Basikubala Balabuzya . . .

Nkaambo nzi Leza Ncaakaambila Abrahamu Kuti Atuule Mwanaakwe?

▪ Mbubwenya mbokulembedwe mubbuku lyamu Bbaibbele lya Matalikilo, Jehova Leza wakaambila Abrahamu kuti aabe mwanaakwe musankwa Izaka kali cituuzyo. (Matalikilo 22:2) Basikubala Bbaibbele bamwi balaalilwa kwaamvwisya makani aaya. Syaazibwene wazyina lyakuti Carol wakaamba kuti: “Ciindi cakusaanguna nindakaamvwa makani aaya aamwana, ndakanyema kapati. Ino ngu Leza uuli buti ooyu waambila muntu kucita cintu cibi boobu?” Nokuba kuti muntu ulakonzya kulimvwa boobo, pele cilakonzya kutugwasya kuyeeya twaambo twamasimpe tobilo tutobela.

Kakusaanguna, amulange-lange Jehova ncaatakacita. Tanaakazumizya Abrahamu kutuula mwanaakwe, nokuba kuti wakalilibambilide kucita boobo, alimwi kuzwa leelyo kunyina Leza naakaambila uumbi muntu kucita boobo. Jehova uyanda kuti bakombi bakwe boonse kubikkilizya abana bazumanane kupona—kupona lyoonse alimwi akukkutila mubuumi.

Cabili, Bbaibbele lipa muzeezo wakuti Jehova wakajisi kaambo kaalubazu kakamupa kwaambila Abrahamu kuti atuule Izaka. Leza wakalizyi kuti myaka minji kumbele wakali kuyoozumizya Mwanaakwe,a Jesu, kutufwida. (Matayo 20:28) Jehova wakali kuyanda kututondezya cipaizyo eeci mbocakali kuyoomupa kuti asweekelwe kapati. Kwiinda mukwaambila Abrahamu kutuula mwanaakwe, wakatondezya cipaizyo ncaakali kuyoocita kumbele. Munzila nzi?

Amulange-lange majwi aa Jehova kuli Abrahamu aakuti: “Tola mwanaako simuzyalwaalike ngoyandisya, nkokuti Izaka . . . akumutuula mbuli cipaizyo” (Matalikilo 22:2) Amubone kuti Jehova wakaamba Izaka kuti mwana “ngoyandisya.” Jehova wakalizyi kuti Abrahamu wakali kumuyanda kapati Izaka. Alimwi Leza wakalizyi mbwaakali kulimvwa kujatikizya Mwanaakwe Jesu. Jehova wakali kumuyanda kapati Jesu cakuti ziindi zyobilo wakaamba kuzwa kujulu kuti, “Mwanaangu ngweyandisya.”—Maako 1:11; 9:7.

Alimwi amubone kuti kulomba kwa Jehova kuli Abrahamu kwakabikkilizya majwi aakuti “[akaka, NW].” Sikwiiya Bbaibbele umwi waamba kuti ciindi Leza naakabelesya bbala eeli wakali kutondezya kuti “MWAMI wakalizyi kusweekelwa Abrahamu nkwaakali kuyooba ankuko akaambo kakutuula mwanaakwe.” Mbubwenya mbotukonzya kweezeezya, kulomba ooku kwakali kunoomupa kutyompwa kapati Abrahamu; munzila iikozyenye, tulakonzya kweezeezya kucisa nkwaakamvwa Jehova ciindi naakali kulangilila Mwanaakwe kapenga akufwa. Cakutadooneka, ncecintu cakamucisa kapati Jehova alimwi kunyina nayoolimvwa boobu limbi pe.

Aboobo, nokuba kuti tulakonzya kuzyiba Jehova ncaakalomba Abrahamu kuti acite, ncamaano kuyeeya kuti Jehova kunyina naakazumizya sinsiku ooyu uusyomeka kuti atuule mwanaakwe. Tanaakazumizya Abrahamu kuti amvwe kucisa kupati muzyali nkwakonzya kumvwa; wakamukwabilila Izaka kulufwu. Pele, Jehova kunyina naakamukwabilila ‘Mwanaakwe mwini, pele wakamulekela kuti afwide ndiswe toonse.’ (Baloma 8:32) Nkaambo nzi Jehova ncaakazumizya kuti apenge boobu? Wakacita oobo kutegwa “tukonzye kuba abuumi.” (1 Johane 4:9) Eelo kaka eeci cituyeezya mbwatuyanda Leza! Eeci ceelede kutukulwaizya kumuyanda andiswe.b

[Bupanduluzi buyungizidwe]