Ntalisyo

“Ndakakomenena mumunzi muniini kucooko cakunyika,” ulaamba Dauda uzwa ku Sierra Leone. “Cimwi ciindi, nindakacili mulombe, kwakali kuzwanganina nyika akati kamukwasyi wangu amukwasyi umwi. Boonse bakali kutaminina nyika njimunya. Kumana kaambo, simisamu wakaitwa. Wakapa muntu umwi cimboni, amane wakamuvumba amulembo uutuba. Mpawo muntu kunsi aamulembo wakatalika kubimba akuzwa nkasaalo. Naakalanga mucimboni, wakoongoolola kati: ‘Ndibona mudaala uzaabuswena! Usamide zisani zituba. Mulamfu alimwi mudaala, amasusu alaamvwi, alimwi uloongomana asyoonto naenda.’

“Wakali kubandauka Syaanene! Amane wakanjilwa akutalika koongolola kati: ‘Ikuti kamutasyomi nzyeamba, amuboole mulilangile nobamukamwini!’ Ncobeni, kwakanyina naba omwe wandiswe wakajisi camba cakucita obo! Simisamu wakamutontozya kwiinda mukumusansaila musamu wamasalamuzi uuvwelene matu amaanzi, alo ngaakajisi mucinkuli.

“Kakananina mumuntu wamucimboni, ‘Syaanene’ wakaamba kuti nyika yakali yamukwasyi wesu. Wakaambila baneene bangu kuti beelede kwiibelesya nyika kakwiina penzi. Mukwasyi umwi wakazumina eci. Kaambo kakamana.”

Zicitika zyamusyobo oyo nzyalyoonse Kumbo a Africa. Okuno, mbubonya mbuli mumasena amwi anyika, mamiliyoni atabaliki basyoma kuti bantu bafwide bainka kunyika yamyuuya, oko nkobakonzya kulangilila akweendelezya buumi bwabantu anyika. Sena kusyoma oku nkwabwini? Sena bafwide ncobeni balapona? Ikuti na teensi, ino mbani abo balyaamba kuba myuuya yabafwide? Kuziba kwiingula kuluzi kumibuzyo eyi ncintu cipati kapati. Makani abuumi alufu.