Kabbokesi Kamubuzyo

◼ Mbokunga tuyanda kwaabelesya kabotu-kabotu mabbukweesu, ino nkucinca kuli buti nkotunga twacita notumwaya mabbuku mubukambausi bwamumugwagwa?

Notuli mubukambausi bwamumugwagwa, cili kabotu kubasikila bantu amamagazini naa mabbuku katwaajisi mumaanza. Imakanze ngotweelede kubaangawo ngakusola kubandikaa bantu. Munzila eyo tulakonzya kubona naa muntu ngotwasikila uliyandide alimwi naa inga wazumina kwaabala mamagazini eesu. Ikuti kacikonzyeka kubandika mubufwaafwi kujatikizya cimwi cazibalo mumagazini, cilakonzya kuba kabotu. Alimwi inga cakonzyeka kupandulula kuti mulimo wesu ulacitwaa basikulisungula, aboobo taali makwebo pe, pele mmulimo uuli mukucitwa nyika yoonse kwiinda mulugwasyo lwazyakusanga zyakulisungula. Zimwi ziindi, sikumwaya ulakonzya kweenda antoomwe amuntu kumwi kababandika kujatikizya zibalo zili mumagazini alimwi ampindu zijanika mulinjiyo.

Nokuba boobo, tweelede kubelesya bupampu alimwi akubalanganya munzila yeelede. Ibunji bwabaabo mbotujana mumugwagwa balakonzya kababindide cakuti cilakonzya kuba cintu ciyumu kulindiswe ikubona kuti naa balaaluyandisisyo. Ikuti kakuli boobu, cilakonzya kuba kabotu kubapa buyo tulakiti kutegwa babe aluyandisisyo kumabbukweesu aambi baakutujana mulweendo luboola akuti bakakonzye kwiima kutegwa tubandike.

Kwiinda mukutalovwa-lovwa mubukambausi bwamumugwagwa mumasenaamwi alimwi akubamba ciindi, ibantu bayootuzyiba alimwi akubotelwa kubandika twaambo bajana ciindi, eeco calo ciyoopa kuti tujana ciindi cinji cakubona luyandisisyo lwabo.

Tuyanda kuti mabbukweesu twaabelesye kabotu. Aboobo tweelede kusoleka kusala ciindi ceelede cakumwaya mabbuku. Ikucita boobo kuyootugwasya kulibambila kutobezya bayandisisya alimwi akubaa ciindi cakupandulula mulimo wesu mbuubede.