SENA MULIZYI?

Ino bakali kupona buti bazike muciindi cabana Roma?

Mu Bulelo Bwabana Roma, bantu banji bakaba bazike kwiinda mukuzundwa munkondo alimwi akujatwa. Aabo ibakali kujatwa bakali kusambalwa mubuzike alimwi kunyina nobakali kunga bajokela kumaanda aabo.

Bazike banji bakali kubelesyegwa calunya mumigoti yamabwe, kakuli babelesi bamumafaamu balo bakali kweendelezyegwa kabotu. Ikuti muzike waloboka mpoonya wajatwa akupilusyigwa kuli simalelaakwe, wakali kusinikizyigwa kusama ninga munsingo iilembedwe mabala naa iijisi kantu kalengelela ikatondezya bulumbu mbwaakali kuyoopegwa sikumujata. Aabo ibakali kuloboka-loboka bakali kugantwa ankumo ibbala lyakuti F, lyalo lyakali kutondezya kuti muntu ooyu muzangalisi.

Ibbuku lyamu Bbaibbele lya Filimoni lilapandulula mwaapostolo Paulo mbwaakajola muzike wakatijide Onesimo kuli simalelaakwe, Filimona. Nokuba kuti Filimona wakalijisi nguzu zyakumusubula Onesimo, Paulo wakalomba Filimona kuti ‘amutambule kabotu,’ akaambo kaluyando alimwi abulongwe.—Filimoni 10, 11, 15-18.

Ino nkaambo nzi munzi wa Fonike wansiku ncowakadumide kapati kujatikizya mubala wacisombo wakupentezya zisani?

Munzi wa Fonike, lino uuyeeyelwa kuti ncisi ca Lebanon camazuba aano, wakalizyibidwe akaambo kamubala wacisombo wakupentezya zisani, walo iwakaulikwa zina lyadolopo lya Turo. Mwami Solomoni wamu Israyeli yansiku wakabotya tempele lyakwe kwiinda mukubelesya ‘zisani zyamubala wacisombo’ iwakali kupangwa asyaazibwene waku Turo.​—2 Makani 2:​13, 14

Mubala wacisombo wakupentezya zisani waku Turo ngowakali kudula kapati kuciindi eeco, akaambo kakukomena kwamulimo wakali kuyandika kucitwa kutegwa upangwe. Cakusaanguna, bazubi banswi bakali kubwezelela nkumba-kumba zyamulwizi zinji,a mbwaanga kupanga mubala uukonzya kupenta cisani comwe kwakali kuyandika nkumba-kumba zili 12, 000. Kumane nkumba-kumba eezyi bakali kuzipapaula kutegwa bagwisye musinza muli mubala wakupentezya. Bamana kuugwisya musinza ooyu bakali kuusanganya amunyo akuubikka azuba kwamazuba otatwe. Mpoonya bakali kuubikka mutanka akutila meenda aamulwizi akuubizya kwamazuba aali mbwaabede.

Kwamyaanda yamyaka, kwiinda mumakwebo aabo alimwi azisi nzyobakali kweendelezya, bana Fonike bakazumanana kupanga alimwi akusambala mubala wakupentezya zisani wacisombo waku Turo. Zintu zyakaindi nzyobakali kubelesya kupanga mubala wakupentezya zisani wacisombo zyakajanika munsi-munsi aa Lwizi lwa Mediterranean mane kusikila kumbo aadolopo lya Cádiz, ku Spain.