Sena Kuli Bangelo Babi?

Inzya, bangelo babi nkobali. Ino bakazwa kuli? Kamuyeeyede kuti Leza wakabalenga bangelo kabajisi nguzu zyakulisalila. Leza mbwaakamanina buyo kulenga mwaalumi amukaintu wakusaanguna Adamu a Eva, cilenge camuuya cimwi tiicakalubelesya kabotu lwaanguluko lwakulisalila alimwi cakaleta buzangi anyika. Cakazwidilila mukupa kuti ba Adamu a Eva bazangile Leza. (Matalikilo 3:1-7; Ciyubunuzyo 12:9) Ibbaibbele talicaambi izina eeci cilenge camuuya naa mulimo ngocakali kubeleka kujulu kacitanazanga. Pele mbucakazangila buyo, Bbaibbele liciita kuti Saatani, icaamba “Sikukazya,” alimwi akuti Diabolosi icaamba “Sikubejelezya.”—Matayo 4:8-11.

Cuusisya ncakuti, kuzangila Leza ooku tiikwakagolela waawo pe. Mumazuba aa Nowa, bangelo ibatazyibidwe mweelwe “bakasiya busena bwabo bwakukkala bubeelede” mumukwasyi wa Leza wakujulu. Bakaboola anyika akusama mibili yanyama kutegwa bacite milimo mibyaabi yakoonana, aboobo eeci cakapa kuti basiye milimo njobakalengelwa kucita kujulu.—Juda 6; Matalikilo 6:1-4; 1 Petro 3:19, 20.

Ino ncinzi cakatobela kubangelo aaba babi? Ciindi Leza naakaleta zambangulwe kutegwa asalazye nyika, bangelo aaba bakaisiya mibili yabo yanyama akupiluka kujulu. Nokuba boobo, Leza tanaakabazumizya bangelo bazangi kupiluka “mubusena bwabo bwakusaanguna.” Muciindi caboobo, wakabaanga akubabikka mubusena busampukide ‘bwamudima [wakumuuya] uusiya mbi’ bwiitwa kuti Tatarasi. (Juda 6; 2 Petro 2:4) Madaimona aaya akazumina kweendelezyegwa a Saatani Diabolosi, “imweendelezi wamadaimona,” walo ‘lyoonse uulicengeezya kuba mbuli mungelo wamumuni.’—Matayo 12:24; 2 Bakorinto 11:14.

Ibbaibbele liyiisya kuti Bwami bwa Leza bwabu Mesiya, imfwulumende yakujulu, yakatalika kulela mu 1914.a Nocakacitika eeco, Saatani amadaimona aakwe bakatandwa kuzwa kujulu akusowelwa anyika. Kuvwula kwabubi alimwi akutalilemeka ikudumide anyika, ncitondezyo buyo icitondezya mbobanyemede ambokuli kubi kuyunga kwabo.—Ciyubunuzyo 12:9-12.

Kuyungizya waawo, kwiindila kwabubi alimwi azintu zimwi zigambya zicitika mazuba aano, zitondezya kuti mamanino aakuyunga kwabo aali afwaafwi. Ino-ino, zilenge eezyi zyamuuya zibyaabi ziyoonyonyoonwa. Kumamanino aabulelo bwamyaka iili 1,000 mu Bwami bwa Leza, bangelo babi aaba bayakwaangununwa kwakaindi kaniini kutegwa bakasunke bantu alimwi. Mpoonya bayakunyonyoonwa kukabe kutamani.—Matayo 25:41; Ciyubunuzyo 20:1-3, 7-10.