Sena Kukamantana Kwanjiisyo Zyabukombi Kulaafwaafwi Kucitika?

Sena Kukamantana Kwanjiisyo Zyabukombi Kulaafwaafwi Kucitika?

Imweendelezi wambunga iitegwa Lutheran World Federation wazina lya Christian Krause cimwi ciindi wakati: “Sunu kuli kucinca kupati kujatikizya bweendelezi bwazikombelo zyesu.” Awalo Paapa John Paul II wakaamba makani “aakuzwidilila kupati kwacitwa mukukamantanya Banakristo boonse, eeci tiicakali cintu cuuba-uba pe.

Ooku kwaambilizya kwalutangalo ikwakacitwaa bakombi aaba kwakakulwaizigwaa kusainwa kwa Pepa Lizumizidwe a Boonse lyakali kwaamba kubelekela Antoomwe Munjiisyo Yabululami Alufwutuko ilyakasainwa mu October 31, 1999 mudolopo lya Augsburg mucisi ca Germany. Iciindi camuswaangano oyu alimwi abusena mbubakali kubandikila makani aaya bwakeelela kapati. Kwaambwa kuti mu October 31, 1517, Martin Luther wakagagaila cikwankwani cakajisi makanze aakwe aali 95 amulyango wacikombelo mudolopo lya Wittenberg calo cakatalisya Zikombelo zyaci Protesitanti. Mumwaka wa 1530 Luther abasikumutobela bakwe bakaswaanganina ku Augsburg kwalo nkubakabandikila makani aajatikizya nzyobasyoma, pele izyakalembedwe zyakakakwa aba Cikombelo caba Katolika calo cakaleta kutamvwana kupati akati kanjiisyo zyaba Protesitanti azyaba Katolika.

Sena Kubelekela Antoomwe oko nentaamu iiyandika mukumanizya manyongwe aazikombelo mbubwenya mbuli mbokwaambwa? Tazili zikombelo zyoonse izyakazumina pe. Bahaazibwene kumakani abukombi iba Protesitanti ibainda ku 250 bakasaina kuti tabazuminizyi pe, tabayandi abuniini buya kweendelezyegwaa Cikombelo caba Katolika. Alimwi bakakalala ciindi Cikombelo caba Katolika nocakaambilizya makani aacisubulo cimwi cibyaabi mumwaka wa 2000, eci calo icakatalisya kwiimpana kuliko kuzwa myaka iili 500 yainda. Mbwaanga makani aakabandikwa ku Augsburg alimwi aakukazya kwaba Katolika aakabandikilwa ku Muswaangano waku Trent acibeleka, nkokuti ilukamantano kuzikombelo eezi talulangilwi kucitika pe.

Ikwaandaana akutamvwana kucitika mu Kristendomu nzintu zipati zitakonzyi kumanizyigwa kwiinda mukusainwa buyo kwapepa lyacizuminano. Kunze lyaboobo, ilukamantano mulusyomo luyeeme kapati aazintu zisinizigwa mu Jwi lya Leza, Ibbaibbele. (Ba-Efeso 4:3-6) Lukamantano lwini-lwini talukonzyi kujanika kwiinda mukubelesya mulomo mpande, pele lulakozya kujanwa kwiinda mukwiiya akucita nzyayanda Leza. Musinsimi uusyomeka Mika wakati: “Misyobo yoonse ileenda muzina lyamizimu yayo, aswebo tuleenda muzina lya-Jehova Leza wesu lyoonse mane kukabe kutamani.”—Mika 4:5.

Nkotwakajana cifwanikiso icili apeeji 32]