Lugwalo Kuzwa ku Nicaragua
“Mwasika Amulonga wa Coco, Munyone Kuya Kululyo”
“MUYANDIKA mootokala uukonzya kwiinda mumigwagwa itali kabotu, ntambo yakukwelezya mootokala azigumbuli zyamungwimba. Mumasena aamwi nzila taili kabotu cakuti mulakonzya kunjomba. Mwasika amulonga wa Coco, munyone kuya kululyo.”
Masimpe ngakuti, majwi ngaakaamba misyinalima kunyina naakandipa kuleka kulibilika. Nokuba boobo, buzuba bumwi muli Bwabili mafwumo-fwumo ndakanyamuka kuya kumuswaangano wa Bunakristo ku Wamblán, dolopo lisyoonto lili kunyika mucisi ca Nicaragua.
Ndakanyamuka kubucedo amootokala wangu ngundakali kusyoma kapati nokuba kuti wakali wakaindi. Ndakainda mugwagwa uuzwa ku Alaska kuya ku Chile. Nindakasika ku Jinotega ndakanyona kuya mumugwagwa umbi uutali kabotu ngubaamba kuti feo bakkala nkuko. Kanditanazwa mudolopo lya Jinotega ndakabona mantoolo obilo, yomwe yakalembedwe kuti Maleele aa Leza limwi lyakalembedwe kuti Bubuke.
Imugwagwa ooyu ulazinguluka alimwi ngwamalundu. Nindakali mukkuti, tiindakali kulundusya mootokala. Inzila njindakabelesya yakandipa kwiinda munsi aalwizi lwakali mukkuti munsi aamulundu mulamfwu. Nokuba kuti kwakali sikunku ndakabona zisamu zyakajisi maluba mabotu alimwi ansi aazisamu eezyi kwakali tusamu-samu tubotu.
Imugwagwa mpuwakali kunyonena, kwakali bbaasi lyakali kweendela akati kamugwagwa. Mucoolwe ndakafwambaana kulibona aboobo ndakalileya. Eeli bbaasi lyakali kuzwisya busi bunji alimwi lyakali kuyabutapaula mabwe mulyakali kwiinda. Okuno ku Nicaragua, imabbaasi alilembedwe mazyina ngobabapa aabo beenzya mabbaasi kweelana ambobeenzya mbuli aakuti: Sikuzunda, Kabanze, Nsato, naa Muvwimi.
Izuba nilyakasika acilungu-lungu ndakasika Mucibanda ca Pantasma. Mpundakainda kwakali ŋanda yamapulanga alimwi alubuwa kwakali pyaangidwe kabotu. Aŋanda eeyi kwakali mudaala wakakkede acuuno, imubwa wakalilede munsi aacisamu abasune bobilo bakalipopedwe kabaimvwi acikkoci. Mudolopo limwi lisyoonto ndakabona bana banji bakali kuzwa kucikolo. Nibakali kweenda munzila kabasamide mayunifomu asiya-siya, bakali kulibonya mbuli mayuwe aaboola kunkome.
Izuba lyakali kubala nindakatandila kusika ku Wiwili alimwi nindakaubona mulonga wa Coco ciindi cakutaanguna. Mulonga ooyu ulaampuwo kapati mudolopo eeli alimwi meenda alakunka lyoonse. Nindakayeeya mbondakalaililwa, ndakanyona kuya kululyo akwiinda nzila njeena iiyoosya iilampa makkilomita aasika ku 37 kuya ku Wamblán.
Inzila tiiyakali kabotu pe, ndakainda muzikomba, mumabwe amutulonga-longa tusika kulusele naa fwuka. Nindakali kuyabuleya zikomba kwakali kulunda kasuko kufwumbwa mpundainda. Kwakali kasuko kataambiki. Mucoolwe, ooyu mugwagwa wakandisisya nkundakali kuunka ku Wamblán, kudolopo lili mukkuti lijisi zisamu zinji.
Ibuzuba bwakatobela, ciboneka mbuli kuti bantu boonse bakabuka muma 4:30. Akaambo kakulila kwamizingini ndakabuka akutalika kweenda munzila. Mumulundu oonse kwakali kununkila buyo tunkwa tubakali kupanga muzitofwu zyamabwe.
Mumbali aanzila kwakali zyakuzekaula zitondezya paradaiso zyakazekaulwa amuntu ukkala kubusena oobu. Azintoolo kwakalilembedwe zitondezyo zyakuti kuli zyakunwa ziindene-indene. Zikwankwani zimwi zyakali kupa kuti bantu kabayeeya zisyomezyo zibakali kusyomezya baleli botatwe bakali kulela. Kunze aamaanda kwakali tumbuzi twakayakwa amasenke alimwi ansi twakali syinguludwe asamende.
Nindakali kubaanzya bantu ndakali kwaamba kuti “Adiós” kweelana ambobaazya ku Nicaragua. Bantu bakali kumweta-mweta alimwi bakali kukkomana kubandika andime. Twakali kwaambisya akaambo kakuti imahacci ambongolo zyakali kuyobeka nozyakali kwiinda-inda.
Muli Bwasanu mangolezya, bantu bakatalika kusika kumuswaangano wamazuba obilo. Bamwi bakeenda buya, bamwi bakaboola amahacci kaali bamwi bakaboola amootokala. Bana bamwi basankwa abasimbi bakasamide mpato, bakeenda maola asika kucisambomwi. Nokuba kuti kwakali tudandamiti mpubakali kuzabukila mulonga, bakacikonzya kwiinda alimwi mumaanzi kwakali bamusyundu pele bakaliyumya. Ibamwi ibakazwa kulamfwu bakeetelezya buyo cakulya cisyoonto—mupunga uujisi mafwuta aangulube. Ino ncinzi cipati ncibakaboolela boonse aba bantu?
Bakaboolela kuyumya lusyomo ndobajisi kujatikizya buumi bubotu bwakumbele, kupanduludwa ncilyaamba Bbaibbele akutembaula Leza.
Muswaangano nowakatalika Mumujibelo bantu bainda ku 300 bakaswaangana muŋanda yakajisi ciluli camasenke kabakkede amabbenci kaali bamwi bakali azyuuno. Bamatumbu bakali kusanina bana. Ingulube amizingini zyakali kulila amunzi wakali munsi-munsi.
Ibuzuba oobu kwakali kupya kapati. Nokuba boobo, bantu bakali kubikkila maano kumakani akuzyintu zyibakali kulayigwa. Bakali kubatobelezya baambi nobakali kubala Bbaibbele, bakali kwiimba nyimbo zyakajisi mitwe yamu Bbaibbele alimwi bakali kubatobelezya bakwesu nobakali kupaila.
Kumazuba twakotoka, ndakali kubasangana bana kusobana kalaambe. Twamana kusobana, ndakali kukkala ansi abana akutalika kulanga twaambo tubali kulemba. Ndakali kubatondezya inyenyezi amilalabungu mukkompyuta yangu. Ibana abazyali babo boonse bakakkomana.
Mukulaba kwaliso muswaangano wakamana, boonse bakatalika kupiluka mwabo-mwabo. Ndakanyamuka nibwakaca alimwi ndakalikkomene nkaambo ndakali kuyeeya buyo zyitwakaiya abeenzuma bapya mbindakajana. Ndililibambide kutobela ncibacita, kukkutila azyintu zindijisi akusyoma Leza.
[Zifwanikiso izili apeeji 23]
Mikwasyi minji yakeenda makilomita manji kutegwa bajanike kumuswaangano waku Wamblán