Bbuku Lyangu Lya Makani Aamu Bbaibbele
EELI ndibbuku lijisi makani aamasimpe. Akajanwa mu Bbaibbele, ibbuku lijisi mpuwo kapati kwiinda mabbuku oonse aali munyika. Makani aaya alakugwasya kuzyiba nyika mboyakatalika kuzwa Leza naakatalika kulenga zintu kusikila sunu. Alimwi alaamba Leza nzyasyomezya kuya kucita kumpela.
Eeli bbuku lilakugwasya kuzyiba Bbaibbele mbolibede. Lilaamba bantu bamu Bbaibbele azintu nzyobakacita. Alimwi lilaamba bulangizi butaliboteli bwakupona kukabe akutamani munyika yapaladaiso Leza njaakapa bantu.
Kuli makani aali 116 mubbuku eeli. Alibikkidwe muzyibeela zili lusele. Ipeeji lili kumatalikilo aacibeela acimwi, kulaambwa mubufwiifwi zintu izijanika mucibeela eeco. Makani alilembedwe cakuccililana kweelana ambozyakali kucitika zintu. Eeci cilakugwasya kuziiya acimwi nicakacitika.
Makani alilembedwe mumulaka muuba-uba. Ibunji bwanu nobana muna kukonzya kulibalila. Nywebo nobazyali muya kubona kuti bana banu baniini baya kukkomana ikuti kamubabalila makani aaya cakwiinduluka-induluka. Muya kujana kuti bbuku eeli lilabakkomanisya bana abapati.
Magwalo aamu Bbaibbele alilembedwe kumamanino aamakani aamwi. Mukulwaizyigwa kuzyibala zibalo eezyi zyamu Bbaibbele nkaambo nkokwakazwa makani. Mwamana kubala makani aamwi, amwiinduluke amibuzyo yaciiyo iijatikizya makani aayo iijanwa kumbele kwa Makani 116 akusola kuyeeya bwiinguzi.