Amwiiye Ncolyaamba Jwi Lya Leza
Nkaambo nzi Banakristo Ncobabbapatizyilwa?
Cibalo eeci cili amibuzyo imwi ambweni njomwakalibuzyide kale alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.
1. Ino lubbapatizyo lwa Bunakristo lwaamba nzi?
Lubbapatizyo ninzila yakulomba Leza kuti mube acilongwe cibotu anguwe. Aboobo, Munakristo tayelede kubbapatizyigwa ciindi nacili muvwanda, pele ciindi naasika aciimo ncakonzya kwiiya kujatikizya Leza akuba sikwiiya wa Jesu. (Milimo 8:12; 1 Petulo 3:21) Tuba sikwiiya wa Jesu ciindi notwiiya akucita zyintu nzyaakatulailila kucita.—Amubale Matayo 28:19, 20.
Ciindi nibakali kupona baapostolo ba Jesu, bantu banji bakabweza ntaamu yakwiiya kujatikizya Leza a Jesu kakwiina kuwayawaya. Mucikozyanyo, ciindi mwaalumi umwi naakazyiba kuti lufwu lwa Jesu lwakapa kuti cikonzyeke kuyoofwutuka, mpoonya-mpoonya wakaba sikwiiya. Mazuba aano, bantu banji babombe myoyo basala kuba batobeli ba Jesu.—Amubale Milimo 8:26-31, 35-38.
2. Nkaambo nzi Jesu ncaakabbapatizyilwa?
Jesu wakajisi myaka iili 30 ciindi naakabbapatizyigwa a Johane Mubbapatizi mu Mulonga wa Jordano. Kubbapatizyigwa kwa Jesu kwakali kwiiminina kusala kwakwe kwakucita kuyanda kwa Leza. (Bahebulayo 10:7) Eeci cakali kuyoobikkilizya kwaaba buumi bwakwe kuba cituuzyo cabantu basizibi. Neliba leelyo katanaboola anyika kuzwa kujulu, Jesu lyoonse wakali kubayanda akubamvwida Bausyi, nkokuti Jehova.—Amubale Maako 1:9-11; Johane 8:29; 17:5.
3. Nkaambo nzi Munakristo ncayelede kubbapatizyigwa?
Bukkale bwesu buliindene abwa Jesu mukuti swebo twakazyalwa katuli basizibi. Nokuba boobo, lufwu lwa Jesu lwacipaizyo lupa kuti cikonzyeke kulindiswe kuba acilongwe cibotu a Leza. (Baloma 5:10, 12; 12:1, 2) Cilakonzyeka kuti tubalilwe kulinguwe katuli bamumukwasyi wakwe. (2 Bakolinto 6:18) Ino tucijana buti coolwe eeci? Mumupailo wesu tolikke tulalyaaba kuli Jehova, kukonka kucita kuyanda kwakwe mubuumi bwesu boonse. Twamana kulyaaba, tulatondezya kulyaaba ooku kubuleya kwiinda mukubbapatizyigwa.—Amubale Matayo 16:24; 1 Petulo 4:2.
4. Mbuti mbomukonzya kulibambila kubbapatizyigwa?
Bakamboni ba Jehova balaiya Bbaibbele abantu bali boonse bayanda kuba acilongwe a Leza. Kwiiya Bbaibbele akujanika kumiswaangano ya Bunakristo kuyooyumya luyando alusyomo lwanu muli Leza. Alimwi kuyoomugwasya kuba abukkale alimwi aziyanza zibotu. Kuba aluyando, lusyomo alimwi abube bumwi bumukkomanisya Leza kuyoomugwasya kupona kweelana akukonka kwanu kwakubelekela Jehova mane kukabe kutamani.—Amubale Johane 17:3; Bahebulayo 10:24, 25.
Kutegwa muzyibe zinji, amubone cibalo 18 mubbuku eeli lya Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.