Luumuno Munyika Yoonse—Munzila Nzi?
SENA luumuno munyika yoonse lulaafwaafwi kuba? Ibantu banji mbobakali kuyeeya oobo, pele lino bali mukudooneka. Kweelanaa lipooti yakali kubandika zyabuyumuyumu bwabukkale bwakumbele mumuteende uumwaigwa mucisi ca South Africa uutegwa Daily Mail & Guardian, “kuyeeyela zyabukkale bubotu bupya mumasi oonse ikwakacitwa myaka iili 10 buyo yainda, lino kuboneka kuti tacicili cintu cakusyoma naaceya pe.”
Ibalembi baamba zyabulangizi bwakadumide mumyaka iili kkumi buyo yainda. Mbuyakamanina buyo Inkondo Yakukongana alwalo lunya lwacisi cilaanguzu lwakamana. Lino kwakali kuyeeyelwa kuti ambweni ngamatalikilo aabukkale bupya, bantu banji bakali kuyeeya kuti ambweni lino bantu balakonzya kuzwidilila mukumanizya bucete, malwazi alimwi amakani aabukkale. Ilipooti yaamba kuti, “oobu bulangizi lino bulibonya kuti ncintu cimwi citakonzyi kucitika pe. Imazwanga aambi ali mukutalika mumasena mwaatakali kuyeeyelwa; ibucete munyika mbwiizulwa buyaambele buya. Lino kuli masi obile aatalika kubelesya zilwanyo zyanyukkiliya. Impuwo yambunga ya UN yayaansi kapati akaambo kakuti taicikonzyi kubweza ntaamo zigwasya kutegwa imanizye mazwangaa bantu aatamani. Ibukkale bwabantu buyaabucinca kuzwa mukuyeeyela bukkale bubotu kuya mubukkale buyoosya kapati.”
Basikwiiya Bbaibbele balo balizi kuti kusoleka kwabantu nokuba kuti inga kabajisi mpuwo mbotu buti, takukonzyi kuzwidilila pe. Ino nkaambo nzi? Nkaambo kakuti ikweelanaa caamba Bbaibbele, ‘nyika yoonse iikkede muzibi.’ (1 Johane 5:19) Ikuti nyika kaicili aansi abweendelezi bwa Saatani, tiikonzyi kuba muciimo ca Paradaiso, Leza mbwaakiilenga kuti ibe mbubo pe.
Pele bumboni nkobuli ibusinizya zintu zibotu kumbele. Jehova Leza usyomezya kuleta luumuno munyika yoonse, ikutali kwiinda mukubambulula bweende obu bwazintu pe, pele kwiinda mukuleta “nyika impya” mwalo ‘mukkala bululami.’ (2 Petro 3:13) Ee, kwiinda mu Bwami bwa Leza, inyika yesu iyoosandulwa kuba yaluumuno, munzi uukkomanisya mwalo buumi alimwi amilimo mozinookkomanisya lyoonse kubantu balibombya. Kunze lyaboobo, Leza usyomezya kuti “uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.” Zisyomezyo ezi taziyeeme akusinsima kwabantu kwakuyeeyela buyo pe. Muciindi caboobo, ziyeeme aa Jwi lyakasimpe lya Mulengi uutabeji.—Ciyubunuzyo 21: 4; Tito 1: 2.