Cibalo 40

Iciiyo Kujatikizya Lubomba

ULAKONZYA Jesu kacili mu Naini kwalo lino-lino nkwaakabusya mwanaa mukamufwu naa ambweni uswaya munzi uuli munsi-munsi. Imu Farisi wazina lya Simoni uyanda kulangisisya yooyo uucita milimo eyi mibotu boobu. Aboobo watamba Jesu kuti balye cakulya antoomwe.

Naabona kuti nciindi ncakonzya kukambauka kuli baabo batijanike, Jesu wazumina kuunka mbubwena mbwaali kuzumina nobali kumutamba kulya basimitelo abasizibi. Pele ciindi naanjila muŋanda ya Simoni, Jesu taatambulwa mbuli mbubeelede kutambulwa beenzu.

Imatende mumpato inga atalika kupya akubija tombe akaambo kakweenda mumigwagwa iilaa lusuko alimwi ncilengwa cakusamausya ikusanzya matende aamweenzu amaanzi aatontola. Pele matende aa Jesu taasanzyigwa naasika. Alimwi taamyontwa pe ikutondezya kuti watambulwa camaanza obile mbuli cilengwa cidumide. Aalo mafwuta aakutondezya kusamausya taabikkwa pe kumasusu aakwe.

Kabalya, ibeenzu boonse kabakkede, kwanjila mukaintu umwi uutatambidwe pe. Ulizibidwe mumunzi kuti upona buumi bwakutalilemeka. Kulalangilwa kuti wakakumvwa kale kuyiisya kwa Jesu kubikkilizya akutamba kwakwe kwabaabo ‘boonse balemenwa kuunka kulinguwe kuti balemununwe.’ Alimwi akaambo kakuziyanda kapati nzyaabona azyaamvwa, wamuyandaula lino Jesu.

Imukaintu waboola kunze lya Jesu kutafule akufwugama kumatende aakwe. Imisozyi yakwe noiloka kumatende aa Jesu, ulaipukuta amasusu aakwe. Alimwi wabweza mafwuta anunkilila kabotu munsazi yakwe elyo wamyonta matende aakwe akwaananika mafwuta. Simoni walangilila cakutakkomana. Wayeeya ategwa: “Oyu naali musinsimi, naamuziba mukaintu oyu uumujata kuti nguni, na uli buti, nkaambo mucitazibi.”

Naakuziba kuyeeya kwakwe, Jesu ulaamba: “Simoni, ndiyanda kwaamba kulinduwe.”

Wavwuwa ategwa: “Koamba, Mufundisi.”

Jesu watalika ategwa: “Kwakali bantu bobile abakali amulandu kumuntu umwi. Umulandu waumwi ngwamasheleni aali myaanda yosanwe, uwaumwi ngwamakumi osanwe. Eno mbobakabula cintu cakulunga, wakabajatila boonse bobile. Ino kulibaabo nguuli uuti muyandisisye?”

Simoni ulaamba, ambweni cakutabikkila kapati maanu kumubuzyo uuboneka kuti taukwe ambuugwasya: “Ndiyeeya kuti nguyooyo ngwaakajatilisya.”

Jesu ulaamba: “Wayeeya kabotu.” Mpoonya naalanga kumukaintu, waambila Simoni ategwa: “Sena wamubona mukaintu oyu? Ndanjila muŋanda yako, tondipede maanzi aakusanzwa matende aangu, pele walo walopya matende aangu emisozi yakwe, waasyuuzya esusu lyakwe. Tondimyontede yebo, pele walo, kuzwida ciindi ncaanjila, talekede kumyontesya matende aangu. Umutwe wangu tounanikide mafuta, anu oyu wananika matende aangu mafuta mabotu.”

Aboobo mukaintu wapa bumboni bwakuti weempwa kubukkale bwakwe bwakutalilemeka bwamusyule. Aboobo Jesu wamanizya akuti: “Ncendakwaambila kuti, Wajatilwa zibi zyakwe zinji-zinji, nkaambo wayandisisya. Pele uujatilwa kaniini, uyanda kaniini.”

Awa Jesu kunyina nalekela naa kuzumizya kutalilemeka. Pele icacitika awa cayubununa ikuteelelesya kwakwe kubantu abo balubizya mubuumi pele ibatondezya kuti bausa akaambo kazintu ezi elyo baboola kuli Kristo kuti abalemunune. Kapa kulemununwa kwini-kwini kumukaintu oyu, Jesu ulaamba: “Wajatilwa zibi zyako. . . . Lusyomo lwako lwakufutula, koya aluumuno.” Luka 7:36-50; Matayo 11:28-30.

▪ Watambulwa buti Jesu kuli simeenzu aakwe Simoni?

▪ Nguni wamuyandaula Jesu alimwi nkaambo nzi?

▪ Ncikozyanyo nzi Jesu ncaapa alimwi wacibelesya buti?