Ino Swaabo Nguni—ngu Abrahamu Naa Diabolosi?

Kacili ku Jerusalemu ku Pobwe lya Zivwuka, Jesu wazumanana kuyiisya twaambo tuyandika kapati twakasimpe. Ba Juda bamwi ibaliko bazwa aakumwaambila kuti: “Swebo tuli bana ba Abrahamu alimwi tatunabede bazike.” Jesu waingula kuti: “Ndilizyi kuti muli bana ba Abrahamu. Pele muyanda kundijaya, nkaambo jwi lyangu talizwidilili akati kanu. Ndaamba zintu nzindakabona nindakali antoomwe a Taata; aboobo andinywe amucite zintu nzyomwakamvwa kuli Uso.”—Johane 8:33, 37, 38.

Ncapandulula Jesu cilisalede: Bausyi Jesu baliindene aswaabo. Akaambo kakutamvwisya ncaamba Jesu, ba Juda bainduluka kulitaminina kuti: “Taateesu ngu Abrahamu.” (Johane 8:39; Isaya 41:8) Ncobeni kumubili mbana bakwe. Aboobo bayeeya kuti balaalusyomo ndomunya ndwaakajisi mulongwe wa Leza, Abrahamu.

Pele, Jesu wabapa bwiinguzi bugambya, wati: “Ikuti nomwali bana ba Abrahamu, nomwali kucita milimo njaakacita Abrahamu.” Masimpe, mwana mubotu wiiya bausyi. Jesu wazumanana kwaamba kuti: “Pele lino muyanda kundijaya, ndemuntu nendamwaambila kasimpe nkondakamvwa kuli Leza. Abrahamu kunyina naakacita boobu pe.” Kumane Jesu waamba kaambo kazingulusya mutwe, ulaamba: “Nywebo mucita milimo yauso.”—Johane 8:39-41.

Aino ba Juda tabanazyiba kuti Jesu waamba ni. Balitaminina kuti mbana baaŋanda, balaamba: “Tiitwakazyalwa mubwaamu pe; tujisi Taata omwe, Leza.” Pele, sena masimpe kuti Leza ngo Swaabo? Jesu waamba kuti: “Ikuti Leza naali Uso, nomwali kundiyanda, nkaambo ndakazwa kuli Leza alimwi ncendili waano. Tiindakaliboolela buyo pe, pele ooyo ngonguwe wakandituma.” Kumane Jesu wabuzya mubuzyo akulivwiila mwini ulaamba: “Nkaambo nzi ncomutamvwisyi ncondaamba? Nkaambo tamukonzyi kuswiilila majwi aangu.”—Johane 8:41-43.

Jesu wasola kutondezya bubi bukonzya kuboola akaambo kakumukaka. Pele lino cakutainda mumbali waamba kuti: “Muzwa kuli uso Diabolosi alimwi mulombozya kucita nzyayanda uso.” Ino usyi wabantu aaba uli buti? Jesu wamupandulula cakusalazya kuti: “Ooyo wakali mujayi kuzwa naakatalika, alimwi kunyina naakakakatila mukasimpe.” Mpoonya Jesu wayungizya kuti: “Ooyo uuzwa kuli Leza ulaaswiilila majwi aa Leza. Nkakaambo kaako ncomutaswiilili, nkaambo tamuzwi kuli Leza.”—Johane 8:44, 47.

Majwi aaya aakubasinsa abanyemya ba Juda, eelyo bavwiila kuti: “Sena tatuluzi notwaamba kuti, ‘Uli mu Samariya yebo alimwi ujisi daimona’?” Kwiinda mukwaamba Jesu kuti “mu Samariya,” batondezya kuti tabamuyandi amwainda pe. Pele Jesu tanaabikkila maano masampu aabo, waile kuvwiila kuti: “Tandijisi daimona pe, pele ndilamulemeka Taata, alimwi nywebo tamundilemeki.” Ikutondezya kuti makani aaya mapati Jesu wapa cisyomezyo cigambya cakuti: “Ikuti muntu katobela jwi lyangu, takaluboni lufwu pe.” Tapandululi kuti baapostolo alimwi abamwi buyo ibamutobela tabakafwi pe. Muciindi caboobo, tabakaluboni pe “lufwu lwabili,” nkokuti kunyonyoonwa mane kukabe kutamani kakunyina bulangizi bwakubuka.—Johane 8:48-51; Ciyubunuzyo 21:8.

Pele ba Juda bacibweza mbuli kuti Jesu waamba lufwu ndobafwa bantu boonse, eelyo baamba kuti: “Lino twazyiba kuti ulaadaimona. Abrahamu wakafwa, abasinsimi bakafwa, pele waamba kuti, ‘Ikuti muntu katobela jwi lyangu, takafwi pe.’ Sena uli mupati kwiinda taateesu Abrahamu iwakafwa? . . . Ino yebo uyeeya kuti nduwe ni?”—Johane 8:52, 53.

Cilisalede kuti ncaamba Jesu ncakuti walo ngo Mesiya. Pele muciindi cakwiingula mubuzyo wabo cacigaminina kuti naa nguni, waamba kuti: “Ikuti kandililemeka ndemwini, bulemu bwangu mbwabuyo. Ngu Taata uundilemeka, ooyo ngomwaamba kuti ngu Leza wanu. Nokuba boobo tamumuzyi pe, pele mebo ndilimuzyi. Alimwi ikuti ndaamba kuti tandimuzyi, inga ndaba mubeji mbuli ndinywe.”—Johane 8:54, 55.

Jesu alimwi waamba cikozyanyo casyaanyinakulu uusyomeka ulaamba: “Abrahamu uso wakakondwa kapati abulangizi bwakubona buzuba bwangu, alimwi wakabubona eelyo wakakondwa.” Inzya, kasyomede cisyomezyo ca Leza, Abrahamu wakali kulangila kusika kwa Mesiya. Ba Juda bavwiila cakutasyoma balaamba: “Sena wakamubona kale Abrahamu yebo ootanasisya amyaka iili 50 yakuzyalwa?” Jesu wavwiila kuti: “Ncobeni ndimwaambila masimpe kuti, Abrahamu katanabako, mebo ndakaliko.” Jesu waamba ciindi naakali kupona kujulu kali mungelo singuzu katanaboola anyika akuba muntu.—Johane 8:56-58.

Ba Juda kabanyemede akaambo kakuti Jesu waamba kuti wakali kupona katanabako Abrahamu, babweza mabwe kuti bamupwaye. Pele Jesu wazwa kakunyina kupwaigwa.