Ikusyomeka Lyoonse Kuli Jehova

IKUSYOMEKA mbube buyandika kapati mbobajisi babelesi ba Leza mwini-mwini Jehova, nokuba kuti sunu ncintu citajaniki-janiki. Imuntu uusyomeka ulaliyumya mumasukusyo alimwi tazungaani pe napenga kwaciindi cilamfwu buti. Amuyeeye Mwami mubotu Hezekiya. Ibbaibbele lyaamba kuti, “Ka[ku]takwe naba omwe iwakeelene awe akati kabami boonse ba-Juda ibakamutaangunina naa ibakamutobela.” Ino ncizi cakapa kuti Hezekiya abe muntu ulibedelede? Nkaambo “wakakakatila kuli-Jehova” nokuba kuti wakazingulukidwe aabantu bakali kukomba leza wakubeja Moleki. Inzya, Hezekiya “taakwe naakaleka kumutobela [Jehova], alimwi wakabamba imbeta zyoonse Jehova nzyaakalailila.”—2 Bami 18:1-6.

Imuntu uumbi wakazumanana kusyomeka kuli Jehova mmwaapostolo Paulo. Imakani aamba zyamulimo wakwe aalembedwe mu Magwalo aa Bunakristo aa Cigiliki alatondezya caantangalala kuti Paulo wakazumanana mumulimo wakwe kuli Leza camoyo woonse. Kumamanino aabuumi bwakwe bwaanyika, kalyaamba lwakwe mwini, Paulo wakali kukonzya kwaamba kuti: “Ndakalwana inkondo imbotu, ndakalumana lweendo, alimwi ndakalubamba lusyomo.”—2 Timoteo 4:7.

Taziliboteli kaka zikozyanyo ezi nzyotujisi muli Hezekiya alimwi a Paulo, ibantu bakasyomeka! Atulwiiye lusyomo lwabo kwiinda mukuba bantu basyomeka lyoonse kuli Leza wesu Mupati, Jehova.—Ba-Hebrayo 13:7.