Sena Mulizyi?

Ino mulilo wakali kubwezyegwa buti kaindi?

CIBALO camu Bbaibbele cijanika ku Matalikilo 22:6 caamba kuti, kutegwa alibambile kuyoopa cituuzyo kubusena bwakulamfwu, Abrahamu “wakabweza nkuni zyacituuzyo cuumpwa akupa Izaka mwanaakwe kuti anyamune. Mpoonya walo wakabweza mulilo acipeni, eelyo boonse bobilo bakaunka antoomwe.”

Kunyina aambidwe muma Magwalo kujatikizya nzila yakali kubelesyegwa kukunka mulilo kaindi. Kujatikizya kaambo kabandikwa aawa, sikuluula makani umwi usyoma kuti tacilangilwi kuti mulilo “wakali kukonzya kuzumanana kauyaka mulweendo lulamfwu loonse oolo” ndwaakeenda Abrahamu a Izaka. Aboobo, kweelede kuti icaambwa mukapango aaka zintu izyakali kuyandika kutegwa bakunke mulilo.

Nokuba boobo, bamwi baamba kuti tiicakali cintu cuuba-uba kukunka mulilo mumazuba aakaindi. Bantu cakali kunoobaubila ikubweza makala amulilo kuli basimukobonyina kwiinda kusola kukunka mulilo lwabo beni. Aboobo, basyaazibwene banji basyoma kuti Abrahamu wakanyamwide nongo—ambweni mupika wakajisi cakunyamwida mbuli cceni—iwakajisi makala aayaka naa makala aakabwezyedwe kumulilo wakali kuyaka masiku aakaindide. (Is. 30:14) Makala amulilo aakali kubwezyegwa munzila eeyi, akali kukonzya kubelesyegwa kukunka mulilo atukuni tusyoonto-syoonto aciindi cili coonse mulweendo.