Amweende Mulusyomo
1 Mumaumi abo bantu basika mumamiliyoni bageme lwalo lubono, mukulubizya basyoma buvwubi bwalo boongelezya. (Mt. 13:22) Balasubuka loko ciindi lubono lwabo nolusweeka, nolubbigwa nokuba kukakilwa kugwasya. Tulakulwaizigwa kuti tutobele nzila yabusongo, yakutandila lubono lwakumuuya. (Mt. 6:19, 20) Eeci caamba kuti kube “kulusyomo nkutweenda.”—2 Kor. 5:7.
2 Ibbala lya “lusyomo” lisandulwidwe kuzwa mubbala lya Cigiliki lyalo lipa muzeezo wakusyoma, kuliiba naa kulikwaya mumuzeezo umwi. Kweenda mulusyomo caamba kuswaana buyumuyumu calusyomo muli Leza, ikusyoma kuti ulakonzya kutusolweda ntaamu zyesu alimwi akulisungula kulanganya nzyetuyandika. Jesu wakapa cikozyanyo cibotu; wakazumanana kulangisya zeezyo zyakali zintu zipati-pati ncobeni. (Heb. 12:2) Ncimwi buyo aswebo tweelede kuzumanana kubikka myoyo yesu kuzintu zitalibonyi, izyakumuuya. (2 Kor. 4:18) Lyoonse tweelede kuyeeya kuti buumi bwesu bwaino tabusyomeki pe alimwi akuzumina kuti mpotuyeeme cakumaninina mpaali Jehova.
3 Alimwi tweelede katuliibide cakumaninina mumuzeezo wakuti Jehova nguutusolweda kwiinda mumbunga yakwe iilibonya mubusolozi bwa “muzike musyomesi uucenjede.” (Mt. 24:45-47) Tulatondezya lusyomo lwesu ciindi “[not]ubaswiililisya baalu” mumbungano. (Heb. 13:17) Kulibombya mukubelekelaamwi abubambe bwateokrasi kutondezya lusyomo lwesu muli Jehova. (1 Pet. 5:6) Amoyo woonse, tweelede kusungwaala kugwasyilizya mulimo imbunga ngoitumidwe kucita. Eeci ciyootuyanzanya abakwesu muluyando lupati alukamantano.—1 Kor. 1:10.
4 Mbolunga Lwayumizigwa Lusyomo: Tatweelede kuzumizya lusyomo lwesu kwiima antoomwe. Tweelede kusoleka canguzu kuluyungizya. Kwiiya, kupaila, alimwi akujanika kumiswaangano lyoonse kuyootugwasya kuyumya lusyomo lwesu, kutegwa mulugwasyo lwa Jehova, tukakonzye masunko aali oonse. (Ef. 6:16) Sena mutalikide kale ciyanza cakubala Bbaibbele buzubaa buzuba alimwi akulibambila miswaangano? Sena kanjikanji inga mulazinzibala kuyeeya nzyomwiiya, alimwi sena mulapaila kuli Jehova? Sena ncilengwa cenu icakujanika kumiswaangano akutola lubazu mulinjiyo nomujana ciindi?—Heb. 10:23-25.
5 Lusyomo luyumu lulasinizigwa amilimo mibotu. (Jak. 2:26) Imwi nzila yiinda kukutondezya lusyomo lwesu nkwaambilizya bulangizi bwesu kubantu bambi. Sena mulasola kujana ciindi cakumwaya makani mabotu? Sena bukkale bwanu bulakonzya kubambululwa kutegwa mukonzye kuyungizya lubazu ndomutola mumulimo? Sena mulabelesya nzila zikulwaizigwa izyakusumpula bubotu alimwi alugwasyo luzwa mumulimo wesu? Sena mulalibikkila makanze aakumuuya akufwundumana kuti mwaakonzye?
6 Jesu wakatucenjezya kumakani aakwiindilizya kutola lubazu muzintu zyabuumi bwabuzubaa buzuba akulekela muuya walubono akuliyanda kuti utusite mukubona kwesu kwakumuuya. (Lk. 21:34-36) Tweelede kucenjela mbutweenda kutegwa tukasye lusyomo lwesu kuloba. (Ef. 5:15; 1 Tim. 1:19) Toonse tusyoma kuti limwi tuyookonzya kwaambilizya kuti ‘twakalwana inkondo imbotu, twakalumana lweendo, alimwi twakalubamba lusyomo’—2 Tim. 4:7.