Cibalo 67

Baalilwa Kumujata

KALICIYAAMBELE Pobwe lya Zilawo, ibasololi bacikombelo batuma bamapulisa kuti bamujate Jesu. Taasola akulisisa pe. Pele Jesu wazumanana kuyiisya antangalala kaamba kuti: “Kwasyaala ciindi ciniini ncencili anywebo, nkabela ndilaya kulooyo uwakandituma. Muyoondiyandaula, pele tamukooyoondijana, alimwi nkwembede mebo tamukonzya kukusika.”

Iba Juda teebamvwisya pe aboobo batalika kubuzyanya mulicabo ategwa: “Nkukuli oyu muntu nkwati ye oko nkotutakwe kuyoomujana? Sena uya kuli-Bamwaikide abakede akati kaba-Helene, akuyooiisya ba-Helene? Ndijwinzi eli ndyaamba kuti, Muyoondiyandaula pele tamukooyoondijana, akwalo kuti, Nkwembede tamukonzya kuza nk[u]ko?” Aino Jesu waamba lufwu lwakwe lwaswena akubusigwa kubuumi bwakujulu kwalo nkobatakonzyi kutobela basinkondonyina.

Ibuzuba bwaciloba alimwi bwamamanino aapobwe bwasika. Imafwumofwumo lyoonse lyapobwe, imupaizi walikutila maanzi ngaakali kuteka ku Ciziba ca Siloamu kutegwa kaakunka kuya kucipaililo. Ambweni kayeezya bantu kujatikizya kusekelela oku kwaabuzuba, Jesu ulaamba: “Kwanooli muntu uufwa nyota, aze kulindime anywe. Oyo uusyoma ndime mwida lyakwe muyookunka milonga yamaanzi maumi, mbubonya mbwaamba Magwalo.”

Awa Jesu waamba ziyoocitika ciindi muuya uusalala nouyootilwa. Mwaka watobela, oku kutilwa kwamuuya uusalala kwaacitika ciindi ca Pentekoste. Oku milonga yamaanzi maumi yakunka ciindi basikwiiya bali 120 nobatalika kukambaukila bantu. Pele nocitanasika ciindi eco, kunyina muuya mukuti kunyina basikwiiya ba Kristo bananikwa amuuya uusalala akwiitilwa kubuumi bwakujulu.

Akaambo kakuyiisya kwa Jesu, bamwi batalika kwaamba kuti: “Ncobeni oyu muntu ngomusinsimi oyo,” kuboneka kuti baamba musinsimi mupati kwiinda Musa iwakasyomezyedwe kuboola. Bamwi balaamba: “Oyu ngu-Kristo.” Pele bamwi balakazya ategwa: “Ena, sena Kristo inga ulazwa mu-Galilaya? Sena Magwalo taambide kuti Kristo ulazwa kumukowa wa Davida, ulazwa ku-Betelehemu, kumunzi nkwaakali kukede Davida?”

Elyo kwaba kwaandaana akati kankamu. Bamwi bayanda kuti Jesu ajatwe, pele kunyina wakonzya kucita obo. Bamapulisa nobajoka kabatamujisi Jesu, ibapaizi bapati aba Farisi babuzya ategwa: “Nkaambonzi ncomwatamuleta?”

Baingula ategwa: “Takunabede muntu uuamba bobuya.”

Akaambo kakunyema kapati, basololi bacikombelo batalika kufwubaazya, kusampaula alimwi akwaamba majwi mabyaabi. Babacapa balaamba: “Anywebo mweenwa kale na? Sena mpali umwi wabapati naba waba-Farisi uwamusyoma? Pele nkamu eyi iitezi mulao iloombwezegwa.”

Abone boobu Nikodemo imu Farisi alimwi musololi waba Juda (umwi Wabasinkuta Mpati yaba Juda) walisungula kumwiiminina Jesu. Mulayeeya kuti myaka yobile acisela yainda Nikodemo wakaboola kuli Jesu masiku akutondezya lusyomo lwakwe mulinguwe. Lino Nikodemo ulaamba: “Sena mulawo wesu ulatuzumizya kupa mulandu muntu katanabetekwa kutegwa kaambo kakwe kalondoke?” (BT)

Iba Farisi baindila kunyema kuti mane umwi wabo uvwuninina Jesu. Baamba cakubbookezya ategwa: “Sena ayebo uli waku Galilaya? Kolangaula, ulabona kuti ku-Galilaya takuzwi musinsimi pe.”

Nokuba kuti Magwalo taagami buya kwaamba kuti musinsimi uyakuzwa mu Galilaya, alamwaamba Kristo kuti uyakuzwa nkuko kaamba kuti “mumuni mupati” uyoolibonya mucisi eci. (BT) Kunze lyaboobo, Jesu wakazyalilwa mu Betelehemu alimwi wakali mwanaa Davida. Kakuli buya ba Farisi balakonzya kabaazi makani aya, ambweni mbabaujisi kumwaya makani aakubeja kubantu kujatikizya Jesu. Johane 7:32-52; Isaya 9:1, 2; Matayo 4:13-17.

▪ Ncinzi cicitika lyoonse cifwumofwumo ciindi lyapobwe, alimwi Jesu wacibelesya buti?

▪ Nkaambo nzi ncobakakilwa kumujata Jesu bamapulisa, alimwi basololi bacikombelo balimvwa buti?

▪ Ino Nikodemo nguni, ulimvwa buti kujatikizya Jesu alimwi bamulanganya buti ba Farisinyina?

▪ Mbumboni nzi buliko ibwakuti Kristo uyoozwa mu Galilaya?