Kutegwa Mumwiiye Jesu, Amube. . .

BASILUBOMBA

Mbokunga wakali muntu uulondokede, Jesu tanaakacitikilwa mapenzi akukatazyigwa azintu zinji izyakali kulibilisya bantu bambi. Nokuba boobo, wakatondezya kuti wakali kubeetezyegwa kapati bantu. Wakalilisungwide kuliimya akubagwasya, nkokuti kucita zintu zinji kwiinda zyeezyo bantu nzibakali kulangila kuti ulabacitila. Masimpe, lubomba lwakali kumupa kugwasya bamwi. Amukkale ansi kuyeeya cikozyanyo calubomba lwakwe mu Zibalo 32, 37, 57, 99.

BASIKILIKA

Bantu bamisela yoonse, nkokuti bana abapati, bakali kulimvwa kwaanguluka kumusikila Jesu nkaambo tanaakali kuyoosya naa kulisumpula. Akaambo kakuti bantu bakali kubona kuti ulababikkila maano, bakali kumvwa kabotu kuba anguwe. Kutegwa mubone makani aaya, amubone Zibalo 25, 27, 95.

BANTU BAPAILA LYOONSE

Ciindi coonse Jesu wakali kupaila canguzu kuli Bausyi, kali alikke alimwi anaakali antoomwe abakombi bakasimpe. Wakali kupaila aaziindi ziindene-indene, ikutali buyo aciindi cakulya. Wakali kupaila kuti abalumbe Bausyi, abatembaule, alimwi akulomba busolozi bwabo katanasala mumakani mapati. Amulange-lange zikozyanyo zijakitizya makani aaya mu Zibalo 24, 34, 91, 122, 123.

BANTU BATALIYANDI

Ziindi zimwi, nokuba kuti wakali kuyandika kulyookezya naa kulikatalusya, Jesu wakali kuliimya akubikka kumbele zintu nzyobayandika bamwi. Tanaakajisi muuya wabusyaacivwulemwangu. Mumakani aaya aalo, wakatupa cikozyanyo ncotukonzya kutobelesya andiswe. Amwiiye cikozyanyo eeci mbocitondezyedwe mu Zibalo 19, 41, 52.

BANTU BALEKELELA

Jesu tanaakayiisya buyo kuti cilayandika kulekelela bamwi—wakatondezya kuti wakali muntu uulekelela kwiinda mukulekelela basikwiiya bakwe alimwi abantu bambi. Amuzinzibale kuyeeya zikozyanyo zyamakani aaya mu Zibalo 26, 40, 64, 85, 131.

BASUNGU

Kwakasinsimwa kuti ba Juda banji bakali kuyoomukaka Mesiya alimwi akuti basinkondonyina bakali kuyoomujaya. Aboobo ikuti naakali kuyanda, Jesu naakaubeleka buyo cawaalya awaalya mulimo wakugwasya bantu. Pele muciindi cakucita boobo, wakali musungu kusumpula bukombi bwakasimpe. Kwiinda mukucita boobo, wakapa cikozyanyo kuli basikumutobela boonse cijatikizya mbobeelede kuba basungu abalo ciindi nobajana bantu batayandi kumvwa mulumbe ngobakambauka naa ibabakazya. Amubone Zibalo 16, 72, 103.

BANTU BALICESYA

Jesu wakali kubainda kulamfwu bantu batalondokede muzintu zinji izitakonzyi kubalwa, mbuli muluzyibo alimwi abusongo. Akaambo kakuti wakalilondokede, wakalaanguzu kapati alimwi amaano kwiinda bantu boonse. Nokuba boobo, wakali kubelekela bamwi cakulicesya. Mulajana ziiyo zijatikizya makani aaya mu Zibalo 10, 62, 66, 94, 116.

BANTU BAKKAZIKA MOYO

Ciindi coonse Jesu wakali kubakkazikila moyo baapostolo bakwe alimwi abantu bambi eelyo nobakali kwaalilwa kutobela cikozyanyo cakwe naa kucita zintu nzyaakali kwaamba. Cakukkazika moyo wakali kubayiisya cakwiinduluka-induluka ziiyo nzyobakali kuyandika kwiiya kutegwa abagwasye kuba acilongwe ciyumu a Jehova. Amukkale ansi kuyeeya zikozyanyo zyakukkazika moyo kwa Jesu mu Zibalo 74, 98, 118, 135.