Bakali “Kuyoowa Leza”

BANA Israyeli nobakali mubuzike mucisi ca Egepita basikutumbusya ba-Hebrayo Sifra alimwi a Puwa bakabikkidwe muciimo cikatazya. Mukusola kucesya mweelwe wabamasi iwakali kuyaabuvwula, Farao wakalailila banakazi aba kuti: “Mwatumbusya banakazi ba-Hebrayo . . . , na ngumulombe muleelede kumujaya.”—Kulonga 1:15, 16.

Sifra a Puwa “bakali kuyoowa Leza” elyo bakatondezya busicamba “teebakacita Mwami wa-Egepita mbwaakabalailila.” Aboobo bakali kufwutusya bana balombe nokuba kuti ntaamu eyi yakali kunoobanjizya muntenda. Jehova “wakacitila basikutumbusya kabotu,” akubalongezya akaambo kamilimo yabo yakukwabilila buumi.—Kulonga 1:17-21.

Makani aaya atondezya kuti Jehova ulabalumba abo bamubelekela. Nzyobakacita ba Sifra a Puwa nakazibona buyo kuti ndweetelelo ndwaalaawo muntu woonse nokuba kuti bakalaa camba. Kayi taakwe mwanakazi ulaamanu uunga wajaya mwana muvwanda! Pesi Jehova wakalizi kuti bamwi bantu balacita zibi akaambo kakuyoowa muntu. Wakabona kuti aaba basikutumbusya teebakali buyo alweetelelo, pele bakali kuyoowa Leza akumulemeka ncicakabapa kucita boobo.

Tulalumba kapati kubelekela Leza uutalubi mulimo ngotucita cakusyomeka! Ambweni taakwe muntu akati kesu wakasunkwa munzila njobaakasunkwa ba Sifra a Puwa. Pele notukakatila mukucita cili kabotu—kube kucikolo naa kuncito nkotubeleka, tube muciimo cili buti—Jehova taakwe natabikkili maanu kusyomeka kwesu kulinguwe. Pele, “nguupa cilumbo kulibaabo bamuyandaula.” (Ba-Hebrayo 11:6) Inzya, “Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe, mbomwakabelekela basalala, asunu mucibabelekela.”—Ba-Hebrayo 6:10.