Sena Muli Mbuli Cisamu ca Lagani Auna?

MUMUNZI uuli kumamanino aa Cito ca Moresby, kucisi ca Papua New Guinea, babelesi bobile bakali kuya kuŋanda kuzwa mumulimo wakukambauka. Kabeenda, bakabona cisamu cibotu. Munene wakati: “Ma! Nceeci cisamu ca lagani auna!” Kalanga kumusankwa, wakazumanana ategwa: “Eeli zina lyaamba kuti ‘cisamu caamwaka.’ Kwiimpana azisamu zinji zyamumasena muwa mvwula kapati, mwaka amwaka cilakunkumuka akulibonya mbuli kuti ciliyumide. Pele imvwula niiboola, cilasyuuka, cilafwulula akulibonya kabotu alimwi.”

Kuli ciiyo ciinga cayiigwa kucisamu ca lagani auna, calo icikozyenye acisamu ca zakalanda. Kweelana abasyaazibwene bamwi, cisamu eeci cili akati kazisamu zyosanwe zifwulula iziinda kubota munyika yoonse. Nokuba kuti maluba-luba amatu aaco zilakunkumuka cilimo, cisamu eeci cilayobola maanzi. Miyanda yancico mmiyumu alimwi ilakonzya kupiningizya mumabwe aali ansi kapati. Munzila eeyi, tacikonzyi kunyukulwa amyuuwo yuunga canguzu. Mubufwaafwi, cilapona kwiinda mukucikonzya kukkala mubukkale bukatazya.

Tulakonzya kuba mubukkale busunka lusyomo lwesu. Ncinzi ciyootugwasya kutegwa tuliyumye? Mbubwenya mbuli cisamu ca lagani auna, tulakonzya kuswimpa akuyobola maanzi aapa buumi aajanika mu Jwi lya Leza. Alimwi tweelede kukakatila kuli Jehova, ‘indomba yesu’ akumbunga yakwe. (2 Samuele 22:3) Mubwini, cisamu ca lagani auna nciyeekezyo cibotu citondezya kuti nomuba mubukkale bwamapenzi, tulakonzya kuzumanana kuyuma akubota kumuuya ikuti twabelesya zintu zigwasya nzyatupa Jehova. Kwiinda mukucita boobo, ‘tuyoojana zyeezyo zyakasyomezyegwa’ anguwe, kubikkilizya acisyomezyo cabuumi butamani.—Ba-Hebrayo 6:12; Ciyubunuzyo 21:4.