Ikukomezya Bana Balilemeka—Sena Kucikonzeka?
“ONO tukkede muciinga cabantu cikatazya kapati, ciinga caziyanza zisiyene-siyene imunyinaa mulawo uuliimininide weendelezya bantu boonse mukulilemeka,” mbwaamba oobo Robert Glossop waku Vanier Institute for the Family mudolopo lya Ottawa, kucisi ca Canada. Cakatobela ncinzi? Ilipooti mupepa lyamakani litegwa The Toronto Star yaamba kuti: “Kumita kwabasimbi bacili basyoonto kapati, ikulwana kwabakubusi alimwi akulijaya kwavwula kapati.”
Eeli penzi talili buyo ku North America pe. Mweendelezi wa Center for Human Development wazina lya Bill Damon ku Brown Yunivesiti yaku Rhode Island ku U.S.A., wakaalanga-langa mapenzi aali boobu ku Britain alimwi amumasi amwi aaku Europe, kubikkilizya aku Australia, Israyeli alimwi aku Japan. Waamba kuti zikombelo, zikolo alimwi ambunga zimwi ziyabuleka kusololela bana. Waamba kuti mubukkale bwesu “tatuzi zintu zyeelede ziyandika kutegwa bana babe aaciimo cibotu.” Kaamba bantu bahaazibwene mukuyiisya bukkale bwamumukwasyi ibayiisya kuti “ikutegwa bana bakkale kabotu tabeelede kulayigwa pe,” Damon walo uzumanana kuti “eeyi njenzila yakukomezya bana bazangi.”
Ncinzi bakubusi bamazubaano ncobayandika? Lyoonse bayandika kuyiisya caluyando ikubalulamika mizeezo alimwi amyoyo. Mukubusi umwi aumwi uyandika lulayo lwakwe lumugeme kweelana aciimo cakwe. Kwiinda mukukulwaizigwaa luyando, lulayo kanjikanji lulakonzya kalupegwa kwiinda mukukanana. Nkakaambo kaako ku Tusimpi 8:33 twaambilwa kuti “amuswiilile lulayo.” Pele “majwi luzutu taakonzyi kwiiyisya” bana bamwi. Kuli mbabo, ikusubulwa ikupegwa munsaizi alimwi ikweelede akaambo kakutamvwa kwabo, inga kwayandika. (Tusimpi 17:10; 23:13, 14; 29:19) Pele, Bbaibbele nolikulwaizya kucita boobo, talyaambi kuuma mwana ciindi sikuuma nanyemede nokuba kukulwaizya kuumina limwi cakuti mane mwana mwaalikukwibbaulwa kwaakuzwa bulowa buya naa kuzimba. (Tusimpi 16:32) Muciindi caboobo, imwana weelede kuzyiba ncalulamikilwa munzila eyo alimwi weelede kuziba kuti muzyali ulamubikkila maanu alimwi ulamuyanda.—Amweezyanisye a Ba-Hebrayo 12:6, 11.
Ilulayo luli boobu lubeleka alimwi lubotu lwamu Bbaibbele lwapegwa kabotu-kabotu mubbuku litegwa Inzila Yakujana Lukkomano Mumukwasyi.