Madaimona Mbajayi!
Saatani amadaimona mbakali lyoonse alimwi mbabi kapati. Ciindi Saatani wakajaya zivubwa alimwi ababelesi ba-Jobu musyomesi. Nkabela wakajaya bana ba-Jobu bali kumi kwiinda mukuleta “kambizi” kunyonyoona ŋanda mobakabede. Kuzwawaawo Saatani wakacita Jobu “kuti azwe zilonda kuzwa kumaulu kusikila kukatwikilo.”—Jobu 1:7-19; 2:7.
Mumazuba a-Jesu, madaimona akacita bamwi bantu kuba bacimuumu akoofwaala. (Matayo 9:32, 33; 12:22) Akapenzya umwi muntu akulicita kuti aliyase amabwe. (Marko 5:5) Alimwi akacita mwana mulombe koongolola, kulipwaya ansi, “amuyuminizya.”—Luka 9:42.
Ciindi cimwi, madaimona akapa bantu bamwi kuciswa akuyuminizya bamwi
Sunu, Saatani amadaimona bacili bajayi mbuli lyoonse. Bwini, kubija kwabo kwaindilila kuzwa nobaatandwa mujulu. Kwaambilizya kuzwa munyika yoonse kupa bukamboni bwambuli mbwaali mabi. Aleta malwazi kubantu bamwi. Amwi alapenzya masiku, kubanyanzya ŋonzi naba kubapa maloto mabi. Amwi abelesya nzila zyakoonana ziteelede. Elyo amwi atola kukansondo, kujaya, naba kulijaya.
Mazuba aano, madaimona apa bantu bamwi kuba alunya; bamwi alabapenzya masiku akubapa kulota maloto ayoosya kapati
Lintina, uukala ku Suriname, upandulula mbuli daimona, na muuya mubi, mbuwaajaya zizyo zili 16 zyamukwasyi wakwe akupenzya mubili wakwe alimwi amizeezo kwamyaka iili 18. Kuzwa mukulibonena mukamwini upandulula kuti madaimona “alakomana kupenzya bantu bataliyandili mane kulufu.”
Pele Jehova ulakonzya kukwabilila balanda bakwe kuzwa kumasunko aa-Saatani.—Tusimpi 18:10.