MAKANI AAYEEME AMUTWE UULI ACIVWUMBYO | NKAAMBO NZI NCOTWEELEDE KUSYOMEKA?
Sena Kusyomeka Takucigwasyi?
Ba Hitoshi bakali kubeleka muofesi iilanganya maakkaunti mukkampani imwi yaku Japan iijanina bantu milimo. Ciindi nobakali kulanga-langa maakkaunti amupati wamulimo, mupati wamulimo wakaambila ba Hitoshi kuti bakeelede kulemba lipooti yakubeja. Ba Hitoshi bakapandulula kuti manjezeezya aabo taakonzyi kubazumizya kucita boobo. Akaambo kaceeci, bapati bamulimo bakakonga ba Hitoshi kuti balabatanda mulimo, mpoonya mukuya kwaciindi bakatandwa mulimo.
Mumyezi yakatobela, ba Hitoshi bakalibilika kapati kuti naa bakali kuyoojana mulimo uumbi. Mucikozyanyo, ciindi nobakali kubuzyigwa-buzyigwa kujatikizya mulimo, ba Hitoshi bakaamba kuti tabakonzyi kucita cintu cakutasyomeka amulimo. Basikubabuzya-buzya bakaamba kuti, “Tandinamvwide muntu uuyeeya boobo!” Bamukwasyi waba Hitoshi alimwi abalongwe bakabakulwaizya kuti bazumanane amakanze aabo aakusyomeka, pele balo bakatalikide kudooneka. Mucikozyanyo, ba Hitoshi bakaamba kuti, “Ndakali kulibilika kuti naa kusyomeka kwangu kwakaliluzi.”
Icakacitikila ba Hitoshi cituyeezya kuti tabali bantu boonse bakubikkila maano kusyomeka. Alimwi buya, bamwi balakonzya kukubona kuti takuyandiki, ikapati mumakani aamakwebo. Mukaintu umwi uubeleka ku South Africa, wakaamba kuti, “Ndizingulukidwe aabantu batasyomeki, alimwi zimwi ziindi cilakatazya kusyomeka.”
Nzila imwi yakutasyomeka iidumide kapati mazuba aano, nkubeja. Myaka iili mbwiibede yainda, buvwuntauzi ibwakacitwa abasyaazibwene baku University of Massachusetts Amherst, bazina lya Robert S. Feldman, bwakatondezya kuti 60 pesenti yabantu bapati balabeja nociba ciindi comwe buyo mumubandi wamaminiti aali kkumi. Ba Feldman bakaamba kuti, “Oobu bwakali buvwuntauzi bugambya kapati. Tiitwakali kuyeeyela kuti kubeja inga kakuvwulide boobu.” Cilagambya kubona kuti bantu banji balanyema kuti muntu wabacenga, nokuba boobo bantu babeja mbanji kapati.
Nkaambo nzi kubeja, kubba, alimwi anzila zimwi zyakutasyomeka ncozivwulide boobu mazuba aano? Ino mbuti kutasyomeka mbokubajatikizya banamaleya? Kuyungizya waawo, mbuti mbotukonzya kutantamuka micito yakutasyomeka iili boobu?