Wakabelekela Jehova Cakulibombya
“ICIPATI cini-cini takuli nkobelekela, pele nguyooyo ngobelekela.” John Booth wakali kuyandisya kwaabelesya majwi aya, alimwi wakali kwaatobela mubuumi bwakwe. Oobu buumi bwakwe anyika, bwalo mbwakapona kusikila mu Muhulo, mu January 8, 1996, bwakatondezya cakutazumbauzigwa oyo ngwaakasala kubelekela.
Kacili mwana-mwana kaindi mu 1921, John Booth wakali kusoleka kujana cakucita mubuumi. Wakali kuyiisya cikolo ca Munsondo kucikombelo ca Dutch Reformed Church, pele wakalengaana kuyooiya bukambausi nkaambo wakabona kuti banji bamafwundisi bakalaa bukkale bwakuliyanda. Ciindi naakabona kakwankwani kaambilizya mubandi uulaa mutwe wakuti “Millions Now Living Will Never Die [Mamiliyoni Aabaabo Bapona Lino Tabakafwi],” tanaakasowa ciindi pe kulembela mabbuku aakali kwaambilizigwa. Mbuzyakamunjila kapati nzyaakali kubala, wakatalika kucovwa ncinga makkilomita aali 24 ikuya kumiswaangano ya Basikwiiya Bbaibbele, mbuli mbubakali kuzizilwe Bakamboni ba Jehova kuciindeeco. Wakabbapatizigwa mu 1923 akutalika kuyaabukambauka iŋanda aŋanda mucooko ca Wallkill, mu New York, oko kwalo mukwasyi wakwe nkuwakalaa mpulazi yaŋombe zyamukupa.
Mukwesu Booth wakanjila mumulimo waciindi coonse mu April 1928. Wakakambauka mulubazu lwamuunda ilwakuminzyaabo, alimwi amuminzi ya Kumusanza, kayaabucincanya mabbuku aajatikizya Bbaibbele azyakulya abusena bwakoona. Wakainda mubuyumuyumu mbuli kujana basikukumba tucasu bajisi ntobolo, balo umwi wabo iwakadubula akucisa mupainiyanyina John Booth. Mu 1935 Mukwesu Booth wakasalwa kuba mulangizi weendeenda, elyo wakatalika kuswaya mbungano alimwi atukamu-kamu tusyoonto kuzinguluka cisi. Wakeendelezya miswaangano mipati akugwasya bakwesu abacizi kuliyumya nobakasigwa buti. Ikulangana amakamu aabantu banyemede, ikuliiminina munkuta, akwaangwa zyoonse zyakaba zintu zinyinzi ku Mukwesu Booth. “Inga kulayandika bbuku buya ikupa tupango-pango toonse twakuluula ziindi eezyo izyakali kuyoosya,” mbwaakalembele cimwi ciindi.
Mu 1941, Joseph F. Rutherford, walo wakali ngomweendelezi wa Watch Tower Society, wakatuma Mukwesu Booth kuyoobeleka kumpulazi iitegwa Kingdom Farm, munsi-munsi aku Ithaca, mu New York. Ooko wakaakubeleka cakusyomeka kwamyaka iili 28. Kalutabi nolutontola luyando lwakwe lwamulimo, wakakkomana myaka yoonse eyo ikusangana azyuulu zyabasicikolo ba Watchtower Bible School of Gilead iciiyiisya bamamishinali, calo cakali nkuko ku Kingdom Farm kusikila mu 1961. Mu 1970, Mukwesu Booth wakalombwa kuti akabelekele kumpulazi iitegwa Watchtower Farms ku Wallkill, mu New York, elyo wakazoolijana mucilawo mweena mwaakatalikila bupainiya myaka iili 45 eyo yakaindide.
Mu 1974, Mukwesu Booth wakasalwa kuba umwi wa Kabunga Keendelezya ka Bakamboni ba Jehova ku Brooklyn, mu New York. Wakabeleka mumulimo oyo kusikila kulufwu lwakwe kalaa myaka yakuzyalwa iili 93. John Booth wakali kuyandwa kapati akaambo kakulibombya cini-cini alimwi abube bwaluse ibwa Bunakristo. Kusikila naatakacili kukonzya kupona kabotu alimwi naakazoomaninwa nguzu, wakali kukambauka cakusyomeka iŋanda aŋanda alimwi amumigwagwa yadolopo.
Nobamulila aabo mbaakali kubeleka limwi, balajana luumbulizyo mucisyomezyo ca Bbaibbele icijatikizya Banakristo bananike mbuli nguwe, icakuti balabusyigwa kuya kubuumi bwakujulu akuti “milimo yabo ilabatobela.” (Ciyubunuzyo 14:13; 1 Ba-Korinto 15:51-54) Aino ooko nkuubusena bumbi, pele bwalo mbusena John Booth nkwayookonzya kubelekela Jehova lyoonse alyoonse!
[Cifwanikiso icili apeeji 32]
John Booth 1903-1996
[Kulumba]
Chicago Herald-American