Ino Kubasangana?

NDJAUKUA ULIMBA ulaamyaka yakuzyalwa iili 73, pele mwakali wakabweza lweendo lwamakkilomita aali 450. Wakeenda musinzo woonse elyo wakamutolela mazuba aali 16.

Oyu mudaala wakeenda lweendo olu kutegwa akajanike kuli umwi wamiswaangano ya Bakamboni ba Jehova iicitwa mwaka amwaka. Nowakamana muswaangano, kakkomene kapati alimwi akuyumizigwa munzila yakumuuya, wakeenda kuya kumunzi alimwi—mazuba aali 16 aambi. Sena kwakali kuyandika kupenga boobo? Inzya! Ndjaukua Ulimba walweenda lweendo olu kwamyaka iili mbwiibede mwaka amwaka.

Oyu mwaalumi muna Afulika wakali akati kabantu bainda kutuulunzuma tuli 15 ibakazwa kumanyika aainda ku 230 ibakajanika kumiswaangano ya Bakamboni ba Jehova mwakali. Aino ibanji teebakali kweenda kwamazuba manji kuya kubusena bwamuswaangano. Ibunji bwabo bakali kusikaa myootokala, mabbaasi, zitima naa ndeke. Sena mwakali akati kabo?

Mu 1998, imiswaangano iyoocitwa alimwi nyika yoonse mbwiizulwa, minji inooli cilimo. Ikuti kacili muumi, Ndjaukua Ulimba uyooweenda alimwi musinzo mulamfwu oyu kutegwa akajanike. Walo atuulunzuma twabamwi tuli mbotubede bayooteelela pulogilamu iigwasya, iiyumya lusyomo alimwi iikulwaizya. Kuli baabo boonse bayoojanika, imuswaangano uyooba cintu cibotu mumwaka. Anywebo mwatambwa kuti mukajanike. Bakamboni ba Jehova ibali mubusena bwanu bayookkomana kumwaambila busena ikuyoobeda muswaangano ikufwaafwi ankomukkala.