyakwaamba nzi kulindinywe?+
Bunooli bwamudima uusiya mbi, tabukabi bwamumuni pe.+
19 Bunooli mbuli leelyo muntu natija syuumbwa, mpoonya waswaanganya munyama uutegwa bbeya,
Alimwi ambuli leelyo nanjila muŋanda yakwe akujatilila kubwaanda ajanza lyakwe, kumane nzoka yamuluma.
20 Sena buzuba bwa Jehova tabukabi bwamudima, ikutali bwamumuni?
Sena tabukabi bwamusinze, ikutali bwakumweka?
21 Tandaayandi mapobwe+ aanu pe, andicima,
Alimwi tandikukkomanini kununkilila ikuzwa kumiswaangano yanu iisetekene.
22 Nokuba kuti mukandituulile zituuzyo zyuumpwa buumbulu azituuzyo zyanu zyacipego,
Tandikazikkomanini pe;+
Alimwi tandikazilangi akuzitambula zipaizyo zyanu zyalumvwano zyabanyama baneneede.+
23 Amuleke kundisabila anyimbo zyanu;
Alimwi nditamvwi limbi kulila kwatuntimbwa twanu.+
24 Lubeta luli kabotu alukunke mbubonya mbuli maanzi manji,+
Abwalo bululami mbubonya mbuli kalonga kakunka ciindi coonse.
25 Sena mwakali kundiletela zipaizyo alimwi azituuzyo zyacipego
Kwamyaka iilya iili 40 munkanda, nywebo nobaŋanda ya Israyeli?+
26 Ncobeni lino mulamuyumuna Sakuti mwami wanu a Kaiwani,*
Izikozyanyo zyanu, inyenyeezi yaleza wanu, ooyo ngomwakalipangila nobeni,
27 Mpoonya ndiyoomupa kutolwa mubuzike kwiindilila ku Damasiko,’+ mbwaamba ooyo uujisi zina lyakuti Jehova Leza wamakamu.”+
6 “Maawe kulibaabo balisyoma* mu Ziyoni,
Kulibaabo basyoma kuti balikwabilidwe mucilundu ca Samariya,+
Ibaalumi balupati-pati bamuzisi ziinda kulemekwa,
Bantu ibasikilwa abamuŋanda ya Israyeli!
2 Amuzabukile ku Kalene, mukabone.
Kuzwa kooko mukaunke kumunzi Mupati wa Hamati,+
Kwamana mukaselemukile ku Gati waba Filisiti.
Sena eeyi minzi mibotu kwiinda mami aaya,*
Alimwi sena zilawo zyanjiyo nzipati kwiinda cilawo canu?
4 Boona amalo aameja aabazovwu+ akulandabala azyuuno zibotu,+
Balya bagutu bazwa mubutanga alimwi aboombe baneneede;*+
5 Baanza nyimbo zyeendelana akulila kwakantimbwa,*+
Alimwi mbubonya mbuli Davida, balipangila ziimbyo zyanyimbo;+
6 Waini baunywida munkapu zipati+
Alimwi balanana mafwuta mabotu kapati.
7 Aboobo bayootolwa mubuzike kabasolweda bazike,+
Eelyo kuyobeka kwabantu balikondelezya ibaile kulandabala kuyoomana.
8 ‘Mwami Singuzuzyoonse Jehova walikonkezya mwini,’+ mbwaamba Jehova Leza wamakamu,
‘“Kulisumpula kwa Jakobo+ kwandisesemya,
Ngazi zyakwe zikwabilidwe tandiziyandi pe,+
Alimwi ndiyakwaaba munzi azintu zili mumo.+
9 “‘“Ikuti naa kwasyaala bantu ibali kkumi muŋanda yomwe, abalo bayoofwa. 10 Musazinyina* uyooboola kuzoobabweza akubaumpa omwe-omwe. Uyoogwisya mafwuwa aabo kuzwa muŋanda; kumane uyoobuzya muntu uuli woonse uunooli mutwaanda twamukati mwini mwaŋanda kuti, ‘Sena kuli bambi mbocijisi?’ Eelyo walo uyoovwiila kuti, ‘Kunyina naba omwe!’ Mpoonya uyoomwaambila kuti, ‘Umuna wi! Nkaambo eeci tacili ciindi cakubanda zina lya Jehova.’”
11 Nkaambo ngu Jehova uulailila,+
Eelyo uyoopwayaula ŋanda mpati kuti ibe citantaala buyo,
Aŋanda nsyoonto kuti ibe mulwi buyo wabulongo.+
12 Sena mabbiza inga abalika atala aamwala,
Alimwi sena muntu inga walima mpawo aŋombe?
Nkaambo mwasandula lubeta luli kabotu kuba musamu uujaya,
Ayalo micelo yabululami mwiisandula kuba mululwe.+
13 Nywebo mulabotelwa acintu cabuyo,
Alimwi mwaamba kuti, “Sena tiitwaba basinguzu munguzu zyesu tobeni?”+
14 Aboobo, nywebo nobamuŋanda ya Israyeli, ndilamubusyila cisi kuti cimulwane,’+ mbwaamba Jehova Leza wamakamu,
‘Eelyo bayoomupenzya kuzwa ku Lebo-hamati*+ mane kusikila ku Kkuti* lyakalonga ka Araba.’”
7 Nceeci Mwami Singuzuzyoonse Jehova ncaakanditondezya: Amubone! Wakatuma cikwikwi ciindi zisyango zyamamanino* nozyakali kutalika kumena. Lino eezyi zyakali zisyango zyakumamanino nobwakamana kuceswa bwizu bwakusanina banyama bamwami. 2 Cikwikwi nocakamana kulya zisyango zyoonse zyamucisi, ndakati: “O Mwami Singuzuzyoonse Jehova, akaka kobalekelela!+ Ino Jakobo inga wafwutuka buti? Nkaambo tajisi nguzu!”+
3 Aboobo Jehova wakacinca mizeezo* kujatikizya ceeci.+ “Tacikacitiki pe,” mbwaakaamba Jehova.
4 Nceeci Mwami Singuzuzyoonse Jehova ncaakanditondezya: Amubone! Mwami Singuzuzyoonse Jehova wakaamba kuti bantu basubulwe amulilo. Mulilo ooyo wakayuminizya maanzi manji aamulwizi, alimwi wakaumpa cibeela canyika. 5 Mpoonya ndakati: “O Mwami Singuzuzyoonse Jehova, akaka utaciti boobo pe.+ Ino Jakobo inga wafwutuka buti? Nkaambo tajisi nguzu!”+
6 Aboobo Jehova wakacinca mizeezo* kujatikizya ceeci.+ “Acalo eeco tacikacitiki pe,” mbwaakaamba Mwami Singuzuzyoonse Jehova.
7 Nceeci ncaakanditondezya: Amubone! Jehova wakaliimvwi abwaanda bwakapimwa acipimyo cakupimya bwiime bwacintu, mpoonya mujanza wakajisi cipimyo cakupimya bwiime bwacintu. 8 Mpoonya Jehova wakandibuzya kuti: “Ncinzi ncobwene, Amosi?” Aboobo ndakaingula kuti: “Ndibwene cipimyo cakupimya bwiime bwacintu.” Eelyo Jehova wakandaambila kuti: “Bona ndilabikka cipimyo cakupimya bwiime bwacintu akati kabantu bangu bana Israyeli. Tandikabajatili limbi pe.+ 9 Masena aakukombela aa Izaka+ ayooba matongo, aalo masena aasalala aa Israyeli ayoonyonyoonwa;+ alimwi ndiyoobalwana apanga bamuŋanda ya Jeroboamu.”+
10 Amaziya mupaizi waku Beteli+ wakatuma mulumbe ku Mwami Jeroboamu+ wa Israyeli, ulaamba: “Amosi waleta muzeezo wakukubukila muŋanda ya Israyeli.+ Bantu bamucisi tabakonzyi kuliyumya amajwi aakwe oonse.+ 11 Nkaambo mboobu mbwaamba Amosi, ‘Jeroboamu uyoojaigwa apanga, mpoonya ziyume zitete bana Israyeli bayootolwa mubuzike kuzwa mucisi cabo beni.’”+
12 Kumane Amaziya wakaambila Amosi kuti: “Yebo osizilengaano, koya, kotijila kucisi ca Juda, ukaakuvwolele nkuko cinkwa cako,* alimwi ooko inga waakusinsima.+ 13 Pele utasinsimi limbi ku Beteli,+ nkaambo mbusena busalala bwamwami+ alimwi niŋanda yabwami.”
14 Mpoonya Amosi wakavwiila Amaziya ulaamba: “Mebo tiindakali musinsimi naa mwana wamusinsimi; pele ndakali mweembezi+ alimwi ndakali kulanganya mikuyu.* 15 Nokuba boobo Jehova wakandilesya kweembela butanga, mpoonya Jehova wakandaambila kuti, ‘Koya, ukasinsime kubantu bangu bana Israyeli.’+ 16 Lino komvwa jwi lya Jehova: ‘Yebo waamba kuti, “Utasinsimi makani aakucenjezya bana Israyeli,+ alimwi utakambauki+ makani aakucenjezya bamuŋanda ya Izaka.” 17 Aboobo mboobu mbwaamba Jehova: “Mukaintu wako uyooba muvwuule mumunzi, abalo bana bako basankwa abasimbi bayoojaigwa apanga. Nyika yako iyakwaapaulwa alutambo lwakupimya, mpoonya yebo uyoofwida munyika iisofweede; alimwi ziyume zitete bana Israyeli bayootolwa mubuzike kuzwa mucisi cabo beni.”’”+
8 Nceeci Mwami Singuzuzyoonse Jehova ncaakanditondezya: Amubone! Ndakabona mutaanga* uujisi micelo yacilimo. 2 Mpoonya wakandibuzya kuti, “Ncinzi ncobwene, Amosi?” Eelyo ndakavwiila kuti, “Ndibwene mutaanga uujisi micelo yacilimo.” Mpoonya Jehova wakandaambila kuti: “Mamanino asika kubantu bangu bana Israyeli. Tandikabajatili limbi pe.+ 3 ‘Mubuzuba oobo nyimbo zyakutempele ziyoosanduka kuba kulila,’+ mbwaamba Mwami Singuzuzyoonse Jehova. ‘Mitunta minji iyoosoogwa buyo koonse-koonse+—kuyakuumuna wi!’
4 Amuswiilile nywebo nomulyatauka bacete
Alimwi nomulobya babombe myoyo bamunyika,+
5 Nomwaamba kuti, ‘Ino pobwe licitwa noukkala mwezi liyoomana lili,+ kutegwa tusambale maila eesu,
Alimwi ino iyoomana lili Sabata,+ kutegwa tusambale maila?
Kutegwa tucesye cipimyo caefa*
Akukomezya syekeli,*
Alimwi akunyonganya zikkelo zyesu kutegwa zibe zyalweeno;+
6 Kutegwa tuule bantu bapengede ansiliva
Akuula bacete ampato zyobilo buyo,+
Alimwi akuti tusambale maila aatakwe mulimo.’
Sena coonse buyo tacikafwuti mbuli mulonga wa Nile?
Sena tacikapayi alimwi akuyosa mbubonya mbuli mulonga wa Nile waku Egepita?’+
9 ‘Mubuzuba oobo,’ mbwaamba Mwami Singuzuzyoonse Jehova,
‘Ndiyoopa kuti zuba libbile akalangabwaaseme,
Alimwi ndiyoopa kuti kube mudima mucisi kalitwa mwaaba.+
10 Mapobwe aanu ndiyakwaasandula kuba malila+
Azyalo nyimbo zyanu zyoonse ndiyoozisandula kuba nyimbo zyabuumba,*
Zibuno zyoonse ndiyoozisamika zisani zyamasaka akupa kuti mitwe yoonse ibe alubala;
Ndiyoopa kuti bukkale bube mbuli leelyo nokulilwa mwana simuzyalwaalikke,
Eelyo mamanino aaceeci anooli mabi mbuli buzuba bubi.’
11 ‘Amubone! Mazuba ayoosika,’ mbwaamba Mwami Singuzuzyoonse Jehova,
‘Eelyo ndiyootuma nzala munyika,
Ikutali nzala yacakulya naa nyota yamaanzi,
Pele yakuyanda kumvwa majwi aa Jehova.+
12 Bayootuntulika kuzwa kulwizi lumwi kuya kulwizi lumbi,
Akuzwa kunyika kuya kujwe.*
Banooyaabwiingaila kabayandaula jwi lya Jehova, pele tabakalijani pe.
13 Mubuzuba oobo banakalindu beebeka bayoonetuka,
Antoomwe abalombwana, akaambo kanyota;
14 Aabo bakonkezya mulandu wa Samariya,+ ikuti,
“Masimpe mbwali muumi leza wako, O Dani!”+
Akuti, “Masimpe mboili abuumi nzila yaku Beere-seba!”+
Bayakuwa, eelyo tabakabuki limbi pe.’”+
9 Ndakabona Jehova+ kaimvwi atala aacipaililo, kumane wakati: “Kouma mutwe wamusemu, kutegwa zikunguzyo zizungaane. Koikosola mitwe yanjiyo, eelyo kufwumbwa uusyaalizya akati kabo ndiyoomujaya apanga. Kunyina naba omwe uutija akati kabo uuyoofwutuka, alimwi kunyina uusola kuloboka akati kabo uuyoozwidilila.+
2 Nokuba kuti bakasye akuya ansi mu Cuumbwe,*
Ijanza lyangu liyoobagusya ooko;
Alimwi nokuba kuti bakatante kujulu,
Akwalo ooko ndiyoobaselusya.
3 Alimwi nokuba kuti bakayube atala aacilundu ca Karimeli,
Ndiyoobayandaula akubagusya ooko.+
Nokuba kuti bakayube kunsi aalwizi kuti nditababoni,
Nkukonya ooko ndiyoolailila nzoka kuti ibalume.
4 Nokuba kuti basinkondonyina bakabatole mubuzike,
Nkukonya ooko ndiyoolailila panga, eelyo liyoobajaya;+
Ndiyoobalanga ameso aangu kutegwa ndikabacitile cintu cibi, ikutali cibotu.+
5 Nkaambo Mwami Singuzuzyoonse, Jehova wamakamu, ngonguwe uuguma cisi,*
Cakuti cilanyenguluka,+ alimwi boonse bakkala mulincico bayoolila;+
Eelyo coonse ciyoofwuta mbuli mulonga wa Nile,
Akuyosa mbubonya mbuli mulonga wa Nile waku Egepita.+
6 ‘Ooyo uuyaka matantilo aakwe kujulu
Akukkazikizya mayake aakwe atala aanyika;
Ooyo wiita maanzi aamulwizi,
Kutegwa aapoomwede atala aanyika+
—izina lyakwe ngu Jehova.’+
7 ‘Sena tamuli mbuli bana baba Kusi kulindime, nywebo nobana Israyeli?’ mbwaamba Jehova.
‘Sena tandili ndime ndakagusya bana Israyeli mucisi ca Egepita,+
Ba Filisiti kuzwa ku Krete,+ alimwi abana Siriya kuzwa ku Kiri?’+
8 ‘Amubone! Meso aangu mebo nde Mwami Singuzuzyoonse Jehova alangide bwami bwabasizibi,
Eelyo ndiyoobunyonyoona atala aanyika.+
Pele tandikabanyonyooni cakumaninina bamuŋanda ya Jakobo,’+ mbwaamba Jehova.
9 ‘Nkaambo amubone! Ndilalailila,
Aboobo ndiyooseba bamuŋanda ya Israyeli akati kamasi oonse,+
Mbubonya muntu mbwaseba ansefwa,
Cakuti kunyina kantu nokaba komwe ikawida ansi.
10 Bayoojaigwa apanga, nkokuti basizibi boonse akati kabantu bangu,
Aabo ibaamba kuti, “Mapenzi taakasweni munsi lyesu nokuba kusika nkotubede.”’
11 ‘Mubuzuba oobo ndiyakwiimika civwuka* ca Davida+ ciwide,
Ndiyoobambulula zipulo,
Alimwi ndiyooyakulula matongo aancico,
Ndiyakuciyakulula mbubonya mbocakabede mumazuba aakaindi,+
12 Kutegwa bakakone eezyo zisyeede mu Edomu,+
Amasi oonse aaitwa azina lyangu,’ mbwaamba Jehova, ooyo uucita ceeci.
13 ‘Amubone! Mazuba alaboola,’ mbwaamba Jehova,
‘Eelyo sikulima nayakweenzya sikutebula,
Awalo sikulyatauka misaansa nayakweenzya sikuminza mbuto;+
Malundu ayookunka waini uulweela,+
14 Ndiyoopilusya bantu bangu baangidwe bana Israyeli,+
Eelyo bayooyakulula minzi iinyonyookede akukkala mulinjiyo;+
Bayoosyanga myuunda yamisaansa akunywa waini uuzwa mulinjiyo,+
Alimwi bayoolima myuunda akulya micelo yanjiyo.’+
15 ‘Ndiyoobasimpa mucisi cabo,
Eelyo tabakanonkolwi kabili
Mucisi cabo ncindabapa,’+ mbwaamba Jehova Leza wako.”
Nkokwaamba kuti “Kuba Mukuli” naa “Kunyamuna Mukuli.”
Mu Chihebrayo, “Ooyo uujisi nkoli yabwami.”
Mu Chihebrayo, “Ooyo uujisi nkoli yabwami.”
Mu Chihebrayo, “mubetesi.”
Naa “bakaakaka malailile.”
Naa “kutempele.”
Naa ambweni, “ikuti kakunyina coongelezyo mulinkako?”
Bamwi baamba kuti “kakwisuka.”
Naa “aazyuuno zyaku Damasiko.”
Naa “akubapa bumboni bwakuti balaamulandu.”
Naa “kamilandu.”
Naa ambweni, “manji.”
Naa “basimalelaanu.”
Naa “muzange.”
Naa “Acimanyakkumi.”
Naa “lwiimbo lwamalila.”
Naa ambweni, “uyooba cintu camasalamuzi.”
Ambweni nyenyeezi zya Pleiades izili mucibunga canyenyeezi zya Taurus.
Ambweni cibunga canyenyeezi zya Orion.
Naa “mutelo wanyika.”
Naa “mboili minji milandu yanu.”
Ambweni baleza baambwa waawa nipulaneti iitegwa Saturn, yalo yakali kukombwa mbuli leza.
Naa “baliibide.”
Kuboneka kuti mami aambwa aawa mbwami bwa Juda abwa Israyeli.
Mu Chihebrayo, “cuuno.”
Naa “abapoho bacili bana-bana.”
Naa “kwakalumbu.”
Mu Chihebrayo, “tanaakabacisa.”
Mu Chihebrayo, “Mwanookwabo abausyi.”
Naa “kumanjililo aa Hamati.”
Amubone Bupanduluzi Bwamabala.
Nkokuti, mu January a February.
Naa “wakeetezyegwa.”
Naa “wakeetezyegwa.”
Mu Chihebrayo, “ukaakulide nkuko cinkwa cako.”
Naa “sikunengaula akucela nkuyu.”
Bamwi baamba kuti “cinzuma.”
Amubone Makani Aayungizyidwe B14.
Amubone Makani Aayungizyidwe B14.
Naa “Nyika.”
Naa “nyimbo zyamalila.”
Naa “kumapaswido aazuba.”
Naa “Cikkalilo Cabafwu.” Amubone Bupanduluzi Bwamabala.
Naa “nyika.”
Naa “tente; katungu.”
Mu Chihebrayo, “tuyooyaaya.”