Njiisyo Zigwasya Lyoonse Kubantu Boonse—Kusyomeka

NJIISYO YAMU BBAIBBELE: “Ino nguni uukonzya kuba mweenzu mutente [lya Leza]? . . . Nguyooyo weenda kanyina kampenda, uucita zintu ziluleme alimwi iwaamba masimpe mumoyo wakwe.”—Intembauzyo 15:1, 2.

IBUBOTU BULIKO: Bantu banji balakukkomanina kusyomeka. Pele ino mbuti kuti kwaba coolwe cakuti muntu ajane zintu zimwi kwiinda mukutasyomeka, mpoonya bamwi tiibazyiba kuti tanaasyomeka? Eeci inga cayubununa mboubede moyo, nkokuti muntu mbwabede mukati.

Ba Raquel, balo ibakajisi mulimo wakuula zintu zyakukkampani bakaamba kuti: “Basikusambala zintu bamwi bakali kusola kundipa cisinkamulomo. Bakali kundisyomezya kuti naa ndaula zintu kulimbabo nkokuti bakali kukonzya kuujola muulo wazintu kulindime ikutali kukkampani. Pele ndakayeeya lulayo lwamu Bbaibbele lujatikizya kusyomeka mpoonya ndakabakakila. Bapati amulimo bakaazyiba makani aaya aboobo bakatalika kundisyoma kapati.”

Ikuti ba Raquel nobakaazumina mali ngobakali kuyanda kubapa, nobakagwasyigwa buyo kwaciindi cisyoonto. Pele ino nocakaba buti basikubalemba mulimo nobakaazyiba makani? Sena ba Raquel nobakazumanana amulimo wabo? Alimwi sena nobakajana mulimo uumbi? Icakali kuyandika kapati kuli ba Raquel, manjezyeezya aabo alimwi ampuwo. Lugwalo lwa Tusimpi 22:1 lwaamba kuti: “Izina libotu lyeelede kusalwa kwiinda lubono lunji; kulemekwa nkubotu kapati kwiinda nsiliva angolida.”

Ba Jessie abalo bakali kusyomeka, aboobo bakajisi mpuwo mbotu kuli basikubanjizya mulimo. Ino mbubotu nzi bwakabako? Tiibakapegwa buyo cuuno caatala pele bakapegwa alwaanguluko lunji kujatikizya mbobakali kunoobeleka. Akaambo kaceeci, bakali kucikonzya kuba aciindi cakuba abakaintu babo alimwi abana, alimwi akucita milimo iijatikizya kukomba Leza.

Ciindi nobayandaula babelesi, basikunjizya milimo banji baunka kutubunga ntobazyi kuti tujisi bantu basyomeka. Mucikozyanyo, walupati-pati akkampani iimwi ku Philippines wakalembela ofesi ya Bakamboni ba Jehova yakubusena ooko kulomba kuti Bakamboni balembele mulimo. Wakaamba kuti: “Mbasungu kumilimo, balasyomeka alimwi balalyaaba. Pele Jehova nguweelede kulumbwa nkaambo nguutuyiisya ‘kusulaika bubi’ alimwi ‘akuyanda bubotu.’”—Amosi 5:15.