Cibalo 133
Jesu Wazimanizya Zyoonse Zyaamwaambila Leza
CIINDI Silumamba Mwami Jesu Kristo aakugwisya Saatani anyika yakwe iitaluleme, kuyooba kukondwa kaka! Mpaawo Ibulelo bwa Jesu bwaluumuno bwa Myaka iili Cuulu bwatalika limwi!
Mubweendelezi bwa Jesu abaminyina, basikufwutuka Amagedoni bayoosalazya matongo aayoosiya nkondo eyo iiluleme. Kulalangilwa kuti basikufwutuka baanyika bayoozyala bana kwaciindi cili mbocibede, alimwi aba bayootola lubazu mumulimo wakubamba nyika kuti ibe muunda mubotu weebeka.
Muciindi Jesu uyooleta tuulunzuma tuli mbotubede twabantu kuzwa kuzyuumbwe akupona mu Paradaiso mbotu eyi. Uyoocita obu ikuzuzikizya cisyomezyo cakwe mwini cakuti: “Ciindi ciyoosika . . . boonse abali muzyuumbwe, bayoozwa mpoonya.”
Akati kabaabo mbabusya Jesu, kunooli muntu ulya wakali sizibi iwakafwa kumbali akwe acisamu cakupenzyenzya. Amuyeeye kuti Jesu wakamusyomezya kuti: “Ncobeni ndakwaambila [sunu, NW], tunooli ayebo mu-Paradaiso.” Peepe, oyo muntu takatolwi kujulu kuti akalele mbuli mwami antoomwe a Jesu alimwi Jesu takabi muntu alimwi akupona mu Paradaiso anyika anguwe. Pele, Jesu unooli asizibi oyu mukuti uyoomubusya kuti abe muumi mu Paradaiso akubona kuti nzyayandika munzila yakumubili ayakumuuya zyoonse zyalanganizigwa mbubwenya mbukwatondezyegwa apeeji litobela.
Amuciyeeye buyo! Mubweendelezi bwa Jesu bwaluyando, mukwasyi oonse wabantu—basikufwutuka Amagedoni, bana babo alimwi azyuulu-zyuulu zyabaabo babusigwa kuzwa kubafwu ibamumvwida—banooya buba bantu balondokede. Jehova ikwiinda mu Mwanaakwe uusyomeka Jesu Kristo, uyookkala abantu munzila yakumuuya. “Nkabela,” mbubwenya jwi Johane ndyaakamvwa kuzwa kujulu mbolyaamba, “uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.” Kunyina muntu anyika uyoopenga naa kuciswa.
Bwakuumana Bulelo bwa Jesu bwa Myaka iili Cuulu, ibukkale buyooba buyo mbubwenya mbuli mbwaakakanzide Leza kumatalikilo ciindi naakambila banabukwetene bakusaanguna ba Adamu a Eva kuti bazyalane akuzuzya nyika. Inzya, inyika iyoozula musyobo uululeme wabantu balondokede. Ciyooba boobu akaambo kakuti cipaizyo ca Jesu cacinunuzyo cinoogwaside boonse. Ilufwu luletwaa cibi ca Adamu talunoociliko!
Aboobo Jesu uyoomanizya zyoonse Jehova nzyaakamutuma. Nkokuti, kumamanino aamyaka iili cuulu, uyoopilusya Bwami antoomwe amukwasyi wabantu uulondokede kuli Usyi. Mpoonya Leza uyooangununa Saatani abadaimona bakwe kuzwa mumulindi uutagoli imutakwe cicitwa. Ikuti acite nzi?
Kumamanino aamyaka iili cuulu, bunji bwabaabo banoopona mu Paradaiso banooli bantu babusidwe balo ibalaa lusyomo lutanasunkwa. Kabatanafwa teebakaziziba zisyomezyo zya Leza aboobo teebakatondezya lusyomo mulinzizyo. Mpoonya nobakabusigwa akuyiisigwa kasimpe ka Bbaibbele, cakabaubila mu Paradaiso kakutakwe kukazigwa ikubelekela Leza. Pele kuti naa Saatani wapegwa ciindi cakusoleka kubalesya kubelekela Leza, sena inga bajanika kuti balasyomeka nobaba mumasunko? Ikutegwa mubuzyo oyu ukaingulwe, Saatani weelede kwaangununwa.
Ikuyubununwa kwakapegwa kuli Johane kutondezya kuti bwaakumana Bulelo bwa Jesu bwa Myaka iili Cuulu, Saatani uyoozwidilila kweena mweelwe wabantu uutazibidwe kuti baleke kubelekela Leza. Pele, kwaakumana kusunka kwamamanino, Saatani, badaimona bakwe alimwi abaabo boonse mbayookonzya kweena bayoonyonyoodwa limwi. Pele, ibayoosunkwa bwini basikufwutuka basyomeka bayoozumanana kupona akukkomanina zilongezyo zya Usyi wakujulu kusika kutamani.
Cilasalala kuti Jesu wabeleka alimwi uyoozumana kubeleka mulimo mupati ikumaninzya makanze aa Leza aabulemu. Tulakonzya kukkomanina mazuba aakumbele mabotu akaambo kazintu nzyacita mbwali Mwami mupati wa Leza wakujulu. Pele, tatukonzyi kuluba zyoonse nzyaakacita naakali muntunsi.
Jesu wakaboola anyika cakulisungula kuti azyootuyiisye kujatikizya Usyi. Kunze lyaboobo, wakatutondezya ziimo zibotu zya Leza. Cilatukkomanisya notulanga busicamba bwakwe bwini-bwini alimwi abwaalumi, ibusongo buteelanizigwi, ibusongo bwakwe bwakuyiisya, ibusololi bwakwe bwakutayoowa alimwi alubomba lwakwe aluse. Twayeeya mbwaakapenga citaambiiki naakali kupa cinunuzyo, inzila yalikke motukonzya kujana buumi, masimpe tulamulumba kapati!
Inzya, twamubona mwaalumi mwini-mwini muciiyo cesu eci cabuumi bwa Jesu! Ibupati bwakwe tabuzumbauzigwi alimwi bulagambya. Citupa kuyeeya majwi aamweendelezi waba Roma Pontiyo Pilato aakuti: “Amubone, ngooyu muntu.” Inzya masimpe, “Muntu,” imuntu mupati kwiinda iwakaponede!
Kwiinda mukucitambula cipego cakwe icipaizyo cacinunuzyo, imukuli wacibi alufwu lwakakonwa kuli Adamu zilakozya kuzwisigwa kulindiswe elyo Jesu ulakonzya kuba “Taateesu Uuteeli.” Boonse bayanda kubaa buumi butamani tabeelede kuziba buyo Leza alikke pele awalo Mwanaakwe Jesu Kristo. Ikubala bbuku eli akuliiya akumugwasye kubaa luzibo olu ilupa buumi! 1 Johane 2:17; 1:7; Johane 5:28, 29; 3:16; 17:3; 19:5; Luka 23:43; Matalikilo 1:28; 1 Ba-Korinto 15:24-28; Ciyubunuzyo 20:1-3, 6-10; 21:3, 4; Isaya 9:6.
▪ Ncoolwe nzi cikkomanisya ncobayooba acalo basikufwutuka Amagedoni abana babo?
▪ Mbaani bayookkomana mu Paradaiso kunze lyabasikufwutuka Amagedoni abana babo, alimwi muunzila nzi Jesu mwayooba ambabo?
▪ Mbukkale buli buti ibuyooba kumamanino aamyaka iili cuulu, alimwi ncinzi ncayoocita Jesu awo?
▪ Nkaambo nzi ncayooanguludwa Saatani kuzwa mumulindi uutagoli, alimwi ncinzi ciyoocitika kulinguwe akuli baabo bamutobela?
▪ Ino Jesu ukonzya buti kuba “Taateesu Uuteeli”?