Mulimo wa Broshuwa Eeyi

UMWI haabusongo mu Dutch Spinoza wakalemba kuti: “Muciindi cakuseka micito yabantu akwiitongooka naa kwiisula, ndasola kwiiteelela.” Nobamayi mulijisi mulimo wakusola kuteelela mizeezo, buumi, alusyomo lwabasicikolo bali mumaanza aanu, antoomwe abana bacikolo ba Bakamboni ba Jehova. Zimwi ziindi aaba basicikolo inga basala ciimo cibaanga cilaandeene kuli boonse mumakani amwi. Pele na kwaboneka kuti ciimo eeci cijatikizya bukombi abukkale bwasicikolo, kuyandika kuciteelela. Eeyi broshuwa yakalembwa aba Watch Tower Bible and Tract Society (inkamu iibalembela mabbuku Bakamboni ba Jehova) kuti imugwasye kuteelela basicikolo Bakamboni. Tusyoma kuti mulaibala kabotu-kabotu cakukkalikana.

Kuteelela lusyomo lwamuntu lujatikizya bukombi tacaambi kuti mweelede kuzumina naa kumutobela, alimwi kuzibya tacaambi kukambaukila pe. Mulimo wa broshuwa eeyi tauli wakumusinikizya kubaa lusyomo lwa Bakamboni nokuba kusinikizya basicikolo banu. Ncotuyanda buyo nkumuzibya nzila nzyobayiisigwa basicikolo banu bamwi kubazyali babo alimwi alusyomo lwabo, kutegwa cimuubaubile kubateelela Bakamboni bana akubelekela antoomwe ambabo. Bana nzyobaiya anzyobacita zilakonzya kaziteendelani ciindi coonse, nkaambo mwana umwi-aumwi wiiya kubaa manjezeezya aakwe mwini.

Bakamboni ba Jehova abalo mbweena mbuli bazyali banji, bayanda kuti bana babo baiye kabotu. Aboobo balabayiisya kubelekela antoomwe abamayi babo. Nkakaambo kaako, Bakamboni bazyali abana babo, ncobayanda kuti bamayi kababateelela akubalemeka.

Bakamboni ba Jehova mba Kristo bazizilwe nyika yoonse mbwiizulwa. Pele kuli ziindi nobatateelelwi kabotu. Aboobo tusyoma kuti broshuwa eeyi ilamugwasya kubateelela kabotu bana ba Bakamboni bali mumaanza aanu. Ncotusyoma kapati nkuti mulabona ncobakonzya kusala kwaandaana muziindi zimwi.