Ino Kuzyiba Leza Inga Kwamugwasya Buti?

Kusikila kukaambo aaka, twabandika twaambo twiindene-indene kutegwa tujane bwiinguzi kumubuzyo wakuti, Ino Leza Nguni? Twabona kwiinda mu Bbaibbele kuti zina lyakwe ngu Jehova alimwi akuti bube bwakwe bupati kapati nduyando. Alimwi twalanga-langa zintu nzyaakacita kale alimwi anzyayoocita kumbele kutegwa bantu boonse bakajane mpindu. Nokuba kuti nzinji nzyomweelede kwiiya kujatikizya Leza, ambweni mulakonzya kulibuzya naa inga mwagwasyigwa buti kwiinda mukucita boobo.

Jehova usyomezya kuti ‘ikuti mwamuyandaula, uyoomulekela kuti mumujane.’ (1 Makani 28:9) Amuciyeeyele buyo cipego cilibedelede ncomukonzya kuba ancico mbomuyaabumuzyiba Leza, nkokuti kuba ‘acilongwe cini-cini a Jehova’! (Intembauzyo 25:14) Ino kuba acilongwe cili boobu inga kwamugwasya buti?

Lukkomano lwini-lwini. Jehova waambwa kuti ngu “Leza uukkomene.” (1 Timoteyo 1:11) Ikuba acilongwe anguwe alimwi akwiiya nzila zyakwe ciletela lukkomano lwini-lwini, lwalo lukonzya kumugwasya kuba amizeezo iili kabotu alimwi akuba abuumi buli kabotu. (Intembauzyo 33:12) Alimwi mulakonzya kuba abuumi bukkomanisya kwiinda mukweeleba zintu zitali kabotu, mpoonya akuba azilengwa zili kabotu alimwi akuzumanana kuba mulongwe uuli kabotu kuli bamwi. Muyakwaazumina majwi aasintembauzyo walo iwakaamba kuti: “Cilandibotela kuswena kuli Leza.”—Intembauzyo 73:28.

Kumubikkila maano. Jehova wakasyomezya babelesi bakwe kuti: “Ndiyookulaya kandikulangide.” (Intembauzyo 32:8) Eeci caamba kuti Jehova ulababikkila maano babelesi bakwe umwi aumwi kumugama alimwi akumupa nzyayandika. (Intembauzyo 139:1, 2) Ikuti mwaba acilongwe cibotu a Jehova, lyoonse unoomubikkila maano.

Buumi bubotu bwakumbele. Kunze aakumugwasya kuba abuumi bwalukkomano alimwi abwakukkutila lino, Jehova Leza wapa kuti cikonzyeke kuyoojana buumi bubotu kumbele. (Isaya 48:17, 18) Bbaibbele lyaamba kuti: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.” (Johane 17:3) Muziindi eezyi zikatazya, bulangizi mbwatupa Leza inga bwaba mbuli ngobyo yalo iipa kuti tuzumanane ‘katusinizyede alimwi katuli bayumu nta’.—Bahebrayo 6:19.

Ootu ntumwi twatwaambo ituyandika kapati tweelede kumupa kumuzyiba bwini mbwabede Leza alimwi akuba acilongwe anguwe. Mulakonzya kubandika a Kamboni wa Jehova uuli woonse naa kuswaya webbusaiti ya jw.org kutegwa mujane twaambo tunji tukonzya kumugwasya.