Cibalo 131
Ikulibonya Kwamamanino Alimwi a Buzuba bwa Pentekoste 33 C.E.
ACIINDI cimwi Jesu wacita bubambe bwakuti baapostolo bakwe bali 11 baswaangane kucilundu mu Galilaya. Abamwi basikwiiya baambilwa zyamuswaangano oyu elyo bantu bainda ku 500 babungana. Oyu waba muswaangano mubotu kaka ciindi Jesu naalibonya akutalika kubayiisya!
Akati kazintu zimbi nzyayiisya Jesu waambila nkamu eyi mpati kuti Leza wamupa bwami boonse kujulu alimwi aansi. Walailila ategwa: “Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.”
Amuciyeeyele buyo! Baalumi, banakazi alimwi abana boonse batambula mulimo nguwenya wakutola lubazu mukugwasya bantu kuba basikwiiya. Basikukazya bayoosola kulesya kukambauka akuyiisya kwabo pele Jesu wabaumbulizya ategwa: “Amulange, ndaba anywe mazuba oonse nikuba kusikila kumamanino aaciindi.” Jesu ulabaa basikumutobela kwiinda mumuuya uusalala ikubagwasya kuzuzikizya mulimo wabo.
Jesu walitondezya kuli basikwiiya bakwe kali muumi kwaciindi cilampa mazuba aali 40 kuzwa ciindi naakabusigwa. Mukulibonya oku, wabalailila kujatikizya Bwami bwa Leza akukankaizya mikuli yabo mbobali basikwiiya bakwe. Aciindi cimwi mane walibonya akuli Jakobo imwanaakwabo kulibanyina buyo akumucita kuti asyome walo watakali kusyoma lyoonse kuti ngu Kristo ncobeni.
Kabacili ku Galilaya baapostolo, kulibonya kuti Jesu wabalailila kuti bapilukile ku Jerusalemu. Naaswaangana ambabo kuya wabaambila kuti: “Mutazwi mu-Jerusalemu, pele mucilindilile cisyomezyo ca-Taata, eco ncomwakamvwa kulindime. Nkaambo ncobeni Johane wakabapatizya amaanzi, kwalo nywebo muyoobapatizigwa a-Muuya Uusalala kaatanainda mazuba manjimanji.”
Mpoonya alimwi Jesu waswaangana abaapostolo bakwe wabasololela kuzwa mumunzi kuyakusika ku Betaniya imunzi uuli kunselelo yakujwe ya Cilundu ca Elaioni. Icigambya ncakuti nokuba kuti waamba makani oonse aya aakuti uyoounka kujulu lino-lino, bacisyoma kuti Bwami bwakwe buyookkazikwa anyika. Aboobo babuzya ategwa: “Omwami, sena ulabweedezya bwami ku-Israyeli kuliceecino ciindi?”
Muciindi cakusola alimwi ikululamika kutamvwisya kwabo, Jesu waingula buyo kuti: “Takuli kwanu kuziba ziindi, naaba mazuba ngaabika Taata kubwami bwakwe mwini.” Mpoonya kacikankaizya mulimo ngobeelede kucita ulaamba: “Muyootambula nguzu, wasika alindinywe Muuya Uusalala, muyooba bakamboni bangu muno mu-Jerusalemu, amu-Judaya moonse, amu-Samariya, mane kusikila kumamanino aanyika.”
Kabacimulangilila, Jesu watalika kusumpulwa kuya kujulu mpoonya ikkumbi lyamuvwumba waleka kulibonya. Naamana kucinca mubili wanyama, wagama kujulu kali muntu wamuuya. Kabacilangilide aba bali 11, ibaalumi bobile balibonya kumbali lyabo ibasamide zisani zituba. Aba bangelo basama mibili yanyama babuzya ategwa: “Nywebo nobaalumi ba-Galilaya, mwiimvwinzi akulanga kujulu? Oyu Jesu uwatolwa kujulu uwazwa kulindinywe, uyooboola mbubonya mbomwamubona ulaya kujulu.”
Inzila Jesu njaazwida anyika tiili iilya yakuti buleya boonse bwabona alimwi basikumutobela basyomeka baniini buyo mbebamubona. Aboobo uyooboola munzila njiyonya—katabonwi abuleya alimwi kakuli buyo basikumutobela basyomeka ibaziba kuti wapiluka akutalika kubako mu Bwami bwakwe.
Lino baapostolo baseluka kuzwa a Cilundu ca Elaioni bakosola kkuti lya Kedroni akunjila alimwi mu Jerusalemu. Bakkala nkukonya kuya ikutobela malailile aa Jesu. Nokwainda mazuba aali 10, ku Pobwe lyaba Juda lya Pentekoste yamu 33 C.E., basikwiiya batandila ku 120 kababungene muŋanda yamujulu ku Jerusalemu, ndilyonya kwamvwigwa muzuzumo uuli mbuli guwo pati wazuzya ŋanda yoonse. Kwalibonya milaka iili mbuli mulilo, aumwi wakkala ali omwe-omwe wabaabo baliko elyo basikwiiya boonse batalika kwaambaula myaambo imbi. Oku nkokutilwa kwamuuya uusalala nkwaakasyomezyede Jesu! Matayo 28:16-20; Luka 24:49-52; 1 Ba-Korinto 15:5-7; Incito 1:3-15; 2:1-4.
▪ Nkuuli bani Jesu nkwaapa malailile aakulaya kumulundu mu Galilaya, alimwi malailile nzi ayo?
▪ Nduumbulizyo nzi ndwaapa basikwiiya bakwe Jesu, alimwi uyoozumanana buti kuba ambabo?
▪ Nciindi cilamfwu buti ncaalibonya Jesu kuli basikwiiya bakwe kuzwa ciindi naakabusigwa, alimwi wabayiisya nzi?
▪ Nkuulini nkwaalitondezya Jesu, oyo muntu walo watakali sikwiiya katanafwa Jesu?
▪ Miswaangano nzi yobile yamamanino Jesu njaabaa njiyo abaapostolo bakwe, alimwi ncinzi cacitika kuziindi ezi?
▪ Ino mbuti Jesu mbwayooboola munzila njiyonya mbuli njaunkila?
▪ Ncinzi cacitika ku Pentekoste yamu 33 C.E.?