Balalibelesya Izina lya Leza mu Afulika Mpoili Akati-kati
IBUNJI bwabantu bakkala mu Afulika Mpoili Akati-Kati balasyoma muli Leza. Tabadooneki buya akudooneka kwaamba kuti ngo Mulengi wazintu zyoonse. (Ciyubunuzyo 4:11) Mbweena buyo mbuli bamwi bantu muzilawo zimwi mbobasyoma, nokuba kuti kanjikanji izina lyakwe lyakuti Jehova tabalibikkili maano.
Ibantu bakkala mu Afulika Mpoili Akati-Kati alimwi amuzibeela zimwi zyanyika, balalibelesya zina lya Leza ciindi nobapaila Mupailo Wamwami wakuti, “Alilemekwe izina lyako.” (Matayo 6:9) Pele kwaciindi cilamfwu, mbasyoonto buyo bantu ibakalilizyi izina eelyo. Nokuba boobo, kwamyaka minji yainda, Bakamboni ba Jehova balo ibakambauka cabusungu, babagwasya bantu ikucinca kuyeeya kwabo kujatikizya mbuli mbolibelesyegwa zina lya Leza. Mazubaano, izina lya Leza lilizyibidwe kapati alimwi lilabelesyegwa mumyaambo minji yamu Afulika mbuli mu Cizulu balati (uJehova), Ciyoruba (Jehofah), Cixhosa (uYehova) alimwi a Ciswahili (Yehova). Nokuba boobo, ibunji bwabusanduluzi bwa Bbaibbele mumyaambo njeena eeyi, baciwayawaya kulibesya izina lya Leza lyakuti Jehova.
Ibupanduluzi bubotu bubelesya izina lya Leza ndi Bbaibbele lyamu musyobo wa Cizande walo aabona wiitwa kuti Cipazande naa Ciazande, imwaambo uubelesyegwa muzibeela zimwi zya Central Africa Republic mu Sudan alimwi amu Democratic Republic of Congo. Mucibeela eeco canyika, bantu balalibelesya izina lya Leza lyalo lilembedwe mumusyobo wakwabo kuti Yekova. Nokuba kuti izina lya Leza lilisiyene-siyene mumilaka yaambaulwa, cilayandika kapati kulibelesya izina eeli. Nkaambo nzi? Nkaambo kakuti muntu ‘umwi aumwi uulilila izina lya Jehova uyoofwutuka.’—Ba-Roma 10:13.
Maapu/[Cifwanikiso icili apeeji 32]
(Kutegwa mubone bwini mbwaakkede mabala, amubone bbuku lini)
SUDAN
CENTRAL AFRICAN REPUBLIC
DEMOCRATIC REPUBLIC OF CONGO
[Kulumba]
The Complete Encyclopedia of Illustration/J. G. Heck