‘Cijazyo Cakkabati Cikonzya Kujalulwa Buyo a Jehova’
◼ Erika uujisi myaka yakuzyalwa iili cisambomwe a Mattia uujisi myaka yakuzyalwa yone bakafwidwa bausyi mumwaka wa 2007. Buumba bwabana aaba buyaabumana akaambo kubulangizi bwabubuke.—Incito 24:15.
Bunji bwaziindi, Erika ulabandika abeenzyinyina kujatikizya bulangizi bwamu Bbaibbele mbwajisi, ikapati kucikolo nkwaiya icili kunsumbu ya Sicily. Mucikozyanyo, ciindi mweenzyinyina Beatrice naakaamba kuti bausyi Erika bali kujulu, cakukkazyika moyo Erika wakamwaambila kuti tabusyi mboliyiisya Bbaibbele oobo pe. Beatrice wakabuzya kuti: “Ikuti naa mboobo ino bali kuli?”
Erika wakaingula kuti: “Bali mucuumbwe.” Kuzwa aciindi eeco, Beatrice wakayanda kuzyiba kuti naa cuumbwe ncinzi.
Erika wakamwaambila kuti: “Cuumbwe cili mbuli mulyango wakkabati uukonzya kujalulwa akujalwa. Pele ikuti mulyango ooyu wajalwa, tokonzyi kuujalula pe. Alikke Jehova nguuya kuujalula yaakusika nyika mpya.”
Kumane Erika wakamupandulwida mweenzyinyina kuti Jehova ndizyina lya Leza, akuti uyooleta Paradaiso anyika, alimwi takukabi limbi kuciswa abalo bafwide bayooba baumwi alimwi. Mpoonya Erika wakaambila Beatrice kuti akabuzye banyina kuti naa balakonzya kumuzumizya kutambula bbuku lipandulula makani aaya.
Naakamwaambila kuti banyina bamuzumizya kutambula bbuku, Erika wakamupa bbuku lyakuti Amwiiye ku Mwiiyi Mupati. Erika wazumanana kubandika abantu kujatikizya zyintu nzyaiya kuzwa mu Bbaibbele, mane abayi bakwe wakabapa bbuku lyaambwa atala aawa.
Masimpe ngakuti, zimwi ziindi Erika amusyoonto wakwe balalila nobayeeya bausyi. Pele bulangizi bwabubuke bulabaumbulizya. Aaba bana balacita mbubwenya bucita bantu bamwi munyika, balamulumba Jehova, Leza uumbulizya ncobeni.—Matayo 21:16; 2 Ba-Korinto 1:3, 4.
Mulakonzya kulomba bbuku eeli lijisi zifwanikiso zyeebeka lyamapeeji aali 256 imapati mbuli mapeeji aamagazini eeyi. Ciyandika buyo nkulemba kagwalo kali ansi aawa akukatumina kukkeyala iitondezyedwe naa kukkeyala yeelede iili apeeji 5 mumagazini eeyi.
□ Kakunyina kubbadela, ndilomba kuti munditumine bbuku litondezyedwe waawa.
□ Amundilembele kujatikizya ciiyo ca Bbaibbele caaŋanda citabbadelwi.