Kuzunda kwa Bwami—Kusimpikizya Makani Mabotu Mumulawo

AMWEEZYEEZYE kuti nomukambauka kuŋanda aŋanda mwamvwa alamu ilalila. Mpoonya asyoonto-syoonto iyaabulilisya. Ciindi nomwatalika kwaambaula amukamwini ŋanda, sikumwaya ngomuli limwi mubukambausi wanyonganizyigwa naabona kuti kwasika mootokala wabamapulisa. Mupulisa waseluka mumootokala akumubuzya kuti: “Sena nywebo nyobilo ndinywe mwali kuunka kuŋanda aŋanda kubandika makani aajatikizya Bbaibbele? Bantu balatongooka!” Mpoonya mwaingula cabulemu, mwalizyibya kuti muli Bakamboni ba Jehova. Ino ncinzi citiicitike lino?

Citicitike cinoyeeme azintu zyakacitika musyule. Mumyaka yainda, ino mfwulumende kubusena ooko nkomukkala yali kubeendelezya buti Bakamboni ba Jehova? Sena kuli lwaanguluko lwakukomba? Kuti kacili boobo, eeco citondezya bakwesu abacizyi mbobakabeleka canguzu “kukwabilila akusimpikizya makani mabotu mumulawo.” (Flp 1:7) Kufwumbwa nkomukkala, kuzinzibala kuyeeya makani aajatikizya Bakamboni ba Jehova mbobakazunda munkuta kulakonzya kuyumya lusyomo lwanu. Mucibeela eeci, tulalanga-langa amwi aamakani aayo aakkomanisya. Kuzunda kwesu kusinizya kuti Bwami mbwancobeni, nkaambo notwatakacikonzya tolikke kucita nzyotwacita!