Mubala Wacikambwe (Blue) Weebeka Wamucelo Uutegwa Pollia

CISAMU cizyala mucelo ooyu citegwa Pollia condensata icijanika muzisi zinji zyamu Africa, nceciinda kuba amubala ooyu wacikambwe akati kazisamu zyoonse. Nokuba boobo, mukati tacijisi mubala ooyu wacikambwe. Ino ncinzi cipa kuti kacilibonya mumubala ooyu weebeka kapati?

Amulange-lange cicitika: Maseelo aali mumabali-bali aacikanda camucelo ooyu ajisi tutambo tusyoonto-syoonto tuyalene mbuli tusanga twamancisi. Tutambo ootu tulazinguluka akupanga cibeela cilibonya mbuli kuti ngusipuliŋi akaambo kambotuyalene. Pele tutambo ootu tatujisi mubala wacikambwe. Mubala ooyu ulalibonya kweelana atutambo ootu mbotukkede. Aboobo mbotukkede tutambo ootu ncecipa kuti mucelo ooyu kaulibonya mumubala wacikambwe uumweka-mweka. Bunji bwamaseelo alibonya mbuli mubala wacikambwe. Pele ciya buyo ankomwaimina, zimwi ziindi mucelo ooyu ulakonzya kulibonya mbuli mubala wanyazabili, mubala uusubila-subila, naa mubala wamungunga waji akaambo kambotukkede tutambo mukati. Kuyungizya waawo, kuti mwailangisisya mibala eeyi, iboneka mbuli kuti ilisangene amibala iimbi mbubwenya mbuli mibala iilibonya asikkilini yakkompyuta.

Mbwaanga micelo ya pollia taijisi mubala wacikambwe, ilazumanana kulibonya mumubala ooyu noliba leelyo noyaloka kucisamu. Cigambya ncakuti, micelo iimwi iyakabwezelelwa myaka iinda ku 100 iceebeka akulibonya mbuli kuti yacelwa sunu! Basikuvwuntauzya baamba kuti, nokuba kuti mucelo ooyu taujisi cikanda ciligwa mbwaanga ujisi buyo nseke, ulabakwelelezya bayuni banji.

Basayaansi bayeeya kuti mucelo wa Pollia iweebeka ulakonzya kukulwaizya bantu kupanga zintu zijisi mibala iitajujuki alimwi amapepa.

Ino muyeeya buti? Sena mubala wacikambwe weebeka wamucelo uutegwa Pollia, wakasanduka buya naa wakalengwa buya?