Mubili “Uubona” Wanswi Iitwa Kuti Brittle Star

TINSWI eeyi iikkala ansi aalwizi mumusenga, ilijisi cilikwabilizyo mpoili atala calo cigambya. Eeci cibeela camubili wanswi eeyi cipangidwe atuleensi twalo tupa kuti cikanda canswi eeyi kacibona.

Amubone kaambo aaka: Magazini iitwa kuti Natural History yaamba kuti, ciindi basayaansi nibakali kulanga-langa cikanda canswi eeyi “bakabona kuti kuli bugunyu-gunyu butanteene, butalibonyi kapati, busyoonto-syoonto mbuli kasusu kamuntu.” Oobu bugunyu-gunyu, bupangidwe aazibeela zya calcium carbonate, zyalo zipa kuti tuleensi katujisi nguzu zyakunjizya mumuni nomuba munsinga zili aansi aacikanda mwalo mumuni mouboneka kuti taukonzyi kunjila. Kuyungizya waawo, ootu tuleensi tupangidwe munzila yakuti katucikonzya kupanga cinzimweemwe ceelede.

Ba Joanna Aizenberg, basyaazibwene musayaansi, bakaamba kuti, mboupangidwe mubili wanswi eeyi, “kutondezya nzila imwi iiyandika kapati muciiyo ca biology, mwalo zyintu kanji-kanji mozipangwa kubelesya nzila zisiyene-siyene.”

Kwiinda mukwiiya inswi eeyi muciiyo ca biology, basikuvwuntauzya bakajana nzila ngubauba, alimwi iitaduli yakupanga tubeela twakubikka mumaleensi kwiinda mukubelesya calcium carbonate. Ootu tubeela tulabelesyegwa munzila zinji, kubikkilizya amulisikapepele, kwalo nkotubelesyegwa kutuma mayuwe aamumuni kwiinda mutuwaya tuniini-niini tuli mukati.

Ino Muyeeya Buti? Sena mubili “uubona” wanswi iitwa kuti brittle star wakaboola akaambo kakusanduka kwazyintu? Naa wakalengwa buya?