Ncinzi Leza Ncayanda?

Leza uyanda kuti katupona muluumuno alukkomano munyika yaparadaiso kukabe kutamani!

Pele mulakonzya kulibuzya kuti, ‘Mbuti mbocikonzya kucitika eeco?’ Bbaibbele lyaamba kuti Bwami bwa Leza buyoopa kuti cikonzyeke, alimwi nkuyanda kwa Leza kuti bantu boonse baiye kujatikizya Bwami oobo amakanze aakwe kujatikizya ndiswe.—Intembauzyo 37:11, 29; Isaya 9:7.

Leza uyanda kuti tugwasyigwe.

Mbubwenya mbuli usyi bana siluyando mbwayanda kuti bana bakwe kazibeendela kabotu zintu, awalo Taateesu wakujulu uyanda kuti katukkomene kukabe kutamani. (Isaya 48:17, 18) Wakasyomezya kuti “ooyo uucita kuyanda kwa Leza unooliko lyoonse mane kukabe kutamani.”—1 Johane 2:17.

Leza uyanda kuti katweenda munzila zyakwe.

Bbaibbele lyaamba kuti Mulengi wesu uyanda ‘kutuyiisya nzila zyakwe’ kutegwa tucikonzye ‘kweenda munzila zyakwe.’ (Isaya 2:2, 3) Wakamantanya “bantu bazina lyakwe” kutegwa baambilizye kuyanda kwakwe munyika yoonse.—Milimo 15:14.

Leza uyanda kuti katukamantene mukumukomba.

Muciindi cakwaandaanya bantu, bukombi bwa Jehova bwakasimpe bulabakamantanya muluyando lwini-lwini. (Johane 13:35) Ino mbaani mazuba aano bayiisya bantu munyika yoonse mbobakonzya kubelekela Leza calukamantano? Twamulomba kuti mujane bwiinguzi mubroshuwa eeyi.