“Kalandigwasya Kwaamba Twaambo Tubanjila Mumoyo Bantu”
ICIINDI cimwi, mudolopo lya Porto Alegre kumusanza kwacisi ca Brazil, kwakali muswaangano wamasi uujatikizya makani aabukkale. Ibantu banji kuzwa kuzisi zili 135 bakajanika kumuswaangano ooyo. Aaziindi zyakulyookezya, ikakamu ka Bakamboni kuzwa kumbungano imwi yamu Porto Alegre bakasikila basimuswaangano banji kutegwa babaambile mulumbe wamu Bbaibbele wa Bwami. Ino bakali kwaambaula buti?
Elizabete imupainiya uluula kuti: “Twakabelesya kabbuku kakuti Good News for People of All Nations.” Wakayungizya kuti: “Bakajanika kumuswaangano banji tiibakalina buzuba bamvwa makani mabotu aa Bwami, nokuba boobo bakautambula camaanza obilo mulumbe wesu. Twakaambaula abantu bazwa ku Bolivia, China, France, India, Israel, alimwi a Nigeria. Kuli basimuswaangano bamwi, twakalijisi mabbuku aabandika Bbaibbele aamumwaambo wabo, aayo ngobakatambula calukkomano.”
Ku Mexico, Raúl imupainiya ulakabelesya awalo kabbuku aaka alimwi ulazwidilila. Cimwi ciindi, wakasikila mudaala umwi muna Arabia wamyaka yakuzyalwa iili 80 iwakafwidwa mukaintu caino-ino. Imudaala ooyo naakamana kubala peeji mukabbuku aali mulumbe wa Bwami muci Arabia, yakamweenda misozi akaambo kakukondwa. Nkaambo nzi? Cisyomezyo ca Leza cakuti lufwu talukooyoobako limbi icili ku Ciyubunuzyo 21:3, 4, cakamunjila kapati naakacibala mumulaka wakwe. Aciindi cimbi, Raúl naakali kucita bukambausi bwamukwiizya, wakaswaangana mwaalumi umwi wakali kwaambaula Chiportuguese. Imwaalumi ooyo awalo wakafwidwa mwanaakwe musankwa. Raúl wakamupa kabbuku kuti abale apeeji aalembedwe mulaka wa Chiportuguese. Naakamana kubala, mwaalumi ooyo wakatondezya kuti wakali kuyanda kuzumanana kwiiya Bbaibbele alimwi wakazumina kuba aciiyo ca Bbaibbele.
Raúl wali kukabelesya kabbuku kakuti Good News for People of All Nations ikukambaukila bantu baambaula Chiarmenia, Chinese, Chingisi, Chifrenchi, Chigerman, Chihindi, Chikorean, Chimixe, Chipersian, Chirussian, a Chizapotec. Waamba kuti: “Ndabona mbociyandika kapati ikubelesya kabbuku aaka mumulimo wangu. Kandigwasya kwaamba twaambo tubanjila mumoyo bantu nokuba kuti tandaambauli mwaambo wabo.”
Bantu banji mbobazumanana kweenda akuyookkala kumasi aambi, tulijisi zyoolwe zinji zyakuyaana abaabo ibaambaula mwaambo uumbi. Tuyoocikonzya kubandika ambabo mulumbe wa Bwami kwiinda mukubelesya kabbuku kakuti Good News for People of All Nations. Sena mweenda ankako lyoonse?
[Zifwanikiso izili apeeji 32]
Raúl akabbuku ikamugwasya kwaamba twaambo tubanjila mumoyo bantu