Nkaambo Nzi Zikwati Zinji Ncozimana?

“Ba Falisi bakaboola kulinguwe [Jesu] kabajisi muzeezo wakumusunka kabati: ‘Sena cilizumizyidwe kumwaalumi kuleka mukaintu wakwe aakaambo kali koonse?’”—Matayo 19:3.

BANTU bamwi bakali kupona muciindi ca Jesu bakali kubuzya naa cikwati tiicakeelede kumana. Jesu wakabaingula kuti: “Sena tiimwakabala kuti ooyo wakabalenga kuzwa kumatalikilo, wakalenga mwaalumi amukaintu alimwi wakati: ‘Akaambo kaceeci mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe’? Lino tabacili bobilo, pele baba mubili omwe. Aboobo eeco Leza ncaakaswaanganya kutabi muntu uucaandaanya.”a (Matayo 19:4-6) Masimpe, Leza wakali kuyanda kuti zikwati kazitamani.

Muzisi zinji mazubaano, zikwati zinji ‘zilaandaanizyigwa,’ akumana. Sena lulayo lwamu Bbaibbele kujatikizya cikwati talucibeleki mazubaano? Sena zikwati zilamana akaambo kakuti kuli cilubide mububambe oobu?

Amulange-lange cikozyanyo eeci: Banabukwetene bone baula myootokala ikozyanya. Banabukwetene bobilo balaubamba kabotu mootokala wabo akuweenzya kabotu-kabotu. Mootokala wabo taufwi pe. Aaba bamwi banabukwetene bobilo tabajisi ciindi cakuubamba mootokala wabo, alimwi tabaweenzyi kabotu. Mootokala wafwa mpoonya baleka aakubelesya. Ino mpali aali penzi kuli banabukwetene aaba babili—nkumootokala naa nkuuli bamukamwini? Masimpe, penzi lili kuli bamukamwini.

Mbubwenya buyo, kumana kwazikwati tacaambi kuti kuli cilubide kububambe oobu. Mamiliyoni aazikwati zyazwidilila apa bumboni kukaambo aaka. Zikwati zili boobu zileta lukkomano alimwi aluumuno kubantu, kumikwasyi akuli basimukobonyina. Pele cikwati, mbuli mootokala, ceelede kubambwa kabotu lyoonse kutegwa cikkale.

Nokuba kuti mwakkala buyo mazuba masyoonto naa myaka minji mucikwati canu, lulayo lwamu Bbaibbele ilutondezya mbomunga mwazumanana kubamba akuyumya cikwati canu lulabeleka ncobeni. Amubone zikozyanyo mumapeeji aatobela.

[Bupanduluzi buyungizidwe]