Cibalo 21

Mucikombelo Cakumunzi Okwabo Jesu

KAKUNYINAA kudooneka iciindi Jesu naapiluka mumunzi ookwabo mu Nazareta, munzi oonse wanyanyaala. Katanaunka kuti akabbapatizigwe kuli Johane kwiinda-inda buyo amwaka omwe musyule, Jesu wakazibidwe kuti mmubezi. Pele lino ulizibidwe koonse-koonse kuti ngusikucita maleele. Basimunzi baliyandide kumubona kacita imwi milimo mibotu akati kabo.

Ikulangila kwabo kwaindila ciindi Jesu naaunka kucikombelo camumunzi ookwabo mbuli cilengwa cakwe. Mukati kamiswaangano waimikila kuti abale elyo wapegwa bbuku lyamusinsimi Isaya. Wajana mpokulembedwe makani kujatikizya Oyo uunanikidwe amuuya wa Jehova, alo aali kucaandaano ca 61 mu Bbaibbele lyesu sunu.

Naamana kubala kujatikizya Yooyu mbwayookambauka kwaangununwa kubaange, kubononona kwaboofu alimwi akujatikizya mwaka uusalidwe wa Jehova, Jesu wapilusya bbuku kumugwasilizi mpoonya wakkala. Bantu boonse bamulangisisya. Mpoonya waambaula ambweni kwaciindi cilamfwu kapandulula ategwa: “Sunu kwazuzigwa lugwalo olu mumatwi aanu.”

Ibantu bagambwa “kumajwi aaluzyalo” elyo balyaambauzya ategwa: “Oyu tali mwana a-Josefa na?” Pele akaambo kakuti ulizi kuti bayanda kumubona kacita maleele, Jesu wazumanana akwaamba kuti: “Ncobeni muyoondyaambila aka kasimpe kakuti, Omusilisi, kolisilika. Zyoonse nzotwakamvwa izyakacitwa ku-Kapernauma, zicite amomuno mucisi cakwanu.” Ibakali basimukobonyina Jesu bayeeya kuti ikuponya kweelede kutalikila kumunzi ikutegwa bantu bakwe bagwasigwe kusaanguna. Aboobo bayeeya kuti Jesu taabalanganya pe.

Kazi mbobayeeya, Jesu waamba makani aamwi aakacitika munsi. Ulaamba, kwakali bamukabafwu banji mucisi ca Israyeli mumamazuba aa Eliya, pele Eliya taakwe naakatumwa kuli umwi wambabo pe. Pele wakatumwa kuli mukamufwu uutali muna Israyeli waku Sidoniya kwalo nkwaakaakucita maleele aapa buumi. Alimwi mumazubaa Elisha, kwakali basicinsenda banji, pele Elisha wakasalazya buyo Naamani waku Suriya.

Akaambo kakunyema kapati kumakani aaya aamusyule aayubulula kuliyanda kwabo alimwi akubula lusyomo, boonse ibali mucikombelo banyamuka akukwelaanya Jesu anze aamunzi. Oko bamutola atala acilundu awo mpouyakidwe munzi wa Nazareta, basoleka kumusowela mujeleele. Pele Jesu wasupuka akutija. Luka 4:16-30; 1 Bami 17:8-16; 2 Bami 5:8-14.

▪ Nkaambo nzi munzi woonse wa Nazareta ncowanyanyaala?

▪ Ino bantu bauyeeyela buti mulumbe wa Jesu, pele ncinzi cabanyemya?

▪ Ncinzi bantu ncobasoleka kumucita Jesu?