“Toonse Tuli Baluzubo Lomwe”
MAZUBA aya ainda, kulangana zikombelo amibala kwasakana nyika yoonse mbwiizulwa. Kwiimpana kwamisyobo kwabusya kujayana, kupenzyanya bulanga, alimwi azinyonyoono zimbi zyuusya nsoni. Kweelana alipooti yaba Amnesty International, ikutalanganya buntususu kwakasinikizya bantu basika ku 23 miliyoni nyika yoonse mbwiizulwa kutija kuzwa mumaanda abo mu 1994.
Imwalo mu Rwanda bakasika ku 500,000 bantu bakajaigwa alimwi bakainda ku 2,000,000 ibambi aabo balo bakaba bazangalisi nobakatalika kulwana ba Tutsi aba Hutu. Ipepa lyamakani lyaku Belgium lya Le Soir lyakaamba kuti: “Ikapati Bakamboni ba Jehova balo bakapenzegwa bumbi akaambo kakukaka kubweza zilwanyo.” Bakamboni ba Jehova tabatoli lubazu mulumamba pe. Nokuba boobo, myaanda yambabo yakajaigwa mukulwana oku. Eeci cituyeezya majwi aa Jesu kuli basiciiya bakwe aakuti: “Nkaambo tamuli bayeeyi nyika . . . inyika nciimusulide.”—Johane 15:19.
Umwi mukwasyi wa Bakamboni—Eugène Ntabana, mukaintu wakwe, alimwi abana bobile—bakali kukkala mudolopo lipati, lya Kigali. Naakali kupandulwida basimukobonyina zyakutatola lubazu kwa Bunakristo, kanjikanji Eugène wakali kunga ulacaamba civwuna cimwi cisyuuka kabotu mumasena aakasaala icamusyobo uutegwa bougainvillea.—Matthew 22:21.
Wakali kunga wapandulula ategwa, “Omuno mu Kigali, cisyango ca bougainvillea cilazyala maluba-luba aasalala, aasalala-salala, alimwi aatuba zimwi ziindi. Nokuba boobo, oonse ngaluzubo lomwe. Ncimwi buyo andiswe tobantu. Nokuba kuti tuliindene-indene misyobo, mibala, naa mumasena motuzwa, toonse tuli baluzubo lomwe, iluzubo lwamuntususu.”
Mukubula coolwe, nokuba kuti wakali mukwasyi waluumuno alimwi uutakwe lubazu, ibana Ntabana bakajaigwa ankamu yakasungweede buyo kutila bulowa. Pesi bakafwa mulusyomo. Tulakonzya kusyoma kuti Jehova Leza uyoozuzikizya cisyomezyo cakwe kubantu bali boobu, elyo bakabusigwe kutegwa bakone nyika eyo yalo iitakabi amuuya wakulangana ziimo. (Incito 24:15) Mpoona, imukwasyi wabana Ntabana, antoomwe abambi, “bayookondwa muluumuno lunji.”—Intembauzyo 37:11.