BASIKUBALA BALABUZYA . . .
Sena Jesu wakasyomezya sizibi kuti uyoopona buumi bwakujulu?
Mubuzyo ooyu ulabuzyigwa nkaambo Jesu wakasyomezya sizibi iwakajaigwa antoomwe anguwe kuti kumbele uyooba abuumi mu Paradaiso. Jesu wakati: “Ncobeni sunu ndikwaambila kuti, Uyooba andime mu Paladaiso.” (Luka 23:43) Amubone kuti Jesu taakwe naakaamba nkoyakali kuyoobeda Paradaiso eeyo. Aboobo, sena Jesu wakali kupandulula kuti sizibi uulya wakali kuyoomusangana kujulu?
Kusaanguna, atulange-lange naa sizibi uulya wakalisikide azyeelelo zyakupona buumi bwakujulu. Bantu ibajisi bulangizi bwakujulu bakabbapatizyigwa mumaanzi alimwi amuuya uusalala, aboobo, baba basikwiiya ba Jesu alimwi baba bana ba Leza. (Johane 3:3, 5) Ceelelo acimwi ncakuti balapona kweelana azyeelelo zya Leza zyakulilemeka alimwi balatondezya bube buli mbuli kusyomeka, alimwi aluzyalo. (1 Bakolinto 6:9-11) Kuyungizya waawo, beelede kuzumanana kusyomeka kuli Leza alimwi akuli Kristo kusikila kumamanino aabuumi bwabo bwaanyika. (Luka 22:28-30; 2 Timoteyo 2:12) Lilikke nobasika azyeelelo eezyo nobakonzya kweelela kubusyigwa akulanganya mulimo mupati uubalindila kujulu, wakubeleka kabali bapaizi alimwi akulela bantu kabali bami antoomwe a Kristo kwamyaka iili cuulu.—Ciyubunuzyo 20:6.
Mukwiimpana, sizibi iwakali kumbali aa Jesu wakali kupona buumi bwabugwebenga alimwi wakafwa kali cigwebenga. (Luka 23:32, 39-41) Masimpe, wakatondezya bulemu ciindi naakaambila Jesu kuti: “Ukandiyeeye waakunjila mu Bwami bwako.” (Luka 23:42) Nokuba boobo, taakaningaba sikwiiya wa Jesu uubbapatizyidwe, uunanikidwe amuuya, alimwi taakaninga kutondezya kuti wakaliluleme akusyomeka mubuumi naakacili kupona. Sena ciboneka kuti ncamaano kuti Jesu wakali kukonzya kumusyomezya bwami antoomwe abasikumutobela ibakatondezya kusyomeka?—Baloma 2:6, 7.
Mucikozyanyo: Ikuti muntu wamulomba kuti mumulekelele akaambo kakumubbida mali, mulakonzya kusala kumulekelela. Pele sena inga mwamusyoma kuti ayendelezye makwebo aanu naa kuti alanganye mukwasyi wanu? Mikuli eeyi inga mwaipa buyo bantu mbomusyoma kapati. Mbubwenya buyo, aabo bapegwa bulangizi bwabuumi kujulu beelede kusinizya kuti inga basyomwa kuti bayoozumanana kutobela zyeelelo zya Leza ziluleme ciindi baakulela bantu. (Ciyubunuzyo 2:10) Nokuba kuti kumamanino sizibi wakatondezya kweempwa kwini-kwini, kunyina cakali kukonzya kusinizya oobo.
Pele sena Jesu taakaambila sizibi kuti bayooba antoomwe kujulu buzuba mbubwenya oobo? Eeci tiicakali kukonzya kuba boobo, nkaambo Jesu lwakwe tanaakaunka kujulu buzuba oobo. Muciindi caboobo, wakali “mukati kanyika”—mucuumbwe—kwamazuba otatwe. (Matayo 12:40; Maako 10:34) Neliba leelyo naakabuka, wakakkala anyika kwamazuba aali 40 katanaunka kujulu. (Milimo 1:3, 9) Aboobo, sizibi tanaakali kukonzya kuba antoomwe a Jesu kujulu mubuzuba oobo.
Pele ino muuparadaiso iili sizibi mwaakali kuyoonjila? Aakubusyigwa, unooli muparadaiso yaanyika yalo Jesu njayakweendelezya. (Milimo 24:15; Ciyubunuzyo 21:3, 4) Kutegwa mwiiye zinji kujatikizya Paradaiso eeyo alimwi azyeelelo zya Leza, amubandike aumwi wa Bakamboni ba Jehova.