Imamagazini Amabbuku Mbwayelede Kulangwa Mumbungano
1 Izintu zili mbuli ma Bbaibbele, mabbuku, itubbuku, mamagazini alimwi amatrakiti tulazijana kwiinda mumbungano. Kanjikanji iba Sosaiti balazitumina zintu ezi kumbungano mucikwelete, mpoona ezi zintu zilabwezegwa abasikumwaya abapainiya balo ibatizimwaye kubantu batondezya luyandisisyo kukasimpe.
2 Lino kuli buvwuntauzi ibuli mukucitwa abalangizi beendeenda kujatikizya maakkaunti aambungano. Milumbe njotwatambula kale itondezya kuti mbungano zimwi zili mukubeleka canguzu kululamika maakkaunti aazyo, elyo eezyo mbungano zyeelede kulumbaizigwa. Alimwi tusyoma kuti mbwaanga yakawa kabotu mvwula mwaka uno, imbungano zilasola kuuzya butebuzi bwazyo kutegwa zibbadele zikwelete zyazyo. Izintu zipati zipa kuti mbungano zinji zibe aamaakkauti aatali kabotu nzyakuti: “Basikumwaya bakweleta mabbuku”; “Izintu zitola busena tazilembwi munzila isumbula”; alimwi “Imaakkaunti taalingulwi pe.”
3 Akaambo kaceeci, tulakonzya twabuzya kuti: Sena cililuzi kuzumizya basikumwaya KUKWELETA mamagazini amabbuku? Mbuti bakwesu ibapedwe mulimo wakulanga zintu ezi mbobeelede kuzyeendelezya? alimwi sena bapainiya beelede kubweza mabbuku aabanamukwasyi amuulo wabupainiya?
4 Kusaanguna, nguni uulaa mabbuku aaya? Cakutadooneka, aya mabbuku nga Sosaiti alimwi kweelana amulawo wakabikkwa aba Sosaiti nobakaambilizya kuti, “Kucinyina Kukweletesya Mabbuku,” mu Mulimo Wesu Wabwami iwa mu Chichewa iwa April 1994, taakwe weelede kuzumizigwa kukweleta mabbuku. Oyu mulawo uleelede kutobelwa akwalo kumamagazini akuli zyakulembya. Tazikweletwi pe. Aboobo kuti mwaalu naa mukutausi uulanga zyamabbuku wakweletesya mabbuku naa wazumizya umwi kukweleta, sena eco inga categwa ncikwelete naa nkubba? Ooko nkubba, nkaambo taakwe mwaalu naba mukutausi uujisi mulawo wakukweletesya mabbuku. Ooko inga kwaba kunyansya malailile aa Sosaiti. (Amubone Ngazi Yamulindizi yamu Chichewa ya April 15, 1994, amapeeji 19-21, mutwe wakuti “Sena Nkubba Ncobeni.”) Nokuba boobo oyu mulawo nowatakaninga bikkwa, kuli bamwi basikumwaya ibakakweleta mabbuku ibatana kwaabbadelela. Ikuti naa nkobali ncobeni, beelede kufwambaana kubbadela cikwelete cabo kumbungano kuti kakukonzeka.—Intembauzyo 37:21
5 Ibakutausi ibalanga mabbuku amamagazini bacita mulimo mubotu. Aabo balaa mulimo oyu balaa coolwe cipati, elyo beelede kubikkila maanu cini-cini. Ibakwesu bapedwe mulimo oyu beelede kabaazi kabotu malailile aali mu Watch Tower Publications List (Instructions) alimwi a S-AB-27 (Instructions for Congregation Accounting), kutegwa kakuli buyo mweelwe wamabbuku wansaizi iikonzya kumanwa. Imabbuku aayandika ambungano ayelede kuzibilwa limwi, elyo kweelede kwaambilizya kumbungano ciindi nomukanza kooda mabbuku.
6 Ibapainiya abalangizi beendeenda balabweza mamagazini amabbuku aakumwaya amuulo waalubazu. Eeci cibagwasya kubaa mali aakuligwasya mumulimo wabo. Ibapainiya abalangizi beendeenda tabazumizigwi kuulila basikumwaya bamwi, banamukwasyi nobaba beenzinyina mabbuku amyuulo eyi yaalubazu. Ooko inga kwaba kutyola mulawo alimwi ncimwi buyo akubbida Sosaiti. Basikumwaya beelede kubweza mabbuku abo kumbungano amuulo wabasikumwaya. Ibanamukwasyi abasazinyina bapainiya aabo batali bapainiya balo, beelede kubweza mabbuku abo amuulo wabasikumwaya. Ikuti painiya naba mulangizi weendeenda wapa mabbuku kuli sikumwaya, weelede kumupa amuulo wabasikumwaya, pele mali aaindilila weelede kwaatola kumubelesi uulanga zyamaakkaunti walo uuti atume ku Sosaiti.
7 Aabo bapedwe mukuli wakulanga mabbuku aatuminwa mbungano kubikkilizya andiswe toonse notujisi lubazu lwakwaamwaya, tweelede lyoonse katusyomeka munzila njotubelesya “lubono lwakutalulama.”—Luka 16:9-13.