Amubucenjelele Busimoni!
SIMONI waku Samariya wakali kulemekwa kapati abantu mbocakali kukkala limwi. Wakali kupona mumwaanda wamyaka wakusaanguna C.E., alimwi bantu bakalaangilidwe kumicito yakwe yamabibo alimwi bakali kunga balamutembaula ategwa: “Oyu muntu ninguzu zya-Leza ezyo izitegwa Nzipati.”—Incito 8:9-11.
Nokuba boobo, Simoni naakaba Munakristo uubbapatizidwe, wakazyiba kuti kwakali nguzu zipati kwiinda nzyaakali kutondezya katanasanduka. Zyakali nguzu izyakapedwe baapostolo ba Jesu, izyakali kubagwasya kupa bambi izipego zyamaleele izyamuuya uusalala. Simoni wakakkomana kapati cakuti wakapa baapostolo imali akubalomba ulaamba: “Amundipe amebo nguzu ezi, kuti kufumbwa ngwenti bike maanza atambule Muuya Uusalala.”—Incito 8:13-19.
Mwaapostolo Petro wakamusinsa Simoni, ulaamba: “Mali aako afwidilile antoomwe ayebo, nkaambo wayeeya kuti cipego ca-Leza caulwa mali. Tojisi caabilo nebuba busena kumakani aya, nkaambo moyo wako tuululeme kumbele lya-Leza.”—Incito 8:20, 21.
Kucibalo camu Bbaibbele eci nkolizwa bbala lyakuti “busimoni,” lyalo ilipandulwidwe kuba “cinyonyoono cakuula naa kuuzya zyuuno naa kusumpulwa mucikombelo.” Ibbuku litegwa New Catholic Encyclopedia lilazumina kuti ikapati kuzwa mumwaanda wa 9 kusikila wa 11 “busimoni bwakalizwide mumasena mukkala basikulibenga, akati kabasololi bazikombelo basyoonto, babbishopo mane aakati kabapaapa.” Ikumwaya kwafwuka kwa The Encyclopædia Britannica (1878) kwaamba kuti: “Ikulingaula makani aansiku aamiswaangano yamaseseke yaba Paapa kusinizya sikwiiya kuti kwiina kusala kwakacitwa kwatakajatikizya busimoni, pele muziindi zinjaanji ibusimoni bwakacitwa mumiswaangano yamaseseke mboobo bubyaabi cini-cini, bufwisya bweemya kapati alimwi butasisiki.”
Banakristo bakasimpe sunu beelede kubucenjelela busimoni. Mucikozyanyo, bamwi balakonzya kubalumbaizya cakwiindizya naa ikubapa zipego aabo bajisi nguzu zyakupa mikuli iiyungizidwe. Kulubazu lumwi, aabo ibalaanguzu zyakupa mikuli eyi balakonzya kutondezya kusalulula baabo ibakonzya—alimwi lyoonse ibasungweede—kubapa zipego ezyo. Imbazu zyoonse ezi zyobile zijatikizya busimoni, alimwi Magwalo taaizumizyi nzila ili boobo. Petro wakakulwaizya Simoni ulaamba: “Sanduka kububi bwako obu, ukumbile kuli-[Jehova] Leza, ambweni kulajatilwa kuyeeya kwamoyo wako [“muzeezo wako oyu,” New Jerusalem Bible.] Nkaambo ndabona kuti uli mundulwe iilula amukwaangwa bubi.”—Incito 8:22, 23.
Mucoolwe, Simoni wakazyiba mbokwaalubide kapati kulombozya kwakwe. Wakakombelezya baapostolo ulaamba: “Amundikombele ku-Mwami [Jehova], entasikilwa neciba comwe cazeezi zintu nzooamba.” (Incito 8:24) Akaambo kakutobela ciiyo ciyandika kapati cili mucibalo eci, Banakristo beni-beni balasolekesya kweeleba kubisigwaa busimoni bwamusyobo uuli woonse.