Nkaambo Nzi Leza Ncalekelede Balaanguzu Kudyaaminina Batajisi Nguzu?

Mu Bbaibbele kuli zibalo zyuusisya izyaamba bantu ibakajisi nguzu mbebakali kudyaaminina baabo batakajisi nguzu. Eeci cituyeezya cibalo caamba zya Naboti.a Mumwaanda wamyaka wakkumi B.C.E., mwami wa Israyeli, Ahabu, wakazumizya mukaintu wakwe Jezebeli kuti ajaye Naboti abana bakwe kutegwa mwami abweze muunda wamwaalumi ooyu. (1 Bami 21:1-16; 2 Bami 9:26) Nkaambo nzi Leza ncaakazumizya micito iili boobu yalunya?

Atubikkile maano kukaambo komwe kayandika: Leza takonzyi kubeja. (Tito 1:2) Ino kaambo aaka kaajatikizya buti makani aamicito mibyaabi yakudyaaminina bamwi? Kumatalikilo Leza wakabacenjezya bantu kuti kumuzangila cakali kuyooleta buyo lufwu. Mbubwenya mbwaakaamba Leza, lufwu nkoluli lyoonse kuzwa ciindi nibakazanga mumuunda wa Edeni. Muntu wakusaanguna kufwa, wakafwa kwiinda mukudyaamininwa naa kucitilwa lunya—ciindi Kaini naakajaya Abelo munyina.—Matalikilo 2:16, 17; 4:8.

Kuzwa ciindi eeco, Ijwi lya Leza lyaamba boobu kujatikizya bantu: ‘Muntu weendelezya muntunyina kukumubisizya.’ (Mukambausi 8:9) Sena majwi aaya ngamasimpe? Jehova wakabacenjezya bantu bakwe, bana Israyeli kuti bami babo bayoobadyaaminina, akupa bantu kukwiilila Leza. (1 Samuele 8:11-18) Naba Mwami Solomoni wakali kuciindizya kutezya bantu bakwe mitelo. (1 Bami 11:43; 12:3, 4) Bami babyaabi, mbuli Ahabu, bakali basilunya kwiinda. Amuciyeeyele buyo: Ikuti Leza naakailesya micito iili boobu yalunya, sena majwi aakwe naatakaba aakubeja?

Alimwi amuyeeye kuti Saatani waamba kuti bantu babelekela Leza akaambo kakuti bayanda kujana zintu zimwi. (Jobu 1:9, 10; 2:4) Ikuti Leza kabakwabilila babelesi bakwe kumicito yoonse yalunya, sena inga tiicapa bumboni bwakuti majwi aa Saatani ngamasimpe? Alimwi ikuti Leza kailesya micito eeyi kubantu boonse, sena inga taapegwa mulandu wakuti ulabeja? Kukwabililwa kuli boobu, inga kwapa banji kuyeeya kuti inga bazwidilila mukulyeendelezya kakunyina Leza. Pele Jwi lya Leza lyalo lyaamba kuti muntu takonzyi kulyeendelezya naaceya. (Jeremiya 10:23) Tuyanda kuti Bwami bwa Leza buboole; bulikke buyo mbobuyoomana kutalulama.

Sena eeci caamba kuti Leza kunyina ncacita kujatikizya penzi eeli? Peepe. Atubone zintu zyobilo nzyacita: Cakusaanguna, ulaiyubununa micito yalunya. Mucikozyanyo, Ijwi lyakwe lilayubununa zyoonse Jezebeli nzyaakacita kuli Naboti. Alimwi Bbaibbele litondezya kuti micito mibi iili boobu ilasumpulwa amuleli singuzu walo uutayandi kuzyibwa. (Johane 14:30; 2 Bakolinto 11:14) Bbaibbele lyaamba kuti muleli ooyu ngu Saatani Diabolosi. Kwiinda mukuyubununa bubi alimwi amicito yakudyaaminina bamwi kubikkilizya ayooyo uupa kuti kazicitika, Leza ulatugwasya kwiitantamuka micito yalunya. Kwiinda mukucita boobo, ulabukwabilila buumi bwesu bwakumbele.

Cabili, Leza ulatupa bulangizi bwakuti uyakwiimana micito iili boobu. Twalanga-langa mbwaakabayubununa, akubabeteka, alimwi akubasubula ba Ahabu a Jezebeli—alimwi abamwi bakali mbuli baaba—citupa lusyomo lwakuti bumwi buzuba uyoobasubula bantu bacita zibi. (Intembauzyo 52:1-5) Leza alimwi utupa bulangizi busyomeka bwakuti ino-ino uyoobugwisya bubi kuli baabo bamuyanda.b Naboti muntu iwakali kusyomeka antoomwe abana bakwe bayoopona munyika yaparadaiso yabululami kukabe kutamani.—Intembauzyo 37:34.