“Imulumi Sicoolwe Uulaa Mukaintu Mubotu”

IBANTU bamwi batamikizya Bakamboni ba Jehova ziindi zinjaanji kuti mbabamwaya makwatano aabantu. Nokuba boobo, aaya taali masimpe nkaambo makwatano manji imujanika kuti omwe buyo wabanabukwetene ngo Kamboni wa Jehova alazwidilila. Ikutobela lulayo lwa Bbaibbele mubukkale bwamumukwasyi kuleta lukkomano mulukwatano, eci cilatondezegwa mulugwalo olu ilwakalembedwe mupepa lyamakani lyaku France.

“Kwamyaka iitandila ku 28 lino, ndali mulumi uukkomene kubaa mukaintu mubotu walo uuli ngumwi wa Bakamboni ba Jehova. Wakandikomezyela bana ibali musanu, alo aali bana bakujana bobile. Boonse wali kubalanga kabotu cakutasala alimwi muluyando. Lino mbweli mweendelezi mupati wakkampani iijisi babelesi ibali 45, masimpe mukaintu wangu wandigwasya kapati kuti ndisumpuke mumulimo wangu. Nkakaambo kaako nindakabona zyakalembwa mupepa lyamakani ndyondiyandisisya kubala kalyaamba zya Bakamboni ba Jehova kuti mbantu balibilisya naa bayoosya kucibeela citegwa Lot-et-Garonne ndakayanda kuti ndimupe bukamboni bwini-bwini.”

Lugwalo lulaindilizya kwaamba kuti: “Tabafwebi alimwi tabakolwi. Sena eci cilalibilisya? Mbanakristo batasinikizyi muntu uli oonse kutobela milawo njobatobela. Bapa citondezyo cibotu muzyintu zinji. . . . Tabajaniki muziyanza zibi zyakubba mali antela kusambala misamu iikola. Tabakonki kulikasya kukwata naa kukwatwa alimwi mbantu bapona buumi buli mbuli bwamuntu uuli oonse. . . .

“Inga mwandibuzya kuti: Ino nkaambo nzi yebo ncotali umwi wa Bakamboni ba Jehova? Nkaambo kakuti kuyandika lusyomo lwa Bunakristo abukkale bululeme alimwi eezi zintu tazijaniki-janiki kubantu banji.”