Basicikolo Ibalibilika Akaambo Kakuba Azyakucita Zinji
JENNIFER uujisi myaka yakuzyalwa iili 17, lyoonse wakali kubalilwa akati kabaabo ibakali kwaambwa kuti mbasongo mucikolo mwaakali kwiiya. Wakali kutola lubazu muzyintu ziindene-indene zyakali kucitika kucikolo bamana kwiiya, aboobo, bamayi ibakali kumuyiisya alimwi abaabo basikupa lulayo bakali kumuyanda. Pele mumwaka ngwaakali kumanizya cikolo, wakatalika kuciswa mutwe alimwi kanji-kanji wakali kuvwundaukwa kumoyo. Wakaamba kuti, cakamupa kuti aciswe nkubala kwaciindi cilamfwu alimwi akuba aciindi cisyoonto cakoona.
Tali buyo Jennifer uulimvwa boobu. Mweelwe wabasicikolo ibalibilika uboneka kuti uyaabuya mujulu, alimwi bamwi balaunka kucibbadela kuti bakasilikwe. Nkakaambo kaako, kabunga kabamayi bakucisi ca America bakabikka bubambe bwakucesya zyintu nzyobeelede kucita basicikolo kucikolo. Bubambe oobu bwiitwa kuti, Challenge Success.
Ikuti naa muli basicikolo, ambweni andinywe mulalibilika akaambo kakuba azyintu zinji zyakucita mbubwenya mbuli Jennifer. Ndiza muli bazyali ibabona kuti mwaneenu ulalibilika kapati akaambo kakuyanda kuti azwidilile kucikolo. Sena bazyali abasicikolo kuli nkobakonzya kujana lugwasyo?