Ciindi Bakamboni ba Jehova Nobamuswaya

Ncinzi ncobayelede kucita ba Katolika ciindi umwi wa Bakamboni ba Jehova naabaswaya aŋanda yabo? Ibbuku lyakalembwa ono-ono awa ambunga iitegwa National Catechistic Bureau of the Italian Bishops’ Conference lyaamba kuti: “Ikukaka kubandika ambabo, kamuseka-seka pele kamusinizizye, takuli kubula bulemu pe.”

Tabali boonse Bakatolika bazumina, mbuli mbokutondezedwe a lugwalo lwakatumwa kupepa lyamakani litegwa Gazzetta del Mezzogiorno amuntu uukkala mudolopo lya Foggia, ku Italy lwalo lwaamba kuti:

“Tandili umwi wa Bakamboni ba Jehova. Ndili Katolika. Pele ndiligambidwe amilawo imwi icikombelo njocibikkilide basimbungano, ikubaambila kubikka zizibyo azitendele zyabo zyakutanda Bakamboni ba Jehova. Kakubee aaba bantu balo bayumwide buyo Majwi aa Leza, alimwi balabagwasya bantu bamwi kuyungizya luzibo lwini-lwini lwa Bbaibbele. Eeyi milawo indiyeezya ciindi cisi ca Italy nocakanjililwa bulwazi bwakusoomona akuluka aboobo twakapegwa kulaililwa kubotu kwambotunga twalikwabilila kubulwazi oobu.

“Mukuyeeya kwangu, ooku kubikka milawo miyumu boobu kutondezya kuti icikombelo cilalibikkila milawo yaco kakunyina kulanganya naa kubuzya basicikombelo naa balaukkomanina mulawo ooyo. Pele kwamyaka minji ono, ndababona Bakatolika abalo kabaya kuŋanda aŋanda, kabaaswaya maanda aa Bakamboni ba Jehova aalo; kumane balo babatambula kabotu, balabandika ambabo, kakunyina angobatanda.”

Bakamboni ba Jehova tababasinikizyi bantu kutambula mulumbe wabo. Mubusena bwakucita boobo, balasoleka canguzu kubandika abantu bamwi zyabulangizi bujanika Mujwi lya Leza mbobajana kuba bubakulwaizya mumazubaano aamapenzi. Kwiinda mukwiinka kuŋanda aŋanda, alimwi akwiinda mukubandika abaabo mbobaswaanganya mumigwagwa, Bakamboni ba Jehova balabandika makani mabotu aa Bwami bwa Leza abaabo balisungwide kuswiilila.—Matayo 24:14; Incito 5:42; 17:17.